Read Rampi Roma 3 Bible Online

Roma 3 - Rampi bible

Roma 3

¹Ingkiꞌ toYahudi hante to handoꞌio toYahudi hibobaliluki, hapo rasiꞌte mewaliki toYahudi, hei hapo rasiꞌte nibulabaꞌ?

²Angkana kotuꞌuana uwaꞌ mpuꞌu rasiꞌkio toYahudi, hei woriꞌ podumbuꞌane! Uluꞌ-uluꞌna, Pueꞌ Ala mepaꞌani BooNa pe ingkiꞌ toYahudi hampiha.

³Mewaliꞌ, Hohumbo ane uwaꞌ toYahudi to hawaꞌhi tungkuꞌ i pepoꞌohira? Ba Pueꞌ Ala hamboaꞌmo hingkiꞌ mampobuhoꞌi dandiNa pe iohi lekiꞌ-lekiꞌra?

⁴Hawaꞌi hatoꞌo. Kehapoꞌi lekiꞌna toaꞌ to hawaꞌi mampobuhoꞌi dandira, angkana Pueꞌ Ala tontona hingkiꞌ mampobuhoꞌi dandiNa. Alaꞌ uwaꞌ teꞌukiꞌ i Suraꞌ Mangkolehi to mantiꞌi waheꞌe: O Pueꞌ, lekiꞌna to Itiꞌi tuꞌu. Kehapoꞌi uwaꞌ to mosalaꞌiKo, bateꞌMu penani. [1]

⁵Mewaliꞌ, waliana toaꞌ to hawaꞌi mononto mampomombaha komonontona pobutusina Pueꞌ Ala. Ane hatoꞌoꞌi, hapo tene to hohumbo hingkiꞌ totiꞌi? Ba hawaꞌi maniuꞌ kobukotane Pueꞌ Ala? (Peꞌitanongku hieꞌe, peꞌitano manusiaꞌlu).

⁶Angkana pekiri hieꞌe hawaꞌi tuꞌu! Ane rapaꞌna hawaꞌi mononto Pueꞌ Ala, palaihana Io hawaꞌi wadi mobutusi kara-karara lekiꞌ-lekiꞌna toaꞌ i ando pobutusi i kotutuana duniaꞌ.

⁷Mahamporeꞌi hinaꞌ aku to rosalaꞌi nokomi dosangku, hantaro waliangku to kodake to mampomombaha komonontona Pueꞌ Ala horiana konaꞌNa nipokodeꞌ?

⁸Uwaꞌ woꞌo toaꞌ to mowuliori-ori lolitangku. Rotiꞌi mololitaꞌa waheꞌe: Aginamo towalimolu walia to kodake hingkeꞌna konaꞌna Pueꞌ Ala hingkiꞌ nipokodeꞌ. Toaꞌ to mantiꞌi hatoꞌo, masipatoꞌ mpololeke nohukuhi Pueꞌ Ala!

⁹Mewaliꞌ, ba ingkiꞌ toYahudi meliu komoromiꞌte ka toaꞌ ntaniꞌna? Hawaꞌi! Alaꞌ hibalimo to ka kutiꞌimo, lekiꞌ-lekiꞌna toaꞌ bateꞌna masalaꞌ, alaꞌ ingkiꞌ lekiꞌ-lekiꞌta nokuasaꞌiki dosa, moromiꞌ toYahudi moromiꞌ toaꞌ ntaniꞌna.

¹⁰Alaꞌ hampiha teꞌukiꞌ i lali Suraꞌ Mangkolehi to mantiꞌi waheꞌe: Hawaꞌi uwaꞌ howeꞌ haduo toaꞌ to maniuꞌ i pampeꞌelena Pueꞌ Ala.

¹¹Hawaꞌi uwaꞌ howeꞌ haduo to pobahaꞌ hapo to moromiꞌ. Hawaꞌi uwaꞌ howeꞌ haduo to mampaliꞌ Pueꞌ Ala.

¹²Lekiꞌ-lekiꞌna toaꞌ motinuni Pueꞌ Ala. Hamboaꞌmo modumbuꞌ tuwuꞌre. Hawaꞌi uwaꞌ toaꞌ to moromiꞌ waliare, howeꞌ haduo hawaꞌi uwaꞌ. [2]

¹³Pololitara mangkomi toaꞌ pe komahia. Ka lilaꞌra mesuwu lolita to mepomonawuꞌ, ka omeꞌra mesuwu lolita hibali ule to moꞌupoꞌ. [3]

¹⁴Poko motundaꞌhi toaꞌ ntaniꞌna, hei lolitara mampomolalo lalira toaꞌ ntaniꞌ. [4]

¹⁵Hali-halihi mepopoꞌioꞌio hei merorokoꞌ.

¹⁶I imbolu koꞌakoara, mangkomihi posisalaꞌ hante komaporiꞌ.

¹⁷Hawaꞌi robahaꞌ lala pohintuwuꞌ. [5]

¹⁸Hawaꞌi robahaꞌ mengkoruꞌ pe Pueꞌ Ala. [6]

¹⁹Tobahaꞌ aturane hi Musa nipaꞌanikihi pe to hangangaa mampetuntui hawaꞌ tiꞌo. Mewaliꞌ, hawaꞌi uwaꞌ howeꞌ haduo toaꞌ to podehoꞌ mopangakuꞌ kohawaꞌna masalaꞌ. Lekiꞌ-lekiꞌna toaꞌ bateꞌna nobutusi Pueꞌ Ala.

²⁰Hawaꞌi uwaꞌ howeꞌ haduo to wadi modame hante Pueꞌ Ala, alaꞌ mampetuntuiꞌi lekiꞌ-lekiꞌna Aturana hi Musa. Aturana tiꞌo mampotongawalu komadosana toaꞌ.

²¹Hinewowoꞌena Pueꞌ Ala mampatidoꞌkimokiki hohumbo lalane hingkeꞌna modameki hante Io, angkana hawaꞌi moliu i Aturana hi Musa. Suraꞌna hi Musa hante suraꞌna nabi-nabi, mampokononto potuntuninta Atura hi Musa hawaꞌki mampodame hante Pueꞌ Ala,

²²angkana modameki hante Pueꞌ Ala alaꞌ pepoꞌohinta pe hi Yesu Kerisitu. Lekiꞌ-lekiꞌna toaꞌ to mepoꞌohi pe hi Yesu modame hante Pueꞌ Ala, alaꞌ Io hawaꞌi mampopoꞌoriꞌori toYahudi hante to handoꞌio toYahudi.

²³Lekiꞌ-lekiꞌta toaꞌ madosa. Io horiana moꞌelaki ka Pueꞌ Ala hei hawaꞌki masipatoꞌ pahua dolaꞌta i lali komanobaꞌNa.

²⁴Angkana alaꞌ nohompoꞌmoki Yesu Kerisitu, Pueꞌ Ala mampohenteki ka pehuku dosanta, hei modamemoki hante Io. Lekiꞌ-lekiꞌna tiꞌo Nopaꞌanikiki ntooꞌ-ntooꞌ ka kopopuhiꞌna laliNa.

²⁵Pueꞌ Ala mampewei hi Yesu hibali popenomba hingkeꞌna mewali lala podame. Hi Yesu nirokoꞌ hei hibobo raꞌaNe motuntuni pampokonontona Pueꞌ Ala. Io mahi hingkeꞌna ingkiꞌ to mepoꞌohi niꞌampuni dosante. Pueꞌ Ala mowali tiꞌo notongawa komonontoNe. Alaꞌ ikohandoaꞌana tene hi Yesu mahi, Pueꞌ Ala hawaꞌi mohuku lekiꞌ-lekiꞌna toaꞌ to madosa nokomi kosabaraꞌNa.

²⁶Angkana hinewowoꞌena Pueꞌ Ala mampetidoꞌkimo komonontoNa, hingkeꞌna lekiꞌ-lekiꞌna toaꞌ to mepoꞌohi pe hi Yesu, hingkiꞌ norekeꞌ Pueꞌ Ala mononto i pampeꞌeleNa.

²⁷Mewaliꞌ, hawaꞌki masipatoꞌ mampokokodeꞌ alaꞌ notorimoki Pueꞌ Ala, handoꞌio nokomi petuntuta i Aturana hi Musa, angkana nokomi pepoꞌohinta pe Pueꞌ Yesu.

²⁸Hieꞌemo tungkaihane lolitangku: Mewaliki modame hante Pueꞌ Ala, handoꞌio ka walianta to moromiꞌ motuntuni Aturana hi Musa, angkana nokomi pepoꞌohinta pe hi Yesu.

²⁹Ba ipekirikei Pueꞌ Ala iomo Pueꞌnalu toYahudihi? Hawaꞌreꞌi woꞌo Io Pueꞌne toaꞌ ntaniꞌna? Hingkeꞌna ibahaꞌkei Io woꞌo Pueꞌna toaꞌ ntaniꞌna!

³⁰Alaꞌ haduolu Pueꞌ Ala, hei Io hadoduona to mampodameki hante wotaNa alaꞌ pepoꞌohinta, moromiꞌ toYahudi hante to handoꞌiohi toYahudi.

³¹Mewaliꞌ, wadireꞌi topohentemo Aturane hi Musa, alaꞌ Pueꞌ Ala mampodamemoki hante wotaNa nokomi pepoꞌohinta, handoꞌio alaꞌ pampetuntuinta i Atura tiꞌo? Hawaꞌi! Inioꞌ nipekiri hatoꞌo! Angkana, alaꞌ pepoꞌohinta, hangangaa topoꞌilali Aturane hi Musa tiꞌo hingkeꞌna tobahaꞌi peleihane Pueꞌ Ala.