Read Rampi Roma 7 Bible Online

Roma 7 - Rampi bible

Roma 7

¹Mewaliꞌ halali-halali, toroa pandiri' ka atura-atura. Hawaꞌkeireꞌi ibahaꞌ, kolentuꞌanta tene tuwuꞌ, bateꞌna tuwuꞌki motuntuni atura-atura? Angkana ane mahimoki, hawaꞌi uwaꞌ kuasaꞌne atura tiꞌo i ingkiꞌ.

²Rapaꞌna, uwaꞌ haduo towoweꞌe tohamoko. Ane tuwuꞌi tene maꞌanine, bateꞌna tehiluꞌ i maꞌanina motuntuni atura kohamoko. Angkana ane mahimoꞌi maꞌanine, himpolohoꞌmo ka atura to mohiluꞌ towoweꞌe tiꞌo i maꞌanina.

³Mewaliꞌ, rapaꞌna ane towoweꞌe tiꞌo hamoko hante tomaꞌani ntaniꞌna kolentuꞌana tene tuwuꞌ maꞌanine, palaihana towoweꞌe tiꞌo mebualosi. Angkana ane mahimoꞌi maꞌanine, himpolohoꞌmo ka atura kohamoko. Mewaliꞌ ane hamokoꞌi hante tomaꞌani ntaniꞌna, hawaꞌi nirekeꞌ mebualosi.

⁴Mewaliꞌ halali-halali, hatoꞌo woꞌo ingkiꞌ: Aturana hi Musa wadi nipandiriꞌ hibali maꞌaninta to mahimo. Hampiha tehiluꞌki i Aturana hi Musa. Angkana hinewowoꞌena, ane mahiki moꞌawa hante Kerisitu, hamboaꞌmoki tehiluꞌ i atura-atura tiꞌo, alaꞌ mohaꞌanumoki hante Kerisitu to tuwuꞌ huliꞌ ka komahia. Alaꞌ pohaꞌanunta hante Kerisitu, kotuwuꞌta modumbuꞌ i Pueꞌ Ala.

⁵Hampiha, tempota handoaꞌki tene mampoꞌohi hi Yesu, mangkodokoꞌiluki nturusi mowali to kodake motuntuni peleihana lalinta, hei hapo to niꞌopikiki i Aturana hi Musa, pedeꞌ towali nturusi. I lali kotuwuꞌta hampiha, wotanta topakeꞌ mowali dosa, koꞌukoana tekaꞌaki ka Pueꞌ Ala.

⁶Angkana hinewowoꞌena, tepohentemoki ka Aturana hi Musa, alaꞌ mahimo atura-atura tiꞌo i kotuwuꞌta. Mewaliꞌ, hamboaꞌmoki motuntuni lala to hohai hei motuntuni atura-atura to teꞌukiꞌ hingkeꞌna wadiki mampetuntui peleihana Pueꞌ Ala, angkana hinewowoꞌena motuntuniki lala to wolaꞌ alaꞌ kuasaꞌna Inohaꞌ Mangkolehi majama i lalinta hingkeꞌna wadiki majama i Pueꞌ Ala.

⁷Ba uwaꞌ to hingkiꞌ meꞌitano: Ane hatoꞌoꞌi, ba Aturana hi Musa kodake? Hawaꞌi! Atura tiꞌo moromiꞌ, alaꞌ ka Atura tiꞌo, tobahaꞌ hapo to nitiꞌi dosa. Ane rapaꞌna hawaꞌi uwaꞌ atura to mantiꞌi, “Inioꞌ mohoka!”, kehawaꞌi kubahaꞌ kokodakene lalingku to mangkohoka hapolu to noꞌompui awangku.

⁸Angkana i tempoku pahori atura tiꞌo, pedeꞌ kukodokoꞌi mowali dosa, koꞌukoana woriꞌ langkaꞌ pekiri to kodake hei tetambai womo peleihangka morampu woriꞌ luma ngkoduniaꞌ. Mewaliꞌ, ane rapaꞌna hawaꞌi uwaꞌ Aturane hi Musa, kehawaꞌi uwaꞌ kuasaꞌne dosa mampomonawuꞌa.

⁹Hampiha, ikohandoaꞌna tene kubahaꞌ Aturane hi Musa, kutiꞌi moromiꞌ mpololeke kotuwuꞌka. Angkana ikokuhorinalu hawaꞌ tiꞌo, pedeꞌ kukodokoꞌi mowali dosa,

¹⁰hei masipatoꞌa mpololeke nikaꞌa ka Pueꞌ Ala. Kotuꞌuana, tungkaihana Aturana Pueꞌ Ala hingkeꞌna pahuaꞌa kotuwuꞌ to wolaꞌ.

¹¹Alaꞌ moliu hawaꞌ tiꞌo, nopomonawuꞌa dosa, koꞌukoana tekaꞌaꞌa ka Pueꞌ Ala.

¹²Io horiana, Aturana hi Musa bateꞌna mangkolehi, hei hawaꞌ tiꞌo mononto hei moromiꞌ.

¹³Mewaliꞌ, ba uwaꞌ to hingkiꞌ meꞌitano: Ba aturana Pueꞌ Ala to moromiꞌ tiꞌo to mokaꞌaꞌa ka Pueꞌ Ala? Handoꞌio. Angkana, alaꞌ kokubahaꞌna atura tiꞌo, tetambai peleihangka mowali dosa, horiana tekaꞌaꞌa ka Pueꞌ Ala. Ka atura to moromiꞌ tiꞌo, mambahamo dosangka hei mambahamo kokodakene dosa.

¹⁴Mewaliꞌ halali-halali, tobahaꞌ mpololeke, Aturane hi Musa bateꞌna moromiꞌ alaꞌ pongkana ka Inohaꞌ Mangkolehi. Angkana aku hieꞌe toaꞌ to madosa, alaꞌ nopohawiꞌa dosa.

¹⁵Kupowuli hadoduongku waliangka, alaꞌ walia to moromiꞌ to kukodokoꞌi kuwali, handoꞌioreꞌi tiꞌo to kuwali, hei hapo to kupokoiꞌ, tiꞌo wae to kuwali!

¹⁶Angkana ane kuwali walia to kubahaꞌ hawaꞌi moromiꞌ, palaihana kuponiuꞌ mpololeke kotuꞌune Aturane hi Musa.

¹⁷Mewaliꞌ, kotuꞌuana hawaꞌi kuwali to hawaꞌi moromiꞌ tiꞌo alaꞌ peleihangku hadoduongku, angkana alaꞌ dosa to mokuasaꞌi lalingku mowali tiꞌo.

¹⁸Peleihangku, kukodokoꞌi mowali walia to moromiꞌ, angkana hawaꞌi kubiaꞌ, iomo horiana kubahaꞌ aku hieꞌe toaꞌ to madosaꞌa, hawaꞌi uwaꞌ to moromiꞌ i lali kotuwuꞌku.

¹⁹Hawaꞌi kuwali hapo to moromiꞌ motuntuni peleihangku, angkana to poko kuwali, iomo walia to kodake to kotuꞌuana hawaꞌi kulei.

²⁰Io horiana ane kuwaliꞌi walia to hawaꞌi kulei, palaihana: hawaꞌi kuwali alaꞌ peleihangku, angkana alaꞌ dosa to mokuasaꞌi lalingku mowali tiꞌo.

²¹Tiꞌomo to poko mewali i lali kotuwuꞌku: kulei mowali hapo to moromiꞌ, angkana walia to kodake to poko kuwali.

²²I lalingku, kuponiuꞌ mpololeke hapo to teꞌukiꞌ i lali Hawaꞌna Pueꞌ Ala,

²³angkana handoꞌio tiꞌo to kupetuntui, alaꞌ i lali kotuwuꞌku uwaꞌ kuasaꞌ to ntaniꞌna to monaniꞌa. I lalingku, kulei mpololeke motuntuni Hawaꞌna Pueꞌ Ala, angkana kuasaꞌ dosa to moꞌewa peleihangku tiꞌo, koꞌukoana nonaniꞌa kuasaꞌ dosa to uwaꞌ i lalingku.

²⁴Io horiana kotuwuꞌku waheꞌe: kulei mpololeke motuntuni Hawaꞌna Pueꞌ Ala, angkana bateꞌku poko madosa alaꞌ peleihana lalingku to kodake. Horewuꞌa mpololeke! Himoreꞌi to hingkiꞌ mamposalamaꞌa ka kotuwuꞌku hieꞌe to nokuasaꞌi dosa? Kupokodeꞌ Pueꞌ Ala alaꞌ Io to mamposalamaꞌa ka dosangku hieꞌe moliu i Pueꞌta Yesu Kerisitu!