Read Rampi 2 Korintus 5 Bible Online

2 Korintus 5 - Rampi bible

2 Korintus 5

¹Wotanta i duniaꞌ hieꞌe wadi nipandiriꞌ hibali bambaruꞌ. Hei tobahaꞌ, ane bambaruꞌ hieꞌe nirenda, palaihana iomo ane mahimoki, Pueꞌ Ala hingkiꞌ mampatimomokiki haꞌanu tambi i suruga to hawaꞌi nowali toaꞌ hei to hawaꞌi hingkiꞌ mokoꞌukoa.

²Kolentuꞌanta tene meꞌoha i bambaruꞌta i duniaꞌ hieꞌe, meroraiki nturusi alaꞌ mangkodokoꞌiki meꞌohaꞌ i tambi i suruga.

³Tambi i suruga iomo wotanta to wolaꞌ. Mewaliꞌ ane mahiki intu tanuanaꞌta pahua wota to wolaꞌ. Wota to wolaꞌ tiꞌo nipandiriꞌ baduꞌna tanuanaꞌta horiana mebaduꞌki hei hawaꞌki melolawa.

⁴Alaꞌ kolentuꞌanta tene tuwuꞌ i duniaꞌ hieꞌe, meroaiki alaꞌ komadorina lentuata. Hawaꞌki merorai alaꞌ tolei mampolihi wotanta hieꞌe, angkana meroraiki alaꞌ tolei hingkeꞌna wotanta to hingkiꞌ mahi hieꞌe nipohawa hante wota to wolaꞌ to hawaꞌi mokoꞌukoa.

⁵Pueꞌ Ala hadoduona to mampatimomokiki hingkeꞌna tohua wota to wolaꞌ, hei hinewowoꞌena Io mampaꞌanimoki Inohaꞌ Mangkolehi, to mewali tikoanta i lekiꞌ-lekiꞌna tiꞌo to hingkiꞌ tohua.

⁶Iomo horiana maroho nturusi lalinte hei tobahaꞌ mpololeke, kolentuꞌanta tene tuwuꞌ i lali wotanta i duniaꞌ hieꞌe, moꞌelaki tene ka peꞌohaꞌanta moꞌawa hante Pueꞌ Yesu.

⁷Kolentuꞌanta tene tuwuꞌ i duniaꞌ hieꞌe metuntuki pe Pueꞌ alaꞌ pepoꞌohinta, kehapoꞌi handoaꞌi tene toꞌokiꞌ.

⁸Mewaliꞌ, maroho nturusi lalinte. Kehapoki mahi, topotanaꞌ, alaꞌ ane tekaꞌaki ka wotanta hieꞌe, hingkiꞌ moꞌawaki hante Pueꞌ.

⁹Hei tokodokoꞌi mowali nturusi hapo to mampomotanaꞌ laliNa, moromiꞌ tuwuꞌki tene i duniaꞌ hieꞌe, ba mahimoki.

¹⁰Alaꞌ hampiha tempo, ingkiꞌ lekiꞌ-lekiꞌta to mepoꞌohi hangangaa metotiꞌiki i hinarona Kerisitu hingkeꞌna Noparesaꞌ waliante,[10] hei ingkiꞌ lekiꞌ-lekiꞌta hingkiꞌ pahua howonina to hintotoꞌ hante walianta kolentuꞌanta tene tuwuꞌ i duniaꞌ hieꞌe, moromiꞌ ba kodake.

¹¹Mewaliꞌ, alaꞌ pengkoruꞌki pe Pueꞌ Alaꞌ, iomo horiana magegaka mampowute Kareba Moromiꞌ, hingkeꞌna toaꞌ hingkiꞌ mepoꞌohi pe Pueꞌ Yesu. Pueꞌ Ala pobahaꞌ lalingki. Peleihangki hingkeꞌna ibahaꞌkei woꞌo kopopuhiꞌne lalingki.

¹²Inioꞌ ipekirikei kikodokoꞌi mamperenaki wotangki hadoduongki. Kiponobahaꞌikei waliangki to moromiꞌ to wadi niperenaki, hingkeꞌna uwaꞌ lalami mohoniꞌhi toaꞌ to moꞌewaka, toaꞌ tiꞌo mampokokodeꞌhi alaꞌ waliara rorekeꞌ toaꞌ ntaniꞌ moromiꞌ hantaro lalira hawaꞌi moromiꞌ.

¹³Uwaꞌhi to mantiꞌi magilaka, angkana hawaꞌka magila. Ane hibalika to magila, tiꞌo mewali alaꞌ kilei motuntuni Pueꞌ Ala ka lalingki mpololeke. Angkana, ane mononto pekiringki, tiꞌo mewali alaꞌ kilei mosulingikei.

¹⁴Lekiꞌ-lekiꞌna to kiwali mehupaꞌ ka komarimana Kerisitu, alaꞌ kibahaꞌ: Io mahi mosulewotai lekiꞌ-lekiꞌna toaꞌ,[11] tiꞌo mopalaiha, mahimo woꞌo peleihante mowali salaꞌ.

¹⁵Alaꞌ tungkaihana Kerisitu mahi mosulewotai lekiꞌ-lekiꞌna toaꞌ, hingkeꞌna ingkiꞌ to tuwuꞌ tene i duniaꞌ hieꞌe hamboaꞌmoki mampetuntui peleihanta hadoduonta, angkana mampetuntuiki peleihana Kerisitu, to mahimo mosulewotaiki hei to tuwuꞌmo huliꞌ.

¹⁶Mewaliꞌ, iomo horiana hamboaꞌmoka morekeꞌ toaꞌ moromiꞌ ba hawaꞌi podo i howalinalu. Kehapoꞌi hampiha kitiꞌi Kerisitu toaꞌ biasalu, angkana hinewowoꞌena hamboaꞌmo hatoꞌo pekiringki alaꞌ Io meliu ka tiꞌo.

¹⁷Mewaliꞌ, ane toaꞌ mohintuwuꞌ hante Kerisitu, io mewali toaꞌ to wolaꞌ.[12] Waliana to hampiha liumo, hei kotuwuꞌna mewalimo wolaꞌ.

¹⁸Pueꞌ Ala to mowali lekiꞌ-lekiꞌna tiꞌo. Io to morumbaꞌ humei Kerisitu mampelumbuiki, hingkeꞌna mohintuwuꞌ hante Pueꞌ Ala. Hei Io mampaꞌanika jama mampowute kareba tiꞌo pe toaꞌ ntaniꞌna, hingkeꞌna iohi woꞌo wadi mohintuwuꞌ hante Pueꞌ Ala.

¹⁹Hieꞌemo kareba to kipowute: alaꞌ konopelumbuinta Kerisitu, Pueꞌ Ala mampohintuwuꞌ toaꞌ hante wotaNa hadoduona, hei hamboaꞌmo Nopoꞌilali salaꞌre. Ingka hieꞌe, Nopaꞌanika jama mampowute kareba tiꞌo pe toaꞌ ntaniꞌna, hingkeꞌna mohintuwuꞌhi woꞌo hante Pueꞌ Ala.

²⁰Ingka hieꞌe, rumbaꞌanaka Kerisitu, iomo horiana, ane mololitaka pe ingkei, hibali Pueꞌ Ala hadoduona to mampololitakikei. Mewaliꞌ kiperapiꞌ mpololeke hingkeꞌna mohintuwuꞌkei hante Pueꞌ Ala, alaꞌ tiꞌo peleihane Kerisitu.

²¹Kerisitu tiꞌo hawaꞌi madosa, angkana Pueꞌ Ala mampohibaliꞌI toaꞌ to madosa alaꞌ Io to mampohorunga lekiꞌ-lekiꞌna dosana toaꞌ. Tungkaihana Pueꞌ Ala, hingkeꞌna ingkiꞌ to mohintuwuꞌ hante Kerisitu, wadiki mewali mononto i pampeꞌelena Pueꞌ Ala.[13]