Read Rampi 1 Korintus 10 Bible Online

1 Korintus 10 - Rampi bible

1 Korintus 10

¹Halali-halali, kulei hingkeꞌna ikolowoikei hapo to mewali hampiha i tododulunta. Pueꞌ Ala mampodulukihi moꞌawa hante kini. Lekiꞌ-lekiꞌra limbahi mewute i tahiꞌ Teberau.

²Hibalihi to niriu i lali kini hante uwai, tandaꞌ mewalihi topetuntuna hi Musa.

³Iohi lekiꞌ-lekiꞌra mangka pangka to hibobali, hei maꞌinuhi uwai to hibobali. Pangkara hante paꞌinura tiꞌo, iomo pangka hante paꞌinu to ka Pueꞌ Ala. Maꞌinuhi uwai to mehupaꞌ ka watu to kodeꞌ, hei watu tiꞌo nipandiriꞌ hibali Kerisitu to moꞌowonihi hei mampaꞌanihi kotuwuꞌ.

⁵Angkana nokomi kokodakena waliara, woriꞌ i lumbura to hawaꞌi nopomoromiꞌ Pueꞌ Ala, iomo horiana mahihi hei wotalokaꞌra nipotedehi kolopetanoliahi i popada lori.

⁶Lekiꞌ-lekiꞌna to mewali i toYahudi hampiha mewali pandiri' i ingkiꞌ, hingkeꞌna hawaꞌki mampetuntui waliara to kodake.

⁷Inioꞌki menomba pe lomoa, hibali to rowali hantenaꞌ ka lumbura hampiha. Alaꞌ uwaꞌ teꞌukiꞌ i lali Suraꞌ Mangkolehi to mantiꞌi: “Mangkahi hante maꞌinu moꞌawa-awa. Mosusaꞌhi motanaꞌ-tanaꞌ wute kohopopoanamo ropoꞌintuꞌa.”

⁸Inioꞌki mowali walia to mekokomaꞌi, hibali to rowali hantenaꞌ ka lumbura. Alaꞌ waliara tiꞌo, mahihi 23.000 duo i lali haꞌando.

⁹Inioꞌki mohohongkeꞌ Kerisitu, hibali to rowali hantenaꞌ ka lumbura, horiana mahihi nobingku ule.

¹⁰Hei iniꞌoki monau-nau, hibali to rowali hantenaꞌ ka lumbura, horiana norokoꞌhi malaꞌeka to perorokoꞌ.

¹¹Lekiꞌ-lekiꞌna to mewali i iohi hampiha teꞌukiꞌ hingkeꞌna mewali pepangkolowoi pe ingkiꞌ, hingkeꞌna hawaꞌki pahua pehukuna Pueꞌ Ala hibali hante iohi. Alaꞌ ingkiꞌ hieꞌe, tuwuꞌki i tempo koꞌukoana.

¹²Mewaliꞌ, ane uwaꞌ to mantiꞌi, “Maroho mpololeke pepoꞌohingka pe Pueꞌ,” hangangaa moromiꞌ-romiꞌkei hingkeꞌna hawaꞌkei monawuꞌ pe lali dosa!

¹³Hinangkana pekelo to morumpakei, pekelo to biasa mewali i toaꞌ, angkana dandina Pueꞌ Ala bateꞌna mewali: hawaꞌkei hingkiꞌ Nopotedehi nikeloi meliu ka rohona lalimi. I tempomi norumpa pekelo, Pueꞌ Ala hingkiꞌ mampaꞌanikei lala hingkeꞌna mantahakei.[11]

¹⁴Mewaliꞌ, halali-halali to kupokarima, inioꞌkei menomba pe lomoa!

¹⁵Mololitaꞌa pe ingkei, alaꞌ kurekeꞌkei toaꞌ to buhaꞌ pekiri. Kuperapiꞌ hingkeꞌna ipekokirikei lolitangka hieꞌe, tuꞌu ba hawaꞌi.

¹⁶Ane maꞌinuki anggoroꞌ i lali kopangka roti, hei totiꞌi woriꞌ komoromiꞌna pe Pueꞌ Ala, palaihana: mohaꞌanuki hante Kerisitu moliu kohibobona raꞌaNa i loti momehulepe. Hibali tiꞌo woꞌo ane nipodolaꞌ-dolaꞌkiki roti honiꞌi toꞌoka, tokolowoi komahine Kerisitu i loti momehulepe. Tiꞌo woꞌo mampokononto hawowotaki hante Kerisitu.

¹⁷Alaꞌ roti tiꞌo haꞌanulu nidolaꞌ-dolaꞌkiki honiꞌi toꞌoka. Palaihana: ingkiꞌ to woriꞌ mohaꞌanuki hante Kerisitu.

¹⁸Hatoꞌo woꞌo adaꞌra toSaraeli. Ane mampeweihi popenombara pe Pueꞌ Ala i womboꞌ potutua popenomba, hei i tempora mangka hadolaꞌ ka popenombara tiꞌo, nirekeꞌhi mohaꞌanu hante Pueꞌ Ala.

¹⁹Hapo tungkaihangka mantiꞌi hatoꞌo? Hawaꞌi kutiꞌi uwaꞌ pueꞌ i huwali ka Pueꞌ Ala. Hei hawaꞌi woꞌo kutiꞌi uwaꞌ dumbuꞌne pangka to ropopenomba pe lomoa.

²⁰Tungkaihangku: lekiꞌ-lekiꞌna to ropopenomba, hawaꞌi ropopenomba pe Pueꞌ Ala, angkana ropopenomba pe lomoa hei hawaꞌi kulei ane mohaꞌanukei hante lomoa.

²¹Hawaꞌi masipatoꞌ ane ingkei to maꞌinu anggoroꞌ tandaꞌ pohintuwuꞌmi hante Pueꞌ Yesu, maꞌinukei woꞌo anggoroꞌ moꞌawa hante iohi to menombahi pe lomoa. Hawaꞌi woꞌo masipatoꞌ ane ingkei to mangka roti, mangkakei woꞌo moꞌawa hante toaꞌ to menomba pe lomoa.

²²Ba hingkiꞌ mohohongkeꞌikei Pueꞌ Ala horiana Io mohiriꞌ hei bukota?[12] Ba ipekirikei marohokei ka Pueꞌ?

²³Uwaꞌ to mantiꞌi, “Wadiki mowali hapolu motuntuni peleihanta hadoduonta.” Tuꞌu lolita tiꞌo, angkana kutiꞌikikei: uwaꞌ to modumbuꞌ to wadi towali; uwaꞌ woꞌo to hawaꞌi modumbuꞌ. Wadiki mowali hapolu motuntuni peleihanta, angkana hawaꞌi lekiꞌ-lekiꞌna wadi mampokaroho lalina hangko awanta.

²⁴Palaihana: inioꞌkei mampaliꞌlu porasiꞌami hadoduomi. Hangangaa mowalikei woꞌo hapo to wadi mosulungi hangko awami.

²⁵Hinangkana kopongkona to ropobaluꞌ i pobaluꞌ-baluꞌa, wadi nihili hei niꞌoka. Hawaꞌkei paralu meꞌitano dulu ba pangka tiꞌo ropopenombamo pe lomoa ba handoaꞌi. Lekiꞌ-lekiꞌna tiꞌo wadi niꞌoka hante kopopuhiꞌna lalimi,

²⁶alaꞌ “Duniaꞌ hieꞌe hante lekiꞌ-lekiꞌna ohina, Pueꞌ Ala tumpune.”

²⁷Ane nowowoikei awami to handoꞌio tosarani nolou mangka pe tambina, wadikei mangka hapolu to nopatimomokikei. Inioꞌ ipeꞌitanokikei ba ropopenombamoꞌi pe lomoa kopongkona tiꞌo ba handoaꞌi.

²⁸Angkana ane uwaꞌ to mangka itoꞌo to mampatiꞌikikei, “Kopongkona tiꞌo ropopenombamo pe lomoa” Anioꞌ iꞌokakei hingkeꞌna hawaꞌkei mampomasusa lalina toaꞌ tiꞌo.

²⁹Ane i ingkiꞌluꞌi hadoduonta, hawaꞌi mahampo ane toꞌokaꞌi pangka tiꞌo. Wora intu uwaꞌ to meꞌitano, “Mahamporeꞌi hinaꞌ peleihangku hadoduongku wadi nopokononto to haduona?

³⁰Ane kuꞌokaꞌi kopongkona tiꞌo, hei kutiꞌi woriꞌ komoromiꞌ i Pueꞌ Ala, mahamporeꞌi horiana uwaꞌhi tene toaꞌ to mosalaꞌiꞌa?”

³¹Angkana kutiꞌi: ane mangkaki ba maꞌinuki, ba hapolu to towali, hangangaa towalimo hingkeꞌna Pueꞌ Ala nipokodeꞌ.

³²Inioꞌkei mowali hapo to hingkiꞌ mampomonawuꞌ hangko awami, moromiꞌ toYahudi, ba toaꞌ to handoꞌio toYahudi, ba halali hampepoꞌohimi to mengkoruꞌ pe Pueꞌ Ala.

³³Hatoꞌo woꞌo aku, i langkaꞌ-langkaꞌna kuwali nturusi hapo to mampomotanaꞌ lalina lekiꞌ-lekiꞌna toaꞌ. Hawaꞌa mampaliꞌ porasiꞌangku, angkana kuwali hapo to hingkiꞌ modumbuꞌ i toaꞌ ntaniꞌna hingkeꞌna pahuahi kotuwuꞌ to wolaꞌ to hawaꞌi mokoꞌukoa.