Read Rampi 2 Korintus 6 Bible Online

2 Korintus 6 - Rampi bible

2 Korintus 6

¹Mewaliꞌ, ingka hieꞌe, majamaka moꞌawa hante Pueꞌ Ala mampowute pohawaꞌNa pe toaꞌ. Iomo horiana kiperapiꞌ mpololeke halali-halali, hingkeꞌna inioꞌ idangkeleꞌikei komarimane Pueꞌ Ala pe ingkei.

²I lali Suraꞌ Mangkolehi, notiꞌi Pueꞌ Ala waheꞌe: “I tempo to Kupokononto, Kupehoromua pekokaemi, I ando koKuposalamaꞌmi, Kusulungikei ka pehuku dosami.” Halali-halali, kutiꞌikikei: hinewowoꞌenamo tempone to nopokononto Pueꞌ Ala mamposalamaꞌkei.

³Aku hante awangku majamaka, hangangaa kikororomiꞌi hingkeꞌna hawaꞌi uwaꞌ komasalaꞌne waliangki horiana hawaꞌi uwaꞌ to nipokonawuꞌ, hei hingkeꞌna hawaꞌi uwaꞌ toaꞌ to wadi mosalaꞌi jamangki mampowute hawaꞌna Pueꞌ Ala.

⁴Iomo horiana, i langkaꞌ-langkaꞌna kiwali nturusi hapo to moromiꞌ, hingkeꞌna tongawa koꞌingkana topajamane Pueꞌ Ala to mononto, moliu i kokiriina molangkaꞌ-langkaꞌ komaporiꞌ.

⁵Nikondoka, nitarungkuꞌka, hei nipaduluka.[14] Majamaka madori horiana woriꞌ mpiha hawaꞌka hohumbo leꞌo hei hawaꞌka hohumbo mangka.

⁶I langkaꞌ-langkaꞌna, mombaha koꞌingkana topajamane Pueꞌ Ala, alaꞌ: Mononto lalingki, kibahaꞌ hawaꞌne Pueꞌ Ala, sabaraꞌka, moromiꞌ lalingki pe lekiꞌ-lekiꞌna toaꞌ, norandaka Inohaꞌ Mangkolehi, hei mampokarimaka hangko awangki ka kopopuhiꞌna lalingki,

⁷kipopatengkaꞌ jamangki ka kuasaꞌ to kihua ka Pueꞌ Ala. Waliangki to mononto i peꞌoꞌelena Pueꞌ Ala to mewali piho hante labangki mantahaka moꞌewa poniꞌki.[15]

⁸Kipopatengkaꞌ nturusi jamane Pueꞌ Ala, moromiꞌ roꞌadaꞌika ba ropononaꞌaka; niperenakika ba nipokonawuꞌka. Kehapoꞌi kitiꞌi hapo to tuꞌu, angkana uwaꞌ to mantiꞌi topowutika.

⁹Uwaꞌ toaꞌ to mopangakuꞌ ingka rumbaꞌanaka Pueꞌ Ala, uwaꞌ woꞌo to mosapuakaka. Woriꞌ komaporiꞌ to morumpaka horiana ingka hibalika toaꞌ to hingkiꞌ mahi, angkana tuwuꞌka tene! Nikondoka, angkana hawaꞌka mahi.

¹⁰Pehoringki maporiꞌ, angkana motanaꞌ lalingki. Merima-rima tuwuꞌki, angkana ingka to mangkomika pebarakati ka Pueꞌ Ala pe toaꞌ to woriꞌ. I pampeꞌelena toaꞌ, woriꞌ komakuraꞌki, angkana kotuꞌuana lekiꞌna uwaꞌ i ingka.

¹¹Halalingku toKorintus! Ohina lalingki kipowutekikei, hei kipokarimakei.

¹²Handoꞌio ingka to hawaꞌi marima pe ingkei, angkana ingkei wae to hamboaꞌmo marima pe ingka.

¹³Pololitangku hieꞌe, hibaliꞌa mololita pe anaꞌku hadoduongku, io horiana kuperapiꞌ hingkeꞌna ipokarimaka, hibali ingka woꞌo marima pe ingkei!

¹⁴Inioꞌkei mohintuwuꞌ hante toaꞌ to hawaꞌhi mepoꞌohi pe Pueꞌ Yesu.[16] Wadireꞌi toaꞌ to mampetuntui peleihane Pueꞌ Ala mohintuwuꞌ hante toaꞌ to mosapuaka Pueꞌ Ala?[17] Wadireꞌi to mobaro mampahamoloꞌ hante to mokorindi?

¹⁵Wadireꞌi Kerisitu mohintuwuꞌ hante Belisiꞌ?Wadireꞌi toaꞌ to mepoꞌohi mohintuwuꞌ hante toaꞌ to hawaꞌi mepoꞌohi?

¹⁶Hapo kohibaliane tambina Pueꞌ Ala hante tambi penombaha pe lente lomoa? Hawaꞌi uwaꞌ kohibobaliane! Ingkiꞌ hieꞌe wadi nipandiriꞌ hibali tambina Pueꞌ Ala, alaꞌ Pueꞌ Ala to tuwuꞌ uwaꞌ i lalinta. Notiꞌi waheꞌe: “Hingkiꞌ meꞌohaꞌA i lumbura hei hingkiꞌ Kupoꞌawahi. Aku hingkiꞌ mewali Pueꞌ Alara, hei iohi hingkiꞌ mewali toaꞌKu.

¹⁷Mewaliꞌ, hangangaa ipolihikei toaꞌ to hawaꞌhi pobahaꞌA. Inioꞌhi nipohintuwuꞌki! Ipomoꞌelakei wotami ka lekiꞌ-lekiꞌna waliara to kodake. Ane iwalikei hatoꞌo, hingkiꞌ Kutorimokei.

¹⁸Aku hingkiꞌ mewaliꞌA Umoꞌmi, hei ingkei woꞌo hingkiꞌ mewalimokei anaꞌKu.” Hatoꞌomo pantiꞌine Pueꞌ Ala to meliu kuasaꞌNa ka lekiꞌna to uwaꞌ.