Read Rampi 1 Korintus 14 Bible Online

1 Korintus 14 - Rampi bible

1 Korintus 14

¹Mewaliꞌ, to hangangaa topohimpodulu, iomo mampokarimaki hangko awanta, hei hangangaa tokodokoꞌi mpololeke woꞌo pahua komapande ka Inohaꞌ Mangkolehi. Angkana komapande to modumbuꞌ mpololeke iomo komapande mampowute lolita to ka Pueꞌ Ala.

²Toaꞌ to mololita i lali wiharo to handoaꞌi nibahaꞌ to mepohele, hawaꞌhi mololita pe toaꞌ, angkana mololitahi hante Pueꞌ Ala, alaꞌ toaꞌ ntaniꞌna hawaꞌhi pobahaꞌ hapo to nitiꞌi. Alaꞌ perandana Inohaꞌ Mangkolehi, mampololitahi hapo to tewuni i toaꞌ.

³Angkana toaꞌ to mampowute lolita to ka Pueꞌ Ala, lolitara mampokaroho lalina hangko awara, mampoturuꞌhi, hei mampododoli lalira.

⁴Toaꞌ to mololitahi i lali wiharo to handoaꞌi nibahaꞌ to mepohele, mampokaroholuhi lalira hadoduora, angkana toaꞌ to mampowute lolita to ka Pueꞌ Ala, mampokaroho lalira lekiꞌ-lekiꞌna toaꞌ i lali jumaꞌa.

⁵Peleihangku halali-halali, hingkeꞌna ingkei lekiꞌ-lekiꞌna pobahaꞌkei mololita i lali wiharo to handoaꞌi nibahaꞌ to mepohele, angkana moromiꞌ tene ane mampowutekei lolita ka Pueꞌ Ala, alaꞌ ane mampowutekei lolita ka Pueꞌ Ala, kodeꞌ podumbuꞌane i toaꞌ ntaniꞌna hintina mololitakei i lali wiharo to ka kuasaꞌ Inohaꞌ Mangkolehi. Angkana ane uwaꞌhi to molimba wiharo tiꞌo hingkeꞌna nibahaꞌi palaihane, honiꞌi uwaꞌ wae podumbuꞌane mampokaroho lalira lekiꞌ-lekiꞌna toaꞌ i lali jumaꞌa.

⁶Mewaliꞌ halali-halali, ane rapaꞌna nolouꞌa maminggu moꞌawa hante ingkei, hei mololitaꞌa i lali wiharo to handoaꞌi nibahaꞌ to mepohele, hapomo dumbuꞌne i ingkei? Angkana modumbuꞌ mpololeke ane kupowutekikei hapo to nopotongawakiꞌa Pueꞌ Ala, ba mampokononto tungkaihana Pueꞌ Ala, ba mampowuteꞌa lolita ka Pueꞌ, ba mepoturuꞌa.

⁷Hingkoweꞌ woꞌo parewa to momoni hibali tulali ba katapi, ane hawaꞌi nipomomuni ngkoromiꞌ, hawaꞌi uwaꞌ podumbuꞌane. Toaꞌ to mampehoromua hawaꞌi pobahaꞌ lengkoꞌna monina.

⁸Hei ane uwaꞌ torompeꞌ to nitowuiꞌ hingkeꞌna mowowoi surodadu nolou moponiꞌ, angkana ane hawaꞌi mononto konipomomunine, hihimo to hingkiꞌ timomo nolou moponiꞌ?

⁹Hatoꞌo woꞌo ingkei: ane mololitakei i lali wiharo to handoaꞌi nibahaꞌ to mepohele, hohumbomo korobahaꞌne palaihane hapo to itiꞌikei? Lekiꞌ-lekiꞌna lolitami hawaꞌi modumbuꞌ, hibalilu parowo to moliu.

¹⁰I duniaꞌ hieꞌe, molangkaꞌ-langkaꞌ wiharo, hei lekiꞌ-lekiꞌna wiharo uwaꞌ palaihane.

¹¹Angkana ane uwaꞌ toaꞌ to mampololitakiꞌa i lali wiharo to hawaꞌi kubahaꞌ, hingkiꞌ kupowuli hapo to nololita. Hatoꞌo woꞌo, ane mololitaꞌa i lali wiharo to hawaꞌi robahaꞌ, hingkiꞌ ropowuli hapo to kupasuwu.

¹²Hatoꞌo woꞌo ingkei halali-halali: alaꞌ koꞌikodokoꞌinakei pahua komapande ka Inohaꞌ Mangkolehi, mewali hangangaa iperapiꞌkei to modumbuꞌ mpololeke iomo komapande to mampokaroho lalira lekiꞌ-lekiꞌna toaꞌ i lali jumaꞌa.

¹³Iomo horiana, hihimo to mololita i lali wiharo to handoaꞌi nibahaꞌ to mepohele, hangangaa merapiꞌ woꞌo pe Pueꞌ hingkeꞌna pahua komapande molimba lolitana tiꞌo, hingkeꞌna lekiꞌ-lekiꞌna toaꞌ to mampehoromua hingkiꞌ pobahaꞌ palaihana.

¹⁴Alaꞌ ane mekokaeꞌki mopakeꞌ wiharo to handoaꞌi tobahaꞌ, mekokaeki ka lalinta, angkana hawaꞌi moliu pekirinta alaꞌ hawaꞌi tobahaꞌ hapo palaihane lekiꞌ-lekiꞌna to topasuwu.

¹⁵Mewaliꞌ, hapo to hangangaa towali? Mekokaeki mopakeꞌ wiharo to handoaꞌi tobahaꞌ to ka Inohaꞌ Mangkolehi, hei mekokaeki woꞌo mopakeꞌ wiharo to robahaꞌ hangko awanta. Moromiꞌ ane molingaki mampokodeꞌ Pueꞌ Ala mopakeꞌ wiharo to handoaꞌi tobahaꞌ to ka Inohaꞌ Mangkolehi, hei molingaki woꞌo mampokodeꞌ Pueꞌ Ala mopakeꞌ wiharo to robahaꞌ toaꞌ ntaniꞌna.

¹⁶Ane rapaꞌna mantiꞌiki woriꞌ komoromiꞌ pe Pueꞌ Ala i lali wiharo to handoaꞌi kahampiha tobahaꞌ, toaꞌ to pahori hawaꞌi hingkiꞌ pobahaꞌ palaihana, mewali hawaꞌhi wadi mantiꞌi “Amin” hei mamponiuꞌ pekokae tiꞌo.

¹⁷Kehapoꞌi moromiꞌmo pekokaente mantiꞌi woriꞌ komoromiꞌ i Pueꞌ Ala, hawaꞌi hingkiꞌ modumbuꞌ i hangko awanta, alaꞌ pekokaenta tiꞌo hawaꞌi hingkiꞌ mampokaroho lalira.

¹⁸Kutiꞌi woriꞌ komoromiꞌ i Pueꞌ Ala, alaꞌ mololitaꞌa i lali wiharo to mepohele ka ingkei lekiꞌ-lekiꞌmi.

¹⁹Angkana ane mamingguki, agingku mampowute halangkaꞌ rolangkaꞌlu lolita mopaguru toaꞌ, hintina mampasuwuꞌa woriꞌ wiharo to mepohele, angkana hawaꞌi robahaꞌ toaꞌ hapo palaihane.

²⁰Halali-halali! Inioꞌkei mampekiri hibali oꞌanaꞌ. Hangangaa mampekirikei hibali toaꞌ to monindimo, hei noniuꞌ i walia to kodake, hangangaa hibalikei himidoꞌ to handoaꞌi tene pobahaꞌ hapo-hapo.

²¹I lali Suraꞌ mangkolehi, teꞌukiꞌ waheꞌe: Notiꞌi Pueꞌ Ala: “Moliu i wiharo to handoaꞌi nibahaꞌ to mepohele hingkiꞌ Kupoturuꞌkihi toYahudi. Hingkiꞌ Kuwowoihi toaꞌ ka woiꞌ to moꞌela hingkeꞌna mampowutehi lolitangKu i toYahudi i lali wiharo to hawaꞌi robahaꞌ. Angkana kehapoꞌi hatoꞌo, hawaꞌhi hingkiꞌ mampoꞌohi lolitangKu.”

²²Mewaliꞌ, ane uwaꞌki to mololita i lali wiharo to handoaꞌi nibahaꞌ to mepohele, lolitana tiꞌo tandaꞌ kuasaꞌ ka Pueꞌ Ala pe toaꞌ to handoaꞌi tene mepoꞌohi pe Io, handoꞌio pe toaꞌ to mepoꞌohimo. Angkana ane mampowuteki lolita to ka Pueꞌ Ala, lolitanta tiꞌo mewali tandaꞌ kuasaꞌ ka Pueꞌ Ala pe toaꞌ to mepoꞌohi, handoꞌio pe toaꞌ to hawaꞌi mepoꞌohi.

²³Kehapoꞌi hatoꞌo, ane uwaꞌhi toaꞌ to handoꞌio tosarani ba to handoaꞌi tene pobahaꞌ hawaꞌna Pueꞌ Ala, hei nolouhi maminggu moꞌawa hante ingkei, hapo to hingkiꞌ rotiꞌi ane lekiꞌ-lekiꞌmi mololita i lali wiharo to handoaꞌi nibahaꞌ to mepohele? Mononto hingkiꞌ rotiꞌi magilakei.

²⁴Angkana ane lekiꞌmi mampowute lolita to ka Pueꞌ Ala, hei mekahi haduo toaꞌ to handoꞌio toSarani ba to handoaꞌi tene pobahaꞌ hawaꞌna Pueꞌ Ala, io hingkiꞌ pobahaꞌ palaihana lolitami hei nobahaꞌ komadosane,

²⁵hei lekiꞌ-lekiꞌna to tewuni i lalina hingkiꞌ mambaha. Koꞌukoana, io hingkiꞌ melingkotuꞌ menomba pe Pueꞌ Ala, honiꞌi mantiꞌi, “Tuꞌu mpololeke Pueꞌ Ala uwaꞌ i ingkei!”

²⁶Mewaliꞌ halali-halali, hapo palaihane lekiꞌ-lekiꞌna tiꞌo? Ane maminggukei: uwaꞌ to molinga, uwaꞌ to mepoturuꞌ, uwaꞌ to mampowute lolita to ka Pueꞌ Ala, uwaꞌ to mololita i lali wiharo to handoaꞌi nibahaꞌ to mepohele, uwaꞌ to molimba wiharo tiꞌo hingkeꞌna robahaꞌi lekiꞌ-lekiꞌna toaꞌ. Lekiꞌ-lekiꞌna tiꞌo nipopodumbuꞌ mosulungi jumaꞌa.

²⁷Ane uwaꞌhi toaꞌ to mololita i lali wiharo to handoaꞌi nibahaꞌ to mepohele, hangangaa roduolu wute totolu, inioꞌ nomelobi ka tolu duo. Hei inioꞌhi mololita lekiꞌ, hangangaa momehawa-hawahi. Hei hangangaa uwaꞌ toaꞌ to molimba wiharora hingkeꞌna robahaꞌi palaihane.

²⁸Ane hawaꞌi uwaꞌ to molimba lolitara, toaꞌ to mololita i lali wiharo to handoaꞌi nibahaꞌ to mepohele, hangangaa monondiiꞌhi ane mamingguki. Agina mololitahi pe Pueꞌ Ala i lalira.

²⁹Ane uwaꞌhi to mampowute lolita to ka Pueꞌ Ala, maganaꞌlu roduo ba tolu duo to mololita, hei hangangaa uwaꞌ toaꞌ ntaniꞌna to mampokononto lolitara, ba ka Pueꞌ Ala ba hawaꞌi.

³⁰Ane rapaꞌna uwaꞌ haduo toaꞌ to mahura to mantorimo peponobuhoꞌi ka Pueꞌ Ala, aginamo toaꞌ to kolentuꞌana mololita meꞌohaꞌ dulu, hingkeꞌna awana wadi mololita.

³¹Mewaliꞌ, wadikei momehawa-hawa mampowute lolita to ka Pueꞌ Ala, hingkeꞌna lekiꞌmi pahua poturuꞌ to mampokaroho lalimi.

³²Toaꞌ to mampowute lolita to ka Pueꞌ Ala hangangaa mampokononto ba temponamoꞌi mololita ba handoaꞌi tene.

³³Lala mpenomba hangangaa nipopatengkaꞌ ngkoromiꞌ, hintotoꞌ hante peleihana Pueꞌ Ala. Hawaꞌi nolei Pueꞌ ane uwaꞌhi toaꞌ to metuli. Tiꞌomo atura to ropetuntui i lali jumaꞌa-jumaꞌa i imbo-imbolu.

³⁴Mewaliꞌ, towoweꞌe hangangaa monondiiꞌ ane mamingguki. Hawaꞌhi nipoliu mololita, hei hangangaa mengkoruꞌhi hibali to teꞌukiꞌ i lali atura agama.

³⁵Ane mangkodokoꞌihi pobahaꞌ ba hapolu, aginamo nipeꞌitanoki romoꞌi pe maꞌanira i tambi, alaꞌ hawaꞌi hintotoꞌ ane towoweꞌe mololita kolentuꞌanta maminggu.

³⁶Ba itiꞌikeireꞌi ingkeimo to ulu-uluꞌne mampowute hawaꞌna Pueꞌ Ala? Ba itiꞌikeireꞌi hawaꞌna Pueꞌ Ala ropowutelu pe ingkei?

³⁷Ane uwaꞌhi toaꞌ to mantiꞌi, “Mantorimoꞌa komapande mampowute lolita to ka Pueꞌ Ala,” ba “Mantorimoꞌa komapande ka Inohaꞌ Mangkolehi,” toaꞌ tiꞌo hangangaa mopangakuꞌ hapo to kuꞌukiꞌ hieꞌe iomo hawaꞌ ka Pueꞌ.

³⁸Angkana ane hawaꞌhi mampoꞌohi poturuꞌku hieꞌe, inioꞌhi ipoꞌohikei!

³⁹Mewaliꞌ halali-halali, hangangaa ikodokoꞌikei mpololeke hingkeꞌna pahuakei komapande mampowute lolita to ka Pueꞌ Ala, angkana inioꞌhi woꞌo niꞌopi to mololita i lali wiharo to handoaꞌi nibahaꞌ to mepohele.

⁴⁰Lekiꞌ-lekiꞌna hangangaa niwali motuntuni lala to masipatoꞌ hei motuntuni atura to moromiꞌ.