Read Rampi Roma 1 Bible Online

Roma 1 - Rampi bible

Roma 1

¹Pe tosarani i kota Roma Suraꞌ hieꞌe ka aku hi Paulu, rumbaꞌana Yesu Kerisitu, to Noꞌuwiꞌ mewali suroNa mampowute Kareba Moromiꞌ to ka Pueꞌ Ala.

²Hampiha, Pueꞌ Ala modandimo moliu i nabi-nabi noniuꞌ Kareba Moromiꞌ, hei tiꞌo to teꞌukiꞌ i lali Suraꞌ Mangkolehi.

³Kareba Moromiꞌ tiꞌo noniuꞌ Anaꞌna Pueꞌ Ala, Pueꞌta Yesu Kerisitu. Motuntuni konipoꞌanaꞌkiNa, Io haduo muleꞌna datu Daudi.

⁴Angkana hi Yesu Iomo woꞌo Anaꞌna Pueꞌ Ala, hei Io mangkolehi hibali Pueꞌ Ala. Mambaha lekiꞌ-lekiꞌna tiꞌo, alaꞌ Pueꞌ Ala mampotuwuꞌ huliꞌ ka komahia. Iomo Pueꞌta Yesu Kerisitu!

⁵Alaꞌ kohiYesuna, Pueꞌ Ala mampaꞌaniꞌa woriꞌ pebarakati, horiana Nohiniꞌa mewali suroNa, hingkeꞌna aku to mampowute Kareba Moromiꞌ pe humanele duniaꞌ i toaꞌ to handoꞌiohi toYahudi, hingkeꞌna mepoꞌohihi hei mengkoruꞌhi pe Pueꞌ Yesu, wute konaꞌNa nipokodeꞌ.

⁶Hatoꞌo woꞌo ingkei tosarani to i Roma. Koworiꞌami handoꞌiokei toYahudi, angkana Pueꞌ Ala mowowoikei woꞌo mewali toaꞌna Yesu Kerisitu.

⁷Iomo horiana kupokatu suraꞌ hieꞌe pe ingkei. Pueꞌ Ala mampokarimakei hei mowowoikei mewali toaꞌNa. Hinamo Pueꞌ Ala Umoꞌta hei Pueꞌ Yesu Kerisitu mobarakatikei ka kopopuhiꞌna laliNa hei mampaꞌanikei Romiꞌ Ngkotuwuꞌ.

⁸Uluꞌ-uluꞌna, kutiꞌi woriꞌ komoromiꞌna Pueꞌ Ala alaꞌ koꞌingkeina halali-halali. Kutiꞌi hatoꞌo alaꞌ komarohona pepoꞌohimi pe Pueꞌ Yesu tekarebamo i humanele duniaꞌ.

⁹Ka lalingku mpololeke mampopatengkaꞌa jama to nopaꞌanikiꞌa Pueꞌ Ala. Jamangku tiꞌo, mampowute Kareba Moromiꞌ noniuꞌ AnaꞌNa. Hei Pueꞌ Ala to mosobiꞌi kokuponindimi nturusi i lali pekokaengku.

¹⁰Kuperapiꞌ i lali pekokaengku, woiwoina Nopaꞌaniꞌa tempo ako mangkohidupaꞌkikei.

¹¹Kukodokoꞌi mpololeke mampohidupaꞌkikei, hingkeꞌna moliu i aku, hingkiꞌ pahuakei pebarakati to ka Inohaꞌ Mangkolehi to hingkiꞌ mampokaroho pepoꞌohimi.

¹²Tungkaihangku hingkeꞌna wadiki momepokaroho lali, alaꞌ hibobalimoki mepoꞌohi pe Yesu Kerisitu.

¹³Halali-halali, kotuꞌuana woriꞌ mpiha kukodokoꞌi mangkohidupaꞌkikei, angkana poko uwaꞌ to mosalemporiꞌa. Tungkaihangku ako mangkohidupaꞌkikei, hingkeꞌna uwaꞌ wuaꞌne pajamangku i kotami, hibali wuaꞌna pajamangku i lumbuna toaꞌhi to handoꞌiohi toYahudi i bolaꞌ-bolaꞌ ntaniꞌna.

¹⁴Alaꞌ paraluꞌa mampowute Kareba Moromiꞌ pe lekiꞌ-lekiꞌna toaꞌ, moromiꞌ pe toYunani hei to handoꞌio toYunani, moromiꞌ to mosikolaꞌ hei to hawaꞌi mosikolaꞌ.

¹⁵Iomo horiana kukodokoꞌi mpololeke mampowute woꞌo Kareba Moromiꞌ pe toaꞌ to uwaꞌ i Roma.

¹⁶Hawaꞌa mohili mampowute Kareba Moromiꞌ, alaꞌ moliu Kareba Moromiꞌ tiꞌo, Pueꞌ Ala mampopebahaꞌ kuasaꞌNa mamposalamaꞌ toaꞌ to mepoꞌohi ka pehuku dosara, uluꞌ-uluꞌna toYahudi, wute-wute woꞌo toaꞌ to handoꞌiohi toYahudi.

¹⁷Ka Kareba Moromiꞌ tiꞌo, tobahaꞌ hohumbo lalane hingkeꞌna nipomodameki mahuliꞌ hante Pueꞌ Ala. Lalana waheꞌe: mewaliki modame hante Pueꞌ Ala nokomi pepoꞌohinta pe Io. Hawaꞌi uwaꞌ lala ntaniꞌna, alaꞌ i lali Suraꞌ Mangkolehi teꞌukiꞌmo waheꞌe: Toaꞌ to nipomodame hante Pueꞌ Ala, iomohi to salamaꞌ alaꞌ pepoꞌohira.

¹⁸Ka suruga, Pueꞌ Ala hadoduoNa mampomombaha kobukotaNa alaꞌ lekiꞌ-lekiꞌna dosa to uwaꞌ i lalina toaꞌ hei lekiꞌ-lekiꞌna waliara to kodake. Alaꞌ nokomi waliara to kodake tiꞌo, toaꞌ hawaꞌhi pobahaꞌ poturuꞌ to tuꞌu.

¹⁹Hapo to paralu nobahaꞌ manusiaꞌ noniuꞌ Pueꞌ Ala mambahamo, alaꞌ Pueꞌ Ala hadoduoNa to mampokonontokihi.

²⁰Kehapoꞌi hawaꞌi toꞌokiꞌ noniuꞌ Pueꞌ Ala, angkana ka pewalina duniaꞌ, toaꞌ pobahaꞌ koꞌuwaꞌna Pueꞌ Ala, alaꞌ ka lekiꞌ-lekiꞌna to Nopopewali, mambahamo komanobaꞌna tuwuꞌNa, hei mombaha woꞌo kuasaꞌNe to hawaꞌi mokoꞌukoa. Mewaliꞌ, hawaꞌi uwaꞌ toaꞌ to wadi mosapuaka lekiꞌ-lekiꞌna tiꞌo.

²¹Kehapoꞌi robahaꞌ mpololeke koꞌuwaꞌne Pueꞌ Ala, angkana hawaꞌi roꞌadaꞌi, hei hawaꞌi woꞌo ropokodeꞌ. Pampekirira hawaꞌi modumbuꞌ hei lalira mokorindi hante moꞌelahi ka Pueꞌ Ala.

²²Rorekeꞌ mapandehi, hantaro bebehi!

²³Hawaꞌhi hiniꞌ menomba pe Pueꞌ Ala to tuwuꞌ wute nantolou-louna. Menombahi pe lente to rowali hadoduora motuntuni lentena toaꞌ, lentena tinti, ule ba pinatuwuꞌ ntaniꞌna to hampaiꞌlu kotuwuꞌre i duniaꞌ hieꞌe.

²⁴Mewaliꞌ, alaꞌ kobebera tiꞌo, iomo horiana nopotedehihi Pueꞌ Ala motuntuni peleihana lalira to kodake, koꞌukoana mowalihi dosa to mekokomaꞌi hei mepokohili hante hangko awara.

²⁵Hawaꞌhi mampoꞌohi hapo to tuꞌu noniuꞌ Pueꞌ Ala, angkana wuliha mampoꞌohihi hapo to salaꞌ. Hawaꞌhi hiniꞌ menomba pe Pueꞌ Ala to mowalihi. To ropenombai hante to ropengkoruꞌi wuliha to nowali Pueꞌ Ala. Hantaro kotuꞌuana, Tomowali wae to hangangaa topokodeꞌ wute nantolou-louna. Amin!

²⁶Mewaliꞌ, nokomi kohawaꞌra hiniꞌ menomba pe Pueꞌ Ala, angkana menombahi pe to ntaniꞌna, iomo horiana Nopotedehimohi motuntuni peleihana lalira to mepokohili tiꞌo, wute-wute i towoweꞌe mampomaꞌani hangko towoweꞌena.

²⁷Hatoꞌo woꞌo tomaꞌani: mampohantambi hangko tomaꞌaniana. Tomaꞌani mowali walia to hawaꞌi masipatoꞌ i hangko tomaꞌanira, hei walia tiꞌo mepokohili. Koꞌukoana, pahuahi pehuku to hintotoꞌ hante waliara to masalaꞌ mpololeke tiꞌo.

²⁸Nokomi kohawaꞌra hiniꞌ mopangakuꞌ Pueꞌ Ala i lali pekirira, iomo horiana nopotedehimo Pueꞌ Ala pekirire mewali kodake, koꞌukoana mowalihi to hawaꞌi masipatoꞌ.

²⁹Woriꞌ langkaꞌ dosa hante pekiri to hawaꞌi mononto i lalira. Hawaꞌhi pangkororeina, mampokarugiꞌ toaꞌ, mowahiꞌhi, merorokoꞌhi, mosisalaꞌhi, mowutihi, momekabiriꞌhi hante mangkomi-komihi lolita.

³⁰Mampokodakehi toaꞌ, mampokoiꞌhi Pueꞌ Ala, hawaꞌhi poꞌadaꞌ, mampokokodeꞌhi, mampetoꞌuwaꞌhi, Mampaliꞌhi lala to wolaꞌ mowali to kodake. Hawaꞌhi mengkoruꞌ pe tomotodira.

³¹Hawaꞌhi hiniꞌ motuntuni peleihana Pueꞌ Ala, hawaꞌhi mampekiri toaꞌ ntaniꞌna hawaꞌhi mampobuhoꞌi dandira, hawaꞌhi marima pe hangko awara, hawaꞌhi monindi pe hangko awara.

³²Pobahaꞌhi mpololeke aturana Pueꞌ Ala to mantiꞌi hihimolu to hatoꞌo, hangangaa nihuku mahi. Angkana kehapoꞌi hatoꞌo, mowaliluhi nturusi walia to kodake tiꞌo, hei handoꞌio tiꞌolu, iohi woꞌo mampotanaꞌhi toaꞌ to mowali to kodake.