Read Rampi 2 Korintus 10 Bible Online

2 Korintus 10 - Rampi bible

2 Korintus 10

¹Halali-halali, aku hieꞌe hi Paulu. Uwaꞌ to hingkiꞌ kupowute pe ingkei. Uwaꞌhi toaꞌ i lumbumi to mantiꞌi, “Ane hi Paulu moꞌela ka ingka, lolitana makaja i lali suraꞌna, angkana ane momehinoroika, moꞌalusuꞌ mpololeke.” Mewaliꞌ, ka lalingku to mengkaꞌiwowoiꞌ hei moꞌalusuꞌ, hibali lalina Kerisitu,

²kuperapiꞌ hingkeꞌna ane hupaꞌa i ingkei, anioꞌkei mampopehupaꞌ kobukotangku. Wuraniꞌa mokamoroki toaꞌ to mantiꞌi waliangki hibali waliana toaꞌ i duniaꞌ.

³Kehapoka tuwuꞌluka i duniaꞌ, angkana ane moꞌewaka toaꞌ {to mosapuaka poturuꞌki}, kiꞌewahi hante kuasaꞌ to ka Pueꞌ Ala, handoꞌio ka komapandengki hibali toaꞌ i duniaꞌ. Ingka wadi nipandiriꞌ hibali surodadu to morenda bentera poniꞌki.[23] Palaihana, pekiri to mosapuaka poturuꞌki kiꞌewahi hante kuasaꞌ to ka Pueꞌ Ala,

⁵kinanihi toaꞌ to moꞌewa poturuꞌ to tuꞌu, to mampokokodeꞌ hante to mosalempori lalana toaꞌ to mangkodokoꞌi pobahaꞌ Pueꞌ Ala. Alaꞌ kuasaꞌ to kihua ka Pueꞌ Ala, kiwolihi pekirire toaꞌ to hatoꞌo, hingkeꞌna mengkoruꞌhi pe Kerisitu.

⁶Mewaliꞌ, moromiꞌ ane tuꞌu-tuꞌukei mengkoruꞌ pe Kerisitu, alaꞌ ingka timomoka mohuku toaꞌ to hawaꞌi mengkoruꞌ pe Kerisitu.

⁷Ipekirikei moromiꞌ! Ane uwaꞌi ka lumbumi to mampoꞌohi koꞌiona mpuꞌu toaꞌne Kerisitu, hangangaa ipangakuꞌ woꞌo koꞌingkana toaꞌNe.

⁸Ba itiꞌikei mampokokodeꞌa? Hawaꞌi kulei mampokokodeꞌ, angkana hawaꞌa mohili mampokononto kuasaꞌku to Nopaꞌanikiꞌa Pueꞌ. Hawaꞌa Nopaꞌani kuasaꞌ mampomonawuꞌ pepoꞌohimi, angkana mampokaroho pepoꞌohimi.

⁹Hawaꞌi kulei ane ipekirikei kutungkaikei kupororokaꞌ hante ohina suraꞌku.

¹⁰Kutiꞌi hatoꞌo, alaꞌ uwaꞌ toaꞌ i lumbumi to mantiꞌi, “Ane tobasaꞌi suraꞌne, ohina motari hei hawaꞌi uwaꞌ tonowowuni, angkana ane uwaꞌi iseꞌe moꞌawa hante ingkiꞌ, io hibali toaꞌ to moledeꞌ hei lolitana hawaꞌi modumbuꞌ!”

¹¹Mewaliꞌ, hangangaa nobahaꞌ toaꞌ tiꞌo: komotarine lolitangki i lali suraꞌki, hatoꞌo woꞌo ane hupaꞌka!

¹²Hawaꞌka podehoꞌ mampohibali wotangki hante toaꞌ to mamperenakihi wotara hadoduora. Rotiꞌi moromiꞌ mpololeke waliare, hantaro bebehi mpololeke alaꞌ motuntuniluhi pekirira hadoduora.

¹³Ingka hawaꞌka hatoꞌo. Ane mamperenakika wotangki hadoduongki, hawaꞌi kipopeliu ka hapo to kiwalimo. Ane kiperenaki wotangki hadoduongki, kipololitalu jamangki to nopokonontokika Pueꞌ Ala. Hei jamangki tiꞌo wute woꞌo i ingkei, halali-halali.

¹⁴Mewaliꞌ, ane mampowuteka Kareba moromiꞌ pe ingkei hawaꞌka molungkaꞌi hapo to hintotoꞌ, alaꞌ ingka to uluꞌ-uluꞌna mampowute Kareba Moromiꞌ pe ingkei.

¹⁵Hawaꞌka mamperenaki wotangki alaꞌ wuaꞌ pajamara toaꞌ ntaniꞌ. Ane ingka, hawaꞌi kiwali hatoꞌo. Hawaꞌi kipololita wuaꞌne pajamangki to i huwali ka jama to nopaꞌanikika Pueꞌ Ala. Angkana kipohinaru halali-halali, ane tetambaiꞌi komarohone pepoꞌohimi, hingkiꞌ tetambai woꞌo wuaꞌne pajamangki i lumbumi,

¹⁶wute kokorobaa-robaha pajamangki, alaꞌ kikodokoꞌi mampowute Kareba Moromiꞌ pe peꞌohaꞌa to moꞌela tene ka ingkei. Hawaꞌi kilei mampowute Kareba Moromiꞌ pe toaꞌ to ka pahorimohi kareba tiꞌo, hingkeꞌna hawaꞌka mamperenaki wotangki nokomi wuaꞌna pajamana toaꞌ ntaniꞌna.

¹⁷Uwaꞌ to teꞌukiꞌ i lali Suraꞌ Mangkolehi waheꞌe: “Himo to mamperenaki hangangaa mamperenaki hapo to nowali Pueꞌ.”

¹⁸Alaꞌ toaꞌ to masipatoꞌ niperenaki iomo toaꞌ to noperenaki Pueꞌ, handoꞌio toaꞌ to mamperenaki wotana hadoduona.