Read Rampi Roma 14 Bible Online

Roma 14 - Rampi bible

Roma 14

¹Uwaꞌ halali hampepoꞌohinte to handoaꞌi tene maroho pepoꞌohire. Hangangaa itorimokei moromiꞌ toaꞌ tiꞌo, kehapoꞌi pahuami mosisalaꞌ noniuꞌ hapo to biasa nowali.

²Rapaꞌna: toaꞌ to maroho pepoꞌohira, mangkahi mampopengaa pangka, angkana toaꞌ to mororangko pepoꞌohira, mangkaluhi terua alaꞌ motehuꞌhi mangka bauꞌ.

³Ingkei to mangka mampopengaa pangka, inioꞌkei mampokokeniꞌa awami to hawaꞌhi mangka bauꞌ. Hei ingkei to hawaꞌi mangka bauꞌ, inioꞌkei woꞌo mosalaꞌi awami to mangka mampopengaa pangka, alaꞌ Pueꞌ Ala mantorimomohi woꞌo awami tiꞌo mewali anaꞌNa.

⁴Himokeireꞌi horiana podehoꞌkei mosalaꞌi hawiꞌna toaꞌ ntaniꞌ? Ba moromiꞌ waliane ba hawaꞌi, tuana romo to mampokononto. Hei bateꞌna hingkiꞌ moromiꞌ waliane, alaꞌ Pueꞌ hadoduoNa to pobiaꞌ mampoꞌodaꞌhi hingkeꞌna uwaꞌ wuaꞌne pajamara.

⁵Uwaꞌ woꞌo pandiri' to ntaniꞌna: uwaꞌhi toaꞌ to mantiꞌi uwaꞌ ando to nipeꞌoꞌuwaꞌ ka ando to ntaniꞌna. Angkana uwaꞌhi toaꞌ ntaniꞌna to mantiꞌi lekiꞌ-lekiꞌna ando hibobalilu. Hieꞌemo to paralu tobahaꞌ: hapolu to towali, hangangaa hintotoꞌ hante to topoꞌohi.

⁶Toaꞌ to moꞌadaꞌi ando to nopokononto, tiꞌo rowali hingkeꞌna mampokodeꞌhi Pueꞌ. Toaꞌ to mangka mampopengaa pangka, tiꞌo roꞌoka hingkeꞌna mampokodeꞌhi Pueꞌ, hei mombaha tungkaihare hatoꞌo alaꞌ mantiꞌihi woriꞌ komoromiꞌne Pueꞌ Ala. Hatoꞌo woꞌo toaꞌ to mangka pangka motuntuni paliara, mangkahi woꞌo hingkeꞌna mampokodeꞌhi Pueꞌ, hei mantiꞌihi woꞌo woriꞌ komoromiꞌne pe Io. Mewaliꞌ rolangkaꞌ walia hieꞌe moromiꞌ,

⁷alaꞌ ingkiꞌ to mepoꞌohi, hamboaꞌmoki tuwuꞌ hingkeꞌna motuntuniluki peleihanta hadoduo. Hawaꞌki woꞌo mahi motuntuni peleihanta hadoduo.

⁸Tuwuꞌ ba mahiki, hingkeꞌna moꞌadaꞌiki Pueꞌta, alaꞌ toaꞌNaki.

⁹Tungkaihana Kerisitu mahi hante tuwuꞌ huliꞌ, hingkeꞌna Io mewali Pueꞌ lekiꞌ-lekiꞌna toaꞌ, moromiꞌ to tuwuꞌ tene, moromiꞌ to mahimo.

¹⁰Mewaliꞌ, mahamporeꞌi hinaꞌ mosalaꞌikei halali hampepoꞌohimi?[41] Mahamporeꞌi woꞌo horiana mampononaꞌakei halali hampepoꞌohimi? Alaꞌ hingkiꞌ hupaꞌ tempone, lekiꞌ-lekiꞌta hingkiꞌ metotiꞌiki i hinarona Pueꞌ Ala hingkeꞌna Nobutusiki.

¹¹I lali Suraꞌ Mangkolehi, Pueꞌ Ala mantiꞌi: Tuꞌu mpololeke to kutiꞌi hieꞌe: lekiꞌ-lekiꞌna toaꞌ hingkiꞌ melingkotuꞌ i hinarongKu, hei lekiꞌ-lekiꞌna toaꞌ hingkiꞌ mopangakuꞌ koꞌAkuna Pueꞌ Ala. [42]

¹²Mewaliꞌ, lekiꞌ-lekiꞌta hangangaa mampangakuꞌki walianta pe Pueꞌ Ala.

¹³Pueꞌ Ala hingkiꞌ mobutusi kara-karana lekiꞌ-lekiꞌna toaꞌ, iomo horiana kutiꞌikikei: inioꞌkei momesalaꞌi. Aginamo ikororomiꞌikei hingkeꞌna hawaꞌi uwaꞌ waliami to mampomonawuꞌ halali hampepoꞌohimi koꞌukoana madosahi ba to mampomolalo pekirira.

¹⁴Alaꞌ pohintuwuꞌku hante Pueꞌ Yesu, kubahaꞌ mpololeke kohawaꞌna uwaꞌ to nipelaraꞌki niꞌoka i peꞌoꞌelena Pueꞌ. Angkana ane uwaꞌ toaꞌ to mantiꞌi pangka to halangkaꞌ nipelaraꞌki, bateꞌna mpuꞌu io madosa ane noꞌokaꞌi.

¹⁵Hatoꞌo woꞌo, ane uwaꞌ pangka to nokopalia awami, angkana iꞌokakei i hinarona, ipomolalokei pekirine hei hawaꞌkei marima i awami. Mewaliꞌ inioꞌ ipomonawuꞌi pepoꞌohine awami alaꞌ pangka to iꞌoka. Alaꞌ awami tiꞌo, iomo halali hampepoꞌohimi to nosulewotai woꞌo Kerisitu ikomahina.

¹⁶Mewaliꞌ, ane uwaꞌ to irekeꞌkei moromiꞌ, hantaro mampomonawuꞌ pepoꞌohina awami, inioꞌ iwalikei, hingkeꞌna waliami tiꞌo hawaꞌi nosalaꞌi toaꞌ ntaniꞌna.

¹⁷Alaꞌ poparentana Pueꞌ Ala, handoꞌiolu noniuꞌ i pangka ba inua. Angkana noniuꞌ tuwuꞌ mampetuntui peleihana Pueꞌ Ala, hei tuwuꞌ i lali kotanaꞌ lali hei romiꞌ ngkotuwuꞌ; Lekiꞌ-lekiꞌna tiꞌo pepongkana ka Inohaꞌ Mangkolehi.

¹⁸Ane iwalikei hatoꞌo pe Kerisitu, hingkiꞌ nopomotanaꞌkei Pueꞌ Ala hei noꞌadaꞌikei awami.

¹⁹Iomo horiana hangangaa ipaliꞌkei lala hingkeꞌna mohintuwuꞌkei hante hangko awami, hei momepokaroho lalikei haduo hei haduo.

²⁰Inioꞌ ipokarugiꞌ hapo to nowali Pueꞌ Ala i lalina toaꞌ alaꞌ iꞌokakei to rotiꞌi awami hawaꞌi wadi roꞌoka. Kotuꞌuana, hawaꞌi uwaꞌ pangka to nikopali, angkana hawaꞌi moromiꞌ ane ipomonawuꞌkei awami pe lali dosa alaꞌ hapo to iꞌokakei.

²¹Inioꞌkei mangka bauꞌ ba maꞌinu to melolanu, ba mowalikei hapolu to mampomonawuꞌ halali hampepoꞌohimi, horiana madosahi.

²²Hinamo Pueꞌ Alalu hadoduona to pobahaꞌ waliami hintotoꞌ hante pepoꞌohimi. Morasiꞌhi toaꞌ to mowali hapo to moromiꞌ motuntuni pahuara, hei lalira hawaꞌi mosalaꞌi waliara.

²³Angkana ane uwaꞌ toaꞌ to mororangko tene laline mangka bauꞌ ba pangka ntaniꞌna, hei koꞌukoana noꞌokalu, palaihana io madosa, alaꞌ to nowali tiꞌo hawaꞌi hibobali hante hapo to nopoꞌohi i lalina. Mewaliꞌ, ane towali hapo to hawaꞌi hibobali hante pepoꞌohinta, bateꞌna madosaki alaꞌ walianta tiꞌo.