Read Rampi 1 Korintus 8 Bible Online

1 Korintus 8 - Rampi bible

1 Korintus 8

¹Kololiuhana, hingkiꞌ mololitaꞌa noniuꞌ pangka to nipopenomba pe lomoa. Itiꞌikei, “Ingkiꞌ toSarani, mapandeki. Tobahaꞌmo poturuꞌ to tuꞌu.” Tuꞌu mpololeke, angkana kutiꞌikikei: nokomi komapande, toaꞌ mampokokodeꞌ. Angkana rima mampokaroho kotuwuꞌta.

²Uwaꞌ haduo toaꞌ mantiꞌi, “Mapande” hantaro kotuꞌuana, komapandene hawaꞌi mokonolouha.

³Angkana toaꞌ to tuꞌu-tuꞌu mampokarima Pueꞌ Ala, Pueꞌ Ala pobahaꞌi.

⁴Mewaliꞌ, noniuꞌ i pangka to ropopenomba pe lomoa, uwaꞌkei to mantiꞌi wadilu niꞌoka, alaꞌ tobahaꞌ kohawaꞌna uwaꞌ pueꞌ ntaniꞌna, bateꞌnalu Pueꞌ Ala. Hei tobahaꞌ: ka lekiꞌ-lekiꞌna lomoa to ropenombai, hawaꞌi uwaꞌ howeꞌ halangkaꞌ to tuꞌu.

⁵Woriꞌ langkaꞌ to ropenombai toaꞌ, to rotiꞌi pueꞌ ba lomoa, moromiꞌ i laniꞌ, moromiꞌ i womboꞌ duniaꞌ.

⁶Angkana pe ingkiꞌ to mepoꞌohi, haduolu Pueꞌ Ala, Iomo Umoꞌta, hei lekiꞌ-lekiꞌna to uwaꞌ pongkana ka Io. Nopaꞌaniki kotuwuꞌ hingkeꞌna mampokodeꞌki konaꞌNa. Hei haduolu Pueꞌte, Iomo Yesu Kerisitu. Moliu hi Yesu tiꞌo, Pueꞌ Ala mowali lekiꞌ-lekiꞌna to uwaꞌ i duniaꞌ, hei alaꞌ kohiYesuna, pahuakei kotuwuꞌ to wolaꞌ.

⁷Angkana kehapoꞌi hatoꞌo, hawaꞌi lekiꞌ-lekiꞌna toSarani to pobahaꞌ tiꞌo. Uwaꞌhi to menomba pe lomoa ikohandoaꞌara pobahaꞌ Pueꞌ, hei wute hinewowoꞌena, ane pangka to ropopenomba pe lomoa, rotiꞌi i lalira, “Menomba womoki pe lomoa!” Mewaliꞌ, ane mangkahi pangka tiꞌo, rotiꞌi i lalira, “Madosaki,” alaꞌ bata-bata tene lalire ba wadi niꞌoka ba hawaꞌi.

⁸Kotuꞌuana, pangka tiꞌo hawaꞌi mangkomiki dodungku pe Pueꞌ Ala hei hawaꞌi woꞌo mangkomiki moꞌela ka Pueꞌ Ala. Ane toꞌokaꞌi, hawaꞌki morasiꞌ, hei ane hawaꞌi toꞌoka, hawaꞌki woꞌo marugiꞌ.

⁹Angkana hangangaa moromiꞌ-romiꞌkei. Lekiꞌ-lekiꞌna pangka wadi toꞌoka, angkana inioꞌ ka hapo to toꞌoka topokonawuꞌ awante to handoaꞌi tene maroho pepoꞌohina.

¹⁰Ingko to maroho pepoꞌohimu wadiko mangka hapolu, angkana ane mangkako pangka to nipopenomba pe lomoa i tambi penombahara pe lomoa hei noꞌokiꞌko halali hampepoꞌohimu to handoaꞌi maroho pepoꞌohina, waliamu tiꞌo mamparukuꞌi mangka hante komomaꞌa.

¹¹Iomo horiana, alaꞌ koꞌibahaꞌnamokei pangka tiꞌo wadi niꞌoka, ipokonawuꞌ halalimi to bata-bata tene lalina. Hei to ipokonawuꞌ tiꞌo, iomo halali hampepoꞌohimi to nosulewotai Kerisitu moliu i konirokoꞌNa.

¹²Ane iwalikei to hatoꞌo, masalaꞌkei, alaꞌ ipokonawuꞌ halalimi to hawaꞌi tene maroho pepoꞌohina, hei madosa mpololekekei i pampeꞌelena Kerisitu.

¹³Iomo horiana kutiꞌikikei: ane rapaꞌna kupokonawuꞌ halali hampepoꞌohingka alaꞌ kokuꞌokana bouꞌ ba pangka, agina hamboaꞌmo hingkiꞌ kuꞌoka pangka tiꞌo, hingkeꞌna hawaꞌi uwaꞌ halalingka to monawuꞌ alaꞌ waliangku.