Read Rampi 1 Korintus 4 Bible Online

1 Korintus 4 - Rampi bible

1 Korintus 4

¹Aku hante hi Apolo hei awangkuhi irekeꞌkei mpuꞌu tadulakomi, aginamo itiꞌikakei rumbaꞌanaka. Alaꞌ rumbaꞌanaka woꞌo Kerisitu. Ingka to mampowute karebane Pueꞌ Ala, hei hampiha kareba tiꞌo tewuni tene pe toaꞌ i duniaꞌ.

²Toaꞌ to mewali rumbaꞌa, iomohi toaꞌ to nipoꞌohi mampopatengkaꞌ jamana.

³Mewaliꞌ, ane uwaꞌkei to mosalaꞌi pajamangku, hawaꞌi mahampo. Hatoꞌo woꞌo ane pajamangku niparesaꞌ, hawaꞌi woꞌo mahampo. Hawaꞌi woꞌo kupokononto ba moromiꞌi pajamangka ba hawaꞌi.

⁴Kubahaꞌ kopopuhiꞌne lalingku hei hawaꞌa masalaꞌ, angkana handoꞌio tiꞌo to mampokononto kohawaꞌka masalaꞌ. Pueꞌ to hingkiꞌ moparesaꞌ lalingku, ba moromiꞌi ba hawaꞌi.

⁵Iomo horiana kutiꞌi, inioꞌkei mosalaꞌi jamara hangko awami ane handoaꞌi tene tempona. Ipekaukei dulu kohupaꞌne huliꞌ Pueꞌ. Iomo to hingkiꞌ mobungkahi lekiꞌ-lekiꞌna to tewuni tene i lali komokorindiana. Io to hingkiꞌ mampotongawa lekiꞌ-lekiꞌna tungkaihana lalira toaꞌ. I tempo tiꞌo, haduo-haduo toaꞌ hingkiꞌ pahua pepokodeꞌ ka Pueꞌ Ala, hintotoꞌ hante waliana.

⁶Halali-halali, hapo to kutiꞌi hingkonia noniuꞌ i hi Apolo hante aku hadoduongku. Ingka roduo mewalika pandiriꞌ, hingkeꞌna mampetuntuikei hawaꞌ to mantiꞌi, “Nitiko nturusi hapo to teꞌukiꞌ i lali hawaꞌna Pueꞌ.” Tungkaihangku hingkeꞌna inioꞌkei mampokokodeꞌ alaꞌ petuntumi i haduo tadulakomi. Inioꞌkei mamperenaki haduo tadulakomi hei mampononaꞌa to haduona.

⁷Ba itiꞌikeireꞌi, moromiꞌkei tene ka hangko awami? Haporeꞌi to uwaꞌ i ingkei to hawaꞌi itorimokei ka Pueꞌ Ala? Mahamporeꞌi hinaꞌ mampokokodeꞌkei, hantaro hapo to uwaꞌ i ingkei lekiꞌ-lekiꞌna to nopaꞌanikilukei Pueꞌ Ala?

⁸Ba ipekirikei hamboaꞌmo uwaꞌ to iparaluꞌikei? Ba ipekirikei marohomo pepoꞌohimi pe Pueꞌ? Ba itiꞌikei moparentakei hibali datu, hei ingka surona Pueꞌ Yesu hamboaꞌmo iparaluꞌikei? Kemoromiꞌ mpololeke ane mewalikei datu i poparentana Pueꞌ Ala, hingkeꞌna ingka woꞌo moparentaka moꞌawa hante ingkei.

⁹Angkana motuntuni pahuangku, ingka suronaka Pueꞌ Yesu, nopopewalimoka Pueꞌ Ala toaꞌ to nipariwoiꞌ tuwuꞌki ka lekiꞌ-lekiꞌna toaꞌ. Ingka ropohibalika hante toaꞌ to nihuku mahi i hinarora toaꞌ to woriꞌ, to roꞌoꞌele toaꞌ hante malaꞌeka.

¹⁰Ingka rorekeꞌka tobebe alaꞌ mampowuteka kareba noniuꞌ i Kerisitu, angkana itiꞌikei ingkei toSarani to mapande! Ingka, moledeꞌka, angkana itiꞌikei maroho pepoꞌohimi! Ingkei to roꞌadaꞌi toaꞌ i duniaꞌ, angkana ingka, nisalaꞌ-salaꞌika!

¹¹Wute hinewowoꞌena, hawaꞌi ganaꞌ kopongkonangki, hawaꞌi ganaꞌ paꞌinungki, hei hawaꞌi woꞌo ganaꞌ pebaduꞌki. Ropoperima-rimaka nturusi. Hawaꞌi uwaꞌ peꞌohaꞌangki.

¹²Ingka majamaka madori mampaliꞌ kotuwuꞌangki. Ane uwaꞌhi to motundaꞌka, kihowonihi hante pebarakati. Ane uwaꞌhi to mampoperima-rimaka, kiriilu.

¹³Ane uwaꞌhi to mampasuwu lolita to kodake pe ingka, kihoniꞌluhi hante lolita to maꞌalusuꞌ. Wute hinewowoꞌena, nirekeꞌka hibali kora to nitube to hawaꞌi uwaꞌ podumbuꞌana.

¹⁴Halali-halali! Tungkaihangku hieꞌe hawaꞌkei kupokohili, angkana moliu lolitangku hieꞌe, kupoturuꞌkei alaꞌ kurekeꞌmokei hibali anaꞌku hadoduongku to kupokarima.

¹⁵Kehapoꞌi i sabuna gurumi to mampoturuꞌkei i petuntumi pe Kerisitu, angkana akulu to nipoꞌumoꞌ, alaꞌ akumo to uluꞌ-uluꞌna mampowute Kareba Moromiꞌ, wute mepoꞌohikei pe Yesu Kerisitu.

¹⁶Iomo horiana kuperapiꞌ mpololeke, halali-halali, hingkeꞌna ipetuntuikei waliangka.

¹⁷Mewaliꞌ, kurumbaꞌ hi Timotius nolou mangkohidupaꞌkikei. Hi Timotius tiꞌo kupoꞌohi mampopatengkaꞌ jamana Pueꞌ, hei hibalimo anaꞌku to kupokarima. Ane hupaꞌi i ingkei, hingkiꞌ nopopangkolowoikei huliꞌ hohumbo petuntuka pe Kerisitu, hei kotuwuꞌku hintotoꞌ hante poturuꞌ to kupowute pe lekiꞌ-lekiꞌna jumaꞌa.

¹⁸I lumbumi uwaꞌ to mewali mampokokodeꞌ, alaꞌ ropekiri hamboaꞌmoꞌa hingkiꞌ nolou mangkohidupaꞌkikei.

¹⁹Angkana hingkiꞌ nolouluꞌa. Ane noponiuꞌi Pueꞌ, hamboaꞌmo morue hingkiꞌ mehupaꞌa. I tempo tiꞌo, hingkiꞌ kuꞌokiꞌ hapo to rowali toaꞌ to mampokokodeꞌ tiꞌo, hei hingkiꞌ kubahaꞌ ba uwaꞌi kuasaꞌne Pueꞌ Ala i iohi, ba podo lolitaralu.

²⁰Alaꞌ ane Pueꞌ Ala meparenta i lalinta, hangangaa topetuntui peleiNe, handoꞌiolu i pololitanta, angkana i walianta woꞌo.

²¹Mewaliꞌ, imboꞌina to ileikei: ane mehupaꞌa mampoturuꞌkei hei handoaꞌi tene ipohentekei waliami to kodake, hingkiꞌ makaja pololitangka. Angkana ane tewolihiꞌi waliami, hingkiꞌ maꞌalusuꞌ pololitangka hei marima lalingka.