Read Rampi 2 Korintus 1 Bible Online

2 Korintus 1 - Rampi bible

2 Korintus 1

¹Pe jumaꞌa i kota Korintus Suraꞌ hieꞌe ka aku hi Paulu, to noꞌuwiꞌ Pueꞌ Ala mewali surona Yesu Kerisitu motuntuni peleihaNa, hei ka hi Timotius halalinta, kipokatu pe ingkei halali hampepoꞌohingki to uwaꞌ i kota Korintus hei kota-kota ntaniꞌna i woiꞌ Akaia.[1]

²Kiperapiꞌ hingkeꞌna Pueꞌ Ala Umoꞌta hante Pueꞌ Yesu Kerisitu mampaꞌanikei pebarakati hante romiꞌ ngkotuwuꞌ.

³Topokodeꞌmo Pueꞌ Ala, Umoꞌna Pueꞌta Yesu Kerisitu, alaꞌ Iomo Umoꞌta to kodeꞌ rimaNa, hei Io woꞌo to mampokaroho lalingki i langkaꞌ-langkaꞌna komaporiꞌ to morumpa kotuwuꞌki. Nowali hatoꞌo hingkeꞌna roho to kitorimo ka Io kipakeꞌ woꞌo mampokaroho lalira toaꞌ ntaniꞌna to pahua woꞌo komaporiꞌ.

⁵Woriꞌ komaporiꞌ to nohua Kerisitu, hei komaporiꞌ tiꞌo kihua woꞌo, angkana tetambai woꞌo koworiꞌne ka roho lali to kihua ka Kerisitu.

⁶Ane norumpaka komaporiꞌ, komaporiꞌ tiꞌo kiriilu hingkeꞌna kipokarohoꞌi lalimi hei hingkeꞌna salamaꞌkei. Hei ingkei, norumpakei woꞌo komaporiꞌ hibali to kihua. Mewaliꞌ, ane Pueꞌ Ala mampokaroho lalingki i lali komaporiꞌ, roho tiꞌo kipakeꞌ woꞌo mampokaroho lalimi, hingkeꞌna sabaraꞌkei hei mantahakei.

⁷Iomo horiana hawaꞌi bata-bata lalingki. Kibahaꞌ kohingkiꞌ mantahami i lali komaporiꞌ. Kibahaꞌ komaporiꞌ to ihuakei hibali hante komaporiꞌ to kihua, hei bateꞌna Pueꞌ Ala hingkiꞌ mampokaroho lalimi hibali hante ingka.

⁸Halali-halali, kikodokoꞌi hingkeꞌna ibahaꞌkei komakajane komaporiꞌ to morumpaka hampiha i poropensi Asia,[2] hei komaporiꞌ tiꞌo meliu ka pebiaꞌki. Wulimoka hamboaꞌmo kibahaꞌ hapo to hingkiꞌ kiwali, hibalika to hingkiꞌ mahi.

⁹Pehoringki hibalika to nibutusi hingkiꞌ nihuku mahi. Angkana komaporiꞌ tiꞌo hangangaa mewali hingkeꞌna hawaꞌka mohinaru i rohongki hadoduongki, angkana wae hingkeꞌna mohinaruka pe Pueꞌ Ala to makuasaꞌ mampotuwuꞌ huliꞌ toaꞌ to mahi.

¹⁰Kehapoka pahua kohorewuꞌ to makaja tiꞌo, angkana Pueꞌ Ala mampohintemoka mpuꞌu ka kohorewuꞌ tiꞌo, horiana hawaꞌka mahi. Hei kibahaꞌ Pueꞌ Ala hingkiꞌ mampohenteka ka lekiꞌna kohorewuꞌ, moromiꞌ to morumpaka hinewowoꞌena ba i ando to hingkiꞌ dongkaꞌ.

¹¹Ingkei woꞌo, ipekokaekika, alaꞌ nokomi pekokaena toaꞌ woriꞌ, Pueꞌ Ala hingkiꞌ mosulungika, horiana woriꞌ toaꞌ hingkiꞌ mantiꞌi woriꞌ komoromiꞌna pe Io.

¹²Halali-halali, motanaꞌ lalingki alaꞌ kibahaꞌ popuhiꞌ lalingki. I lekiꞌ-lekiꞌna waliangki i duniaꞌ, hawaꞌi uwaꞌ komasalaꞌki, peꞌuwaꞌnamo i ingkei. I lekiꞌna to kiwali, hawaꞌi uwaꞌ to kiwowuni; tungkaihangki mononto i pampeꞌelena Pueꞌ Ala. Hapo to kiwali, kiwali ka komoromiꞌna to kihua ka Pueꞌ Ala, hawaꞌi ka komapandengki.

¹³Hapo to kiꞌukiꞌ i lali suraꞌki, mombaha palaihane, hawaꞌi uwaꞌ to kiwowuni. Kehapoꞌi handoaꞌkei tene pobahaꞌ mpololeke tungkaihangki, kupohinaru koꞌukoana hingkiꞌ ibahaꞌkei lekiꞌ-lekiꞌna, hingkeꞌna ikohupaꞌna huliꞌ Pueꞌta Pueꞌ Yesu, hingkiꞌ motanaꞌ lalimi alaꞌ koꞌingkana, hei ingka woꞌo hingkiꞌ motanaꞌ lalingki alaꞌ koꞌingkeina.

¹⁵Mewaliꞌ, alaꞌ kipoꞌohiꞌi komotanamio pe ingka, iomo horiana uwaꞌmo tungkaihangkaꞌ nolou mokadoroꞌikei korompihana, hingkeꞌna rompihakei woꞌo pahua pebarakati.

¹⁶Motuntuni poliwongku to uluꞌ-uluꞌna tiꞌo, hingkiꞌ kuweoꞌkei i tempoku nolou pe woiꞌ Makedonia, hei ane mahuliꞌa ka poropensi Makedonia, hingkiꞌ holampi womoꞌa i ingkei, hingkeꞌna i sulungiꞌakei i patengkaꞌku nolou pe woiꞌ Yudea.

¹⁷Angkana poliwongku ako mokadoroꞌikei hawaꞌi mewali. Ba itiꞌikeireꞌi hawaꞌi tuꞌu dandingka? Ba itiꞌikeireꞌi motuntuniluꞌa peleihangku hadoduongku? Hawaꞌa hibali toaꞌ i duniaꞌ: kutiꞌi “Ioꞌ,” angkana tungkaihangku hawaꞌi hatoꞌo.

¹⁸Halali-halali, hawaꞌa hatoꞌo! Hibali hante Pueꞌ Ala mobuhoꞌi lekiꞌ-lekiꞌna dandiNa pe ingkiꞌ, hatoꞌo woꞌo lolitangki pe ingkei, wadika nipoꞌohi. Hawaꞌi kitiꞌi “Ioꞌ” pe ingkei ane tungkaihangki hawaꞌi hatoꞌo.

¹⁹Aku hi Paulu, hi Silas[3] hante hi Timotius, to mampowute pe ingkei kareba noniuꞌ Yesu Kerisitu, Anaꞌna Pueꞌ Ala. Hei hi Yesu Kerisitu tiꞌo, hawaꞌi uwaꞌ kotewolihiane tungkaihaNa pe ingkiꞌ. Hawaꞌi kahampiha Notiꞌi “Ioꞌ” ane hawaꞌi hatoꞌo to Notungkai. Mononto mpololeke hawaꞌi uwaꞌ kotewolihiane tungkaihaNa pe ingkiꞌ.

²⁰Woriꞌ dandine Pueꞌ Ala pe ingkiꞌ. Io mobuhoꞌi lekiꞌ-lekiꞌna dandiNa tiꞌo moliu i hi Yesu. Alaꞌ kohiYesuna, wadiki mampokodeꞌ Pueꞌ Ala hei mantiꞌi, “Amin!”

²¹Pueꞌ Ala hadoduona to mampokaroho lalingki hante lalimi woꞌo, hingkeꞌna ingkiꞌ lekiꞌ-lekiꞌta mohintuwuꞌki hante Kerisitu. Pueꞌ Ala to moꞌuwiꞌki mewali toaꞌNa,

²²hei mampaꞌaniki Inohaꞌ Mangkolehi to mampokononto koꞌingkiꞌna toaꞌNe. Inohaꞌ Mangkolehi tiꞌo iomo tandaꞌna Pueꞌ Ala i lalinta, alaꞌ Io mampokaroho dandina Pueꞌ Ala i ingkiꞌ, hingkeꞌna mononto i ingkiꞌ, hingkiꞌ Nopaꞌaniki lekiꞌna to Nodandikiki.[4]

²³Halali-halali, hawaꞌa mowuti, Pueꞌ Ala sabiꞌka. Alaꞌ Io to pobahaꞌ lalingku. Hampiha hawaꞌa nolou pe Korintus alaꞌ hawaꞌa hiniꞌ mampomasusakei hante lolitangku to motari.

²⁴Hawaꞌka hiniꞌ moparukukei noniuꞌ i pepoꞌohimi, alaꞌ kibahaꞌ maroho pepoꞌohimi pe Kerisitu. Angkana kilei majama moꞌawa hante ingkei hingkeꞌna motanaꞌ lalimi.