Read Rampi 1 Korintus 6 Bible Online

1 Korintus 6 - Rampi bible

1 Korintus 6

¹Mahamporeꞌi hinaꞌ ileikei mampehoriki halali hampepoꞌohimi i hinarona topobutusi to hawaꞌi mepoꞌohi pe Pueꞌ Yesu? Mahamporeꞌi hinaꞌ hawaꞌi ipehorikikei kara-karami i toaꞌna Pueꞌ Ala?

²Hawaꞌkeireꞌi ibahaꞌ, toaꞌna Pueꞌ Ala hingkiꞌ mobutusi to i duniaꞌ? Mewaliꞌ, ane ingkei hingkiꞌ mobutusi to i duniaꞌ, mahamporeꞌi hinaꞌ hawaꞌi nibiaꞌ mobutusi posisalaꞌmi to monangkoꞌ i tempo hieꞌe?

³Hawaꞌreꞌi ibahaꞌkei, ingkiꞌ tosarani to hingkiꞌ mobutusi woꞌo malaꞌeka? Mewaliꞌ, hangangaa nibiaꞌ woꞌo mobutusi posisalaꞌre toaꞌ i duniaꞌ hieꞌe.

⁴Ane uwaꞌ posisalaꞌmi, mahamporeꞌi hinaꞌ nipowute tiꞌo pe toaꞌ to handoꞌio halali hampepoꞌohimi?

⁵Tungkaihana lolitangku hieꞌe, hingkeꞌna mohilikei. Halali-halali to mepoꞌohi pe Kerisitu, hawaꞌireꞌi uwaꞌ haduo i lumbumi to mononto lalina to wadi mobutusi posisalaꞌmi?

⁶Angkana kuhori pokokei mampehoriki halali hampepoꞌohimi pe hinarona topobutusi to hawaꞌi mampoꞌohi Pueꞌ Yesu!

⁷Ianareꞌi mosisalaꞌkei hante halali hampepoꞌohimi tiꞌo mepokohili, hapona tene ane ipehorikikei pe toaꞌ to hawaꞌi mepoꞌohi. Ane uwaꞌ posisalaꞌmi aginamo haduo mengkonani hintina nipowute tiꞌo pe hinarona topobutusi to hawaꞌi mepoꞌohi.

⁸Angkana wuliha ingkei to masalaꞌ mpololeke. Alaꞌ mepokonawuꞌkei hei mobagiuꞌkei halali hampepoꞌohimi!

⁹Hawaꞌkeireꞌi ibahaꞌ halali-halali, toaꞌ to kodake waliara, hawaꞌhi hingkiꞌ mewali toaꞌna Pueꞌ Ala i lali kodatuaNa. Inioꞌkei mampomonawuꞌ wotami hadoduomi. Toaꞌ to mekokomaꞌi waliara, to menomba pe lomoa, to mebualosi, to mowali salaꞌ hibali tomaꞌani to mampohantambi hangko tomaꞌanina,

¹⁰to manako, to hariko, to nolanu, to mampokodake hangko awana, to mobagiuꞌ toaꞌ. Toaꞌ to hatoꞌo, hawaꞌhi hingkiꞌ mewali toaꞌna Pueꞌ Ala i lali kodatuaNa.

¹¹Uwaꞌkei to hatoꞌo hampiha, angkana Pueꞌ Ala mowaheꞌkei ka dosami, Nopohohidamokei Pueꞌ Ala mewali toaꞌNa, hei Nopomaniuꞌmokei i pampeꞌeleNa alaꞌ pohintuwuꞌmi hante Pueꞌ Yesu Kerisitu hei alaꞌ kuasaꞌna Inohaꞌna Pueꞌ Ala Pueꞌta.

¹²Uwaꞌ i lumbumi to mantiꞌi, “Wadiki mowali hapolu motuntuni peleihanta hadoduonta.” Tuꞌu lolita tiꞌo, angkana kutiꞌikikei, hangangaa topekiri dulu: uwaꞌ to towali to modumbuꞌ; uwaꞌ woꞌo to hawaꞌi modumbuꞌ. Kehapoꞌa wadi mowali hapolu motuntuni peleihangku, angkana hawaꞌi kulei ane wotangku hieꞌe nokuasaꞌi hapolu.

¹³Uwaꞌ woꞌo i lumbumi to mantiꞌi, “Pangka modumbuꞌ i hinaꞌinta, hei hinaꞌinta modumbuꞌ niꞌohii pangka.” Tuꞌu lolita tiꞌo, angkana merolangkaꞌ tiꞌo hampiha tempo hingkiꞌ nopopolai Pueꞌ Ala. Hawaꞌkei wadi mantiꞌi wotanta to nowali Pueꞌ Ala hieꞌe topakeꞌlu mowali walia to mekokomaꞌi. Ukonawae, wotanta hieꞌe hangangaa topakeꞌlu mowali hapo to hintotoꞌ hante peleihana Pueꞌ, alaꞌ Io tumpune wotanta.

¹⁴Pueꞌ Ala mampotuwuꞌ huliꞌ Pueꞌ Yesu ka komahia. Hatoꞌo woꞌo nokomi kuasaꞌNa, wotanta hieꞌe hingkiꞌ Nopotuwuꞌ huliꞌ.

¹⁵Hawaꞌreꞌi ibahaꞌkei, wotami iomo hadolaꞌ ka wotana Kerisitu. Moromiꞌreꞌi ane wotanta to mewali dolaꞌna Kerisitu topakeꞌ mowali walia to mekokomaꞌi pe towoweꞌe to hawaꞌi moromiꞌ waliana? Bateꞌna hawaꞌi moromiꞌ!

¹⁶Hawaꞌreꞌi ibahaꞌkei, hihimo to mowali walia to mekokomaꞌi pe haduo towoweꞌe to hatoꞌo, mewalimo hawowota hante towoweꞌe tiꞌo, alaꞌ i lali Suraꞌ Mangkolehi teꞌukiꞌ waheꞌe: “Toaꞌ to roduo tiꞌo mewalimohi hawowota.”

¹⁷Angkana hihimo to mohaꞌanu hante Pueꞌ, io hampekokiri hante Pueꞌ.

¹⁸Mewaliꞌ hangangaa ipomoꞌelakei wotami ka walia to mekokomaꞌi tiꞌo, alaꞌ walia tiꞌo mampomokomaꞌ wotana hadoduona. Angkana dosa to ntaniꞌna hawaꞌi mampomokomaꞌ wotana to mowalia, kehapoꞌi madosa.

¹⁹Hawaꞌreꞌi ibahaꞌkei, halali-halali, wotami iomo peꞌohaꞌana Inohaꞌ Mangkolehi. Io uwaꞌ i lalimi. Pueꞌ Ala hadoduona mampaꞌanikei Inohaꞌ Mangkolehi. Io makuasaꞌ i wotami, handoꞌio ingkei to makuasaꞌ i wotami, alaꞌ wotami handoꞌio ingkei tumpune.

²⁰Alaꞌ ingkei Nohompoꞌmokei Pueꞌ Ala, hei lapaꞌmo Nobaiari hante masuliꞌ mpololeke. Iomo horiana wotami hangangaa nipakeꞌ mowali to moromiꞌ hingkeꞌna Pueꞌ Ala nipokodeꞌ.