Read Rampi Roma 8 Bible Online

Roma 8 - Rampi bible

Roma 8

¹Hinewowoꞌena, hamboaꞌmo uwaꞌ pehuku i himolu toaꞌ to mohaꞌanu hante Yesu Kerisitu.

²Alaꞌ pohaꞌanunta hante Yesu Kerisitu, kuasaꞌna Inohaꞌ Mangkolehi mampaꞌaniki kotuwuꞌ to wolaꞌ hei mampohinteki ka kuasaꞌ dosa to mangkomiki pe komahia.

³Ingkiꞌ hawaꞌki wadi hipohinte ka kuasaꞌ dosa alaꞌ petuntuta i Aturana hi Musa, hei hawaꞌi tobiaꞌ mampetuntui lekiꞌ-lekiꞌna Atura tiꞌo ka rohonta hadoduonta. Angkana uwaꞌ to nowali Pueꞌ Ala to meliu ka kuasaꞌna Atura tiꞌo. Io morumbaꞌ anaꞌNa humei pe duniaꞌ mewali toaꞌ, hibali toaꞌ to madosa, hingkeꞌna Io mohompoꞌ toaꞌ ka dosana.

⁴Nowali Pueꞌ Ala hatoꞌo, hingkeꞌna hapo to teꞌukiꞌ i Atura hi Musa, iomo lekiꞌ-lekiꞌna peleihana Pueꞌ Ala, topetuntui mpololeke, motuntuni peleihana Inohaꞌ Mangkolehi hei hawaꞌi motuntuni peleihana lalinta.

⁵Toaꞌ to mampetuntuiluhi peleihana lalira to kodake, motuntuniluhi hapo to ropekiri i lalira. Angkana toaꞌ to mampekiri hibobali hante Inohaꞌna Pueꞌ Ala, hingkiꞌ mampekirihi nturusi walia to mampomotanaꞌ Inohaꞌna Pueꞌ Ala.

⁶Hihimolu toaꞌ to mampohimpodulu peleihana lalina to kodake, monontomo kopahuane komahia to mokaꞌaki ka Pueꞌ Ala. Angkana hihimolu to mampohimpodulu peleihana Inohaꞌ Mangkolehi, iomo tiꞌo to pahua kotuwuꞌ to wolaꞌ hei mohaꞌanu hante Pueꞌ Ala.

⁷Toaꞌ to motuntuni peleihana lalina to kodake, moꞌewa Pueꞌ Ala. Hawaꞌi mengkoruꞌ i hawaꞌNa, alaꞌ hawaꞌi nobiaꞌ.

⁸Toaꞌ to mampetuntui peleihana lalina to kodake, hawaꞌi nobiaꞌ mowali hapo to nopotanaꞌ Pueꞌ Ala.

⁹Angkana ingkei, halali-halali, hamboaꞌmokei motuntuni peleihana lalimi to kodake. Motuntunikei peleihana Inohaꞌ Mangkolehi ane Inohaꞌna Pueꞌ Ala tiꞌo tuꞌu-tuꞌu uwaꞌ i lalimi. Ane toaꞌ to hawaꞌi nokoꞌuwaꞌi Inohaꞌna Kerisitu i lalira, handoꞌiohi toaꞌna Kerisitu.

¹⁰Angkana ingkei, ane Kerisitu uwaꞌ i lalimi, kehapoꞌi wotami hieꞌe mahi alaꞌ dosa, angkana hingkiꞌ pahuakei kotuwuꞌ to wolaꞌ, alaꞌ modamemokei hante Pueꞌ Ala.

¹¹Pueꞌ Ala mampotuwuꞌ huliꞌ hi Yesu nokomi kuasaꞌna Inohaꞌ Mangkolehi, hei Inohaꞌ Mangkolehi tiꞌo to uwaꞌ i lalimi. Mewaliꞌ, kehapoꞌi mahi wotami hieꞌe, Pueꞌ Ala bateꞌna hingkiꞌ mampotuwuꞌ huliꞌ woꞌo wotami hante kuasaꞌna Inohaꞌ Mangkolehi to uwaꞌ i lalimi.

¹²Mewaliꞌ, halali-halali, ingkiꞌ hieꞌe to maꞌindamoki hei hangangaa tobaiari hante motuntuniki peleihana Pueꞌ Ala. Hamboaꞌi ipetuntuikei peleihane lalimi to kodake,

¹³alaꞌ ane ipetuntuikei peleihane lalimi to kodake, hingkiꞌ mahikei hei nikaꞌakei ka Pueꞌ Ala. Angkana, ane ipohentekei waliami to motuntuni peleihana lalimi to kodake, alaꞌ kuasaꞌna Inohaꞌ Mangkolehi, hingki' pahuakei kotuwuꞌ to wolaꞌ.

¹⁴Hihimolu toaꞌ to noranda Inohaꞌna Pueꞌ Ala, iomo anaꞌne Pueꞌ Ala.

¹⁵Hampiha, nopohawiꞌkei dosa, iomo horiana mangkorokaꞌkei pehukuna Pueꞌ Ala. Angkana hinewowoꞌena itorimokei Inohaꞌ Mangkolehi, iomo horiana hamboaꞌmokei paralu morokaꞌ, alaꞌ Inohaꞌ Mangkolehi tiꞌo to mampopewalikei anaꞌna Pueꞌ Ala. Hei alaꞌ pajamana Inohaꞌ Mangkolehi, wadimoki mewowoi Umoꞌ pe Pueꞌ Ala.

¹⁶Alaꞌ Inohaꞌ Mangkolehi moꞌawa hante lalinta mantiꞌi koꞌingkiꞌna anaꞌne Pueꞌ Ala.

¹⁷Mewaliꞌ, ane nopoꞌanaꞌmoki Pueꞌ Ala, tobahaꞌ hingkiꞌ mewaliki to moꞌompui manaꞌ, hei hingkiꞌ pahuaki dolaꞌta to nopatimomomo Pueꞌ Ala i ingkiꞌ anaꞌNa. Lekiꞌ-lekiꞌna tiꞌo tohua moꞌawa hante Kerisitu, alaꞌ i duniaꞌ hieꞌe, ane ingkiꞌ nipoperima-rima hibali hante Kerisitu, i ando pobutusi hingkiꞌ pahuaki woꞌo kotuwuꞌ to manobaꞌ moꞌawa hante hi Yesu.

¹⁸Kubahaꞌ mpololeke, lekiꞌ-lekiꞌna komaporiꞌ to tohua i duniaꞌ hinewowoꞌena hawaꞌi mopalaiha, alaꞌ manobaꞌ tene kotuwuꞌ to tohua intu i ando to hingkiꞌ dongkaꞌ.

¹⁹Hinewowoꞌena, lekiꞌ-lekiꞌna ohi duniaꞌ to nowali Pueꞌ Ala, mampekau-kau tempona Pueꞌ Ala hingkiꞌ mampotongawa himo to mewalimo anaꞌ-anaꞌNe.

²⁰Pueꞌ Ala mampokononto duniaꞌ hamboaꞌmo modumbuꞌ, tiꞌo handoꞌio alaꞌ peleihana duniaꞌ angkana mewali alaꞌ peleihana Pueꞌ Ala. Kehapoꞌi hatoꞌo, uwaꞌ tene pepohinarua, hingkeꞌna i hampiha tempo, Pueꞌ Ala hingkiꞌ mampohente duniaꞌ hieꞌe ka kuasaꞌ to mampomokeroꞌi, horiana duniaꞌ hieꞌe hingkiꞌ nipokodeꞌ moꞌawa hante ingkiꞌ, anaꞌna Pueꞌ Ala.

²²Halali-halali, tobahaꞌ wute hinewowoꞌena lekiꞌ-lekiꞌna ohi duniaꞌ merorai nturusi. Komaporiꞌna duniaꞌ hieꞌe hibali komaporiꞌna towoweꞌe to notokoꞌi.

²³Hei handoꞌiolu duniaꞌ hieꞌe to merorai, angkana lalinta woꞌo, hantaro mepoꞌohimoki hei totorimomo medulu Inohaꞌ Mangkolehi to Nopaꞌanikiki. Kehapoki maporiꞌ hinewowoꞌena, angkana topekau tempone Pueꞌ Ala hingkiꞌ mampohente wotanta ka koduniaꞌa hei hingkiꞌ Nopopewaliki anaꞌNa.

²⁴Angkana ane tohuamoꞌi hapo to topohinaru noniuꞌ ikohipohentetamo ka pehuku dosanta, palaihana hamboaꞌmoki mampekau, alaꞌ mewalimoꞌi.

²⁵Ane mohinaruki i hapo to hingkiꞌ mewali, hangangaa sabaraꞌki mampekau wute mewali.

²⁶Ingkiꞌ toaꞌ to moledeꞌ, hawaꞌi tobahaꞌ hapo to hangangaa totiꞌi ane mekokaeki. Angkana Inohaꞌ Mangkolehi mosulungiki alaꞌ Nobahaꞌmoꞌi hapo to toparalu, hei i hinarona Pueꞌ Ala, Io to mampowute perapiꞌta to hawaꞌi tobiaꞌ topohowaꞌ.

²⁷Hei Pueꞌ Ala to pobahaꞌ lalina toaꞌ, pobahaꞌ woꞌo peleihana Inohaꞌ Mangkolehi, alaꞌ ingkiꞌ lekiꞌ-lekiꞌta toaꞌna Pueꞌ Ala to nopekokaeki Inohaꞌ Mangkolehi motuntuni peleihana Pueꞌ Ala.

²⁸Ane mampokarimaki Pueꞌ Ala hei ane Nowowoiki hintotoꞌ hante tungkaihaNa, lekiꞌ-lekiꞌna to mewali i lali kotuwuꞌta bateꞌna nopakeꞌ Pueꞌ Ala hingkeꞌna modumbuꞌ i ingkiꞌ.

²⁹Ka uluꞌ-uluꞌna, Pueꞌ Ala pobahaꞌ kohihimona to hingkiꞌ Nopoꞌanaꞌ. Hei iohi to mepoꞌohi, Noꞌuwiꞌmohi hingkeꞌna Nopohibalihi hante hi Yesu, horiana hi Yesu tiꞌo Iomo Anaꞌ Tokokaꞌ i lumbuna woriꞌ topohalali.

³⁰Mewaliꞌ: ingkiꞌ to Noꞌuwiꞌmoki Pueꞌ Ala ka uluꞌ-uluꞌna, Nowowoiki hingkeꞌna mewaliki anaꞌNa. Hei ingkiꞌ to Nowowoimoki mewali anaꞌNa, Noꞌampuniki woꞌo hingkeꞌna modameki hante Io. Hei ingkiꞌ to nopodamemoki hante Io, Nodandi hingkiꞌ pahuaki woꞌo dolaꞌta ka komanobaꞌNa.

³¹Hapo tene to wadi hingkiꞌ totiꞌi noniuꞌ i lekiꞌ-lekiꞌna to nowali Pueꞌ Ala tiꞌo? Ane Pueꞌ Ala tinaꞌ i ingkiꞌ, himo tenoreꞌi to pobiaꞌ moꞌewaki? Hawaꞌi uwaꞌ!

³²Howeꞌ, AnaꞌNa to hadoduona, hawaꞌi Nopekabohiꞌ mahi mohompoꞌki, hapona tene i langkaꞌ-langkaꞌ to modumbuꞌ mpololeke i lali kotuwuꞌta Nopepaꞌaniki.

³³Hei ingkiꞌ to Noꞌuwiꞌ Pueꞌ Ala, himo tenoreꞌi to wadi mosalaꞌiki? Hawaꞌi uwaꞌ, alaꞌ Pueꞌ Ala hadoduoNa to mantiꞌi kohawaꞌnamo uwaꞌ salaꞌta.

³⁴Himo tenoreꞌi to wadi mantiꞌi hangangaa nihukuki? Hawaꞌi uwaꞌ, alaꞌ hi Yesu Kerisitu to mahi mosulewotaiki alaꞌ komadosanta. Pelumbuꞌna tene katoꞌo, Io nipatuwuꞌ huliꞌ hei mahura tinaꞌ i koanana Pueꞌ Ala, hei mamperoruiki ka to mosalaꞌiki i hinarona Pueꞌ Ala.

³⁵Uwaꞌreꞌi to wadi mokaꞌaki ka komarimana Kerisitu? Kehapoki norumpa komasusa, ba komaporiꞌ, ba poperima-rima, ba kobiloraha, ba komakuraꞌa, ba pepororokaꞌ, ba perorokoꞌ, bateꞌna hawaꞌki tekaꞌa ka rimana Kerisitu.

³⁶I lali Suraꞌ Mangkolehi uwaꞌ teꞌukiꞌ waheꞌe: O Pueꞌ, uwaꞌhi nturusi toaꞌ to mangkodokoꞌi morokoꞌka nokomi petuntuki pe Ingko. Ingka hieꞌe hibali gimba to hingkiꞌ nirereꞌ.[10] [11]

³⁷Kehapoꞌi ba hapolu to morumpaki, bateꞌna penaniki nturusi, hei makaja mpololeke penaninte alaꞌ komarimana hi Yesu i ingkiꞌ!

³⁸Alaꞌ kubahaꞌ mpololeke, hawaꞌi uwaꞌ to wadi mokaꞌaki ka komarimana Pueꞌ Ala: Moromiꞌ kotuwuꞌ ba komahia moromiꞌ malaꞌeka ba kuasaꞌ to kodake, ba pepororokaꞌ moromiꞌ to mewali hinewowoꞌena, moromiꞌ to mewali i ando to hingkiꞌ dongkaꞌ, moromiꞌ kuasaꞌ i laniꞌ ba i duniaꞌ, hawaꞌi uwaꞌ hapolu to wadi mokaꞌaki ka komarimana Pueꞌ Ala to tohua alaꞌ pohaꞌanunta hante Pueꞌta Yesu Kerisitu.