Read Rampi 1 Korintus 13 Bible Online

1 Korintus 13 - Rampi bible

1 Korintus 13

¹Kehapoꞌi kubiaꞌ mololita i lali wiharo malaꞌeka ba wiharo toaꞌ to hawaꞌi kubahaꞌ, angkana ane hawaꞌi uwaꞌ komarimangku, hawaꞌi modumbuꞌ kotuwuꞌka. Lekiꞌ-lekiꞌna komapande tiꞌo hibalilu monina goꞌ ba tanengko to melili. Hawaꞌi modumbuꞌ.

²Kehapoꞌa pahua komapande mampowute lolita to ka Pueꞌ Ala, hei kubahaꞌ lekiꞌ-lekiꞌne to tewuni, hei maroho pepoꞌohingka horiana kubiaꞌ molimba biri, angkana ane hawaꞌi uwaꞌ komarimangku, hawaꞌi modumbuꞌ kotuwuꞌka.

³Ane lekiꞌ-lekiꞌna lumangku kudolaꞌ-dolaꞌkihi toaꞌ to merima-rima, hei kupewei woꞌo wotangka hingkeꞌna nihunuꞌi, angkana ane hawaꞌi uwaꞌ komarimangka, hawaꞌi modumbuꞌ kotuwuꞌka.

⁴Hapo palaihane to nitiꞌi rima? Ane mampokarimaki hangko awanta, hangangaa: sabaraꞌki hei moromiꞌ lalinte, hawaꞌi pobahaꞌ mohiriꞌ, hawaꞌki mampokokodeꞌ, hawaꞌki mamperenaki wotanta,

⁵hawaꞌki mowali hapo to molungkaꞌi adaꞌ, hawaꞌki moparuku peleihanta hadoduonta pe toaꞌ ntaniꞌna, hawaꞌki hohiꞌ bukota, hei hawaꞌki momepoꞌilali.

⁶Ane marimakei pe hangko awanta, palaihana: hawaꞌi tolei walia to kodake, angkana to tolei, walia to moromiꞌ,

⁷mojagai konaꞌna toaꞌ, mepoꞌohiki nturusi, mohinaruki nturusi, hei sabaraꞌki nturusi kehapoꞌi ba hapolu to morumpaki.

⁸Rima hawaꞌi hingkiꞌ mokoꞌukoa. Angkana ane uwaꞌ to mapande mampowute lolitana Pueꞌ Ala hingkiꞌ uwaꞌ tempone komapande tiꞌo moholi. Ane uwaꞌki to mapande mololita i lali wiharo to handoaꞌi nibahaꞌ to mepohele, hingkiꞌ uwaꞌ tempone komapande tiꞌo hingkiꞌ uko. Ane pahuaki komapande ka Pueꞌ Ala hingkeꞌna pobahaꞌki hapo to handoaꞌi robahaꞌ awanta, hampiha tempo komapande tiꞌo hamboaꞌmo niparalui.

⁹Hinewowoꞌena lekiꞌ-lekiꞌna komapandena toaꞌ makuraꞌ tene. Hingkoweꞌ toaꞌ to mampowute lolita to ka Pueꞌ Ala, makuraꞌ tene komapandere.

¹⁰Angkana ane hupaꞌmo tempone Pueꞌ Ala mampomombaha lekiꞌ-lekiꞌna, hamboaꞌmo hingkiꞌ uwaꞌ komapande tiꞌo, alaꞌ hamboaꞌmo roparaluꞌi.

¹¹Rapaꞌna, tempoku tene oꞌanaꞌ, pololitangku hibali tene oꞌanaꞌ; hatoꞌo woꞌo pekiringku hante waliangku. Angkana hinewowoꞌena, monindimoꞌa; tiꞌo horiana kupohentemo hapo to kuwali hampiha.

¹²Hinewowoꞌena, hibaliki toaꞌ to mepomororoa to hawaꞌi mombaha, alaꞌ handoaꞌi tene tobahaꞌ hohumbo kototuꞌuana. I ando to hingkiꞌ dongkaꞌ, honiꞌi tobahaꞌ wae lekiꞌ-lekiꞌne, alaꞌ hingkiꞌ momehinoroiki hante Pueꞌ Ala. Hinewowoꞌena, makuraꞌ tene kokubahaꞌne Pueꞌ Ala, angkana i ando to hingkiꞌ dongkaꞌ, hingkiꞌ kubahaꞌ mpololeke Pueꞌ Ala hibali woꞌo Io pobahaꞌa hinewowoꞌena.

¹³Mewaliꞌ hinewowoꞌena, uwaꞌ tolu langkaꞌ to hangangaa towali: mepoꞌohiki pe Pueꞌ Ala, mohinaruki i dandina Pueꞌ Ala, hei marimaki pe hangko awanta. Angkana ka tolu langkaꞌ tiꞌo, to meliu mpololeke komoromiꞌne iomo rima.