Read Rampi 1 Korintus 16 Bible Online

1 Korintus 16 - Rampi bible

1 Korintus 16

¹Kololiuhana halali-halali, hingkiꞌ mololitaꞌa noniuꞌ i doiꞌ to hingkiꞌ nirampu hingkeꞌna mosulingikei toaꞌna Pueꞌ Ala i kota Yerusale to merima-rima tuwuꞌra. Kuperapiꞌ hingkeꞌna irampukei doiꞌ pesulungimi motuntuni hapo to kupoturuꞌkimohi i jumaꞌa-jumaꞌa to uwaꞌ i woiꞌ Galatia.

²Hampoliꞌmokei ipekau kohupaꞌka honiꞌkei irampu hapo to hingkiꞌ nipakatukihi. Angkana haminggu-haminggu i ando minggu,[20] nipotaniꞌ dulu doiꞌ tiꞌo i tambimi motuntuni pahuami haduo-haduo, hei iporiakei ngkoromiꞌ wuteꞌa mehupaꞌ.

³Ane mehupaꞌmoꞌa intu, iꞌuwiꞌkei ka lumbumi, toaꞌ to nipoꞌohi, hingkeꞌna kupaꞌanihi suraꞌ rotiko, hei kurumbaꞌhi nolou pe Yerusale mangkomi doiꞌ pesulungimi.

⁴Hei ane roparaluꞌa, nolouluꞌa woꞌo moꞌawa hante iohi.[21]

⁵Uwaꞌ tungkaihangkaꞌ hingkiꞌ mololoꞌokei angkana akoꞌa dulu moweoꞌi jumaꞌa-jumaꞌa to uwaꞌ i woiꞌ Makedonia, alaꞌ kukodokoꞌi dulu nolou pe iohi.

⁶Peleihangku hingkeꞌna meꞌohaꞌa dulu moꞌawa hante ingkei. Wora hingkiꞌ meꞌohaꞌa i ingkei wute liu tempo mepoholeꞌ, hei uko tiꞌo ipopewotumoꞌakei mampololiu patengkaꞌku nolou pe woiꞌ ntaniꞌna.

⁷Hawaꞌi kulei holampi hangkaꞌ-hangkaꞌlu ingkei. Ane noponiuꞌ Pueꞌ, kukodokoꞌi hingkeꞌna meꞌohaꞌa moꞌawa hante ingkei.

⁸Angkana hinewowoꞌena, hangangaa meꞌohaꞌa dulu iseꞌe i Epesu wute i ando Pentakosta,

⁹alaꞌ kehapoꞌi woriꞌhi toaꞌ to moꞌewaꞌa, angkana modumbuꞌ mpololeke pajamangka iseꞌe.

¹⁰Ane mehupaꞌi hi Timotius, kupohinaru itorimokei ngkoromiꞌ hei iꞌadaꞌikei, alaꞌ io mampopatengkaꞌ jamana Pueꞌ hibali hante aku.

¹¹Mewaliꞌ, inioꞌ uwaꞌ to mampariwoiꞌ.[22] Kuperapiꞌ woꞌo hingkeꞌna ipopewotukei ngkoromiꞌ ane mahuliꞌi humei pe aku, alaꞌ kupekau iseꞌe kohupaꞌne moꞌawa hante halali hampepoꞌohinta.

¹²Kololiuhana, ane halalinta hi Apolo, woriꞌ mpihamo kurumbaꞌ hingkeꞌna mampoꞌawa halali hampepoꞌohi to ntaniꞌna to hingkiꞌ nolou mololoꞌokei i Korintus. Hinewowoꞌena handoaꞌi tene hiniꞌ nolou, angkana ane uwaꞌi koholangkoane, hingkiꞌ akolukei nololoꞌo.

¹³Majaga-jagakei. Ipokarohokei pepoꞌohimi! Ipokarohokei lalimi! Itikokei nturusi pepoꞌohimi!

¹⁴Hapolu to iwalikei, hangangaa iwalikei ka lalimi to buhaꞌ rima.

¹⁵Halali-halali, ibahaꞌmokei hi Stepanu hantambi to uluꞌ-uluꞌna mewali toSarani i woiꞌ Akaia.[23] Mampeweihi kotuwuꞌra pe Pueꞌ hingkeꞌna mosulungihi toaꞌna Pueꞌ Ala.

¹⁶Mewaliꞌ, halali-halali, kuperapiꞌ hingkeꞌna ipetuntuikei poturuꞌre hi Stepanu hantambi, hei poturuꞌra lekiꞌ-lekiꞌna awara to mampopatengkaꞌ jamana Pueꞌ.

¹⁷Motanaꞌ lalingka alaꞌ mehupaꞌmohi hi Stepanu, hi Potunatu hante hi Akaikusi ka kota Korintus. Iomohi to kurekeꞌ sulewotami to humei mosulungiꞌa iseꞌe.

¹⁸Halalinta tiꞌo mampokaroho lalingku, hei wadihi woꞌo mampokaroho lalimi. Iomo horiana kuperapiꞌ hingkeꞌna iꞌadaꞌikei toaꞌ to hatoꞌo.

¹⁹Lekiꞌ-lekiꞌna jumaꞌa to uwaꞌ i poropensi Asia[24] mampowute tabeara pe ingkei. Hi Akila hante hi Prikila hantambina[25] moꞌawa hante lekiꞌ-lekiꞌna toSarani to maminggu i tambira mampowute woꞌo tabeara i lali konaꞌna Pueꞌ.

²⁰Tabea ka lekiꞌ-lekiꞌna halali hampepoꞌohimi iseꞌe i Epesu. Ane hirampukei maminggu, mometabeꞌ-tabeꞌkei ka lalimi mpololeke.

²¹Koꞌukoana suraꞌ hieꞌe kuꞌukiꞌ hante korawengku hadoduongku. Tabea ka aku hi Paulu!

²²Toaꞌ to hawaꞌi mampokarima Pueꞌ Yesu, hingkiꞌ horewuꞌ. Maranata! Humeimoko, Pueꞌ!

²³Kuperapiꞌ hingkeꞌna Pueꞌ Yesu mobarakatikei!

²⁴Kupokarimakei lekiꞌ-lekiꞌmi i lali konaꞌna Yesu Kerisitu. Amin.