Read Rampi 1 Korintus 5 Bible Online

1 Korintus 5 - Rampi bible

1 Korintus 5

¹Uwaꞌ kuhori kareba noniuꞌ i waliana haduo toaꞌ ka lumbumi. Waliana toaꞌ tiꞌo mekokomaꞌi, alaꞌ morompoꞌiꞌi hantambina umoꞌna. Hingkoweꞌ toaꞌ to hawaꞌi pobahaꞌ Pueꞌ Ala, hawaꞌhi mowali to hatoꞌo.

²Angkana ingkei, kehapoꞌi uwaꞌ to mowalia to hatoꞌo, mampokokodeꞌkei tene, hantaro kotuꞌuana, iposusa lalikei, hei toaꞌ tiꞌo hangangaa nipopolai ka lumbumi.

³Kehapoꞌa moꞌela ka ingkei, angkana pekiringku uwaꞌlu nturusi moꞌawa hante ingkei, hei makuasaꞌa tene mampohawaꞌkikei. Mewaliꞌ, ka kuasaꞌ to Nopaꞌanikiꞌa Pueꞌ Yesu Kerisitu, kupokonontomo: toaꞌ to kodake waliana tiꞌo hangangaa nihuku. Ane morampu-rampukei, hibaliluꞌa to moꞌawa hante ingkei, hei i lali kuasaꞌna hi Yesu Pueꞌta

⁵ipeweikei toaꞌ tiꞌo pe kuasaꞌna Belisiꞌ. Palaihana, hangangaa nipopolai toaꞌ tiꞌo ka lumbumi. Hangangaa iwalikei hatoꞌo, hingkeꞌna wotana pahua pehuku, angkana tanuanaꞌna hingkiꞌ Noposalamaꞌ Pueꞌ ikohupaꞌna huliꞌ Pueꞌ Yesu.

⁶Hawaꞌkei masipatoꞌ mampokokodeꞌ nturusi, alaꞌ uwaꞌhi tene i lumbumi to kodake waliare! Hawaꞌreꞌi ibahaꞌkei lolita to mantiꞌi, “Ragiꞌ to hangkiuꞌ mampopembiaꞌ tinampu mewali woriꞌ”?

⁷Lekiꞌ-lekiꞌna ragiꞌ to moruemo hangangaa ropopolai dulu. Hatoꞌo woꞌo ingkei hangangaa nipopolai ragiꞌ to moruemo iomo dosa, horiana mewalikei roti to wolaꞌ to hawaꞌi niragiꞌi. Ingkei Nopomangkolehimokei Pueꞌ Ala moliu Kerisitu to mahi mohompoꞌ dosanta. Io hibali hambaꞌa gimba to nirereꞌ i Posusaꞌa Pokalintora.

⁸Mewaliꞌ, humeimoki mamposusaꞌi Posusaꞌa Pokalintora i lalinta. Hawaꞌki masipatoꞌ mangka roti to niragiꞌi, palaihana walianta hampiha to kodake. Hei hangangaa mangkaki roti to wolaꞌ to hawaꞌi niragiꞌi. Palaihana hangangaa mampetuntuiki poturuꞌ to tuꞌu.

⁹I lali suraꞌku to kupokatumo pe ingkei, kutiꞌikikei hingkeꞌna inioꞌkei moꞌawa toaꞌ to mowali walia to mekokomaꞌi.

¹⁰Angkana to kutungkai tiꞌo, handoꞌio toaꞌ to hawaꞌi pobahaꞌ Pueꞌ Ala to mekokomaꞌi waliara, to hariko, to mebagiuꞌ, ba to menomba pe lomoa, alaꞌ ane keꞌiohi to kutungkai, palaihana kehanganga topolihi duniaꞌ hieꞌe.

¹¹Tungkaihangku hieꞌe iomo hingkeꞌna inioꞌhi nipoꞌawa toaꞌ to mantiꞌi halali hampepoꞌohinta angkana mowalihi walia to mekokomaꞌi, mepariwoiꞌhi, menombahi pe lomoa, mampokodakehi hangko awara, malanu-lanuhi, hei mebagiuꞌhi. Hingkoweꞌ woꞌo mangka, inioꞌkei moꞌawa hante toaꞌ to hatoꞌo!

¹²Ane toaꞌ to handoꞌiohi tosarani, hawaꞌi uwaꞌ kuasaꞌka hingkiꞌ mosalaꞌihi. Pueꞌ Alalu to makuasaꞌ mohukuhi. Angkana ingkei, wadikei mohuku halali hampepoꞌohimi to mowali nturusi salaꞌ, alaꞌ uwaꞌ to teꞌukiꞌ i lali Suraꞌ Mangkolehi waheꞌe: “Nipopolaihi ka lumbumi toaꞌ to kodake waliane!”