Read Rampi Suro 4 Bible Online

Suro 4 - Rampi bible

Suro 4

¹Kolentuꞌara tene hi Peturuꞌ hante hi Yohanes mampoturuꞌ toaꞌ i Tambina Pueꞌ Ala, hupaꞌmohi haꞌumbora duo tadulako mpenomba hante toSaduki hei tadulakora topampodaꞌ Tambina Pueꞌ Ala mampohidupaꞌkihi.

²Katoꞌo bukotahi pe hi Peturuꞌ hante pe hi Yohanes, alaꞌ iohi mampekarebaikihi pe toaꞌ to woriꞌ noniuꞌ i kotuwuꞌna huliꞌ hi Yesu ka komahia. Hei pepoturuꞌra tiꞌo, mampokonontokihi woꞌo kotuwuꞌna huliꞌ to mahi.

³Iomo horiana suro to roduo tiꞌo nipangkuhi hante ropopekahi i lali petarungkuꞌa. Alaꞌ tempo tiꞌo winimo, io hina nitahahi itoꞌo wute mehoꞌolu.[9]

⁴Angkana toaꞌ-toaꞌ to mampehoromua pepoturuꞌra suro to meroduo tiꞌohi i Tambina Pueꞌ Ala, woriꞌ to mepoꞌohi pe hi Yesu, horiana terononihi koworiꞌre mewali 5.000 duo tomaꞌani.

⁵Kopoꞌonina tadulakora toYahudi hei tomotodira toYahudi hante guru-guru agama morampuhi i Yerusale.

⁶Uwaꞌhi woꞌo i pogomboa tiꞌo, Tadulako Mpenomba Ngkodeꞌ konaꞌna hi Hanas hante tinona iomo hi Kaipa, hi Yohanes, hi Alesande hante tinona to ntaniꞌna.

⁷Hirampuhi lekiꞌ-lekiꞌra, honiꞌi rorumbaꞌmo toaꞌ moroa hi Peturuꞌ hante hi Yohanes rokomi pe hinarora. I kohupaꞌra, haduo ka lumbura tadulako tiꞌo meꞌitanomo pe hi Peturuꞌ hante pe hi Yohanes, notiꞌi, “Hohumbo hinaꞌ nibiaꞌ mampokoꞌoriꞌ tokohu tiꞌo? Ka imbo rohomi, hei hihimo to mampaꞌanikei kuasaꞌ mowali tiꞌo?”

⁸Mololitamo hi Peturuꞌ hante kuasaꞌna Inohaꞌ Mangkolehi, notiꞌi, “Tua-tua tadulako toaꞌ to woriꞌ hei tadulako agama!

⁹Niparesaꞌka i ando hieꞌe alaꞌ pampokoꞌoriꞌki tokohu tiꞌo, hei ikodokoꞌikei woꞌo pobahaꞌ hohumbo komoꞌoriꞌne.

¹⁰Kitiꞌikikei hante pe lekiꞌ-lekiꞌna halalinta toSareili, toaꞌ hieꞌe moꞌoriꞌmo hei nobiaꞌ metotiꞌi iseꞌe alaꞌ kuasaꞌna hi Yesu Kerisitu toNasareꞌ. Hi Yesu tiꞌo to ipakukei i loti momehulepe, angkana nopotuwuꞌ huliꞌ Pueꞌ Ala.

¹¹Iomo to notungkai i lolitane Suraꞌ Mangkolehi to mantiꞌi waheꞌe: ‘Uwaꞌ haꞌanu watu to notube topoꞌaro tambi, hantaro watu tiꞌomola to mewali pahurahane tambi.’ ” [10]

¹²Katoꞌo notiꞌi womo hi Peturuꞌ, “Hawaꞌi uwaꞌ lala ntaniꞌna to mepaꞌani kotuwuꞌ to wolaꞌ, bateꞌnalu moliu ka hi Yesu. Alaꞌ i humanele duniaꞌ hieꞌe, hawaꞌi uwaꞌ toaꞌ ntaniꞌna, bateꞌnalu hi Yesu to norumbaꞌmo Pueꞌ Ala, hante Iolu to pobiaꞌ mamposalamiꞌki ka pehuku dosanta.”

¹³Hokomohi mpuꞌu tadulako tiꞌo pahori komapandera hi Peturuꞌ hante hi Yohanes mololita, alaꞌ hawaꞌhi motehuꞌ, hapo tene alaꞌ hi Peturuꞌ hante hi Yohanes toaꞌ biasalu to hawaꞌi mosikolaꞌ. Katoꞌo robahaꞌ tadulako tiꞌohi koꞌiora topeguruna hi Yesu hampiha.

¹⁴Angkana tadulako tiꞌo hawaꞌi podehoꞌ mehoniꞌ, alaꞌ tokohu to nopokoꞌoriꞌ tiꞌo uwaꞌ woꞌo itoꞌo, metotiꞌi i hirira hi Peturuꞌ hante hi Yohanes.

¹⁵Io hinaꞌ nipopesuwumohi surone Pueꞌ Yesu tiꞌo ka koniparesaꞌara, honiꞌhi mogombo,

¹⁶rotiꞌi, “Hapo to hingkiꞌ towali pe toaꞌ to roduo tiꞌo? Alaꞌ lekiꞌ-lekiꞌna toaꞌ i Yerusale pobahaꞌ koꞌiora to mowali tandaꞌ kuasaꞌ to mekohohokoi tiꞌo. Hawaꞌi woꞌo wadi tosapuaka.

¹⁷Angkana, hintoromoꞌi humalekiꞌna toaꞌ pahori, agina topototehuꞌhi hante toꞌopihi hingkeꞌna inioꞌhi mololita pe hihimolu noniuꞌ i hi Yesu.”

¹⁸Uko tiꞌo, niwowoimohi hi Peturuꞌ hante hi Yohanes rotiꞌi, “Inioꞌkei mepoturuꞌ ba mantiꞌi konaꞌna hi Yesu.”

¹⁹Mehoniꞌ hi Peturuꞌ hante hi Yohanes, rotiꞌi, “Ipekirikei hadoduomi umbona to nolei Pueꞌ Ala, motuntunika hawaꞌmi ba motuntunika hawaꞌna Pueꞌ Ala?

²⁰Alaꞌ hamboaꞌmoka mokobokia mampololita hapo to kiꞌokiꞌ hei to kihorimo.”

²¹Katoꞌo makajamo kobukotare tadulako tiꞌo, honiꞌi mampototehuꞌhi hi Peturuꞌ hante hi Yohanes. Koꞌukoana nipolohoꞌmohi, alaꞌ hawaꞌi uwaꞌ kototuꞌuane hingkiꞌ mohukuhi, hei alaꞌ motehuꞌhi pe toaꞌ woriꞌ to mampokodeꞌ Pueꞌ Ala, alaꞌ tandaꞌ kuasaꞌ to rowali hi Peturuꞌ hante hi Yohanes.

²²Toaꞌ tiꞌo moꞌoriꞌ hante tandaꞌ kuasaꞌ to mepolomenia. Tinuwuꞌna tokohu tiꞌo lobimo iba mpuluꞌ ntoꞌana.

²³Konipolohoꞌralu, hi Peturuꞌ hante hi Yohanes noloumohi mampohidupaꞌki awara, hei mampololitahi hapo to nitiꞌikihi tutuꞌ-tutuꞌ tadulako mpenomba hei tomotodira toYahudi.

²⁴Korohorina awara lolitare tiꞌo, mekokaemohi moꞌawa-awa pe Pueꞌ Ala, rotiꞌi, “Pueꞌ, Ingkomo to mowali laniꞌ hante woiꞌ hei tahiꞌ hante lekiꞌna ohina.

²⁵Moliu Inohaꞌ Mangkolehi Ingko to kahampiha mantiꞌi pe hi Daudi hawiꞌMu, tododulungki tiꞌo, honiꞌi io mololita, notiꞌi, ‘Mahamporeꞌi hinaꞌ bukota toaꞌ to handoꞌio toYahudi? Mahamporeꞌi hinaꞌ toaꞌ to woriꞌ mowali tungkaiha to hawaꞌi modumbuꞌ?

²⁶Datu-datu i duniaꞌ mampatimomohi hingkiꞌ moponiꞌ. Hatoꞌo woꞌo lekiꞌ-lekiꞌna topohawaꞌ, hintuwuꞌhi hingkiꞌ moꞌewa Pueꞌ Ala hante Datu Topohompoꞌ to Noꞌuwiꞌ.’ [11]

²⁷O Pueꞌ, tebuhoꞌimo mpuꞌu lolitane hi Daudi tiꞌo. Alaꞌ hampiha i lali kota hieꞌe, Datu Herode hante Pontius Pilatu hintuwuꞌhi moꞌawa-awa hante toaꞌ to woriꞌ, toSareili hei toaꞌ to handoꞌiohi toSareili. Pohintuwuꞌra tiꞌo, mangkodokoꞌi moꞌewa hi Yesu, hawiꞌMu to Mangkolehi to Iꞌuwiꞌ mewali Datu Topohompoꞌ.

²⁸Mobutusihi hingkeꞌna morokoꞌhi hi Yesu. Angkana to niwali tiꞌo mobuhoꞌi hapo to Ipokonontomo umbiꞌ, alana lekiꞌ-lekiꞌna mewali motuntuni kuasaꞌMu hante peleihaMu.

²⁹Pueꞌ, hinewowoꞌena Ihorimo lolitare toaꞌ to mampototehuꞌka! Mewaliꞌ kiperapiꞌ pe Ingko, ingka hawiꞌMu hieꞌe, hingkeꞌna Ipaꞌanika roho lali hingkeꞌna hawaꞌka motehuꞌ mampowute BooMu.

³⁰Pueꞌ, Iponoꞌokiꞌihi kuasaꞌMa, hei Ipaꞌanika kuasaꞌ ka hi Yesu, hawiꞌMu to Mangkolehi, hingkeꞌna kibiaꞌ mampokoꞌoriꞌ toaꞌ to mohakiꞌ hei mowali woriꞌ tandaꞌ to mepohele.”

³¹Koꞌukonalu mekokae, mododua romo tambi to ropeꞌohaꞌi, hei nopekahihi Inohaꞌ Mangkolehi. Mepongka katoꞌo wuranimohi mpuꞌu mampowute Boona Pueꞌ Ala pe toaꞌ to woriꞌ.

³²Lekiꞌ-lekiꞌna toaꞌ to mepoꞌohi pe hi Yesu, mohintuwuꞌ hei hampekokirihi. Hawaꞌi uwaꞌ haduo to mantiꞌi, “Hituꞌe lumangka,” angkana lekiꞌ-lekiꞌna to uwaꞌ i iohi ropakeꞌ moꞌawa-awa.

³³I tempo tiꞌo surona Pueꞌ Yesu pahuamohi kuasaꞌ to kodeꞌ hingkeꞌna mampowutehi kotuwuꞌna huliꞌ Pueꞌ Yesu. Hei lekiꞌ-lekiꞌra pahuahi pebarakati to kodeꞌ mpololeke ka Pueꞌ Ala.

³⁴Hawaꞌi mpuꞌu uwaꞌ haduo to nokomakuraꞌi. Alaꞌ hihimolu to uwaꞌ woiꞌna ba tambina, mampobaluꞌ woiꞌ ba tambi tiꞌo,

³⁵hei doiꞌna rokomi nolou ropewei pe surona Pueꞌ Yesu, hingkeꞌna nidolaꞌ-dolaꞌkihi toaꞌ to mamparaluꞌi.

³⁶Watoꞌo woꞌo nowali hi Yusuf. Io mampobaluꞌmo woiꞌna, hante doiꞌ hilina nopaꞌaniki surona Pueꞌ Yesu. Hi Yusuf tiꞌo iomo haduo ka muleꞌna hi Lewi to meꞌohaꞌ i Siprus. Surona Pueꞌ Yesu mangkokeneꞌi woꞌo hi Baraba, palaihana: to mepododoli.[12]