Read Rampi Roma 4 Bible Online

Roma 4 - Rampi bible

Roma 4

¹Mewaliꞌ, pandiriꞌ hapo to toroa ka kotuwuꞌna hi Burahima, tododulunta hampiha? Hohumbo lalane horiana io modame hante Pueꞌ Ala?

²Ane rapaꞌna hi Burahima modame hante Pueꞌ Ala alaꞌ waliana to moromiꞌ, io masipatoꞌ mampokokodeꞌ. Angkana hawaꞌi uwaꞌ lalane hi Burahima mampokokodeꞌ i hinarona Pueꞌ Ala, alaꞌ io modame hante Pueꞌ Ala handoꞌio alaꞌ waliana to moromiꞌ.

³Teꞌukiꞌ i Suraꞌ Mangkolehi waheꞌe: Hi Burahima mepoꞌohi pe Pueꞌ Ala, iomo horiana io notorimo Pueꞌ Ala mewali toaꞌ to modamemo hante Io [7]

⁴Pandiriꞌna: toaꞌ to majama masipatoꞌ pahua harora, alaꞌ harora tiꞌo mewalimo dolaꞌra ka pajamara, handoꞌio pepaꞌani ntooꞌ-ntooꞌlu.

⁵Angkana pohintuwuꞌta hante Pueꞌ Ala hawaꞌi hibali toaꞌ to meharo, alaꞌ hawaꞌki notorimo Pueꞌ Ala nokomi komoromiꞌna walianta. Ingkiꞌ to madosamoki, angkana ane mepoꞌohiki pe Pueꞌ Ala, Notorimomoki mewali toaꞌ to modame hante Io.

⁶Poturuꞌ hieꞌe hibali hante lolitana datu Daudi hampiha. Hi Daudi mampololita noniuꞌ ikomotanaꞌra toaꞌ to Notorimo Pueꞌ Ala handoꞌio alaꞌ komoromiꞌna waliara.

⁷Notiꞌi hi Daudi waheꞌe: Motanaꞌmo toaꞌ to teꞌampuni salaꞌre, hei to tepohente dosare.

⁸Motanaꞌhi mpololeke, alaꞌ Pueꞌ Ala hamboaꞌmo mampoꞌilali salaꞌra. [8]

⁹Komotanaꞌ to nololita Daudi tiꞌo ba pe ingkiꞌluꞌi toYahudi to nibulabaꞌ? Hawaꞌi. Komotanaꞌ tiꞌo rohoriki woꞌo toaꞌ to handoꞌiohi toYahudi.[9] Alaꞌ hibali to kipowutekikei, Pueꞌ Ala morekeꞌ hi Burahima modame hante Io, alaꞌ pepoꞌohina.

¹⁰Hiwaꞌimbo hi Burahima modame hante Pueꞌ Ala? Koꞌukona nibulabaꞌ ba ikohandoaꞌna nibulabaꞌ? Tobahaꞌmo io modame hante Pueꞌ Ala ikohandoaꞌna tene nibulabaꞌ.

¹¹Konibulabaꞌna tiꞌo iomo tandaꞌ koꞌukonamo Notorimo Pueꞌ Ala mewali toaꞌ to modame hante Io. Mewaliꞌ, mambahamo i ingkiꞌ: hi Burahima modame hante Pueꞌ Ala alaꞌ pepoꞌohina ikohandoaꞌna tene nibulabaꞌ. Horiana io mewali umoꞌra lekiꞌ-lekiꞌna toaꞌ to handoꞌio toYahudi to mepoꞌohi pe Pueꞌ Ala, alaꞌ kehapohi hawaꞌi nibulabaꞌ motuntuni Aturana hi Musa, bateꞌna wadihi modame hante Pueꞌ Ala nokomi pepoꞌohira hibali hante hi Burahima.

¹²Hatoꞌo woꞌo hi Burahima ropoꞌumoꞌ toYahudi to mepoꞌohi pe Pueꞌ Ala, alaꞌ iomo to mewali pandiri', handoꞌio alaꞌ konibulabaꞌra, angkana alaꞌ mampetuntuihi pepoꞌohina hi Burahima ikohandoaꞌna tene nibulabaꞌ.

¹³Hampiha Pueꞌ Ala modandi pe hi Burahima hante pe muleꞌna koꞌiora to hingkiꞌ moꞌompui duniaꞌ. Pueꞌ Ala modandi hatoꞌo pe hi Burahima hante pe muleꞌnahi, handoꞌio alaꞌ petuntuna hi Burahima i Aturana Pueꞌ Ala, angkana alaꞌ pepoꞌohina horiana io notorimo Pueꞌ Ala.

¹⁴Ane rapaꞌna toaꞌ to motuntuniluhi Aturana hi Musa to pahua hapo to nodandi Pueꞌ Ala, palaihana pepoꞌohira pe Pueꞌ Ala langkoꞌ, hei hapo to nodandi Pueꞌ Ala hawaꞌi hingkiꞌ mewali.

¹⁵Ane molungkaꞌiki Aturana hi Musa tiꞌo, iomo to mampoꞌuwaꞌ kobukotane Pueꞌ Ala horiana hangangaa Nohukuki. Angkana ane hawaꞌi uwaꞌ Aturane hi Musa, kehawaꞌi uwaꞌ pelungkaꞌi.

¹⁶Io horiana, Pueꞌ Ala norekeꞌmoki modame hante Io nokomi pepoꞌohinta, hingkeꞌna ka kopopuhiꞌna laliNa, lekiꞌ-lekiꞌna muleꞌna hi Burahima bateꞌna hingkiꞌ pahua hapo to Nodandi. Dandina Pueꞌ Ala tiꞌo handoꞌiolu dolaꞌra toYahudi to pobahaꞌ Aturana hi Musa, angkana mewali woꞌo dolaꞌra hihimolu to mepoꞌohi, hibali pepoꞌohina hi Burahima pe Pueꞌ Ala hampiha, alaꞌ hi Burahima iomo umoꞌta mampopiha.

¹⁷Uwaꞌ lolitane Pueꞌ Ala pe hi Burahima to teꞌukiꞌ waheꞌe: “Kupopewalimoko umoꞌra toaꞌ woriꞌ i humanele duniaꞌ.” I peꞌoꞌelena Pueꞌ Ala, hi Burahima mewali umoꞌna lekiꞌ-lekiꞌna to mepoꞌohi, alaꞌ io mepoꞌohi pe Pueꞌ Ala, hei Pueꞌ Ala iomo to mampotuwuꞌ huliꞌ to mahi hante to mampoꞌuwaꞌ hapo to hawaꞌi hohumbo mewali, hingkiꞌ mewali moliu pantiꞌiNa.

¹⁸Palaihana, hi Burahima hamboaꞌmo hingkiꞌ mohinaru uwaꞌ muleꞌne alaꞌ toꞌamamoꞌi, angkana kehapoꞌi watoꞌo, hi Burahima bateꞌna mepoꞌohi hante mohinaru nturusi i dandina Pueꞌ Ala pe io, koꞌukoana io mewali umoꞌra toaꞌ wori' i humanele duniaꞌ, alaꞌ Pueꞌ Ala modandimo pe io, Notiꞌi, “Muleꞌmu hingkiꞌ woriꞌ mpololeke.”

¹⁹I tempo tiꞌo, tinuwuꞌna hi Burahima dodungkumo hanatu ntoꞌa, hei hamboaꞌmo maroho wotane. Hei hantambina hi Sarai lalo hei tobasemo woꞌo. Kehapoꞌi hatoꞌo, hawaꞌi tewolihi pepoꞌohine hi Burahima pe Pueꞌ Ala.

²⁰Hawaꞌi mororangko laline i dandina Pueꞌ Ala, angkana komaroho-rohoa konopoꞌohine dandina Pueꞌ Ala. Nokomi pepoꞌohina tiꞌo, maroho laline, horiana hi Burahima mampokodeꞌ nturusi Pueꞌ Ala.

²¹Nopoꞌohi mpololeke, Pueꞌ Ala makuasaꞌ mampobuhoꞌi dandiNa.

²²Nokomi pepoꞌohina tiꞌo, uwaꞌ teꞌukiꞌ i lali Suraꞌ Mangkolehi to mantiꞌi: Pueꞌ Ala morekeꞌmo hi Burahima modame hante Io.

²³To teꞌukiꞌ tiꞌo, handoꞌiolu noniuꞌ hi Burahima,

²⁴angkana noniuꞌ woꞌo ingkiꞌ. Ingkiꞌ notorimomoki Pueꞌ Ala, hei Norekeꞌmoki toaꞌ to modamemo hante Io alaꞌ mepoꞌohiki pe Pueꞌ Ala to mampotuwuꞌ huliꞌ Pueꞌta, Pueꞌ Yesu.

²⁵Hi Yesu tiꞌomo to nipeweimo hingkeꞌna nirokoꞌI mosulewotaiki nokomi komasalaꞌta, hei nipotuwuꞌ huliꞌ hingkeꞌna ingkiꞌ modamemoki mahuliꞌ hante Pueꞌ Ala.