Read Rampi 2 Korintus 9 Bible Online

2 Korintus 9 - Rampi bible

2 Korintus 9

¹Kotuꞌuana, hamboaꞌmo paralu kuꞌukiꞌkikei suraꞌ noniuꞌ doiꞌ to hingkiꞌ kikomi nolou pe toaꞌna Pueꞌ Ala i kota Yerusale.

²Kubahaꞌmo ileikei mpololeke mesulungi, iomo horiana kiperenakikei i hinarora jumaꞌa-jumaꞌa Makedonia, kutiꞌikihi, “Ane halali hampepoꞌohinta toKorintus to meꞌohaꞌhi i woiꞌ Akaia,[21] mepongka toꞌa to liu, timomohi mopakatu doiꞌ pe halali hampepoꞌohinta to merima-rima tuwuꞌra.” Mewaliꞌ, korohorinalu komarimane lalimi, teruiꞌmo woꞌo lalire toMakedonia, koꞌukoana woriꞌhi woꞌo to mampewei pesulungira.

³Angkana kehapoꞌi hatoꞌo, kurumbaꞌmohi hi Titus hante roduo awana medulu nolou pe ingkei, hingkeꞌna mosulingikei morampu doiꞌ. Hei kupohinaru ane hupaꞌa, lekiꞌ-lekiꞌna tiꞌo hingkiꞌ timomomo, hingkeꞌna lolitangku mamperenakikei hawaꞌi rorekeꞌ wutingkulu, alaꞌ ukomohi kutiꞌiki toMakedonia timomomokei mopakatu doiꞌ.

⁴Alaꞌ ane hupaꞌhi toMakedonia to mampoꞌawaꞌa nolou pe ingkei, hei ane rapaꞌna handoaꞌi tene terampu doiꞌ pesulungimi, hingkiꞌ makaja komohilingka, alaꞌ ukomokei kuperenaki i hinarora. Hei ingkei woꞌo hingkiꞌ mohilikei.

⁵Iomo horiana kutiꞌi i lalingku, aginamo kurumbaꞌhi hi Titus hante roduo awana nolou medulu, hingkeꞌna doiꞌ to nidandimo hampiha hirampumo. Mewaliꞌ, ane mehupaꞌa ngkamuri, hingkiꞌ timomomo umbiꞌ doiꞌ tiꞌo. Ane watoꞌoꞌi, hingkiꞌ mombaha doiꞌ tiꞌo ipepaꞌanikikei ka kopopuhiꞌna lalimi, handoꞌio alaꞌ peparuku.

⁶Ipoꞌilalikei pandiri' hieꞌe: hapo to tohuꞌa, tiꞌo woꞌo to torupuꞌ. Toaꞌ to mehuꞌa hangkiuꞌlu, hangkiuꞌlu woꞌo to hingkiꞌ norupuꞌ. Toaꞌ to mehuꞌa woriꞌ, woriꞌ woꞌo to hingkiꞌ norupuꞌ.

⁷Hinamo toaꞌ hori-hori mampewei ka kopopuhiꞌna lalina. Inioꞌkei mampewei ka komadorina lalimi, hei inioꞌkei mampewei hante mparorukua, alaꞌ Pueꞌ Ala mampokarima toaꞌ to mampewei ka komotanaꞌ lalina.

⁸Hei Pueꞌ Ala makuasaꞌ mampaꞌanikei lekiꞌna pebarakati wute hamboaꞌmo uwaꞌ komakuraꞌmi, hingkeꞌna nibiaꞌi mampopatengkaꞌ lekiꞌna jama to moromiꞌ, mosulungi hangko awami.

⁹Alaꞌ uwaꞌ teꞌukiꞌ i lali Suraꞌ Mangkolehi to mantiꞌi: “Io modolaꞌ-dolaꞌ pebarakati pe toaꞌ to merima-rima tuwuꞌra. Komoromiꞌna laliNa hawaꞌi uwaꞌ koꞌukoana.” [22]

¹⁰Pueꞌ Ala mampaꞌani tinudaꞌ pe topohawori, hei Io mampaꞌaniki kopongkona. Hatoꞌo woꞌo, Pueꞌ Ala hingkiꞌ motambai hapo to uwaꞌ i ingkei, hingkeꞌna tetambai woꞌo komoromiꞌne lalimi mosulungi toaꞌ.

¹¹Ingkei hingkiꞌ Nopomorasiꞌkei i langkaꞌ-langkaꞌna, hingkeꞌna ka kopopuhiꞌna lalimi, mosulungikei toaꞌ ntaniꞌna. Mewaliꞌ, ane kikomiꞌi pampeweimi pe halali hampepoꞌohinta to merima-rima tuwuꞌra, woriꞌ toaꞌ hingkiꞌ mantiꞌi woriꞌ komoromiꞌne pe Pueꞌ Ala.

¹²Pampewei tiꞌo hingkiꞌ mampoganai komakuraꞌra toaꞌna Pueꞌ Ala i Yerusale. Hei handoꞌio tiꞌolu, alaꞌ kopopuhiꞌna lalimi, woriꞌ toaꞌ hingkiꞌ mantiꞌi woriꞌ komoromiꞌ i Pueꞌ Ala.

¹³Ane toaꞌ pangkiꞌ pampawei to kikomi tiꞌo, hingkiꞌ mampokodeꞌhi Pueꞌ Ala nokomi komoromiꞌna lalimi, hingkiꞌ ipotongawakei komarohone pepoꞌohimi i Kareba Moromiꞌ noniuꞌ i Kerisitu, hei hingkiꞌ tongawa woꞌo pengkoruꞌmi i hawaꞌNa. Hingkiꞌ mampokodeꞌhi Pueꞌ Ala, alaꞌ popuhiꞌ lalimi mosulungihi hante toaꞌ ntaniꞌna.

¹⁴Hei iohi hingkiꞌ mampekokaekikei woꞌo ka lalira mpololeke to buhaꞌ rima, alaꞌ kodeꞌ rimane Pueꞌ Ala pe ingkei.

¹⁵Totiꞌi woriꞌ komoromiꞌ i Pueꞌ Ala, alaꞌ pepaꞌaniNa pe ingkiꞌ, hei tiꞌo meliu mpololeke ka hapo to wadi topekiri!