Read Rampi 1 Korintus 11 Bible Online

1 Korintus 11 - Rampi bible

1 Korintus 11

¹Ipetuntuimokei waliangka, hibali woꞌo aku mampetuntui waliana Kerisitu.

²Halali-halali, kupokodeꞌkei alaꞌ i langkaꞌ-langkaꞌna ikolowoiꞌakei nturusi, hei ipetuntuikei poturuꞌ to kupowutekikei.

³Angkana uwaꞌ halangkaꞌ to kupaꞌingaꞌikikei hingkeꞌna ibahaꞌkei: to mewali tutuꞌ lekiꞌ-lekiꞌna tomaꞌani iomo Kerisitu. Hatoꞌo woꞌo to mewali tutuꞌ hantambina iomo maꞌanina, hei Pueꞌ Ala mewali tutuꞌ Kerisitu.

⁴Ane uwaꞌi tomaꞌani to metangkoniꞌ honiꞌi mekokae ba mampowute lolitana Pueꞌ Ala i paminggua, tomaꞌani tiꞌo mampononaꞌa Kerisitu to mewali tutuꞌna.

⁵Angkana ane uwaꞌi towoweꞌe mekokae ba mampowute lolitana Pueꞌ Ala, ane mamingguki hawaꞌi metangkoniꞌ, towoweꞌe tiꞌo mampononaꞌa maꞌanina to mewali tutuꞌna, alaꞌ io hibali hante towoweꞌe to nibangkuroriꞌ.

⁶Mewaliꞌ, ane uwaꞌ towoweꞌe to hawaꞌi palei metangkoniꞌ i tempora menomba, hinamo io mobangkuroriꞌ wiloluna! Angkana ane mohiliꞌi nibangkurori tutuꞌne, hangangaa metangkoniꞌ.

⁷Ane tomaꞌani to mekokae ba mampowute lolitana Pueꞌ Ala, inioꞌ metangkoniꞌ, alaꞌ tomaꞌani nowali Pueꞌ Ala motuntuni pambiaraNa hadoduoNa, hingkeꞌna konaꞌNa ropokodeꞌ. Towoweꞌe hangangaa metangkoniꞌhi alaꞌ towoweꞌe nipopewali hingkeꞌna konaꞌna tomaꞌani ropokodeꞌ,

⁸alaꞌ tomaꞌani to uluꞌ-uluꞌna, hawaꞌi nipopewali ka towoweꞌe, angkana towoweꞌe wae to nipopewali ka tomaꞌani.

⁹Hei hatoꞌo woꞌo, tomaꞌani hawaꞌi nipopewali hingkeꞌna mampoꞌawaꞌi hantambina, angkana hantambina wae to nipopewali hingkeꞌna mampoꞌawaꞌi maꞌanina.

¹⁰Iomo horiana towoweꞌe hangangaa metangkoniꞌhi, hingkeꞌna noꞌokiꞌi malaꞌeka koꞌuwaꞌna kuasaꞌne towoweꞌe mekokae hante mampowute BooNa Pueꞌ.

¹¹Angkana i ingkiꞌ to mepoꞌohi pe Pueꞌ, towoweꞌe hante tomaꞌani momeparaluꞌi. Towoweꞌe mamparaluꞌi tomaꞌani, hei tomaꞌani mamparaluꞌi towoweꞌe,

¹²alaꞌ kehapoꞌi uluꞌ-uluꞌna towoweꞌe nipopewali ka tomaꞌani, angkana uko tiꞌo, lekiꞌ-lekiꞌna tomaꞌani nipoꞌanaꞌki ka towoweꞌe, hante to mampoꞌuwaꞌ lekiꞌ-lekiꞌna tiꞌo iomo Pueꞌ Ala.

¹³Ipekokirikei: masipatoꞌreꞌi ane towoweꞌe hawaꞌi metangkoniꞌ mekokae pe Pueꞌ Ala i lali paminggua?

¹⁴Tobahaꞌ, woriꞌ toaꞌ mantiꞌi hawaꞌi masipatoꞌ ane tomaꞌani kurauꞌ wilolune,

¹⁵angkana ane towoweꞌe kurauꞌ wilolune, tiꞌo mewali tandaꞌ komarangara, hei wilolura tiꞌo to mewali tangkoniꞌre.

¹⁶Angkana ane uwaꞌ to mangkodokoꞌi mosapuaka to kutiꞌi tiꞌo, hieꞌemo lolitangka: motuntuni adaꞌ to topetuntui, towoweꞌe hangangaa metangkoniꞌ i tempora menomba, hei adaꞌ tiꞌo ropetuntui woꞌo halali hampepoꞌohinta i jumaꞌa-jumaꞌa ntaniꞌna. Hawaꞌi uwaꞌ adaꞌ ntaniꞌna.

¹⁷Liu katoꞌo, uwaꞌ woꞌo halangkaꞌ to kukodokoꞌi kutiꞌikikei, hei hawaꞌi kuperenakikei alaꞌ waliami hieꞌe. Alaꞌ ane morampu-rampukei, woriꞌ tene to kodake to iwalikei hintina to moromiꞌ.

¹⁸Uluꞌ-uluꞌna, kuhori kareba to mantiꞌi, ane morampu-rampukei maminggu, uwaꞌ posisalaꞌ i lumbumi, hei kupekiri kareba tiꞌo wora uwaꞌ kotuꞌuane!

¹⁹Kotuꞌuana hangangaa uwaꞌ posisalaꞌ, alaꞌ lali posisalaꞌmi, hingkiꞌ tongawa hihimo to maroho petuntune pe Pueꞌ.

²⁰Angkana ane morampu-rampukei, hawaꞌkei iwali hapo to masipatoꞌ, hibali to mangka roti hante maꞌinu anggoroꞌ mamponindi komahina Pueꞌ Yesu.

²¹Alaꞌ i tempomi mangka moꞌawa-awa, uwaꞌkei to hawaꞌi mamponindi awami, mangkakei wute wohu, hei uwaꞌkei woꞌo to maꞌinu wute nolanu. Koꞌukoana awami bilorahi hante mangkumarohi.

²²Mahamporeꞌi hinaꞌ iwalikei hatoꞌo? Hawaꞌkeireꞌi ketambi? Aginamo mangkakei dulu hante maꞌinu i lali tambimi. Ba ileikei mampononaꞌa jumaꞌana Pueꞌ Ala hei mampokohilihi halalimi to merima-rima tuwuꞌra? Ba itiꞌikeireꞌi hingkiꞌ kuperenakikei? Hawaꞌi! Waliami tiꞌo hawaꞌi kuponiuꞌ.

²³Kupoturuꞌmokei hampiha hapo palaihane ane mangkakei hante maꞌinu moꞌawa-moꞌawa i tempomi mamponindi komahina Pueꞌ Yesu. Hei hapo to kupoturuꞌkikei tiꞌo kutorimo ka Pueꞌ. Winina ikohandoaꞌana tene nipewei pe poniꞌNa, Pueꞌ Yesu moroamo roti

²⁴honiꞌi mohumboꞌaki poꞌawerasiꞌ, mokebiꞌ-kebiꞌ hei Notiꞌikihi topeguruNa, “Hieꞌemo wotangKa to Kupewei mosulewotaikei. Hangangaa iwalikei hieꞌe mewali tandaꞌ pekolowoimi i Aku.”

²⁵Hatoꞌo woꞌo, koꞌukoralu mangka, Nopaꞌanimohi anggoroꞌ, honiꞌi Notiꞌikihi, “Anggoroꞌ hieꞌe, palaihana dandina Pueꞌ Ala to wolaꞌ[13] to mampohintuwuꞌ Pueꞌ Ala hante toaꞌna. Dandi tiꞌo Nopokaroho moliu raꞌangKu to hibobo i komahingKu. I piha-pihami maꞌinu angoroꞌ, iwalikei hingkeꞌna mewali tandaꞌ pekolowoimi i Aku.”

²⁶Mewaliꞌ, i piha-pihana mangkakei roti hante maꞌinukei anggoroꞌ, mampekarebaikikei komahina Pueꞌ Yesu, wute ikohupaꞌna huliꞌ.

²⁷Mewaliꞌ, i tempo mangka roti, himo to mangka roti hei maꞌinu anggoroꞌ i lali konaꞌna Pueꞌ motuntuni lala to hawaꞌi masipatoꞌ, toaꞌ tiꞌo masalaꞌ, alaꞌ io hawaꞌi moꞌadaꞌi wotana hante raꞌana Pueꞌ Yesu to nipandiriꞌ hibali roti hante anggoroꞌ.

²⁸Lekiꞌ-lekiꞌna toaꞌ hangangaa moparesaꞌ dulu lalina, honiꞌi wadi mangka roti hante maꞌinu anggoroꞌ,

²⁹alaꞌ toaꞌ to hawaꞌi masipatoꞌ mangka roti hante maꞌinu anggoroꞌ, angkana mangkahi, hingkiꞌ nohukuhi Pueꞌ Ala, alaꞌ hawaꞌhi moꞌadaꞌi wotana Pueꞌ.

³⁰Iomo horiana woriꞌ toaꞌ i lumbumi to mohakiꞌ hante moledeꞌ wotare, hei uwaꞌhi woꞌo to mahi.

³¹Angkana ane toparesaꞌi dulu lalinte, hawaꞌki hingkiꞌ nohuku Pueꞌ.

³²Ane nohukuki Pueꞌ, palaihana Io mokamorokiki hibali haduo umoꞌ mokamoroki anaꞌna, hingkeꞌna nohohoꞌki hei hawaꞌki hingkiꞌ nihuku i kotutuana duniaꞌ moꞌawa hante toaꞌ to hawaꞌi mepoꞌohi.

³³Mewaliꞌ halali-halali, ane morampu-rampukei mangka roti, momepekaukei dulu. Ane uwaꞌmokei lekiꞌ-lekiꞌmi, honiꞌkei mangka moꞌawa-awa.

³⁴Ane uwaꞌ to bilora, aginamo mangka dulu i tambina, hingkeꞌna hawaꞌi nosalaꞌi Pueꞌ i tempomi mangka roti. Noniuꞌ i peꞌitanomi to ntaniꞌna, hingkiꞌ kupokonontokikei ane mehupaꞌa huliꞌ.