Read Rampi Roma 10 Bible Online

Roma 10 - Rampi bible

Roma 10

¹Halali hampepoꞌohingku! Kulei mpololeke hingkeꞌna hangko toSaraelingku niposalamaꞌhi ka pehuku dosara. Iomo horiana ka lalingku mpololeke kupekokaekihi nturusi pe Pueꞌ Ala.

²Kusobiꞌimo kotuwuꞌre, hei kubahaꞌ mpololeke modotohi majama pe Pueꞌ Ala angkana hawaꞌi maniuꞌ koropopatengkaꞌne jamara tiꞌo.

³Hawaꞌhi mampetuntui lala to mononto to nopatimomomo Pueꞌ Ala, iomo lala to mampodamehi hante Pueꞌ Ala, angkana motuntuniluhi lalara hadoduora. Mangkodokoꞌihi hingkeꞌna modame hante Pueꞌ Ala nokomi kopampetuntuira Aturana hi Musa.

⁴Kohupaꞌna Yesu Kerisitu, Aturana hi Musa hamboaꞌmo modumbuꞌ, iomo horiana, hihimolu to mepoꞌohi pe Yesu Kerisitu, hingkiꞌ modame hante Pueꞌ Ala.

⁵Uwaꞌ lolitane nabi Musa hampiha noniuꞌ i Aturana to mantiꞌi waheꞌe: “Himolu to mampetuntui, iomo to hingkiꞌ pahua kotuwuꞌ to wolaꞌ ka Atura tiꞌo.” [19]

⁶Angkana uwaꞌ tene lolitane hi Musa to mantiꞌi: hinewowoꞌena mewalimoki modame hante Pueꞌ Ala alaꞌ pepoꞌohinta. Teuꞌkiꞌ waheꞌe: Inioꞌ i lalimi mantiꞌi: himo to hangangaa mengkaꞌoreꞌ nolou pe suruga, hei himo woꞌo to hangangaa mengkohou pe peꞌohaꞌa to mahi? [20] Palaihana: hawaꞌki paralu mehendeꞌ nolou pe suruga ako moroa Kerisitu mengkohou humei, hei hawaꞌki paralu mengkohou hei moꞌoreꞌ Kerisitu ka peꞌohaꞌa to mahi.

⁸Alaꞌ hi Musa woꞌo to mantiꞌi waheꞌe: Karebana Pueꞌ dodungku mpololeke i ingkei. Kareba tiꞌo ipoꞌilalikei hei ipangakuꞌkei woꞌo. [21] Kareba to hibali tiꞌomola to kipowute hieꞌe: lekiꞌ-lekiꞌna toaꞌ hangangaa mepoꞌohi pe Pueꞌ Ala.

⁹Alaꞌ ane ipangakuꞌkei i hinarona toaꞌ ntaniꞌna: Hi Yesu iomo Pueꞌ, hei ane ipoꞌohikei i lalimi Pueꞌ Ala mampotuwuꞌ huliꞌ hi Yesu ka komahia, bateꞌna hingkiꞌ Noposalamaꞌkei.

¹⁰Alaꞌ pepoꞌohinta pe hi Yesu to ka lalinta mpololeke, iomo horiana norekeꞌmoki Pueꞌ Ala modame hante Io. Hei nokomi kotopangakuꞌnamo hi Yesu, iomo horiana tehompoꞌmoki ka pehuku dosanta.

¹¹I lali Suraꞌ Mangkolehi teꞌukiꞌ waheꞌe: himolu to mepoꞌohi pe Io, pepohinarura hingkiꞌ tebuhoꞌi. [22]

¹²To teꞌukiꞌ tiꞌo, bateꞌna noniuꞌ i lekiꞌ-lekiꞌna toaꞌ, alaꞌ hawaꞌi uwaꞌ poꞌoriane toYahudi hante toaꞌ to handoꞌio toYahudi. Haduolu Pueꞌte, hei kodeꞌ rimaNa pe lekiꞌ-lekiꞌna toaꞌ to merapiꞌ sulungi pe Io hingkeꞌna tehompoꞌhi.

¹³Alaꞌ i lali Suraꞌ Mangkolehi, teꞌukiꞌ waheꞌe: Himolu to medodoeꞌ pe Pueꞌ, bateꞌna salamaꞌhi ka pehuku dosara. [23]

¹⁴Angkana hohumboreꞌi kopedodoeꞌre pe Pueꞌ Yesu ane handoaꞌhi tene mepoꞌohi? Hohumbomo woꞌo kohingkiꞌ mepoꞌohire pe Pueꞌ Yesu, ane handoaꞌhi tene pahori Kareba Moromiꞌ? Hohumbomo woꞌo kohingkiꞌ pahorire Kareba Moromiꞌ, ane hawaꞌi uwaꞌ toaꞌ to mampowutekihi?

¹⁵Hei hohumboreꞌi kohingkiꞌ ropowutene, ane hawaꞌi uwaꞌ toaꞌ to norumbaꞌ Pueꞌ Ala? Hibali to teꞌukiꞌ hampiha i lali Suraꞌ Mangkolehi: Moromiꞌ mpololeke kohupaꞌre toaꞌ to mampowute kareba to moromiꞌ to ka Pueꞌ Ala! [24]

¹⁶Uwaꞌmo toaꞌ to nirumbaꞌ mampowute Kareba Moromiꞌ, angkana hawaꞌi lekiꞌ-lekiꞌna toaꞌ to mantorimo Kareba Moromiꞌ tiꞌo. Hibali to notiꞌi nabi Yesaia hampiha waheꞌe: Pueꞌ, uwaꞌhireꞌi intu to mepoꞌohi i kareba to kipowute? [25]

¹⁷Mewaliꞌ, toaꞌ hangangaa mampehoromuahi duluna Kareba Moromiꞌ, honiꞌi ropoꞌohi, alaꞌ uwaꞌ toaꞌ to mampowutekihi. Hei Kareba Moromiꞌ tiꞌo iomo kareba noniuꞌ i Kerisitu.

¹⁸Io horiana, kupeꞌitanoki: Ba Kareba Moromiꞌ tiꞌo handoaꞌi tene rohori toSaraeli? Mononto rohorimo, alaꞌ i lali Suraꞌ Mangkolehi teꞌukiꞌ waheꞌe: Kareba tiꞌo tehaworimo pe humanele duniaꞌ. Kareba tiꞌo nipowutemo pe lekiꞌ-lekiꞌna toaꞌ. [26]

¹⁹Io horiana kutiꞌi: Bateꞌna robahaꞌmo toSaraelihi, alaꞌ iomohi to uluꞌ-uluꞌne pahori lolitana Pueꞌ Ala to nopowute nabi Musa hampiha, to mantiꞌi waheꞌe: Ingkei toSaraeli, hingkiꞌ Kupomohiriꞌkei i toaꞌ to handoꞌiohi toSaraeli. Hingkiꞌ bukotakei pe toaꞌ to itiꞌikei bebe. [27]

²⁰Hei motari mpololeke lolitane nabi Yesaia i pampowutena pohawaꞌna Pueꞌ Ala to mantiꞌi waheꞌe: Toaꞌ to hawaꞌi mampaliꞌA, iohi to pahuaꞌA. Hei Kupomombahamo kohihimongKu pe toaꞌ to hawaꞌi mampetanoki kohihimongKu. [28]

²¹Angkana noniuꞌ i toSaraeli, Pueꞌ Ala mantiꞌi waheꞌe: Moruemohi Kupekau hingkeꞌna Kukolopuihi, angkana hawaꞌhi hiniꞌ mehupaꞌ, alaꞌ morintodi nturusi lalire. [29]