Read Rampi Suro 8 Bible Online

Suro 8 - Rampi bible

Suro 8

¹Hi Saulu woꞌo mamponiuꞌ konirokoꞌna hi Stepanu tiꞌo. Mepongka ando tiꞌo, lekiꞌ-lekiꞌna to mepoꞌohi pe Pueꞌ Yesu to uwaꞌ i Yerusale nipopoꞌioꞌiohi mpuꞌu, koꞌukoana tehaworihi i humanele woiꞌ Yudea hei Samaria. Angkana suro-surona romo Pueꞌ Yesu to hawaꞌi mehilai.

²Bahaꞌumbohi toaꞌ to mengkoruꞌ pe Pueꞌ Ala mampeꞌolonihi mpololeke hi Stepanu alaꞌ kohanondoihara, honiꞌi rotawu.

³Angkana i tempo tiꞌo, hi Saulu mampopoꞌioꞌio nturusi toaꞌ to mepoꞌohi pe Pueꞌ Yesu. Lekiꞌ-lekiꞌna tambira nopekahii, hante lekiꞌ-lekiꞌna toaꞌ to mepoꞌohi pe Pueꞌ Yesu, moromiꞌ tomaꞌani moromiꞌ towoweꞌe, nohokiꞌhi hante nokomihi nolou nitarungkuꞌ.

⁴Mewaliꞌ, toaꞌ to mepoꞌohi mobuntelahi alaꞌ nipopoꞌioꞌiohi, iomohila to mampowute woꞌo Kareba Moromiꞌ i imbo-imbolu koꞌakoara.

⁵Watoꞌo woꞌo, hi Pilipu noloumo pe haꞌanu bolaꞌ ngkodeꞌ i woiꞌ Samaria mampowutekihi kohiYesuna Datu Topohompoꞌ.

⁶Korohorinalu tumpu bolaꞌ tiꞌo hapo to notiꞌi hi Pilipu, ropoꞌilali lolitane. Hei roꞌokiꞌ woꞌo tandaꞌ kuasaꞌ to nowali,

⁷alaꞌ io mampopolai lomoa ka woriꞌ toaꞌ to nopekahii, horiana molaimo mpuꞌu lomoa tiꞌo hante moloaꞌ-loaꞌhi. Woriꞌ woꞌo toaꞌ tokohu hante to kamaeꞌ kapuꞌna nopokoꞌoriꞌ hi Pilipu.

⁸Motanaꞌmohi mpuꞌu tumpu bolaꞌ mampeꞌele hapo to mewali tiꞌo.

⁹I lali kota tiꞌo, uwaꞌ haduo tomaꞌani to nikokeneꞌi hi Simo. Hi Simo tiꞌo, haduo toaꞌ to woriꞌ bahaꞌna, to moruemo mampetidoꞌki bahaꞌna to mepohele pe toSamaria. Notiꞌi pe toaꞌhi koꞌiona toaꞌ to kodeꞌ kuasaꞌne.

¹⁰Habolaꞌ tiꞌo mepoꞌohihi mpuꞌu pe toaꞌ tiꞌo hei rotiꞌi, “Hi Simo tiꞌo, uwaꞌ kuasaꞌne ka Pueꞌ Ala.” Rokokeneꞌi monono kopobahaꞌne. Lekiꞌ-lekiꞌna tumpu bolaꞌ metuntumo pe io, alaꞌ woriꞌ mpihahi hele pangkiꞌ kopobahaꞌna.

¹²Angkana kohupaꞌna hi Pilipu i bolaꞌra, io mampowute Kareba Moromiꞌ noniuꞌ i poparentana Pueꞌ Ala, hei nopoturuꞌhi kohiYesuna Datu Topohompoꞌ, alana woriꞌ to mepoꞌohi pe hi Yesu moromiꞌ tomaꞌani moromiꞌ towoweꞌe hei niriuhi.

¹³Katoꞌo, hi Simo mepoꞌohimo woꞌo hei niriu. Koꞌukona niriu, metuntumo mpaloliu pe hi Pilipu, hoko laline pangkiꞌ tandaꞌ kuasaꞌ to nowali hi Pilipu.

¹⁴Uko tiꞌo, surona Pueꞌ Yesu to uwaꞌ i Yerusale rohorimo kareba noniuꞌ ikopantorimoramo pohawaꞌna Pueꞌ Ala i Samaria. Iomo hinaꞌ morumbaꞌhi hi Peturuꞌ hante hi Yohanes nolou pe Samaria.

¹⁵Ikohupaꞌnalu hi Peturuꞌ hante hi Yohanes, ropekokaekimo toSamariahio to mepoꞌohi pe Pueꞌ Yesu, hingkeꞌna pahuahi Inohaꞌ Mangkolehi,

¹⁶alaꞌ Inohaꞌ Mangkolehi handoaꞌi tene mengkohou pe iohi. Alaꞌ hongkoꞌlu koniriura i lali konaꞌna Pueꞌ Yesu.

¹⁷Katoꞌo hi Peturuꞌ hante hi Yohanes mohinimo korawera pe womboꞌ tutuꞌra, hei toSamaria tiꞌohi, mantorimomohi Inohaꞌ Mangkolehi.

¹⁸Noꞌele hi Simo, toaꞌ to nopohiniki hi Peturuꞌ hante hi Yohanes korawena, iohi to mantorimo Inohaꞌ Mangkolehi. Iomo horiana hi Simo mangkomimo doiꞌ nolou pe hi Peturuꞌ hante pe hi Yohanes,

¹⁹notiꞌikihi, “Paꞌaniꞌakae kuasaꞌmi tiꞌo, hingkeꞌna ane kuhiniꞌi korawengka pe tutuꞌna himo-himolu iohi woꞌo hingkiꞌ mantorimomohi Inohaꞌ Mangkolehi.”

²⁰Angkana notiꞌi hi Peturuꞌ pe io, “Hurewuꞌko hante doiꞌmu. Ba ipekirireꞌi, rima pepaꞌanina Pueꞌ Ala wadi nihili hante doiꞌ?

²¹Hawaꞌko masipatoꞌ majama moꞌawa hante ingka, alaꞌ hawaꞌi mononto lalima pe Pueꞌ Ala.

²²Nohohoꞌmoko ka waliamu to kodake tiꞌo, hei mekokaeko pe Pueꞌ hingkeꞌna Io moꞌampuni tungkaihana lalimu to kodake.

²³Alaꞌ kuꞌokiꞌ lalimu mowahiꞌ tene, hei tehiluꞌko tene i kokodakemu.”

²⁴Notiꞌi hi Simo pe hi Peturuꞌ hante hi Yohanes, “Ipekokaekiꞌakei kaiaꞌ pe Pueꞌ hingkeꞌna hawaꞌa norumpa pehukuNa hibali to itiꞌi!”

²⁵Ikoꞌukora hi Peturuꞌ hante hi Yohanes mololita hapo to roꞌokiꞌmo hei to rohuamo hadoduora moꞌawa hante Yesu Kerisitu hei mampowute pohawaꞌna Pueꞌ, katoꞌo mahuliꞌmohi nolou pe Yerusale. I patengkaꞌara, Kareba Moromiꞌ ropowute woꞌo pe bolaꞌ-bolaꞌ ntaniꞌna i woiꞌ Samaria.

²⁶Uwaꞌ haduo malaꞌekana Pueꞌ to mowiharo pe hi Pilipu notiꞌi, “Noloumoko tinaꞌ pe munaꞌu, hei motuntuniko lala to ka Yerusale wute i Gasa.” Lala tiꞌo molakaꞌmo nopoliuhi toaꞌ.

²⁷Katoꞌo noloumo mpuꞌu hi Pilipu motuntuni lala to notidoꞌki Pueꞌ. I tempo tiꞌo, uwaꞌ woꞌo haduo toEtiopia to moliu i lala tiꞌo mahuliꞌ nolou pe woiꞌna. Toaꞌ tiꞌo, dingkaoꞌ tikoane, io makuasaꞌ moꞌorusi lekiꞌ-lekiꞌna lumana datu towoweꞌe i woiꞌ Etiopia. Datu towoweꞌe tiꞌo konaꞌna hi Kandake. Ikoꞌukona toEtiopia tiꞌo menomba pe Pueꞌ Ala i Yerusale, io mehendeꞌmo kereta to noruiꞌ nara hei mahuliꞌ nolou pe woiꞌna. Kolentuꞌana mahura i lali keretana, io mobasa haꞌanu suraꞌ to noꞌukiꞌ nabi Yesaia hampiha.

²⁹I tempo tiꞌo, notiꞌi Inohaꞌ Mangkolehine Pueꞌ Ala pe hi Pilipu, “Nolouko ako ikododungkui kereta tiꞌo.”

³⁰Katoꞌo mehilaimo mpuꞌu hi Pilipu tolou pe kereta tiꞌo. Ikohupaꞌna, itoꞌo nopehoromuaiae toaꞌ tiꞌo mobasa ka Suraꞌna Nabi Yesaia. Meꞌitano hi Pilipu, “Tua, ibahaꞌlu palaihane to ibasa tiꞌo?”

³¹Mehoniꞌ toaꞌ tiꞌo, “Hohumbo kokubahaꞌne, ane hawaꞌi uwaꞌ toaꞌ to mampokonontokiꞌa.” Uko tiꞌo, toEtiopia tiꞌo mowowoimo hi Pilipu mehendeꞌ i lali keretana hingkeꞌna mahurahi moꞌawa.

³²Hieꞌemola ohine to nobasa ka Suraꞌna Nabi Yesaia: “Io hibali hambaꞌa gimba to nikomi ako nirereꞌ. Io hibali hambaꞌa anaꞌ gimba to nigundi wiloluna angkana hawaꞌi mowengka omeꞌna; menondoꞌlu.

³³KonibutusiNa hawaꞌi maniuꞌ; hawaꞌi masipatoꞌ Io nihuku. Hawaꞌi uwaꞌ haduo toaꞌ to mampololita noniuꞌ i pemuleꞌaNa alaꞌ Io nirokoꞌ.”

³⁴Katoꞌo, meꞌitanomo toEtiopia pe hi Pilipu notiꞌi, “Itiꞌikiꞌa ba hihimo to notungkai nabi tiꞌo, ba wotana hadoduona ba toaꞌ ntaniꞌnareꞌi?”

³⁵Katoꞌo, ka to nobasa hingkeꞌenia, hi Pilipu mampokonontoki Kareba Moromiꞌ noniuꞌ i hi Yesu.

³⁶Ikolentuꞌara mokereta, pangkiꞌhi uwai i hiri lala. Notiꞌi toEtiopia tiꞌo pe hi Pilipu, “Ele, ndioꞌo uwaꞌ uwai, ba wadiꞌa iriu?”

³⁷[Mehoniꞌ hi Pilipu, “Ane ipoꞌohimoꞌi mpuꞌu, wadiko kuriu.” Notiꞌi toEtiopia tiꞌo, “Kupoꞌohi hi Yesu Kerisitu koꞌIonamo Anaꞌne Pueꞌ Ala.]”

³⁸Katoꞌo, nopopeꞌohaꞌmo keretane, hei mengkohoumohi tolou pe uwai, hei toEtiopia tiꞌo Noriumo hi Pilipu.

³⁹Ipehorira ka uwai, hampale hangkaꞌ-hangkaꞌ romo Inohaꞌ Mangkolehine Pueꞌ Ala mangkomi hi Pilipu katoꞌo. Katoꞌo, hi Pilipu hamboaꞌmo noꞌoki toEtiopia. ToEtiopia tiꞌo mampololiumo pantengkaꞌana hei motanaꞌ mpololeke laline.

⁴⁰Hi Pilipu hangkaꞌ-hangkaꞌ romo wute i bolaꞌ ngkodeꞌ Asdo, hei loliumo nolou pe kota Kaisarea. I patengkaꞌana tiꞌo, io mampowute nturusi Kareba Moromiꞌ pe lekiꞌ-lekiꞌna bolaꞌ to nopoliuhi.