Read Rampi Galatia 1 Bible Online

Galatia 1 - Rampi bible

Galatia 1

¹Suraꞌ hieꞌe ka aku hi Paulu, surona Pueꞌ Yesu. Kupokatu suraꞌ hieꞌe pe ingkei lekiꞌ-lekiꞌmi jumaꞌa-jumaꞌa i Galatia. Aku hante lekiꞌ-lekiꞌna halali hampepoꞌohingku to uwaꞌ iseꞌe mampowuteka tabeangki! Hingkeꞌna ibahaꞌkei halali-halali, handoꞌio toaꞌ to morumbaꞌa, hei handoꞌio woꞌo toaꞌ to moꞌuwiꞌa mewali suro, angkana hi Yesu Kerisitu hante Pueꞌ Ala Umoꞌta to mampotuwuꞌ huliꞌ hi Yesu ka komahia, to moꞌuwiꞌa mewali suroNa.

³Mekokaeꞌa pe Pueꞌ Ala Umoꞌta hante pe Pueꞌta Yesu Kerisitu hingkeꞌna Nobarakatikei hei mampaꞌanikei Romiꞌ Ngkotuwuꞌ.

⁴Nokomi komadosanta, Pueꞌ Yesu mampewei wotaNa nirokoꞌ hingkeꞌna tepohenteki ka kuasaꞌ duniaꞌ to kodake hieꞌe. Nowali hatoꞌo alaꞌ tiꞌomo peleihane Pueꞌ Ala Umoꞌta.

⁵Topokodeꞌ Pueꞌ Ala wute nantolou-louna. Amin.

⁶Kupowuli mpololeke, halali-halali! Handoaꞌkei tene morue nowowoi Pueꞌ Ala alaꞌ kopopuhiꞌna lalina Kerisitu hingkeꞌna mampoꞌohikei Kareba Moromiꞌ, angkana hinewowoꞌena tewolihimo hamboaꞌmokei mengkoruꞌ pe Pueꞌ Ala, wuliha motuntunikei poturuꞌ to ntaniꞌna to rotiꞌi toaꞌ “Kareba Moromiꞌ” woꞌo.

⁷Tiꞌo handoꞌio kareba moromiꞌ, alaꞌ mehupaꞌhi i lumbumi mampowulilukei moliu poturuꞌra to salaꞌ. Rokodokoꞌi mowolihi Kareba Moromiꞌ noniuꞌ i Kerisitu.

⁸Angkana kutiꞌikikei, hihimolu to mampowute kareba moromiꞌ to mosisalaꞌ hante Kareba Moromiꞌ to kipowutekimokikei, bateꞌna nohukuhi Pueꞌ Ala! Howeꞌlu ingka hante malaꞌeka ka suruga, bateꞌki nohuku Pueꞌ Ala!

⁹Kitiꞌikimokikei hampiha i tempoki tene moꞌawa-awa hante ingkei, hei hinewowoꞌena kutiꞌikikei womo hampiha: ane uwaꞌ toaꞌ to mampowute kareba moromiꞌ to mosisalaꞌ hante to itorimomokei, bateꞌna nohukuhi Pueꞌ Ala!

¹⁰Mewaliꞌ, halali-halali! Uwaꞌ to mantiꞌi hingkeꞌnalu noperenakiꞌa toaꞌ, hantaro kotuꞌuana, to kukodokoꞌi pepokodeꞌ ka Pueꞌ Ala. Uwaꞌ woꞌo to mantiꞌi hingkeꞌna mampomotanaꞌluꞌa lalira toaꞌ. Angkana ane tiꞌo peleihangka, palaihana, aku hieꞌe handoꞌio hawiꞌna Kerisitu.

¹¹Hingkeꞌ ibahaꞌkei halali-halali, Kareba Moromiꞌ to kukomi handoꞌio ka pekirina toaꞌ.

¹²Kareba Moromiꞌ tiꞌo, hawaꞌi kutorimo ka toaꞌ, hawaꞌi woꞌo uwaꞌ toaꞌ to mampoturuꞌkiꞌa, angkana hi Yesu Kerisitu hadoduona to mampokononto Kareba Moromiꞌ tiꞌo pe aku.

¹³Ibahaꞌkei halali-halali, hohumbo kotuwuꞌka hampiha ikopetuntuku agama Yahudi. Wori' mpololeke awangka to motuntuni agama Yahudi, angkana akumo to maroho mpololeke metuntu i lekiꞌ-lekiꞌna atura agama, alaꞌ ka lalingku mpololeke mampetuntui adaꞌra tododulungkuhi.[1] Hei i tempo tiꞌo kupoperima-rimahi lekiꞌ-lekiꞌne toaꞌna Pueꞌ Ala, alaꞌ kukodokoꞌihi kuporopuꞌ.

¹⁵Angkana i tempo tiꞌo, Pueꞌ Ala mampokonontokiꞌa kohihimona AnaꞌNe, hingkeꞌna kupowute kareba noniuꞌ i AnaꞌNa tiꞌo pe toaꞌ to handoꞌiohi toYahudi, alaꞌ Pueꞌ Ala moꞌuwiꞌa ikohandoaꞌangku tene nipoꞌanaꞌki. Alaꞌ kopopuhiꞌna lalina Nowowoimoꞌa mewali suroNa i tempo to Nopokonontomo. IkoNowowoingku, hawaꞌi uwaꞌ toaꞌ to mampoturuꞌa.

¹⁷Hawaꞌa woꞌo nolou pe kota Yerusale meguru pe iohi to medulumohi mewali surona Pueꞌ Yesu, angkana nolouꞌa dulu pe woiꞌ Arab, honiꞌi mahuliꞌa nolou pe kota Damasi.

¹⁸Tolu ntoꞌa katoꞌo, honiꞌa nolou pe Yerusale hingkeꞌna mampohidupaꞌkiꞌa hi Peturuꞌ. Meꞌohaꞌa moꞌawa hante io hampuluꞌ limo ando.

¹⁹Tempo tiꞌo, kupohidupaꞌki woꞌo hi Yakobus hineeꞌna Pueꞌ Yesu.[2] Angkana surona Pueꞌ Yesu to ntaniꞌna, hawaꞌhi kupohidupaꞌki. To roduolu tiꞌo to kupohidupaꞌki.

²⁰Hapo to kuꞌukiꞌ hieꞌe bateꞌna tuꞌu. Pueꞌ Ala to pobahaꞌ lalingku!

²¹Katoꞌo, nolouꞌa pe woiꞌ Siria hante woiꞌ Kilikia.

²²Kolentuꞌangku inoꞌo hawaꞌa kahampiha nolou pe woiꞌ Yudea; iomo hinaꞌ toSarani i jumaꞌa-jumaꞌa tiꞌo handoaꞌi tene kahampiha kiꞌokiꞌ.

²³Pahoriluhi lolitana awara to mantiꞌi, “Hampiha io mampoperima-rimaka hei hingkiꞌ mamporopuꞌ to mepoꞌohi pe Kerisitu. Angkana hinewowoꞌena io mampowutemo hapo to kipoꞌohi hampiha.”

²⁴Iomo hinaꞌ mampokodeꞌmohi Pueꞌ Ala, alaꞌ pahorihi hapo to mewali i aku.