Read Rampi 2 Korintus 13 Bible Online

2 Korintus 13 - Rampi bible

2 Korintus 13

¹Hieꞌe kotolu mpihanamo hingkiꞌ nolouꞌa mololoꞌokei. Ipondindikei hapo to teꞌukiꞌ i lali Suraꞌ Mangkolehi to mantiꞌi: “Ane uwaꞌ haduo toaꞌ to nisalaꞌi, hangangaa uwaꞌ roduo ba tolu toaꞌ to mosobiꞌi kotuꞌuna salaꞌna, hingkeꞌna mononto kara-karane.”[39]

²Kolentuꞌangku moꞌawa hante ingkei i korompihana, kupaꞌingaꞌimohi toaꞌ to i lumbumi to mowali salaꞌ. Mewaliꞌ hinewowoꞌena, i tempoku moꞌukiꞌ suraꞌ hieꞌe, moꞌelaꞌa ka ingkei. Moliu suraꞌ hieꞌe, kupakaꞌingaꞌikei womo: hingkiꞌ hupaꞌ womoꞌa, hei ane handoaꞌhi tene mengkatobaꞌ, hawaꞌi mpuꞌu uwaꞌ haduo to hingkiꞌ tepohente ka pehukungku.

³Uwaꞌkei to merapiꞌ hingkeꞌna kuponoꞌokiꞌikei tandaꞌ to mampokononto Kerisitu mololita moliu i aku. Ipekaulukei! Ane mehupaꞌa pe ingkei, hingkiꞌ iꞌokiꞌkei mpololeke kuasaꞌ to nopaꞌanikiꞌa Kerisitu! Kerisitu hawaꞌi moledeꞌ, angkanareꞌi maroho kuasaꞌNe i lumbumi.

⁴Kehapoꞌi niꞌokiꞌ moledeꞌ wotane Kerisitu i tempoNa ropaku i loti momehulepe, angkana alaꞌ kuasaꞌna Pueꞌ Ala, Io tuwuꞌ huliꞌ. Ingka woꞌo, moledeꞌka hibali Kerisitu, angkana alaꞌ kuasaꞌna Pueꞌ Ala, mohintuwuꞌka moꞌawa hante Kerisitu. Mewaliꞌ halali-halali, ane hupaꞌa intu, hingkiꞌ iꞌokiꞌkei hapo to kiwali moliu kuasaꞌ to nopaꞌanikika Pueꞌ Ala.

⁵Halali-halali, iparesaꞌkei dulu lalimi, ba lala kotuwuꞌmi hintotoꞌ hante pepoꞌohimi pe Kerisitu ba hawaꞌi? Ane nitiko pepoꞌohimi, palaihana Yesu Kerisitu uwaꞌ i lalimi. Angkana ane lala kotuwuꞌmi hawaꞌi hintotoꞌ hante pepoꞌohimi, palaihana, Kerisitu hawaꞌi uwaꞌ i lalimi.

⁶Ane iparesaꞌmokei lalimio kupohinaru hingkeꞌna ipoꞌohikei koꞌakunemo mpuꞌu surone hi Yesu.

⁷Mekokaeka pe Pueꞌ Ala hingkeꞌna hawaꞌkei mowali salaꞌ. Mekokaeka handoꞌio hingkeꞌna iꞌokiꞌkei komoromiꞌki, angkana mekokaeka hingkeꞌna mowalikei hapo to moromiꞌ. Kehapoꞌi uwaꞌhi tene toaꞌ to mosapuaka nturusi kuasaꞌki mewali surona Kerisitu, hawaꞌi mahampo, asalana mowalikei hapo to moromiꞌ.

⁸Hawaꞌka hohumbo moꞌewa hapo to tuꞌu, angkana hangangaa mowalika hapo to tuꞌu.

⁹Motanaꞌ lalingki ane niꞌokiꞌka hibali toaꞌ to moledeꞌ, hei motanaꞌka woꞌo ane hibalikei toaꞌ to maroho. Mekokaeka hingkeꞌna waliami tewolihi womo hei pedeꞌ mononto i pampeꞌelena Pueꞌ.

¹⁰Iomo horiana kuꞌukiꞌkimokei suraꞌ hieꞌe i tempoku tene moꞌela ka ingkei, hingkeꞌna ane hupaꞌa, hawaꞌkei hingkiꞌ kuhuku, alaꞌ kuasaꞌ to Nopaꞌanikiꞌa hawaꞌi kupakeꞌ hingkeꞌna kupokonawuꞌkei ka pepoꞌohimi. Ukonareꞌi, Nopaꞌanikiꞌa hingkeꞌna kupokaroho pepoꞌohimi.

¹¹Koꞌukoana halali-halali, hangangaa motanaꞌkei hei magegakei hingkeꞌna waliami tewolihi hei pedeꞌ mononto i peꞌelena Pueꞌ, hei ipoꞌilalikei poturuꞌka. Hangangaa hampekokirikei hei hangangaa mohintuwuꞌkei. Pueꞌ Ala to buhaꞌ rima, hei pepongkaana romiꞌ ngkotuwuꞌ moꞌowonikei.

¹²Ane morampu-rampukei, mometabeꞌ-tabeꞌmokei ka lalimi mpololeke. Lekiꞌ-lekiꞌna toaꞌna Pueꞌ Ala to uwaꞌ iseꞌe mopakatu tabeara pe ingkei.

¹³Kiperapiꞌ hingkeꞌna Pueꞌ Yesu Kerisitu mobarakatikei, Pueꞌ Ala mampokarimakei, hei Inohaꞌ Mangkolehi moꞌowonikei lekiꞌ-lekiꞌmi.