Read Rampi Roma 5 Bible Online

Roma 5 - Rampi bible

Roma 5

¹Mewaliꞌ, hinewowoꞌena modamemoki mahuliꞌ hante Pueꞌ Ala alaꞌ pepoꞌohinta. Iomo horiana moromiꞌmo pohaꞌanunte hante Pueꞌ Ala alaꞌ konopelumbuinta Pueꞌta Yesu Kerisitu.

²Mewaliꞌ alaꞌ pepoꞌohinta pe Yesu Kerisitu horiana Nopohaꞌanumoki hante Pueꞌ Ala, hingkeꞌna tobahaꞌi kopopuhiꞌne lalina Pueꞌ Ala i lali kotuwuꞌta hieꞌe. Hei motanaꞌ lalinte, alaꞌ uwaꞌ pepohinaruante, koꞌukoana tobahaꞌ kohingkiꞌ pahuante dolaꞌta i lali kokodeꞌna Pueꞌ Ala.

³Hei handoꞌio tiꞌolu. Motanaꞌki woꞌo i lali komaporiꞌ to morumpaki, alaꞌ tobahaꞌ: Ka komaporiꞌ tiꞌo, meguruki hingkeꞌna mantahaki i lali pehohongkeꞌ.

⁴Hei ane mantahaki, Hingkiꞌ notorimoki Pueꞌ Ala. Hei ane notorimoki Pueꞌ Ala, bateꞌna pedeꞌ terononihi pepohinaruante pe Pueꞌ Ala.

⁵Hei ane mohinaruki pe Pueꞌ Ala, pohinaruanta tiꞌo hawaꞌi hingkiꞌ mepomonawuꞌ, alaꞌ Pueꞌ Ala mampetidoꞌkimo rimaNa to kodeꞌ pe ingkiꞌ. Hei Inohaꞌ Mangkolehi to mampotongawa komarimaNa tiꞌo i lalinta.

⁶Waheꞌe komarimane Pueꞌ Ala i ingkiꞌ: I tempota tene moledeꞌ, hawaꞌki hohumbo mohaꞌanu hante Pueꞌ Ala ka rohonta hadoduonta, Pueꞌ Yesu mahi alaꞌ dosanta, hei tempo tiꞌo nopokonontomo umbiꞌ Pueꞌ Ala.

⁷Molakaꞌ toaꞌ to hiniꞌ mahi mosulewotai toaꞌ to hawaꞌi masalaꞌ. Angkana ane uwaꞌ haduo toaꞌ to moromiꞌ mpololeke laline, wora uwaꞌ toaꞌ to hiniꞌ mahi mosulewotai toaꞌ tiꞌo.

⁸Angkana to nowali Pueꞌ Ala meliu katoꞌo. Kerisitu mahi mosulewotaiki i tempota tene madosa. Tiꞌomo to mampotongawa rimane Pueꞌ Ala pe ingkiꞌ.

⁹Mewaliꞌ hinewowoꞌena, mewalimoki toaꞌ to modamemo hante Pueꞌ Ala alaꞌ komahina hi Yesu kerisitu. Hante konopelumbuinta hi Yesu Kerisitu, hingkiꞌ tepohenteki ka kobukotana Pueꞌ Ala i ando pobutusi i koꞌukoana duniaꞌ.

¹⁰I tempota meꞌewa nturusi pe Pueꞌ Ala, Io mampodamemoki moliu ikomahina AnaꞌNa. Hinewowoꞌena ikonopodamentamo Pueꞌ ala bateꞌna niposalamaꞌki alaꞌ Kerisitu meꞌaromo ka komahia.

¹¹Hei handoꞌio tiꞌolu. To topotanaꞌ mpololeke komoromiꞌne Pueꞌ Ala to tohua moliu Pueꞌta Yesu Kerisitu, alaꞌ moromiꞌmo pohaꞌanunte hante Pueꞌ Ala.

¹²Nokomi haduo toaꞌ to molungkaꞌi hawaꞌna Pueꞌ Ala, iomo hi Adama, dosa mekahi pe duniaꞌ hei dosa tiꞌo mangkomiki pe komahia. Hei alaꞌ dosana hi Adama tiꞌo, lekiꞌ-lekiꞌna toaꞌ i duniaꞌ hangangaa mahi alaꞌ madosamoki lekiꞌ-lekiꞌta.

¹³Hampiha, ikohandoaꞌna tene uwaꞌ Aturane hi Musa, toaꞌ madosamo. Angkana toaꞌ tempo tiꞌo handoaꞌi masipatoꞌ nisalaꞌi alaꞌ hawaꞌi uwaꞌ atura to mohiluꞌ, iomo Aturana hi Musa.

¹⁴Angkana kehapoꞌi hatoꞌo, mepongka i tempona hi Adama wute i tempona nabi Musa, lekiꞌ-lekiꞌna toaꞌ hangangaa mahi. Kehapoꞌi hawaꞌhi molungkaꞌi hawaꞌna Pueꞌ Ala hibali to nowali hi Adama, bate'na lekiꞌ-lekiꞌna toaꞌ hangangaa mahi hibali hante hi Adama, alaꞌ madosahi woꞌo. Hi Adama nipopandiriꞌa hi Yesu Kerisitu to mehupaꞌ kamuri.

¹⁵Angkana meroduora moꞌori mpololeke. Komoromiꞌna rimana Pueꞌ Ala moliu hi Yesu hawaꞌi nipohibali hante dosana hi Adama. Alaꞌ waliana haduo toaꞌ iomo hi Adama to molungkaꞌi parentana Pueꞌ Ala, lekiꞌna toaꞌ hangangaa mahi, angkana moliu haduo toaꞌ, Pueꞌ Ala mampetidoꞌki kokodeꞌna rimaNa pe lekiꞌna toaꞌ, iomo moliu Yesu Kerisitu.

¹⁶Komoromiꞌna lalina Pueꞌ Ala pe ingkiꞌ meliu kokodeꞌne ka dosana hi Adama. Alaꞌ dosa to uluꞌ-uluꞌna tiꞌo horiana lekiꞌna toaꞌ nitiꞌi masalaꞌ i peꞌoꞌelena Pueꞌ Ala hei hangangaa nihukuhi. Angkana i tempona lekiꞌna toaꞌ madosa, Pueꞌ Ala mampomombaha kopopuhiꞌna laliNa pe iohi, horiana nitiꞌi hamboaꞌmohi masalaꞌ hei wadihi modame mahuliꞌ hante Pueꞌ Alaꞌ.

¹⁷Nokomi polungkaꞌina hi Adama tiꞌo, lekiꞌ-lekiꞌta hangangaa mahiki alaꞌ muleꞌnaki hi Adama. Angkana meliu mpololeke komoromiꞌne Yesu Kerisitu! Himolu to mepoꞌohi pe Io, io to hingkiꞌ pahua kuasaꞌ moparenta moꞌawa hante Kerisitu, hei hingkiꞌ pahua woꞌo kotuwuꞌ to wolaꞌ to hawaꞌi mokoꞌukoa. Lekiꞌ-lekiꞌna tiꞌo mewali alaꞌ kopopuhiꞌna lalina Pueꞌ Ala, hei Norekeꞌki modame hante Io alaꞌ pohaꞌanunta hante Yesu Kerisitu.

¹⁸Mewaliꞌ, alaꞌ komadosana hi Adama, lekiꞌ-lekiꞌna toaꞌ hangangaa nihuku. Angkana, alaꞌ hi Yesu to motuntuni peleihana Pueꞌ Ala, lekiꞌ-lekiꞌna toaꞌ wadihi modame hante Pueꞌ Ala hei wadi pahua kotuwuꞌ to wolaꞌ to hawaꞌi mokoꞌukoa.

¹⁹Alaꞌ kohawaꞌna mengkoruꞌ hi Adama pe Pueꞌ Ala, lekiꞌ-lekiꞌna toaꞌ mampetuntui hi Adama hei madosa. Angkana hi Yesu mengkoruꞌ pe Pueꞌ Ala. Alaꞌ pengkoruꞌNa tiꞌo, lekiꞌ-lekiꞌna toaꞌ wadi modame mahuliꞌ hante Pueꞌ Ala.

²⁰Uwaꞌmo tungkaihane Aturane hi Musa. Atura tiꞌo nopepaꞌaniki Pueꞌ Ala pe toaꞌ hingkeꞌna mombaha mpololeke komadosare, alaꞌ molungkaꞌihi nturusi Atura tiꞌo. Angkana kehapoꞌi makaja komadosane toaꞌ, meliu kopopuhiꞌne lalina Pueꞌ Ala i toaꞌ!

²¹Hampiha, dosa to makuasaꞌ i lali kotuwuꞌna toaꞌ, koꞌukoana lekiꞌ-lekiꞌna toaꞌ tekaꞌa ka Pueꞌ Ala. Angkana hinewowoꞌena, nokomi kopopuhiꞌna laliNa, Pueꞌ Alamo to makuasaꞌ i lali kotuwuꞌta. Io mampaꞌaniki lala hingkeꞌna wadiki modame hante Pueꞌ Ala, hei Io mampaꞌaniki woꞌo kotuwuꞌ to wolaꞌ to hawaꞌi mokoꞌukoa alaꞌ konopelumbuinta Pueꞌta, Pueꞌ Yesu.