Read Rampi Suro 6 Bible Online

Suro 6 - Rampi bible

Suro 6

¹Komorue-rueha kotetambai-mbaiha nturusi topetuntune hi Yesu. I tempo tiꞌo, lekiꞌ-lekiꞌna toaꞌ to mepoꞌohi pe hi Yesu, toYahudilu. Angkana hantenaꞌhi mowiharo Yunani, hei hantenaꞌhi woꞌo mowiharo Yahudi. To mowiharo Yunani, mangkonunuꞌ mosalaꞌihi awara to mowiharo Yahudi, rotiꞌi, “Tobembaꞌ towoweꞌe to uwaꞌ i ingka hawaꞌi pahua dolaꞌra ka hapo to rodolaꞌ-dolaꞌ ando-ando pe to merima-rima.”

²Iomo hinaꞌ surona Pueꞌ Yesu to hampuluꞌhi meroduo mowowoi lekiꞌ-lekiꞌna toaꞌ to mepoꞌohi pe hi Yesu hingkeꞌna morampuhi, hante notiꞌikihi, “Hawaꞌi moromiꞌ ane ingka to modolaꞌ-dolaꞌ pangka, alaꞌ ane watoꞌoꞌi, hamboaꞌmoka mampakaꞌ mampowute Pohawaꞌna Pueꞌ Ala.

³Mewaliꞌ, halali-halali, aginamo iꞌuwiꞌkei ka iliꞌmi pitu duo toaꞌ to mokonaꞌ moromiꞌ to noranda Inohaꞌ Mangkolehi hante to buhaꞌ pekiri. Iohi to hingkiꞌ kipaꞌani jama morewahi hei modolaꞌ-dolaꞌ pangka tiꞌo,

⁴alaꞌ jamangki mekokae hei mampowute Pohawaꞌna Pueꞌ Ala.”

⁵Lekiꞌ-lekiꞌna toaꞌ mamponiuꞌ lolitara suro tiꞌo. Iomo hinaꞌ hi Stepanu roꞌuwiꞌ alaꞌ io to mepoꞌohi pe Pueꞌ Yesu hei nokuasaꞌi Inohaꞌ Mangkolehi. Roꞌuwiꞌ woꞌo hi Pilipu, hi Poroku, hi Nikano, hi Timo, hi Pamena hante hi Nikolau[13] to ka Antiokia.

⁶To pitu duo tiꞌo nikomimohi nolou pe surona Pueꞌ Yesu, hei suro tiꞌo mohini korawera i tutuꞌra hei mekokae hingkeꞌna nobarakatihi Pueꞌ Ala.

⁷Katoꞌo, kotetambai-tambaihamo koworiꞌre toaꞌ to mampehoromua Pohawaꞌna Pueꞌ Ala hei to mepoꞌohi pe hi Yesu i Yerusale, hei woriꞌmohi woꞌo tadulako mpenomba toYahudi mepoꞌohi pe Pueꞌ Yesu.

⁸Hi Stepanu nobarakati mpuꞌu Pueꞌ Ala hei nipaꞌani kuasaꞌ. Iomo hinaꞌ nobiaꞌ mowali woriꞌ langkaꞌna tandaꞌ kuasaꞌ i hinarora toaꞌ to woriꞌ.

⁹Angkana uwaꞌhi woꞌo to meꞌewa. To meꞌewa tiꞌo iomo toaꞌ to menomba i tambi penombahara toYahudi to rokokeneꞌi tambi Libetini (palaihana: tambina toaꞌ to nipohente ka konipohawiꞌara). Iohi tiꞌo, to moꞌagama Yahudi to ka kota Kirene hante ka Alesandaria. Uwaꞌhi woꞌo toYahudi to ka Kilikia hante ka Asia to mehupaꞌ meꞌewa hante mampoheꞌeroki hi Stepanu.

¹⁰Angkana hawaꞌi robiaꞌ toaꞌ tiꞌo mohoniꞌ hapo to notiꞌi hi Stepanu, alaꞌ Inohaꞌ Mangkolehina Pueꞌ Ala mampaꞌaniꞌi kopobahaꞌ mololita.

¹¹Iomo hinaꞌ nolouhi mampokolaho lalira haꞌumbora toaꞌ hingkeꞌna mowalihi lolita to mosalaꞌi hi Stepanu, rotiꞌi, “Kihori io mampononaꞌa hawaꞌna hi Musa hei mampoꞌiwowoiꞌ Pueꞌ Ala!”

¹²Korohorina toaꞌ to woriꞌ lolitare to mesalaꞌi tiꞌo, bukotamohi mpuꞌu moꞌawa-awa hante tadulakora toYahudi hei guru-guru agama, honiꞌhi nolou mohokiꞌ hi Stepanu hingkeꞌna rokomi pe hinarora topotiko atura pepoꞌohi toYahudi.

¹³Kohupaꞌna itoꞌo, rokomi woꞌo haꞌumbora duohi toaꞌ to rotungkai mewali sabiꞌ wuti. Rotiꞌi sabiꞌ tiꞌo, “Toaꞌ tiꞌo mampononaꞌa nturusi Tambina Pueꞌ Ala hei mampoꞌiwowoiꞌ Hawaꞌna hi Musa!

¹⁴Alaꞌ kihori io mantiꞌi waheꞌe: Hi Yesu toNasareꞌ hingkiꞌ morenda Tambina Pueꞌ Ala hei mowolihi lekiꞌ-lekiꞌna adaꞌ to nopaꞌanikiki hi Musa hampiha.”

¹⁵Korohorina tadulako-tadulako Topotiko Atura Pepoꞌohi toYahudi lolita tiꞌo, ropomoꞌele hi Stepanu, hei liona roꞌokiꞌ hibali lio malaꞌeka.