Read Rampi 1 Korintus 3 Bible Online

1 Korintus 3 - Rampi bible

1 Korintus 3

¹Halali-halali, hampiha i tempoku tene moꞌawa hante ingkei, hawaꞌkei wadi kupoturuꞌ hibali toaꞌ to pahua Inohaꞌ Mangkolehi. Kupoturuꞌkei hibali toaꞌ to motuntuni tene peleihana lalira hadoduora, alaꞌ tempo tiꞌo, pepoꞌohimi pe Kerisitu handoaꞌi tene maroho; hibalikei tene himidoꞌ i lali pepoꞌohimi.

²Ane himidoꞌ to maꞌamiꞌ tene, handoaꞌi tene wadi nipaꞌani pangka. Hatoꞌo woꞌo ingkei hampiha. Kupowutekikei poturuꞌ to hintotoꞌ i toaꞌ to handoaꞌi tene maroho i pepoꞌohira. Hawaꞌkei tene kupowuteki poturuꞌ to hintotoꞌ i toaꞌ to maroho i pepoꞌohira. Hei wute hinewowoꞌena, handoaꞌi tene nibiaꞌ mantorimo,

³alaꞌ motuntunikei tene peleihana lalimi hadoduomi. Mohiriꞌkei tene hei pokokei mosisalaꞌ. Tiꞌo mampotongawa kopampetuntuimi tene peleihana lalimi hadoduomi, hibali hante toaꞌ to handoaꞌi tene pobahaꞌ Pueꞌ.

⁴Haduo mantiꞌi, “Aku metuntuꞌa pe hi Paulu,” hei haduo mantiꞌi, “Aku metuntuꞌa pe hi Apolo.” Waliami tiꞌo hibali waliara toaꞌ to handoaꞌi tene pobahaꞌ Pueꞌ.

⁵Himo hi Apolo hante hi Paulu? Ingka hieꞌe rumbaꞌanaluka Pueꞌ Ala. Jamangki mampoturuꞌkei hingkeꞌna mepoꞌohikei pe Pueꞌ Yesu. Ingka haduo-haduo to mampopatengkaꞌluka jama to nopaꞌanikika Pueꞌ {hei jamangki moꞌoriꞌ-ori}.

⁶Wadi nipandiriꞌ waheꞌe: aku to mohawori, hi Apolo to mobobohi,[2] angkana Pueꞌ Ala to mampotuwuꞌi.

⁷Topohawori hante topobobohi, handoꞌio iohi pongkane jama tiꞌo, bateꞌnalu Pueꞌ Ala to mewali pongkane jama tiꞌo, alaꞌ Io to mampotuwuꞌ huꞌa-huꞌara.

⁸To mohawori hante to mobobohi, hibobaliluhi: hingkiꞌ pahuahi howonina to hintotoꞌ hante jamara.

⁹Aku hante hi Apolo, hibalika topajamana Pueꞌ Ala, hei ingkei wadi nipandiriꞌ hibali kineteꞌna Pueꞌ Ala. Ingkei woꞌo wadikei nipandiriꞌ hibali tambina Pueꞌ Ala.

¹⁰Alaꞌ kopopuhiꞌna lalina Pueꞌ Ala, aku to uluꞌ-uluꞌna mampowute Kareba Moromiꞌ pe ingkei. Wadiꞌa nipandiriꞌ hibali toaꞌ to mapande mowali pahuraha tambi, hei toaꞌ ntaniꞌna mampololiu jama tiꞌo moꞌaro tambi i womboꞌ pahurahana tiꞌo. Lekiꞌ-lekiꞌna topajama hangangaa majaga-jaga hingkeꞌna moꞌarohi i pahuraha tambi tiꞌo hante moromiꞌ.

¹¹Alaꞌ hi Yesu Kerisitu nipandiriꞌ hibali pahuraha tambi to noꞌaro Pueꞌ Ala. Hawaꞌi uwaꞌ pahuraha tambi to ntaniꞌna.

¹²Ane toaꞌ to moromiꞌ pampopatengkaꞌre jamana Pueꞌ, wadihi nipandiriꞌ hibali topoꞌaro tambi to mopakeꞌ parewa to moromiꞌ, hibali bulawa, peraꞌ hante watu to masuliꞌ. Ane toaꞌ to hawaꞌi moromiꞌ pampopatengkaꞌre jamana Pueꞌ, iohi hibalihi topoꞌaro tambi to mopakeꞌ parewa to hawaꞌi moromiꞌ, hibali loti, kora hante wonde.

¹³Mewaliꞌ, ane tambi tiꞌo noꞌoka api, hingkiꞌ mombaha wuaꞌ pajamane toaꞌ topoꞌaro tambi, ba moromiꞌi ba hawaꞌi, alaꞌ wuaꞌ jamana to moromiꞌ hingkiꞌ mantaha, angkana wuaꞌ jamana to hawaꞌi moromiꞌ hingkiꞌ tutu noꞌoka api.[3] Hatoꞌo woꞌo ikohupaꞌna huliꞌ Pueꞌ, hingkiꞌ Noparesaꞌ woꞌo jamane lekiꞌ-lekiꞌna toaꞌ, hei hingkiꞌ tongawa pajamante: moromiꞌ ba hawaꞌi moromiꞌ.

¹⁴I ando pobutusina, Pueꞌ Ala hingkiꞌ moparesaꞌ pajamana lekiꞌ-lekiꞌna toaꞌ. Ane tongawa komoromiꞌne, hingkiꞌ pahuahi howonina.

¹⁵Angkana ane hawaꞌi tongawa komoromiꞌne pajamana moliu i pampeꞌelena Pueꞌ, io marugiꞌ hamboaꞌmo uwaꞌ hapo-hapone. Kehapoꞌi io hingkiꞌ tepohente ka pehuku dosana, angkana hibali tene toaꞌ to niꞌoreꞌ ka lali api.

¹⁶Halali-halali hangangaa ibahaꞌkei ingkei iomo Tambi to nopeꞌohaꞌi Pueꞌ Ala, hei Inohaꞌna Pueꞌ Ala uwaꞌ i lumbumi.

¹⁷Ane uwaꞌ toaꞌ to morenda Tambina Pueꞌ Ala, io hingkiꞌ nohuku Pueꞌ Ala, alaꞌ ingkeimola Tambine Pueꞌ Ala to mangkolehi.

¹⁸Inioꞌkei mampowowutiki wotami hadoduomi. Ane uwaꞌ haduo toaꞌ i lumbumi to mampetomapande, agina toaꞌ tiꞌo mewali hibali tobebe i pampeꞌelena toaꞌ hingkeꞌna io mewali mapande i pampeꞌelena Pueꞌ Ala.

¹⁹Alaꞌ komapandena toaꞌ, i pampeꞌelena Pueꞌ Ala norekeꞌ bebe. Uwaꞌ to teꞌukiꞌ i lali Suraꞌ Mangkolehi waheꞌe: “Pueꞌ Ala mampokonawuꞌ toaꞌ to mapande hante komapandera hadoduora.” [4]

²⁰Uwaꞌ woꞌo to teꞌukiꞌ waheꞌe: “Pueꞌ Ala pobahaꞌ pekirina toaꞌ to mapande hawaꞌi uwaꞌ podumbuꞌana.” [5]

²¹Mewaliꞌ, iomo horiana kuperapiꞌ hingkeꞌna inioꞌ niperenakiꞌi komapandene haduo toaꞌ, alaꞌ lekiꞌna to iparaluꞌikei, nopaꞌanimokikei Pueꞌ Ala.

²²Lekiꞌ-lekiꞌna nopewei Pueꞌ Ala pe ingkei hingkeꞌna mosulungikei hibali: hi Apolo, hi Peturuꞌ, hante aku hi Paulu hei duniaꞌ, moromiꞌ tuwuꞌ ba mahi, tempo hinewoꞌena ba ando to hingkiꞌ dongkaꞌ. Lekiꞌ-lekiꞌna tiꞌo mewali dolaꞌmi.

²³Hei ingkeimo toaꞌne Kerisitu, hei Kerisitumo to ka Pueꞌ Ala.