Read Rampi Suro 7 Bible Online

Suro 7 - Rampi bible

Suro 7

¹Meꞌitano Tadulako Mpenomba Ngkodeꞌ pe hi Stepanu, notiꞌi, “Ba tuꞌu mpuꞌu hapo to rotiꞌi toaꞌ-toaꞌ tiꞌo?”

²Nohoniꞌ hi Stepanu, “Umoꞌ-umoꞌ, halali-halali! Ipehoromuakei dulu lolitangka! Hampiha, tododulunta hi Burahima meꞌohaꞌ i woiꞌ Mesopotamia. Ikohandoaꞌana tene melimba nolou pe kota Haran, Pueꞌ Ala to kodeꞌ kuasaꞌna, hupaꞌ pe io,

³Notiꞌikihi: ‘Ipolihimo woiꞌma hante tinomu. Noloumoko pe woiꞌ to hingkiꞌ Kutidoꞌkiko.’

⁴Iomo hinaꞌ hi Burahima mampolihimo woiꞌra to i Kasdim melimba pe kota Haran. I kota Haran tiꞌo, mahimo umoꞌne hi Burahima. Hei uko tiꞌo, Pueꞌ Ala morumbaꞌ womo hi Burahima melimba pe woiꞌ hieꞌe, to ipeꞌohaꞌimokei hinewowoꞌena.

⁵I tempo tiꞌo, hawaꞌi uwaꞌ woiꞌ to nipaꞌaniki hi Burahima, ngkoweꞌ hampalaꞌ hawaꞌi uwaꞌ nipaꞌaniki. Angkana Pueꞌ Ala modandi pe hi Burahima, Notiꞌi, ‘Woiꞌ Kanaꞌa hingkiꞌ Kupaꞌanikiko wute-wute i pemuleꞌamu.’ I tempo tiꞌo, handoaꞌi tene uwaꞌ anaꞌna.

⁶Angkana notiꞌi Pueꞌ Ala pe hi Burahima waheꞌe: ‘Muleꞌmu hingkiꞌ meꞌohaꞌ i woiꞌra roboꞌ ntaniꞌ mewali tolori. Iohi hingkiꞌ nopohawiꞌhi tumpu bolaꞌ i woiꞌ tiꞌo hei hingkiꞌ nipoperima-rimahi i lali iba natu ntoꞌa.

⁷Angkana uko tiꞌo, hingkiꞌ Kuhukuhi roboꞌ to mampohawiꞌ muleꞌmu, hei muleꞌmu hingkiꞌ molaihi ka woiꞌ tiꞌo hingkeꞌna menombahi pe Aku i woiꞌ Kanaꞌa hieꞌe.’

⁸Katoꞌo, Pueꞌ Ala mampoꞌuwaꞌ dandiNa pe hi Burahima hante tandaꞌ pebulabaꞌ, Io morumbaꞌmo hi Burahima hante muleꞌna hingkeꞌna nibulabaꞌhi. Mewaliꞌ hi Isaki, anaꞌna hi Burahima, nibulabaꞌmo i ando kawalu ka konipoꞌanaꞌakina. Hei hi Isaki mampemuleꞌki hi Akoꞌ, honiꞌi hi Akoꞌ mampemuleꞌki anaꞌna to hampuluꞌ meroduo. Hei iohi tiꞌo to mewali tododuluna toYahudi.

⁹Tododuluna toYahudi tiꞌo mowahiꞌhi pe hi Yusuf, horiana ropobaluꞌ, hingkeꞌna nipohawiꞌi i woiꞌ Masiri. Angkana Pueꞌ Ala mampoꞌowoni hi Yusuf,

¹⁰hei koꞌukoana Nopohente ka lekiꞌ-lekiꞌna komaporiꞌ hei nopaꞌani Pueꞌ Ala kobuhaꞌ pekiri to mampomotanaꞌ lalina hi Pirao, datu i woiꞌ Masiri, horiana hi Pirao mohini hi Yusuf mewali Gubenuru i woiꞌ Masiri hei topohawaꞌ i lali tambi kodatuana.

¹¹Hawaꞌi morue katoꞌo, tempo kobiloraha to makaja merumpa i humanele woiꞌ Masiri hei i woiꞌ Kanaꞌa. I tempo tiꞌo, woriꞌ toaꞌ morii kobiloraha, hei tododulunta woꞌo hamboaꞌmo uwaꞌ pangkara.

¹²Katoꞌo, Nohori hi Akoꞌ, uwaꞌ boi i woiꞌ Masiri. Iomo hinaꞌ norumbaꞌmohi anaꞌnehi, nolou pe Masiri. Iomo uluꞌ-uluꞌre nolou.

¹³Konoloura i korompihana, hi Yusuf mampokonontokihi koꞌionamo halalire. I tempo tiꞌo hongkoꞌ nobahaꞌ hi Pirao noniuꞌ halali-halaline hi Yusuf.

¹⁴Uko tiꞌo, hi Yusuf mepaha pe halalinahi hingkeꞌna nitiꞌiki hi Akoꞌ umoꞌna hei lekiꞌ-lekiꞌna tinona, hingkeꞌna mengkaboliꞌmohi nolou pe woiꞌ Masiri. Koworiꞌra toaꞌ to melimba nolou pe Masiri, pitu mpuluꞌ limo duohi.

¹⁵Mewaliꞌ, mengkaboliꞌ hi Akoꞌ pe woiꞌ Masiri, hei meꞌohaꞌmo inoꞌo wute mahi. Hatoꞌo woꞌo lekiꞌ-lekiꞌna anaꞌna.

¹⁶Angkana wuku-wukura rokomi huliꞌ nolou pe bolaꞌ Sike i woiꞌ Kanaꞌa hei nitawu i lali petowua to nohili hi Burahima hante doiꞌ peraꞌ ka muleꞌna hi Hemo.

¹⁷Hingkiꞌ dodungkumo tempone Pueꞌ Ala mobuhoꞌi dandiNa pe hi Burahima. Memuleꞌmohi tododulunte i woiꞌ Masiri wute woriꞌ muleꞌne.

¹⁸Koꞌukoana, uwaꞌ haduo datu to moparenta i woiꞌ Masiri to hawaꞌi pobahaꞌ kohihimona hi Yusuf.

¹⁹Datu tiꞌo mampomaporiꞌ kotuwuꞌra tododulunta hampiha. Nopoperima-rimahi hei noparukuhi motube hante mampotedehi himidoꞌra hingkeꞌna romahi.

²⁰I tempo tiꞌo, nipoꞌanaꞌkimo hi Musa. Hi Musa tiꞌo, haduo oꞌanaꞌ to maranga mpololeke. Tolu mbulalu komoruene norewahi toduluna, hei uko tiꞌo, nitubemo.

²¹Oꞌanaꞌ to nitube tiꞌo, noroa anaꞌntowowalo, anaꞌna Pirao, hei norewahi hibali anaꞌna hadoduona.

²²Lekiꞌ-lekiꞌna kopebahaꞌra i Masiri nipoturuꞌki hi Musa, alana pololitana makuasaꞌ hante pambiarana.

²³Ganaꞌmo iba mpuluꞌ ntoꞌa tinuwuꞌne, uwaꞌmo pekirine hi Musa nolou mokadoroꞌi hangko toSarailina.

²⁴I tempo tiꞌo, noꞌoki haduo toSareili nopadea haduo toMasiri. Noloumo hi Musa mamperorui halalina horiana toMasiri tiꞌo norokoꞌ.

²⁵Notiꞌi laline hi Musa, hangangaa robahaꞌ halalina koꞌiona to Noꞌuwiꞌ Pueꞌ Ala mampolohoꞌhi ka konipohawira. Angkana hawaꞌi robahaꞌ.

²⁶Poꞌonina, hi Musa pangkiꞌ womo roduo toSaraili to motudaꞌ. Alaꞌ konokodokoꞌina mampohintuwuꞌhi, iomo hinaꞌ notiꞌikihi, ‘Mahamporeꞌi hinaꞌ motudaꞌkei? Hawaꞌkeireꞌi ibahaꞌ ingkei hieꞌe to mohalalikei?’

²⁷Angkana haduo ka to motudaꞌ tiꞌo to masalaꞌ pe halalina mosomuna hi Musa, katoꞌo notiꞌi, ‘Himo to mohiniko mewali tadulako to mobutusi posisalaꞌki?

²⁸Ba ikodokoꞌi woꞌo morokoꞌa, hibali koꞌirokona toMasiri hiwinia’?

²⁹Konohorina hi Musa lolita tiꞌo, mehilaimo ka woiꞌ Masiri ako meꞌohaꞌ i woiꞌ Midia. Itoꞌo io mohamoko hei mampemuleꞌki roduo anaꞌna tomaꞌani.

³⁰Iba mpuluꞌ ntoꞌamo katoꞌo, hupaꞌmo haduo malaꞌeka mampohidupaꞌki hi Musa i popada lori dodungku i Biri Sinai. Malaꞌeka tiꞌo noꞌokiꞌ i lali api to makiꞌ ka lali rui.

³¹Hele hi Musa pangkiꞌ api tiꞌo, iomo hinaꞌ nolou mokododungkui alaꞌ dokoꞌ nobahaꞌ ba hapo to mewali. Io romo nohori loaꞌna Pueꞌ Ala to mantiꞌi:

³²‘Akumo Pueꞌ Ala to ropenombai tododulumu. Akumo hieꞌe Pueꞌ Ala to ropenombai hi Burahima, hi Isaki hei hi Akoꞌ.’ Konohorina hi Musa Loaꞌ tiꞌo, kaliuꞌ mororidiꞌ nokomi komotehuꞌna, hei hamboaꞌmo podehoꞌ mampenotoꞌ api to makiꞌ tiꞌo.

³³Uko tiꞌo, notiꞌi womo Pueꞌ Ala pe hi Musa: Itahu sanalaꞌma, alaꞌ woiꞌ to ipetotiꞌii hieꞌe, iomo woiꞌ to mangkolehi.

³⁴Kuꞌokiꞌmo toaꞌKahi toSaraeli nipopoꞌioꞌio i Masiri. Kuhorimo peroraire. Iomo hinaꞌ mengkohouꞌA humei mampolohoꞌhi. Humeimoko, hinewowoꞌena Kurumbaꞌko mahuliꞌ nolou pe woiꞌ Masiri.

³⁵Mewaliꞌ, hi Musa to nosapuaka toSaraeli, rotiꞌi pe io, ‘Himo to mohiniko mewali tadulakongki to mobutusi posisalaꞌki?’ Angkana koꞌukoana, iomo to nowowoi Pueꞌ Ala i tempona haduo malaꞌeka mololita pe io ka lali rui to makiꞌ. Iomo to nohini Pueꞌ Ala mewali tadulakora toSaraeli to mampolohoꞌhi ka konipohawiꞌara.

³⁶Hi Musa tiꞌo to mangkomi toSaraelihi ka woiꞌ Masiri, hei to mowali woriꞌ tandaꞌ kuasaꞌ to mepohele i woiꞌ Masiri, i Tahiꞌ Momeaꞌ hei i popada leri i lalina iba mpuluꞌ ntoꞌa.

³⁷Hei hi Musa woꞌo to mampowute lolita hieꞌe pe toSareili, notiꞌi, ‘Pueꞌ Ala hingkiꞌ mohini haduo ka iliꞌmi hingkeꞌna mewali nabi hibali aku hieꞌe’

³⁸Hi Musa tiꞌo to mampoꞌowoni toSaraeli i popada leriꞌ. Io woꞌo to pahori lolitane malaꞌekana Pueꞌ i Biri Sinai, katoꞌo nopowute lolita tiꞌo pe tododulunta hampiha. Iomola to mantorimo Boo to ka Pueꞌ Ala to tontona uwaꞌ wute nantolou-louna hingkeꞌna nipowuteꞌi pe ingkiꞌ.

³⁹Kehapoꞌi watoꞌo, tododulunta uluꞌana hawaꞌi hiniꞌ mengkoruꞌ pe hi Musa. Rosapuaka koropotadulakone hei dokoꞌluhi mahuliꞌ nolou pe woiꞌ Masiri.

⁴⁰Mewaliꞌ, iomo hinaꞌ nolouhi pe hi Harun, kokaꞌna hi Musa, rotiꞌiki: ‘Walikika haꞌumbora lente to wadi kipenombai, hingkeꞌna lente tiꞌomo to mewali tadulakongki. Alaꞌ hamboaꞌmo kibahaꞌ hapo to mewali pe hi Musa to mangkomika humei ka woiꞌ Masiri uluꞌana.’

⁴¹Katoꞌo, mowalimohi hambaꞌa lente anaꞌ gapiꞌ. Lente to rowali tiꞌo, ropenombai hante roporokoꞌki pinatuwuꞌ. Mosusaꞌmohi mampokodeꞌ hapo to rowali hante korawera.

⁴²Iomo hinaꞌ notinunimohi Pueꞌ Ala hei nopotedehimohi menomba pe betueꞌ i laniꞌ hibali to teꞌukiꞌ i lali suraꞌ nabi-nabi to mantiꞌi: ‘Ingkei toSareili! Ka hampihakeireꞌi morere pinatuwuꞌ ipopenombakei pe Aku lingkaꞌmi iba mpuluꞌ ntoꞌa i popada lori?

⁴³To ikomikei iomo bambaruꞌ peꞌohaꞌana lomoa Molok[14] hante watu ntoaꞌ to hibali betueꞌ Repan. Lente tiꞌomo to iwalikei hingkeꞌna ipenombaikei. Iomo hinaꞌ hingkiꞌ Kupotodehikei nitawaniꞌ, wute nikomikei moꞌela pe bolaꞌ to i hanupe iomo bolaꞌ ngkodeꞌ Babeli.’

⁴⁴Kolentuꞌara tododulunta i popada leri, Pueꞌ Ala morumbaꞌmo hi Musa mowali Bambaruꞌ Penombaha. Bambaruꞌ Penombaha tiꞌo mewali tandaꞌ koꞌuwaꞌna Pueꞌ Ala i lumbura toSaraeli, hei rowali motuntuni hapo to notidoꞌkihi Pueꞌ Ala pe hi Musa.

⁴⁵Bambaruꞌ Penombaha tiꞌo rokomi nturusi tododulunta mekahi i woiꞌ Kanaꞌa hieꞌe. Uko tiꞌo, hi Yosua motadulakoimo tododulunta mamperompoꞌi woiꞌra to topeꞌohaꞌi hinewowoꞌena. I tempo tiꞌo, Pueꞌ Ala mampopolai tumpu bolaꞌ i woiꞌ Kanaꞌa. Hei Bambaruꞌ Penombahara tiꞌo uwaꞌ tene i lumbura wute i tempona datu Daudi moparenta.

⁴⁶Hi Daudi mampomotanaꞌ Pueꞌ Ala, hei io merapiꞌ hingkeꞌna moꞌaro tambina Pueꞌ Ala to nopenombai hi Akoꞌ hampiha.

⁴⁷Angkana to moꞌaro Tambina Pueꞌ Ala iomo hi Salomo anaꞌna hi Daudi.

⁴⁸Angkana, kuasaꞌNa Pueꞌ Ala meloliu tene ka lekiꞌ-lekiꞌna to ropenombai. Io hawaꞌi meꞌohaꞌ i tambi to nowali toaꞌ. Alaꞌ i lali suraꞌ nabi hampiha teꞌukiꞌ waheꞌe:

⁴⁹Notiꞌi Pueꞌ Ala, ‘Laniꞌ iomo pahurahangKu moparenta, hei woiꞌ pedadihaꞌangKu. Tambi hapo to ikodokoꞌikei niꞌarokiꞌA? I umbo pebolaꞌa to hintotoꞌ Kupeꞌohaꞌi? Hawaꞌi uwaꞌ.

⁵⁰Alaꞌ Aku to mowali lekiꞌ-lekiꞌna!’ ” [15]

⁵¹Notiꞌi womo hi Stepanu pe ampiꞌ-ampiꞌ tadulako agama, notiꞌikihi, “Halali-halali, makaja komorintodine lalimi, hei makaja kotami mampehoromua! Makaja woꞌo kopengkabonoꞌmi mampehoromua lolitana Pueꞌ Ala! Ingkei hibalikei hante tododulumi hampiha, alaꞌ mosapuakakei nturusi Inohaꞌ Mangkolehi.

⁵²Lekiꞌ-lekiꞌna nabi hampiha nopopoꞌioꞌiohi tododulumi. Hei tododulumi morokoꞌhi woꞌo nabi-nabina Pueꞌ Ala to mantiꞌi kohingkiꞌ hupaꞌna Hawiꞌna Pueꞌ Ala to Moromiꞌ iomo hi Yesu. Hei hinewowoꞌena, ingkei to mosapuaka hei morokoꞌ Hawiꞌna Pueꞌ Ala tiꞌo.

⁵³Itorimokei hawaꞌne Pueꞌ Ala to ropowute malaꞌeka pe tododulunta, angkana hawaꞌi ipetuntuikei.”

⁵⁴Korohorina ampiꞌ-ampiꞌna Topotiko Atura Pepoꞌohi ToYahudi lolitane hi Stepanu tiꞌo, bukotamohi mpuꞌu hei koiꞌ lalire.

⁵⁵Angkana hi Stepanu nokuasaꞌimo Inohaꞌ Mangkolehi, hei menoaꞌ pe laniꞌ. Noꞌokiꞌ mpuꞌu pewantane Pueꞌ Ala, hei noꞌoki woꞌo hi Yesu metotiꞌi tinaꞌ i kuanana Pueꞌ Ala.

⁵⁶Notiꞌi hi Stepanu, “Ele! Kuꞌokiꞌ laniꞌ moweaꞌ hei Anaꞌ manusiaꞌ metotiꞌi tinaꞌ i kuanana Pueꞌ Ala!”

⁵⁷Uko tiꞌo, ampiꞌ-ampiꞌna Topotiko Atura tiꞌo mampolohihimohi tolinara, hei moloaꞌ-loaꞌhi ropokobue hei kaliuꞌ romo rohokiꞌ,

⁵⁸hei roruiꞌ nolou pe huwali kota hingkeꞌna rowatuiꞌi. Ampiꞌ-ampiꞌ tiꞌohi mewalihi sabiꞌ wuti i hapo to mewali tiꞌo hante mowulahi jubara hingkeꞌna roholangko molubaꞌ hi Stepanu hei jubara roporia i hinarona haduo pamuda to nikokeneꞌi hi Saulu.

⁵⁹Kolentuꞌana hi Stepanu rowatui, mekokaemo, notiꞌi, “Pueꞌ Yesu, Itorimomo peꞌinohaꞌka!”

⁶⁰Io melingkotuꞌ, notiꞌi nopokodeꞌ, “Pueꞌ, inioꞌhi Ihuku alaꞌ dosara hieꞌe.” Uko mololita watoꞌo, io mahimo.