Read Rampi 1 Korintus 1 Bible Online

1 Korintus 1 - Rampi bible

1 Korintus 1

¹Halali-halali, suraꞌ hieꞌe ka aku hi Paulu hei ka halali hampepoꞌohinta hi Sostene, kipokatu pe ingkei, jumaꞌa to uwaꞌ i kota Korintus. Pueꞌ Ala moꞌuwiꞌmokei mewali toaꞌNa, hei Iomo to mampomangkolehimokei alaꞌ pohintuwuꞌmi hante Yesu Kerisitu moꞌawa hante lekiꞌ-lekiꞌna toaꞌ to meꞌohaꞌ i imbo-imbolu to mekokae pe Yesu Kerisitu, Pueꞌra hei Pueꞌta woꞌo. Aku hieꞌe, noꞌuwiꞌa Pueꞌ Ala mewali surona hi Yesu Kerisitu motuntuni peleihaNa.

³Mekokaeꞌa pe Pueꞌ Ala Umoꞌta hante pe Pueꞌ Yesu Kerisitu hingkeꞌna Nobarakatikei ka kopopuhiꞌna laliNa hei Nopaꞌanikei Romiꞌ Ngkotuwuꞌ.

⁴Halali-halali, hawaꞌa luleꞌ mantiꞌi woriꞌ komoromiꞌ i Pueꞌ Ala noniuꞌ ingkei, alaꞌ ka kopopuhiꞌna laliNa, Io mampaꞌanikei pebarakati nokomi pohintuwuꞌmi hante Yesu Kerisitu.

⁵Alaꞌ pohintuwuꞌmi tiꞌo, Nopaꞌanimokei lekiꞌna pebarakati to modumbuꞌ i kotuwuꞌmi: iomo hinaꞌ Noponobahaꞌimokei poturuꞌ to tuꞌu, hei Nopaꞌanimokei komapande mampowute poturuꞌ tiꞌo.

⁶Lekiꞌ-lekiꞌna tiꞌo mampokononto komarohona pepoꞌohimi i kareba noniuꞌ i Kerisitu to kipowutekikei.

⁷Iomo horiana hamboaꞌmo uwaꞌ komakuraꞌne pebarakati to ihuakei, alaꞌ ihuamokei woriꞌ langkaꞌ kopebahaꞌ ka Inohaꞌ Mangkolehi, hei mampekaukei kohupaꞌana huliꞌ Pueꞌta Yesu Kerisitu.

⁸Io hingkiꞌ mampokaroho pepoꞌohimi wute i kotutuana duniaꞌ, hingkeꞌna ikohupaꞌna huliꞌ Pueꞌta Yesu Kerisitu, hamboaꞌmo hingkiꞌ uwaꞌ komasalaꞌmi.

⁹Hei Pueꞌ Ala bateꞌna topoꞌohi mobuhoꞌi dandiNa i ingkiꞌ, alaꞌ Io to moꞌuwiꞌmokei hingkeꞌna mohaꞌanukei moꞌawa hante AnaꞌNa iomo Yesu Kerisitu Pueꞌta.

¹⁰Halali-halali, ka kuasaꞌ to nopaꞌanikiꞌa Pueꞌta Yesu Kerisitu, kuperapiꞌ hingkeꞌna mohintuwuꞌkei lekiꞌ, hei inioꞌkei mampoꞌuwaꞌ posisalaꞌ. Hangangaa mohintuwuꞌkei hante hampekokirikei.

¹¹Halali-halali, tungkaihangku mantiꞌi hatoꞌo, alaꞌ uwaꞌhi halalinta hi Kloe hantambi to mampowute pe aku koꞌuwaꞌne posisalaꞌmi.

¹²Kupololita hatoꞌo alaꞌ uwaꞌ ka ingkei to mantiꞌi, “Aku metuntuꞌa pe hi Paulu.” Uwaꞌ to mantiꞌi, “Aku metuntuꞌa pe hi Apolo.” To ntaniꞌna woꞌo mantiꞌi, “Aku metuntuꞌa pe hi Peturuꞌ.” Hei uwaꞌ woꞌo to mantiꞌi, “Aku metuntuꞌa pe Kerisitu.”

¹³Uwaꞌreꞌi Kerisitu woriꞌ dolaꞌa? Ba akureꞌi to mahi nipaku i loti momehulepe mampohawa dosami? Ba niriukei hingkeꞌna mewalikei topegurungku? Hawaꞌi!

¹⁴Morasiꞌ, alaꞌ ka lumbumi hawaꞌi uwaꞌ to ntaniꞌna to kuriu, bateꞌralu hi Kirisipu hante hi Gaiu,

¹⁵horiana hawaꞌi uwaꞌ to wadi mantiꞌi kuriukei mewali topetuntuku.

¹⁶(Uwaꞌ tene to kuponindi: hi Stepanu hantambi, aku to moriuhi. Angkana i huwali ka iohi, ane kupekiri hamboaꞌmo uwaꞌ toaꞌ ntaniꞌna to kuriu.)

¹⁷Hawaꞌa norumbaꞌ Kerisitu mewali suroNa hingkeꞌna moriuꞌa toaꞌ, angkana hingkeꞌna mangkomiꞌa Kareba Moromiꞌ. Ikokupowutena Kareba Moromiꞌ, kutungkai kupakeꞌ lolita to hawaꞌi dingkaoꞌ, hingkeꞌna toaꞌ mepoꞌohi handoꞌio alaꞌ komapandengku mololita, angkana mampoꞌohihi kuasaꞌ komahina Kerisitu i loti momehulepe. Hawaꞌi kulei ane komahiNa tiꞌo hamboaꞌmo modumbuꞌ alaꞌ komapandengku mololita.

¹⁸Kipowute kareba to mantiꞌi Kerisitu mohompoꞌ toaꞌ ka pehuku dosa i konirokoꞌNa i loti momehulepe. Ane toaꞌ to hawaꞌi hingkiꞌ salamaꞌ pahori kareba tiꞌo, rotiꞌi, “Tiꞌo hawaꞌi mekahi akala.” Angkana ane ingkiꞌ to nohompoꞌmoki Pueꞌ Ala ka pehuku dosanta pahori kareba tiꞌo, totiꞌi, “Tiꞌomo lalane Pueꞌ Ala mampotongawa kuasaꞌNa!”

¹⁹I lali Suraꞌ Mangkolehi, Pueꞌ Ala mantiꞌi: “Hingkiꞌ Kupoꞌuko komapandene toaꞌ to pobahaꞌ, hei hawaꞌi hingkiꞌ Kupakeꞌ pekirine toaꞌ to mapande.”

²⁰Hapo dumbuꞌre toaꞌ to mapande? Hapo dumbuꞌre guru agama toYahudi? Hapo dumbuꞌre toaꞌ to mapande mololita i duniaꞌ hieꞌe? I pampeꞌelena Pueꞌ Ala, lekiꞌ-lekiꞌna komapandena toaꞌ Norekeꞌlu hawaꞌi modumbuꞌ,

²¹alaꞌ ka komapandena toaꞌ, hawaꞌki pobahaꞌ Pueꞌ Ala. Angkana alaꞌ komapandena Pueꞌ Ala, Nobutusimo umbiꞌ hingkeꞌna hihimo to mepoꞌohi pe Kareba Moromiꞌ to kipowute, hingkiꞌ Nohompoꞌhi ka pehuku dosara. Angkana ane kipowute Kareba Moromiꞌ, toaꞌ to hawaꞌi mepoꞌohi mantiꞌi, “Tiꞌo hawaꞌi mekahi akala.”

²²ToYahudihi, hawaꞌhi mepoꞌohi ane handoaꞌhi kiponoꞌokiꞌi tandaꞌ kuasaꞌ. Hei toYunanihi, hawaꞌhi mepoꞌohi ane hawaꞌhi kipokonontoki hante komapandena toaꞌ.

²³Angkana ingka mampowuteka komahina Kerisitu i loti momehulepe. Kareba tiꞌo ropomolalo pekirira toYahudihi, ane pe toaꞌ to handoꞌio toYahudi, kareba tiꞌo rorekeꞌlu lolita to hawaꞌi mekahi akala.

²⁴Angkana pe hihimolu to noꞌuwiꞌmo Pueꞌ Ala mewali toaꞌNa, moromiꞌ toYahudi ba to handoꞌio toYahudi, Kerisitu to mampotongawa kuasaꞌNa hante komapandena Pueꞌ Ala.

²⁵Ane toaꞌ to hawaꞌi mepoꞌohi, komahina Kerisitu i loti momehulepe hawaꞌi mekahi i akalara, hantaroreꞌi meliu tene komapandena Pueꞌ Ala ka komapandena toaꞌ. Motuntuni pahuana toaꞌ to hawaꞌi mepoꞌohi, Pueꞌ Ala hawaꞌi makuasaꞌ. Hantaro kotuꞌuana meliu tene kuasaꞌNe ka kuasaꞌna toaꞌ.

²⁶Halali-halali, ikolowoikei tene hohumbo kotuwuꞌmi ikohandoaꞌanakei tene nowowoi Pueꞌ Ala mewali toaꞌNa. I tempo tiꞌo, hawaꞌkei woriꞌ to mapande ba makuasaꞌ ba tepoꞌiwombo i pampeꞌelena toaꞌ,

²⁷alaꞌ Pueꞌ Ala moꞌuwiꞌ toaꞌ to hawaꞌi mapande i pampeꞌelena toaꞌ ntaniꞌna, hingkeꞌna to mapande hingkiꞌ nipokohili. Notungkai moꞌuwiꞌhi to moledeꞌ, hingkeꞌna toaꞌ to maroho hingkiꞌ nipokohili.

²⁸Notungkai moꞌuwiꞌhi to i wowoiꞌ kotuwuꞌna, to hawaꞌi niꞌadaꞌi, hante to hawaꞌi modumbuꞌ i pampeꞌelena toaꞌ, hingkeꞌna tongawa to nopokodeꞌ toaꞌ kotuꞌuana hawaꞌi modumbuꞌ.

²⁹Mewaliꞌ, iomo horiana hawaꞌi uwaꞌ howeꞌ haduo toaꞌ to wadi mampokokodeꞌ.

³⁰Ukonareꞌi, Pueꞌ Ala hadoduoNa to mampohintuwuꞌki hante Yesu Kerisitu, alaꞌ Iolu to mampaꞌaniki lala kotehompoꞌa. Moliu pohaꞌanunta hante Yesu Kerisitu, tobahaꞌmo komapandene Pueꞌ Ala: Kerisitu to mampomodameki hante Pueꞌ Ala, hei mampopewaliki toaꞌNa, hei mohompoꞌki ka pehuku dosanta.

³¹Iomo horiana hintotoꞌ mpololeke hapo to teꞌukiꞌ i lali Suraꞌ Mangkolehi: “Himo to mampokokodeꞌ, hangangaa mampokokodeꞌ alaꞌ to nowali Pueꞌ.”