Read Rampi Roma 11 Bible Online

Roma 11 - Rampi bible

Roma 11

¹Mewaliꞌ, kupeꞌitanoki: Ba Pueꞌ Ala mosapuakaka woꞌo lekiꞌ-lekiꞌna toSaraeli? Hawaꞌi! Mambaha ka kotuwuꞌku hadoduongku. Aku hieꞌe toSaraeliꞌa, muleꞌna hi Burahima ka toBenami.

²Pueꞌ Ala hawaꞌi mosapuaka lekiꞌ-lekiꞌna toSaraeli to Noꞌuwiꞌmo ka uluꞌ-uluꞌna. Hangangaa ikolowoikei lolitonane nabi Elia to teꞌukiꞌ i lali Suraꞌ Mangkolehi. Tempona nabi Elia mosalaꞌi toSaraeli i hinarona Pueꞌ Ala,[30] notiꞌi:

³Pueꞌ, iohi to morokoꞌ nabi-nabiMu, hante mokerohi woꞌo potutua popenombangki pe Ingko. To tuwuꞌ aku romo, hei ropaliꞌa woꞌo hingkeꞌna rorokoꞌa! [31]

⁴Hapo pehoniꞌne Pueꞌ Ala? Notiꞌi waheꞌe: Inioꞌ ipekiri ingko romo to motuntuniꞌA, angkana uwaꞌhi tene pitu sabu nabi to Kupopelobi. Iohi tiꞌo, toaꞌKu, alaꞌ hawaꞌhi kahampiha melingkotuꞌ mampenombai lomoa to nikokeneꞌi Baal.

⁵Hatoꞌo woꞌo hinewowoꞌena, Kehapoꞌi woriꞌ toSaraeli hawaꞌi mepoꞌohi pe hi Yesu, angkana uwaꞌhi tene to Nopelobi alaꞌ noꞌuwiꞌmohi Pueꞌ Ala alaꞌ kopopuhiꞌna laliNa,

⁶handoꞌio alaꞌ komoromiꞌna waliara. Ane Noꞌuwiꞌhi alaꞌ waliara to moromiꞌ, palaihana hawaꞌhi Noꞌuwiꞌ alaꞌ kopopuhiꞌna laliNa.

⁷Mewaliꞌ, hangkokiuꞌhi toSaraeli to noꞌuwiꞌ Pueꞌ Ala, honiꞌhi mewali modame hante Io, hohumbomohi to ntaniꞌne? Nopomorintodiꞌi Pueꞌ Ala lalire horiana hawaꞌhi pahori pewowoiNa.

⁸Alaꞌ i lali Suraꞌ Mangkolehi teꞌukiꞌ waheꞌe: Pueꞌ Ala mampomorintodi lalira, hingkeꞌna hawaꞌhi hohumbo pangkiꞌ, hei hawaꞌhi pahori. [32]

⁹Kukolowoi woꞌo lolitane datu Daudi hampiha noniuꞌ i hangko toYahudina to mewali poniꞌna to mantiꞌi: Mekokaeꞌa pe Pueꞌ Ala, hingkeꞌna i lali posusaꞌ hei komotanaꞌra tiꞌo hingkiꞌ mampomonawuꞌhi, horiana pahuahi kohorewuꞌ hante pehuku.

¹⁰Hinamo Nopomokorindi lalire hingkeꞌna hawaꞌhi pobahaꞌ hapo to tuꞌu. Hinamo Nopomaporiꞌhi malentu komasusa. [33]

¹¹Katoꞌo, kupeꞌitanoki womo: woriꞌ toSaraeli madosa alaꞌ hawaꞌhi mepoꞌohi pe hi Yesu, ba palaihana tekaꞌahi ka Pueꞌ Ala wute nantolou-louna? Hawaꞌi. Alaꞌ dosara toSaraeli tiꞌo, toaꞌ to handoꞌiohi toSaraeli Noposalamaꞌhi, hingkeꞌna toSaraelihi mohiriꞌhi pe toaꞌ to handoꞌiohi toSaraeli.

¹²Nokomi komadosara toSaraeli, woriꞌ to handoꞌiohi toSaraeli i humanele duniaꞌ pahua pebarakati tiꞌo. Mewaliꞌ morasiꞌhi toaꞌ to handoꞌio toSaraeli alaꞌ toSaraeli hawaꞌhi mepoꞌohi. Ane toSaraeli mengkatobaꞌ hei mahuliꞌhi pe Pueꞌ Ala, pedeꞌ morasiꞌhi mpololeke toaꞌ i duniaꞌ!

¹³Ingkei to handoꞌiokei toYahudi, hingkeꞌna ibahaꞌkei aku hieꞌe surona Pueꞌ Yesu to Norumbaꞌ mampowute Kareba Moromiꞌ pe ingkei to handoꞌiokei toYahudi. Jama hieꞌe kuperenaki mpololeke io horiana kupopatengkaꞌ moromiꞌ,

¹⁴alaꞌ kubahaꞌ kohingkiꞌ uwaꞌna hangko toYahudika to hingkiꞌ mowahiꞌ alaꞌ wuaꞌna pajamangku, koꞌukoana rokodokoꞌi woꞌo mepoꞌohi. Hante lala tiꞌo, uwaꞌhi ka lumbura to kuposalamaꞌ.

¹⁵Alaꞌ toYahudihi hawaꞌi notorimo Pueꞌ Ala, uwaꞌmo lala i lekiꞌ-lekiꞌna toaꞌ i humanele duniaꞌ hingkeꞌna modamehi hante Pueꞌ Ala. Hapona lekemo ane Pueꞌ Ala mantorimo huliꞌ toYahudihi, hibalihi to mahi to nipatuwuꞌ huliꞌ.

¹⁶Kehapoꞌi haꞌanulu roti nipopenomba pe Pueꞌ Ala, lekiꞌ-lekiꞌna roti tiꞌo mewali mangkolehi. Hatoꞌo woꞌo, ane uwakaꞌna moromiꞌ, daꞌana woꞌo hingkiꞌ moromiꞌ alaꞌ pongkana ka uwakaꞌna.

¹⁷ToYahudi nipandiriꞌhi hibali daꞌa-daꞌa loti Saitu to rorewahi. Daꞌana hantenaꞌ nipopolai, hei potebaꞌana tiꞌo Nopodokiꞌi Pueꞌ Ala daꞌa loti Saitu to hawaꞌi nirewahi, hingkeꞌna daꞌa loti tiꞌo tuwuꞌ ka uwakaꞌna loti to nirewahi. Daꞌa to Nopopedokiꞌ tiꞌo, iomo ingkei to handoꞌiokei toYahudi.

¹⁸Angkana halali-halali, inioꞌkei mampokokodeꞌ. Inioꞌkei mosalaꞌi toYahudi to nipandiriꞌ hibali daꞌa loti to nibokuꞌ tiꞌo. Hangangaa iponindikei: ingkei nipandiriꞌ hibali daꞌa loti to nipedokiꞌki, hei handoꞌio daꞌa loti to mampotuwuꞌ uwakaꞌne, bateꞌnalu uwakaꞌna to mampotuwuꞌ daꞌa loti.

¹⁹Ba uwaꞌ to hingkiꞌ mantiꞌi, “Daꞌa tiꞌo nibokuꞌ hingkeꞌna nipedokiꞌkika itoꞌo?”

²⁰Halali-halali, lekiꞌ-lekiꞌna tiꞌo tuꞌu, angkana hangangaa ikolowoikei: iohi nitube alaꞌ hawaꞌhi mepoꞌohi pe hi Yesu. Ingkei nipedokiꞌki, alaꞌ mepoꞌohikei. Io horiana inioꞌkei mampokokodeꞌ, angkana hangangaa iꞌadaꞌikei hei mengkoruꞌkei pe Pueꞌ Ala.

²¹Ane Pueꞌ Ala mampopolai daꞌana umbiꞌ iomo toYahudi, hapona lekemo ingkei to nipopedokiꞌlu.

²²Io horiana tobahaꞌ mpololeke komarimane Pueꞌ Ala, hei tobahaꞌ woꞌo komakajane pehukuNa. Monontomo koNohukune toaꞌ to hawaꞌi mepoꞌohi pe Pueꞌ Ala, angkana Nopokarimakei, ane mepoꞌohikei nturusi i komarimaNa. Angkana ane hawaꞌkei mepoꞌohi, hingkiꞌ Notubekei woꞌo!

²³Ane toYahudi to hawaꞌhi mepoꞌohi pe hi Yesu nohohoꞌhi ka kotara mepoꞌohi, iohi hingkiꞌ nopopedokiꞌhi huliꞌ Pueꞌ Ala, alaꞌ uwaꞌ kuasaꞌNe mampopedokiꞌhi huliꞌ.

²⁴Ane ingkei to nipandiriꞌ hibali daꞌa loti ka loti to hawaꞌi nirewahi, wadi nipopedokiꞌ i loti to nirewahi, hapo tene daꞌa loti ka loti to rorewahi wadi nipopedokiꞌ huliꞌ, alaꞌ umbiꞌ daꞌanahi loti tiꞌo.

²⁵Halali-halali! Kukodokoꞌi kutiꞌikikei hapo tungkaihane Pueꞌ Ala to tewuni hampiha i toaꞌ. Kutiꞌikikei hieꞌe hingkeꞌna inioꞌkei mampetomapande. Hingkeꞌna ibahaꞌkei: hinewowoꞌena hantangaꞌ toSaraeli morintodi tene lalire, hei komorintodina lalira tiꞌo hingkiꞌ mewali wute ganaꞌmo toaꞌ to handoꞌio toYahudi to nopokononto Pueꞌ Ala mewali toaꞌNa.

²⁶Mepongka katoꞌo, lekiꞌna toSaraeli hingkiꞌ Noposalamaꞌhi ka pehuku dosara. Hingkiꞌ tepobuhoꞌi hapo to teꞌukiꞌ hampiha i lali Suraꞌ Mangkolehi. Notiꞌi Pueꞌ Ala waheꞌe: Hampiha tempo, hingkiꞌ mehupaꞌ Topohompoꞌ ka Sion, hei Io hingkiꞌ mampomoꞌela lekiꞌ-lekiꞌna dosa ka muleꞌna hi Akoꞌ. [34]

²⁷Hieꞌemo podandingKa hante iohi: i tempo tiꞌo, hingkiꞌ Kuꞌampuni dosare. [35]

²⁸Hinewowoꞌena woriꞌ toYahudi mewali tene poniꞌna Pueꞌ Ala, alaꞌ hawaꞌhi hiniꞌ mampoꞌohi Kareba Moromiꞌ, horiana morasiꞌkei to handoꞌio toYahudi, to pahua kotehompoꞌ. Angkana kehapoꞌi hatoꞌo, toYahudi tiꞌo bateꞌra nopokarima nturusi Pueꞌ Ala, alaꞌ iomohi to Noꞌuwiꞌ hampiha motuntuni dandiNa i tododulura.

²⁹Ane Pueꞌ Ala moꞌuwiꞌ hei mobarakati toaꞌ, hawaꞌi tewolihi pekiriNe, hei pebarakati tiꞌo hawaꞌi hingkiꞌ Nobiniꞌ huliꞌ.

³⁰Ingkei to handoꞌiokei toYahudi, hampiha hawaꞌkei mengkoruꞌ pe Pueꞌ Ala, angkana hinewowoꞌena mantorimomokei komarimana Pueꞌ Ala alaꞌ pesapuakara toYahudi.

³¹Hatoꞌo woꞌo toYahudihi. Hinewowoꞌena woriꞌhi to hawaꞌi mengkoruꞌ pe Pueꞌ Ala, iomo horiana ingkei to handoꞌiokei toYahudi mantorimomokei komarimana Pueꞌ Ala. Angkana hampiha tempo, hingkiꞌ mantorimohi huliꞌ komarimana Pueꞌ Ala hibali hante ingkei.

³²Alaꞌ molungkaꞌiki aturaNa, Pueꞌ Ala motarungkuꞌki i lali dosa. Hante tiꞌo Pueꞌ Ala mampetidoꞌki kopopuhiꞌna laliNa pe ingkiꞌ lekiꞌ-lekiꞌta.

³³Kodeꞌ mpololeke komoromiꞌne Pueꞌ Ala! Kuladu mpololeke pekiriNe hei Nobahaꞌ lekiꞌ-lekiꞌna! Himoreꞌi toaꞌ to wadi moparesaꞌ pobutusiNa? Himoreꞌi toaꞌ to pobahaꞌ lekiꞌ-lekiꞌna tungkaihana waliaNa? Teꞌukiꞌ i lali Suraꞌ Mangkolehi waheꞌe:

³⁴Himoreꞌi toaꞌ to pobahaꞌ pekirine Pueꞌ Ala? Hei himoreꞌi to wadi mampoturuꞌI? [36]

³⁵Himoreꞌi to wadi mepaꞌani ba hapo-hapo pe Pueꞌ Ala hingkeꞌna Pueꞌ Ala hangangaa mohowoni woꞌo pe io? Hawaꞌi uwaꞌ howeꞌ haduo. [37]

³⁶Alaꞌ lekiꞌ-lekiꞌna to uwaꞌ, Nopopewali hei nokuasaꞌi Pueꞌ Ala, hingkeꞌna Iolu to nipokodeꞌ. Topokodeꞌmo Pueꞌ Ala wute nantolou-louna! Amin!