Read Rampi Roma 16 Bible Online

Roma 16 - Rampi bible

Roma 16

¹Hinewowoꞌena, hingkiꞌ kuponobahaꞌikei kohihimona hi Pebe. Towoweꞌe hieꞌe iomo to mosulungi jumaꞌa to uwaꞌ i bolaꞌ Kengkerea.

²Kuperapiꞌ hingkeꞌna itorimokei moromiꞌ i lali konaꞌna Pueꞌ Yesu, alaꞌ io woꞌo toaꞌna Pueꞌ Ala. Masipatoꞌ iwalikei hatoꞌo alaꞌ toaꞌnakei Pueꞌ Ala. Ane uwaꞌ hapo-hapo to noparalu, kuperapiꞌ hingkeꞌna nisulungiꞌi, alaꞌ woriꞌ woꞌo toaꞌ to nosulungi, tepekahi aku.

³Tabeangku ipowutekikei hi Pirikila hante hi Akila, awangku mampopatengkaꞌ jamana Yesu Kerisitu

⁴Hampiha hangkiuꞌhi hingkiꞌ nirokoꞌ i tempora mamperorui kotuwuꞌku. Alaꞌ pesulingira tiꞌo, kutiꞌi woriꞌ komoromiꞌna, hei handoꞌio akulu, angkana lekiꞌ-lekiꞌna tosarani to handoꞌiohi toYahudi mantiꞌi woꞌo woriꞌ komoromiꞌna i iohi.

⁵Ipowutekei woꞌo tabeangka pe halali hampepoꞌohinta to hirampu menomba i tambira hi Pirikila hante hi Akila. Tabea pe hi Epenetu to kukopundai. Iomo to uluꞌ-uluꞌna mepoꞌohi pe Kerisitu i poropensi Asia.

⁶Hei tabea woꞌo pe hi Maria,[51] to makaja pajamane mosulungikei.

⁷Ipowutekei woꞌo tabeangka pe hi Andoroniku hante hi Yunia. Iohi tiꞌo, hangko toYahudingkuhi to nitarungkuꞌ moꞌawa hante aku. Moruemohi mepoꞌohi pe Kerisitu. Ikohandoaꞌangku tene mepoꞌohi pe Kerisitu, umbiꞌramo mepoꞌohi. Ka lekiꞌ-lekiꞌna surona Kerisitu iomohi to niꞌadaꞌi mpololeke.

⁸Tabea pe hi Ampiliatu to kukopundai i lali konaꞌna Pueꞌ Yesu.

⁹Tabea pe hi Urbanu, awangki mampopatengkaꞌ jamana Kerisitu. Tabea woꞌo pe hi Staki to kukopundai.

¹⁰Tabea pe hi Apeleꞌ to pahua woriꞌ komaporiꞌ, angkana kehapoꞌi hatoꞌo, tontona mepoꞌohi pe Kerisitu. Tabea pe hi Aristobolu hantambihi hante lekiꞌ-lekiꞌna to meꞌohaꞌ i tambina.

¹¹Tabea pe hi Herodio, hangko toYahudiku. Tabeangku pe halali hampepoꞌohinta to uwaꞌ i tambina hi Narkisu.

¹²Tabea pe hi Trifena hante hi Trifosa. Towoweꞌe to roduo hieꞌe, to majama ngkodeꞌhi mampopatengkaꞌ jamana Pueꞌ. Tabea woꞌo pe hi Persi to kupokarima. Io majama madori mampopatengkaꞌ jamana Pueꞌ.

¹³Tabea pe hi Rufus hante pe inoꞌna to kurekeꞌ hibali inoꞌku. Hi Rufus tiꞌo iomo haduo tosarani to roꞌadaꞌi mpololeke.

¹⁴Ipowutekei tabeangku pe Asikeritu, hi Pelego, hi Heme, hi Patoroba, hi Herema hante lekiꞌ-lekiꞌna halali hampepoꞌohinta to hirampu moꞌawa hante iohi.

¹⁵Tabea pe hi Polologu, hi Yulia, hi Nereu hante hineeꞌna towoweꞌe, hei tabea woꞌo pe hi Olimpa hante lekiꞌ-lekiꞌna halali hampepoꞌohinta to hirampu moꞌawa hante iohi.

¹⁶Mometabeꞌ-tabeꞌmokei ka lalimi mpololeke. Lekiꞌ-lekiꞌna jumaꞌa iseꞌe mampokatu tabeara pe ingkei.

¹⁷Halali-halali, kuperapiꞌ mpololeke pe ingkei: hangangaa majaga-jagakei i toaꞌ to mampoꞌuwaꞌ posisalaꞌ i lumbuna toaꞌ to mepoꞌohi, hei dokoꞌhi mampomonawuꞌkei moliu poturuꞌra to mosisalaꞌ hante poturuꞌ to nipoturuꞌmokikei. Nikoꞌelaihi toaꞌ to hatoꞌo!

¹⁸Alaꞌ toaꞌ to hatoꞌo waliara, hawaꞌhi mampopatengkaꞌ jamana Kerisitu, Pueꞌta, angkana motuntuniluhi peleihana lalira hadoduora. Mokeloihi lalina toaꞌ moliu lolitara to moꞌowi, honiꞌi mampomonawuꞌhi toaꞌ to handoaꞌhi tene pobahaꞌ hapo-hapo.

¹⁹Angkana ane ingkei, woriꞌmo toaꞌ pobahaꞌ pengkoruꞌmi i poturuꞌna Pueꞌ Ala. Motanaꞌa i kokuhorina waliami tiꞌo. Peleihangku hingkeꞌna ibahaꞌkei mpololeke hapo to moromiꞌ, hei mampomoꞌelakei ka walia to kodake.

²⁰Pueꞌ Ala to mampaꞌaniki kolebaꞌ lali hingkeꞌna penani, hei kuasaꞌna Belisiꞌ hingkiꞌ ropuꞌ. Mekokaeꞌa pe Pueꞌ Ala hingkeꞌna nobarakatikei nturusi Pueꞌta Yesu Kerisitu.

²¹ Hi Timotius, awangku majama, mampowute tabeana pe ingkei, hatoꞌo woꞌo hi Lukiu, hi Yaso hei hi Sosipate, hangko toYahudingkuhi.

²²Aku hi Teretiu to moꞌukiꞌ hapo to nodedekiꞌa hi Paulu i suraꞌ hieꞌe, mampowuteꞌa woꞌo tabeangku i lali konaꞌna Pueꞌ Yesu pe ingkei.

²³Hi Gaiu woꞌo mampowute tabeana. Aku hi Paulu, to meꞌohaꞌa i tambina, hei jumaꞌa i kota hieꞌe pokohi morampu iseꞌe. Hi Eratus, haduo topoparenta to mamporia doiꞌ kota, hei halalinta woꞌo hi Kuartu mampowute tabeara.

²⁴[Rima to kodeꞌ ka Pueꞌta Yesu Kerisitu mampoꞌowonikei lekiꞌ-lekiꞌmi. Amin.[52]

²⁵Topokodeꞌmo Pueꞌ Ala, alaꞌ Io to makuasaꞌ mampokaroho pepoꞌohimi moliu Kareba Moromiꞌ to kupowutekikei, hingkeꞌna ibahaꞌkei kohihimona hi Yesu Kerisitu. Inatu toꞌana, Kareba Moromiꞌ noniuꞌ hi Yesu Kerisitu tiꞌo tewuni.

²⁶Angkana hinewowoꞌena Pueꞌ Ala Iomo to tuwuꞌ wute nantolou-louna, mampotongawamokiki tungkaihaNa, iomo horiana tobahaꞌmo palaihane hapo to noꞌukiꞌ nabi-nabi hampiha. Tungkaihana tiꞌo noniuꞌ hi Yesu Kerisitu, nipowute pe toaꞌ i humanele duniaꞌ motuntuni parentana Pueꞌ Ala, hingkeꞌna lekiꞌ-lekiꞌna toaꞌ wadi mepoꞌohi hante mengkoruꞌ pe Io.

²⁷Iomo to hawaꞌi uwaꞌ kohibobaliane. Iomo to pobahaꞌ lekiꞌ-lekiꞌna. Topokodeꞌmo Pueꞌ Ala wute nantolou-louna moliu hi Yesu Kerisitu.] Amin!