Read Rampi Suro 5 Bible Online

Suro 5 - Rampi bible

Suro 5

¹Uwaꞌ woꞌo tohamoko to mampobaluꞌhi woiꞌra. Konaꞌna tomaꞌani tiꞌo hi Anania, honiꞌi konaꞌna hantambina hi Sapira.

²Iohi mamporia hadolaꞌ hilina ka woiꞌra to ropobaluꞌ, hei hadolaꞌna nokomi pe hinarona surona Pueꞌ.

³Angkana hi Peturuꞌ mantiꞌi, “Anania, mahamporeꞌi lalima hinaꞌ nokuasaꞌi Belisiꞌ? Mahamporeꞌi hinaꞌ mampowowutiko pe Inohaꞌ Mangkolehi, hei mowowuniko hadolaꞌ ka hilina woiꞌ tiꞌo?

⁴Kehapoꞌi woiꞌ tiꞌo hawaꞌi nipobaluꞌ, na ingkolu woꞌo tumpune, hei ane nipobaluꞌi hawaꞌreꞌi ingkolu woꞌo tumpune hilina? Mahamporeꞌi hinaꞌ moliwoko mowali walia tiꞌo i lali pekirimu? Ingko hawaꞌko mampowowuti pe manusiaꞌ angkana mampowowutiko pe Pueꞌ Ala.”

⁵Ikonohorinalu hi Anania lolita tiꞌo, modungka romo hei pudiꞌ inohaꞌne. Lekiꞌra toaꞌ to pangkiꞌ hante to pahori motehuꞌhi alaꞌ hapo to mewali tiꞌo.

⁶Katoꞌo, haꞌumborahi anaꞌntomaꞌani moputuꞌ wotana hi Anania motuntuni adaꞌra toYahudi, honiꞌi rokowaꞌ nolou nitawu.

⁷Ba uwaꞌi tolu jaa uko katoꞌo, mekahimo hantambine hi Anania angkana hawaꞌi nobahaꞌ hapo to mewali.

⁸Notiꞌi hi Peturuꞌ pe io, “Itiꞌikiꞌa, woiꞌmi to ibaluꞌkei, ba iomo mpuꞌu hiline?” Mehoniꞌ hi Sapira, “Iomola lekiꞌ-lekiꞌna.”

⁹Notiꞌi hi Peturuꞌ, “Mahamporeꞌi hinaꞌ singkokoloꞌkei mowalia watoꞌo? Ba ikodokoꞌikeireꞌi mohohongkeꞌ Inohaꞌ Mangkolehina Pueꞌ? Eleko! Toaꞌ to hongkoꞌhi mahuliꞌ ka motawu maꞌanimu tiꞌomohi i wambaꞌ, iohi to hingkiꞌ ako motawuko woꞌo.”

¹⁰Konohorinalu lolitane hi Peturuꞌ, modungka romo towoweꞌe tiꞌo hei liu-liu mahi. Kopekahiralu toaꞌ to motawu hi Anania, roꞌele mahimo towoweꞌe tiꞌo. Liu-liu rokowaꞌ nolou nitawu i hirina potowuana maꞌanina.

¹¹Mewaliꞌ, lekiꞌ-lekiꞌna toaꞌ to mepoꞌohi pe Pueꞌ Yesu, to meꞌohaꞌ itoꞌo hei toaꞌ ntaniꞌna, motehuꞌmohi mpuꞌu pahori hapo to mewali tiꞌo.

¹²Surona Pueꞌ Yesu mowalihi woriꞌ tandaꞌ to mepohele i lumbura toaꞌ to woriꞌ. Lekiꞌ-lekiꞌna toaꞌ to mepoꞌohi pe hi Yesu hampekokirihi, hante poko morampuhi i tangkoꞌna Tambina Pueꞌ Ala to rotiꞌi Tangkoꞌ Salomo.

¹³Toaꞌ to hawaꞌhi mepoꞌohi hawaꞌhi wurani mampohamoloꞌ pe to mepoꞌohi angkana iohi to hawaꞌi mepoꞌohi tontora moꞌadaꞌi to mepoꞌohi.

¹⁴Komorue-rueha tetambai womo toaꞌ to mepoꞌohi pe Pueꞌ.

¹⁵Woriꞌ tandaꞌ kuasaꞌ to rowali suro, iomo hinaꞌ woriꞌ to hawaꞌi polido rokomi hante aliꞌra, honiꞌi niꞌuliꞌ i hiri lala. Mowalihi to watoꞌo alaꞌ ropohinaru ane hi Peturuꞌ moliu itoꞌo, kehapoꞌi wowaronalu noniuꞌ i wotara, bateꞌra moꞌoriꞌhi.

¹⁶Hei woriꞌhi toaꞌ to ka kota-kota dodungku Yerusale mehupaꞌ moꞌawa-awa hei mangkomi toaꞌ to mahakiꞌ hante to nopekahii lomoa, lekiꞌra nipokoꞌoriꞌhi.

¹⁷I tempo tiꞌo, Tadulako Mpenomba Ngkodeꞌ hei awana to motuntuni pepoturuꞌra toSaduki, mowahiꞌhi pe surona Pueꞌ Yesu. Iomo hinaꞌ nipoperima-rimahi.

¹⁸Surona Pueꞌ Yesu tiꞌo nihokiꞌhi hei nitahahi i lali petarungkuꞌa.

¹⁹Angkana wini tiꞌo, hupaꞌmo haduo malaꞌekane Pueꞌ hei moweaꞌkihi wambaꞌ petarungkuꞌa tiꞌo, honiꞌi mangkomihi nolou pe huwali. Notiꞌikihi malaꞌeka tiꞌo,

²⁰“Noloumokei pe Tambina Pueꞌ Ala, ipowutekihi pe toaꞌ to woriꞌ lekiꞌ-lekiꞌna kareba noniuꞌ i kotuwuꞌ to wolaꞌ.”

²¹Katoꞌo mehoꞌolu-olu, noloumohi mpuꞌu suro tiꞌo pe Tambina Pueꞌ Ala hei mepoturuꞌhi itoꞌo. Kolentuꞌara mepoturuꞌ, Tadulako Mpenomba Ngkodeꞌ hei awara mowowoihi lekiꞌ-lekiꞌna tadulakora toSareili hingkeꞌna morampuhi i Pogomboa Peparesaꞌ Ngkodeꞌ toYahudi. Morampumohi mpuꞌu lekiꞌ-lekiꞌra, hei rorumbaꞌmo toaꞌ nolouhi moroa surona Pueꞌ Yesu ka lali petarungkuꞌa hingkeꞌna nikomihi i hinarora.

²²Angkana kohupaꞌra to nirumbaꞌ tiꞌo pe tambi petarungkuꞌa, hamboaꞌmo uwaꞌ rohua! Mahuliꞌmohi pe tadulakora, rotiꞌi,

²³“Kohupaꞌki i petarungkuꞌa, kiꞌokiꞌ wambaꞌ petarungkuꞌa tontonalu tewiti hei tekuhi. Hei surodadu itoꞌo uwaꞌ tene mampoꞌodaꞌ wambaꞌ. Kiweaꞌmo wambaꞌ angkana hawaꞌi uwaꞌ haduo to kihua i lali!”

²⁴Koꞌukora tadulako surodadu topampodaꞌ Tambina Pueꞌ Ala hei tutuꞌ-tutuꞌ tadulako mpenomba pahori kareba tiꞌo, wulihi alaꞌ hamboaꞌmo robahaꞌ ba pe imbomohi roꞌako suro tiꞌo. Hei motehuꞌhi, alaꞌ hawaꞌi robahaꞌ hapo to hingkiꞌ mewali.

²⁵Katoꞌo hupaꞌmo haduo tomaꞌani mampatiꞌikihi, “Ipehoromuakei! Toaꞌ to itarungkuꞌkei, uwaꞌmohi mampoturuꞌ toaꞌ to woriꞌ i Tambina Pueꞌ Ala!”

²⁶Iomo hinaꞌ noloumohi tadulako surodadu moꞌawa-awa hante awana pe Tambina Pueꞌ Ala moroa suro tiꞌo. Suro tiꞌo hawaꞌi dulu ropowuriꞌi ba nikohiaꞌ, alaꞌ motehuꞌhi surodadu hingkiꞌ nowatuihi toaꞌ to woriꞌ.

²⁷Katoꞌo suro tiꞌo nikomimohi pe hinarora tadulako. Noparesaꞌhi hei noteneihi Tadulako Mpenomba Ngkodeꞌ, notiꞌi,

²⁸“Kiꞌopimokei to liu, inioꞌkei mepoturuꞌ noniuꞌ i konaꞌna hi Yesu. Ele to iwalikei! I humanele kota Yerusale, woriꞌ toaꞌ mampehoromua poturuꞌmi tiꞌo! Itiꞌikei ingka to masalaꞌo i konirokoꞌna Toaꞌ tiꞌo.”

²⁹Hi Peturuꞌ hante surona Pueꞌ Yesu to ntaniꞌna mehoniꞌhi, rotiꞌi, “Hangangaa hawaꞌna Pueꞌ Ala to topetuntuino hintina hawaꞌna manusiaꞌ.

³⁰Hi Yesu to ipakumokei i loti momehulepe, nopatuwuꞌmo huliꞌ Pueꞌ Ala to ropenombai tododulunta hampiha.

³¹Hei Nohini, Nopopahura tinaꞌ i koanaNa, honiꞌi Nopaꞌani kuasaꞌ mewali Tadulako hei Tomeposalamaꞌ, hingkeꞌna ingkiꞌ toSareili wadi mengkatobaꞌ ka dosanta hante pahua peꞌampuni.

³²Ingkamola to mosobiꞌi lekiꞌna tiꞌo, Inohaꞌ Mangkolehi woꞌo moꞌawa-awa hante ingka mewali sabiꞌ. Pueꞌ Ala mepaꞌani Inohaꞌ Mangkolehi pe lekiꞌna toaꞌ to mengkoruꞌ pe Io.”

³³Korohorina tadulako-tadulako lolitare tiꞌo, bukotahi mpuꞌu, hei rokodokoꞌi morokoꞌ surone Pueꞌ Yesu.

³⁴Angkana uwaꞌ haduo ka lumbura tadulako tiꞌo, haduo toParisi to rokokeneꞌi hi Gamalie. Hi Gamalie tiꞌo guru agama to noꞌadaꞌi lekiꞌ-lekiꞌna toaꞌ. Metotiꞌimo hi Gamalie morumbaꞌ toaꞌ mangkomi suro tiꞌo nolou pe huwali hampaiꞌ.

³⁵Uko tiꞌo io mampowute lolita, notiꞌi, “Halali-halali toSareili! Ipekirikei moromiꞌ, ba hapo to hangangaa iwalikei pe toaꞌ tiꞌo.

³⁶Alaꞌ haꞌumbora ntoꞌa to liu, uwaꞌ haduo tomaꞌani to rokokeneꞌi hi Teuda, to mampowute koꞌiona toaꞌ to makuasaꞌ. Mewaliꞌ, woriꞌ toaꞌ metuntumo pe io, wora uwaꞌhi 400. Angkana koꞌukoana io nirokoꞌ, hei topetuntuna mokaꞌa-kaꞌamohi, alana hamboaꞌmo mewali tungkaihare.

³⁷Uko tiꞌo, i tempona lekiꞌ-lekiꞌna toaꞌ kolentuꞌara noꞌukiꞌ topoparenta konaꞌre, uwaꞌ haduo toGalilea to rokokeneꞌi hi Yudas. Io woꞌo mangkomi toaꞌ woriꞌ moꞌewa topoparenta. Angkana hawaꞌi morue io woꞌo nirokoꞌ, hei topetuntuna mokaꞌa-kaꞌahi woꞌo.

³⁸Mewaliꞌ, halali-halali, hieꞌelu poturuꞌka. Inioꞌhi nipahampo-hampoꞌi topegurune hi Yesu. Hinamo nipotedehihi. Alaꞌ ane ka toaꞌlu pepoturuꞌre hante tungkaihare, hingkiꞌ ropuꞌhi.

³⁹Angkana ane ka Pueꞌ Ala, hawaꞌi hohumbo hingkiꞌ inanikei. Alaꞌ ane niꞌewahi, hibalilukei moꞌewa Pueꞌ Ala.” Mewaliꞌ, lolitana hi Gamalie tiꞌo rotorimo tadulako.

⁴⁰Uko tiꞌo, suro tiꞌo niwowoimohi huliꞌ hei nikondohi, rotiꞌi, “Inioꞌkei mampoturuꞌ toaꞌ noniuꞌ i konaꞌna hi Yesu!” Katoꞌo nipotedehimohi.

⁴¹Suro-suro tiꞌo mampolihimohi tadulako agama hante motanaꞌhi alaꞌ i hinarona Pueꞌ Ala masipatoꞌhi pahua komaporiꞌ alaꞌ petuntura hei pepoꞌohira pe Pueꞌ Yesu.

⁴²Ando-andona i Tambina Pueꞌ Ala ba i tambi ntaniꞌna, mampowutehi nturusi Kareba Moromiꞌ noniuꞌ hi Yesu, Datu Topohompoꞌ.