Read Rampi Suro 9 Bible Online

Suro 9 - Rampi bible

Suro 9

¹I tempo tiꞌo, makaja mpololeke kokoiꞌne lalina hi Saulu, io dokoꞌ mampototehuꞌ hante morokoꞌ toaꞌ to mepoꞌohi pe Pueꞌ Yesu. Iomo hinaꞌ nolou pe Tadulako Mpenomba Ngkodeꞌ,

²katoꞌo merapiꞌ suraꞌ kuasaꞌ to wadi nokomi nolou pe tadulako-tadulako tambi-tambi penombaha i kota Damasi. Tungkaihana, ane uwaꞌhi nohua tomaꞌani hante towoweꞌe to motuntuni poturuꞌna Pueꞌ Yesu, hingkiꞌ nohokiꞌhi hei nokomi huliꞌ nolou pe Yerusale.

³Angkana i patengkaꞌana nolou pe Damasi, i tempona dodungkumo i bolaꞌ ngkodeꞌ, hangkaꞌ-hangkaꞌ romo uwaꞌ to mewanta ka laniꞌ motuleliꞌi hi Saulu.

⁴Katoꞌo modungka romo hi Saulu hei nohori loaꞌ to mantiꞌi, “Saulu, Saulu, mahamporeꞌi hinaꞌ ipoperima-rimaꞌA?”

⁵Notiꞌi hi Saulu, “HihimoKoto, Pueꞌ?” Nohoniꞌ, “Akumo hi Yesu, to ipoperima-rima!

⁶Meꞌaromoko hei noloumoko pe bolaꞌ ngkodeꞌ. Inoꞌo hingkiꞌ nipowutekiko hapo to hangangaa iwali.”

⁷Loaꞌ to nohori hi Saulu tiꞌo, rohori woꞌo awana, angkana hawaꞌi uwaꞌ to roꞌokiꞌ. Iomo hinaꞌ motehuꞌhi hei hamboaꞌmohi himpowiharo.

⁸Katoꞌo, metotiꞌimo hi Saulu. Nowuraꞌ matane, angkana hamboaꞌmo pangkiꞌ. Iomo hinaꞌ nirandaromo nolou pe kota Damasi.

⁹Tolu andona komoruene hawaꞌi pangkiꞌ, hei hawaꞌi woꞌo mangka ba maꞌinu.

¹⁰I bolaꞌ ngkodeꞌ Damasi, uwaꞌ haduo toaꞌ to mepoꞌohi pe Pueꞌ Yesu, konaꞌna hi Anania. Io pangkiꞌ peponoꞌokiꞌi ka Pueꞌ. I lali peponoꞌokiꞌi tiꞌo, Pueꞌ Yesu mowowoiꞌi Notiꞌi, “Anania!” Mehoniꞌ Hi Anania notiꞌi, “Hieꞌeluꞌa, Pueꞌ.”

¹¹Notiꞌi Pueꞌ, “Noloumoko hinewowoꞌena pe tambina hi Yudas i hiri lala to rokokeneꞌi Lala Mononto. Ipaliꞌ i tambi tiꞌo haduo toaꞌ ka bolaꞌ ngkodeꞌ Tasu konaꞌna hi Saulu. Toaꞌ tiꞌo hingkiꞌ ihua kolentuꞌana mekokae,

¹²hei i lali peponoꞌokiꞌi, hi Saulu pangkiꞌ hi Anania, hupaꞌ mampohidupaꞌki hei mopalaꞌ matana hingkeꞌna pangkiꞌi huliꞌ.”

¹³Nohoniꞌ hi Anania, “Pueꞌ, woriꞌ toaꞌ mampololita noniuꞌ hi Saulu tiꞌo. Makaja mpololeke kopampopoꞌioꞌione toaꞌMu i kota Yerusale.

¹⁴Hei io mehupaꞌ woꞌo iseꞌe, alaꞌ nipaꞌaniꞌi kuasaꞌ ka tutuꞌ tadulako-tadulako mpenomba hingkeꞌna mohokiꞌi lekiꞌ-lekiꞌna toaꞌ to mepoꞌohi pe Ingko.”

¹⁵Notiꞌi womo Pueꞌ Yesu pe hi Anania, “Hangangaa nolouko! Alaꞌ hi Saulu tiꞌo Kutungkaimo Kuꞌuwiꞌ mewali topajamangKu. Io hingkiꞌ mampetiꞌiki konaꞌKu pe to handoꞌio toYahudi hei pe datu-datu wute-wute woꞌo pe toSaraeli.

¹⁶Hingkiꞌ Kutidoꞌki komaporiꞌ to hangangaa nohua, hingkeꞌna moliu i komaporiꞌ tiꞌo woriꞌ toaꞌ pobahaꞌ Aku.”

¹⁷Katoꞌo noloumo mpuꞌu hi Anania pe tambi to notiꞌi Pueꞌ Yesu hingkonia, hei nopalaꞌmo matanehi Saulu, notiꞌi, “Saulu, halalingku! Kohumeimu i hieꞌe, iꞌokiꞌmo Pueꞌ Yesu i lumbu lala. Iomo to morumbaꞌa humei mampekokaekiko hingkeꞌna pangkiꞌmoko huliꞌ hei nokuasaꞌiko Inohaꞌ Mangkolehi.”

¹⁸I tempo tiꞌo, uwaꞌ mpuꞌu to hibali rupuꞌ kowiloha to moꞌonoꞌ ka matana, hei hampale pangkiꞌ romo hi Saulu. Hei metotiꞌimo hei kaliuꞌ noriu hi Anania.

¹⁹Uko tiꞌo, mangkamo hei marohomo huliꞌ wotane. Bahaꞌumbora ando komoruene, hi Saulu moꞌawa-awa hante to mepoꞌohi i kota Damasi.

²⁰I bolaꞌ ngkodeꞌ Damasi, io kaliuꞌ nolou pe tambi-tambi penombahara toYahudi, itoꞌo io mampowute kareba noniuꞌ hi Yesu notiꞌi, “Hi Yesu iomo Anaꞌna Pueꞌ Ala.”

²¹Helehi mpuꞌu toaꞌ to pahori lolitana hi Saulu, rotiꞌi, “Hohumboreꞌi hieꞌe? Alaꞌ hampiha iomo to morokoꞌ toaꞌ-toaꞌ to menomba pe hi Yesu i Yerusale. Hei tungkaihana humei iseꞌe, hingkeꞌna mohokiꞌi woꞌo toaꞌ to mepoꞌohi pe hi Yesu to uwaꞌ iseꞌe, honiꞌi nokomihi pe tutuꞌ tadulako-tadulako mpenomba i Yerusale.”

²²Angkana komaroho-rohoa ohi pepoturuꞌne hi Saulu, iomo hinaꞌ wulihi toYahudi to uwaꞌ i Damasi, alaꞌ pepoturuꞌna tiꞌo mampokononto mpuꞌu kohiYesuna Datu Topohompoꞌ.

²³Bahaꞌumbora ando komoruene katoꞌo, mogombomohi toYahudi hingkiꞌ morokoꞌ hi Saulu.

²⁴Tungkaihara hingkeꞌna mampoꞌodaꞌhi lekiꞌ-lekiꞌna wambaꞌ bente kota, moromiꞌ ando hei wini, hingkeꞌna ane moliuꞌi hi Saulu, hingkiꞌ rorokoꞌ. Angkana tungkaihara tiꞌo nobahaꞌ hi Saulu.

²⁵Horiana i hamini tiꞌo, haꞌumbora duo awana hi Saulu mangkomiꞌi nolou pe bente kota to motuleliꞌi Damasi. Itoꞌo hi Saulu ropopahura i lali rota, honiꞌi roꞌulu ka salewaꞌ bente kota wute i woiꞌ i huwali kota.

²⁶Mahuliꞌmo hi Saulu nolou pe Yerusale.[16] Ikohupaꞌna itoꞌo, dokoꞌ mohaꞌanu hante toaꞌ to mepoꞌohi pe hi Yesu, angkana motehuꞌhi pe hi Saulu, alaꞌ hawaꞌi tene ropoꞌohi pepoꞌohinemo pe hi Yesu.

²⁷Angkana hi Baraba nobahaꞌ hi Saulu, hei nopoꞌowonimo nolou pe suro-surona Pueꞌ Yesu. Hi Baraba mampokonontokihi hohumbo hi Saulu pangkiꞌ Pueꞌ Yesu i lumbu lala konolouna pe Damasi, hei hohumbo Pueꞌ mololita pe io. Nopowutekihi woꞌo kowuranina hi Saulu mampowute kareba noniuꞌ Pueꞌ Yesu i Damasi.

²⁸Katoꞌo hi Saulu meꞌohaꞌ moꞌawa hante iohi hei noloumo pe humanele kota Yerusale mampowute kareba noniuꞌ Pueꞌ Yesu hante hawaꞌi uwaꞌ komotehuꞌna.

²⁹Io mololita hei momehoniꞌ hante toYahudi to mowiharo Yunani. Iomo hinaꞌ toYahudi tiꞌo mampaliꞌhi nturusi lala morokoꞌ hi Saulu.

³⁰Katoꞌo Ikorobahaꞌna halali hampepoꞌohira tungkaihare toaꞌ tiꞌo, rowonamo nolou pe kota Kaisarea. Ka Kaisarea, ropopewotumo nolou pe kota Tasu.

³¹I tempo tiꞌo, toaꞌ to mepoꞌohi pe Pueꞌ Yesu hamboaꞌmo nipopoꞌioꞌio i woiꞌ Yudea, Galilea hante Samaria. Terononihimo koworiꞌre to mepoꞌohi pe hi Yesu, hei komaroho-rohoa pepoꞌohire, alaꞌ mengkoruꞌmohi mpuꞌu pe Pueꞌ Ala, hei Inohaꞌ Mangkolehi mampokaroho lalira.

³²I hampiha tempo, hi Peturuꞌ matengkaꞌ pe imbo-imbolu mokadoroꞌi toaꞌna Pueꞌ Ala. I patengkaꞌana tiꞌo io maweo i bolaꞌ Lida, hingkeꞌna mampemehuakiꞌi toaꞌna Pueꞌ Ala to meꞌohaꞌ itoꞌo.

³³I bolaꞌ Lida, io pahua haduo tomaꞌani to nikokeneꞌi hi Enea. Hi Enea tiꞌo, walu ntoꞌamo kohu, hawaꞌi meꞌaro-aro ka koturuana.

³⁴Notiꞌi hi Peturuꞌ pe hi Enea, “Enea, Yesu Kerisitu mampokoꞌoriꞌko! Peꞌaromo hei metotiꞌimoko, ilulumo aliꞌma.” I tempo tiꞌolumo kaliuꞌ metotiꞌi hi Enea.

³⁵Lekiꞌna toaꞌ to meꞌohaꞌ i bolaꞌ Lida hante i bolaꞌ-bolaꞌ to uwaꞌ i ngamba Saro, roꞌokiꞌmo komoꞌoriꞌne hi Enea, katoꞌo mepoꞌohimohi pe Pueꞌ Yesu.

³⁶Hawaꞌi moꞌela ka bolaꞌ Lida, uwaꞌ woꞌo haꞌanu kota to nikokeneꞌi Yope. I Yope, uwaꞌ haduo towoweꞌe to mepoꞌohi pe hi Yesu, konaꞌna hi Tabita. (I wiharo Yunani konaꞌna hi Doka, palaihana: lagiwa.) Moromiꞌ mpololeke waliane hei io mosulungi nturusi toaꞌ to merima-rima.

³⁷I tempo tiꞌo, io mohakiꞌ wute mahi. Ukomo rondiu, wotane roꞌuliꞌmo i koturuana i kamaraꞌ to i tanti.

³⁸Bolaꞌ Yope hawaꞌi moꞌela ka bolaꞌ Lida. Ikorohorinalu topetuntuna hi Yesu, hi Peturuꞌ uwaꞌ i Lida rorumbaꞌmo meroduo toaꞌ to mepoꞌohi i Yope nolou pe hi Peturuꞌ hante pepaha, “Hohiꞌko humei”

³⁹Katoꞌo hi Peturuꞌ molaimo mpuꞌu nolou moꞌawa hante iohi. Kohupaꞌna i Yope, liu-liu rokomi nolou pe koturua konipowatana hi Doka. Lekiꞌna towoweꞌe tobembaꞌ molimbuꞌ hi Peturuꞌ, meꞌolamohi hei rotidoꞌkimo hi Peturuꞌ parewa to norau hi Doka i tempona tene tuwuꞌ.

⁴⁰Angkana hi Peturuꞌ morumbaꞌ lekiꞌ-lekiꞌna toaꞌ mesuwu ka kamaraꞌ, katoꞌo io melingkotuꞌmo hei mekokae. Uko mekokae, nohinoroimo to mahi tiꞌo, notiꞌi, “Tabita, meꞌaromoko!” Katoꞌo mematomo hi Doka. Ikopangkiꞌnalu hi Peturuꞌ, io meꞌaro liu mahura.

⁴¹Katoꞌo hi Peturuꞌ motiko korawena hei nohini i korawena wute metotiꞌi. Uko tiꞌo, nowowoimo huliꞌ lekiꞌ-lekiꞌne toaꞌna Pueꞌ Ala hante tobembaꞌhi to itoꞌo, notiꞌikihi, “Hieꞌemo halalimi to tuwuꞌ huliꞌ.”

⁴²Hapo to mewali to itoꞌo ropololitamo pe humanele kota Yope, koꞌukoana woriꞌ toaꞌ mepoꞌohi pe Pueꞌ Yesu.

⁴³Uko tiꞌo, hi Peturuꞌ meꞌohaꞌ i Yope haꞌumbora ando komoruene. Io meꞌohaꞌ i tambina hi Simo, haduo to mowali mampopengaa parewa ka koliꞌ pinatuwuꞌ.