Read Rampi Roma 6 Bible Online

Roma 6 - Rampi bible

Roma 6

¹Hapo tene to wadi hingkiꞌ totiꞌi? Ane Pueꞌ Ala moꞌampuni dosanta alaꞌ kopopuhiꞌna laliNa i ingkiꞌ, ba moromiꞌ ane mowaliki nturusi dosa hingkeꞌna pedeꞌ terononihi kopopuhiꞌne lalina Pueꞌ Ala moꞌampuniki?

²Mononto hawaꞌi moromiꞌ! Ane mahiki moꞌawa hante Kerisitu, palaihana: peleihana lalinta mowali dosa hangangaa mahi woꞌo, hei hamboaꞌmo makuasaꞌ i ingkiꞌ.

³Hawaꞌireꞌi ibahaꞌkei, ikoniriunta mopalaiha ingkiꞌ mohintuwuꞌmoki hante Yesu Kerisitu ikomahina?

⁴Ikoniriunta tiꞌo, hibaliki toaꞌ to mahi hei nitawu moꞌawa hante Kerisitu. Kerisitu nipatuwuꞌ huliꞌ ka komahia alaꞌ kuasaꞌna Pueꞌ Ala Umoꞌta, hingkeꞌna tuwuꞌki i duniaꞌ hante lala ngkotuwuꞌ to wolaꞌ.

⁵Mewaliꞌ, alaꞌ pohintuwuꞌta hante hi Yesu i lali komahiNa, Pueꞌ Ala hingkiꞌ mampotuwuꞌki woꞌo huliꞌ hibali hante hi Yesu.

⁶Alaꞌ tobahaꞌ, i tempona Kerisitu nirokoꞌ i loti momehulepe, kotuwuꞌta hampiha nirokoꞌ woꞌo moꞌawa hante Io. Mewaliꞌ kuasaꞌ dosa i lali kotuwuꞌta moholi, koꞌukoana hamboaꞌmoki nopohawiꞌ dosa.

⁷Alaꞌ hihimolu to mahi moꞌawa hante Kerisitu, himpolohoꞌmo ka kuasaꞌ dosa.

⁸Mewaliꞌ, alaꞌ mahimoki moꞌawa hante Kerisitu, topoꞌohi hingkiꞌ tuwuꞌki moꞌawa hante Io.

⁹Alaꞌ tobahaꞌ, Kerisitu nipatuwuꞌ huliꞌ, hei uko tiꞌo, hawaꞌi uwaꞌ kuasaꞌ to wadi morokoꞌ Pueꞌ Yesu, alaꞌ Io tuwuꞌ nturusi wute nantolou-louna.

¹⁰Io hampihalu mahi monani kuasaꞌ dosa wute nantolou-louna. Hinewowoꞌena Io tuwuꞌ moꞌawa hante Pueꞌ Ala.

¹¹Hatoꞌo woꞌo ingkiꞌ, hangangaa totiꞌi i lalinta: Mahiꞌa moꞌawa hante Yesu Kerisitu; hamboaꞌmoꞌa mohintuwuꞌ hante dosa, angkana tuwuꞌa hingkeꞌna motuntuniꞌa peleihana Pueꞌ Ala alaꞌ pohintuwuꞌku hante Yesu Kerisitu.

¹²Iomo horiana kupaꞌanikei lolita halali-halali, inioꞌ nipotedehi dosa mokuasaꞌi kotuwuꞌmi i duniaꞌ hieꞌe hingkeꞌna hawaꞌkei mampetuntui peleihane lalimi to kodake.

¹³Wotami inioꞌ ipakeꞌkei mowali dosa hante walia to kodake. Aginamo nipepolintaroki kotuwuꞌmi pe Pueꞌ Ala, alaꞌ himpolohoꞌmokei ka kotuwuꞌmi hampiha hei ihuamokei kotuwuꞌ to wolaꞌ. Hangangaa nipewei wotami pe Pueꞌ Ala hingkeꞌna Nopakeꞌkei mowali walia to moromiꞌ.

¹⁴Hamboaꞌmokei motuntuni Aturana hi Musa, horiana hamboaꞌmokei nokuasaꞌi dosa, alaꞌ mantorimomokei kopopuhiꞌna lalina Pueꞌ Ala.

¹⁵Mewaliꞌ, ane hamboaꞌmoki motuntuni Aturana hi Musa, alaꞌ mantorimomoki kopopuhiꞌna laliNa pueꞌ Ala, hapo to hangangaa towali? Ba mowaliki nturusi dosa? Hawaꞌi!

¹⁶Ibahaꞌlukei, ane rapaꞌna mengkoruꞌkei i haduo toaꞌ hei ipetuntuikei hawaꞌne, hawiꞌnakei toaꞌ tiꞌo. Ane ipetuntuikei nturusi peleihane lalimi to kodake, hingkiꞌ mewalikei hawiꞌna dosa, to mokaꞌakei ka Pueꞌ Ala wute nantolou-louna. Angkana ane mampetuntuikei peleihana Pueꞌ Ala, mewalikei hawiꞌNa, hei mohaꞌanukei huliꞌ hante Io.

¹⁷Hampiha, ikohandoaꞌami tene mampoꞌohi hi Yesu, nopohawiꞌkei tene dosa. Angkana kutiꞌi woriꞌ komoromiꞌne Pueꞌ Ala, alaꞌ hinewowoꞌena mengkoruꞌkei pe Pueꞌ Ala ka lalimi mpololeke alaꞌ motuntunikei poturuꞌ to nipowutekimokikei.

¹⁸Mewaliꞌ himpolohoꞌmokei ka konopohawiꞌmi dosa, hei mewalimokei hawiꞌna Pueꞌ Ala to motuntuni peleihaNa.

¹⁹Pandiriꞌ tiꞌo kupakeꞌ hingkeꞌna hantouꞌ ibahaꞌkei tungkaihane poturuꞌku hieꞌe. Hampiha nopohawiꞌkei dosa, alaꞌ wotami nipotedehi motuntuni peleihana lalimi to kodake hante to hawaꞌi hintotoꞌ, koꞌukoana tetambai kokodakene waliami. Mewaliꞌ hinewowoꞌena, hangangaa ipeweikei wotami pe Pueꞌ Ala hingkeꞌna mewalikei hawiꞌNa hei mononto mpololeke waliami hingkeꞌna mangkolehi kotuwuꞌmi.

²⁰Hampiha, tempomi tene nopohawiꞌ dosa, hawaꞌkei mampetuntui peleihana Pueꞌ Ala.

²¹Pebarakati haporeꞌi to ihuakei ka kotuwuꞌmi to hampiha tiꞌo? Lekiꞌ-lekiꞌna tiꞌo mampoꞌuwaꞌlu komohilimi hinewowoꞌena, alaꞌ waliami tiꞌo koꞌukoana mangkomikei pe komahia to mokaꞌakei ka Pueꞌ Ala.

²²Angkana hinewowoꞌena, himpolohoꞌmokei ka kuasaꞌ dosa, hei mewalimokei hawiꞌna Pueꞌ Ala, koꞌukoana mangkolehi kotuwuꞌmi, hei hingkiꞌ pahuakei kotuwuꞌ to wolaꞌ wute nantolou-louna.

²³Howonina dosa iomo komahia, angkana alaꞌ kopopuhiꞌna lalina Pueꞌ Ala, Nopaꞌanikiki ntooꞌ-ntooꞌ kotuwuꞌ to wolaꞌ to hawaꞌi mokoꞌukoa, moliu pohaꞌanunta hante Pueꞌta Yesu Kerisitu.