Read Rampi Roma 12 Bible Online

Roma 12 - Rampi bible

Roma 12

¹Mewaliꞌ, halali-halali, alaꞌ kokodeꞌna rimana Pueꞌ Ala i ingkiꞌ, iomo horiana kuperapiꞌ hingkeꞌna ipeweikei kotuwuꞌmi pe Pueꞌ Ala mewali popenomba to tuwuꞌ, to mangkolehi hei to mampomotanaꞌ laliNa, iomo lala mpenomba to masipatoꞌ pe Pueꞌ Ala.

²Inioꞌkei mampetuntui waliara toaꞌ to i duniaꞌ hieꞌe to hawaꞌhi mengkoruꞌ pe Pueꞌ Ala, angkana hinamo Pueꞌ Ala mowolaꞌi pekirimi hingkeꞌna tewolihi waliami. Alaꞌ ane iwalikei hatoꞌo, hingkiꞌ ibahaꞌkei mpololeke peleihane Pueꞌ Ala i lali kotuwuꞌmi: PeleihaNa to moromiꞌ to mampomotanaꞌ laliNa hei to masipatoꞌ.

³Alaꞌ kopopuhiꞌna laliNa, Pueꞌ Ala moꞌuwiꞌa hingkeꞌna mewaliꞌa suroNa, iomo horiana kupowutekikei lolita hieꞌe: inioꞌkei mampokokodeꞌ. Angkana pekirimi hangangaa hintotoꞌ hante kopebahaꞌ to nodolaꞌ-dolaꞌkikei Pueꞌ Ala, alaꞌ pepoꞌohimi pe hi Yesu.

⁴Pandiriꞌ, i wotanta woriꞌ dolaꞌna, angkana haꞌanu wotalu. Lekiꞌ-lekiꞌna dolaꞌna molangkaꞌ-langkaꞌ podumbuꞌane.

⁵Hatoꞌo woꞌo ingkiꞌ to mepoꞌohi pe Kerisitu: woriꞌki, angkana hawowotaluki alaꞌ pohintuwuꞌta hante Kerisitu, hei mohintuwuꞌki lekiꞌ-lekiꞌta haduo hei haduo.

⁶Haduo-haduoki pahua komapande to molangkaꞌ-langkaꞌ, motuntuni hapo to nopaꞌanikiki Pueꞌ Ala ka kopopuhiꞌna laliNa. Himo to pahua komapande mampowute lolitana Pueꞌ Ala, hangangaa mampololita hintotoꞌ hante pepoꞌohina.

⁷Himo to pahua kopebahaꞌ mosulungi hangko awana, hangangaa mesulungihi ka kopopuhiꞌna lalina. Himo to pahua komapande mepaguru, hangangaa mepaguru mpololeke.

⁸Himo to pahua kopebahaꞌ mampokaroho lalina hangko awana, hangangaa nopopatengkaꞌ ka lali-lalina. Himo to pahua kopebahaꞌ modolaꞌ-dolaꞌ hapo to uwaꞌ i io, hangangaa nopewei ka kopopuhiꞌna lalina. Himo to pahua komapande motadulakoi, hangangaa mewali tadulako to modoto. Hei himo to pahua kopebahaꞌ mowali to moromiꞌ hangangaa nowali hante komotanaꞌ.

⁹Ipokarimakei awami ka lalimi-lalimi. Ipohentekei waliami to kodake, hei mowaliakei nturusi walia to moromiꞌ.

¹⁰Momepokarimakei hei momeꞌadaꞌikei haduo hei haduo hibalikei topohalali.

¹¹Hangangaa modotokei majama, inioꞌkei lohe. Ipopatengkaꞌkei jamane Pueꞌ hante kopopuhiꞌna lalimi.

¹²Hangangaa motanaꞌkei alaꞌ pepohinaruami i lekiꞌ-lekiꞌna to hingkiꞌ nowalikikei Pueꞌ Ala. Mantahakei i lali komaporiꞌ. Modotokei mekokae.

¹³Isulungikei toaꞌne Pueꞌ Ala to uwaꞌ i lali komakuraꞌra. Hangangaa motanaꞌkei mantorimo tolori.

¹⁴Ane uwaꞌ toaꞌ to mampoperima-rimakei, inioꞌkei itundaꞌ, angkana hangangaa iperapiꞌkei pe Pueꞌ Ala hingkeꞌna Nobarakatihi.

¹⁵Hangangaa motanaꞌkei hante toaꞌ to motanaꞌ, meꞌolakei hante toaꞌ to meꞌola.

¹⁶Mohintuwuꞌkei hante lekiꞌ-lekiꞌna toaꞌ. Inioꞌkei mampokokodeꞌ, angkana ipohintotoꞌkei waliami hante toaꞌ to i wowoiꞌ tuwuꞌra, hei inioꞌkei mampetomapande.

¹⁷Ane uwaꞌhi to mowali dake pe ingkei, inioꞌhi nihowoni. Iwalikei hapo to moromiꞌ i peꞌelena lekiꞌ-lekiꞌna toaꞌ.

¹⁸Ipaliꞌkei lala hingkeꞌna modamekei nturusi hante lekiꞌ-lekiꞌna toaꞌ.

¹⁹Halali-halali to kupokarima: inioꞌ nihowoni kokodakene toaꞌ ntaniꞌna. Itedehikei Pueꞌ Ala mohukuhi, alaꞌ i lali Suraꞌ Mangkolehi, notiꞌi Pueꞌ Ala waheꞌe: Aku to makuasaꞌ mohowoni. Aku to makuasaꞌ mehohuku. [38]

²⁰Mewaliꞌ, ipetuntuikei poturuꞌ i lali Suraꞌ Mangkolehi to mantiꞌi: Ane poniꞌmi bilora, nipopopangkahi. Ane mangkumarohi, nipopaꞌinuhi. Ane iwalikei hatoꞌo, hingkiꞌ mohilihi. [39]

²¹Inioꞌ nihowoni waliane toaꞌ to kodake hante walia to kodake woꞌo, angkana inanikei walia to kodake hante waliami to moromiꞌ.