Read Rampi Galatia 3 Bible Online

Galatia 3 - Rampi bible

Galatia 3

¹Halalingku toGalatia. Bebekei mpuꞌu! Mahamporeꞌi hinaꞌ ipotedehikei toaꞌ mampomonawuꞌkei, wute hamboaꞌmo ipetuntuikei poturuꞌ to tuꞌu? Kupokonontokimokei mpololeke tungkaihane komahina hi Yesu Kerisitu i loti momehulepe.

²Tiꞌikei humei! Ka imbo ipahuakei Inohaꞌ Mangkolehi? Nokomireꞌi pampetuntuimi i atura-aturana hi Musa? Bateꞌna hawaꞌi. Itorimokei Inohaꞌ Mangkolehi nokomi koꞌihorinamokei Kareba Moromiꞌ hei mepoꞌohimokei pe Pueꞌ Yesu.

³Mewaliꞌ mahamporeꞌi hinaꞌ bebekei mpuꞌu? Uluꞌ-uluꞌna ikoꞌipoꞌohinakei hi Yesu, ihuamokei kotuwuꞌ to wolaꞌ ka kuasaꞌna Inohaꞌ Mangkolehi. Ba itiꞌikeireꞌi hinewowoꞌena mewalimokei modame hante Pueꞌ Ala alaꞌ komarohomi hadoduomi? Hawaꞌi!

⁴I tempomi mepoꞌohi pe hi Yesu mampolalamokei komaporiꞌ. Angkana hawaꞌi modumbuꞌ komaporiꞌ tiꞌo, ane ipolihikei pepoꞌohimi.

⁵Pueꞌ Ala mampaꞌanimokei Inohaꞌ Mangkolehi hei mampatidoꞌkikei tandaꞌ kuasaꞌ. Ba Nowali hatoꞌo alaꞌ mampetuntuikei i Aturana hi Musa? Hawaꞌi. Nowali hatoꞌo alaꞌ ihorimokei Kareba Moromiꞌ hei ipoꞌohimokei Pueꞌ Yesu.

⁶Hatoꞌo woꞌo uwaꞌ teꞌukiꞌ i lali Suraꞌ Mangkolehi noniuꞌ i hi Burahima to mantiꞌi waheꞌe: “Hi Burahima mepoꞌohi pe Pueꞌ Ala, iomo horiana notorimo Pueꞌ Ala mewali toaꞌ to modamemo hante Io.” [7]

⁷Mewaliꞌ, tobahaꞌmo halali-halali: hihimo to mepoꞌohi, iohi to nirekeꞌ muleꞌna hi Burahima.

⁸Mepongka hampiha, uwaꞌmo tungkaihane Pueꞌ Ala mampomaniuꞌ toaꞌ to handoꞌiohi toYahudi alaꞌ pepoꞌohira. Iomo hinaꞌ i lali Suraꞌ Mangkolehi, Pueꞌ Ala mampowute kareba to moromiꞌ hieꞌe pe hi Burahima, Notiꞌi, “Alaꞌ ingko hingkiꞌ Kubarakati lekiꞌ-lekiꞌne toaꞌ i duniaꞌ.”

⁹Mewaliꞌ hi Burahima nobarakati Pueꞌ Ala nokomi pepoꞌohina, hatoꞌo woꞌo lekiꞌ-lekiꞌna toaꞌ to mepoꞌohi pe hi Yesu bateꞌna hingkiꞌ nobarakati Pueꞌ Ala moꞌawa hante hi Burahima.

¹⁰I lali Suraꞌ Mangkolehi teꞌukiꞌ waheꞌe: “Buntoꞌmohi i hinarona Pueꞌ Ala, toaꞌ to hawaꞌi mampetuntui nturusi lekiꞌ-lekiꞌna hawaꞌ to teꞌukiꞌ i lali Aturana hi Musa.” Mewaliꞌ, halali-halali, tobahaꞌmo: ane uwaꞌ toaꞌ to mangkodokoꞌi mewali modame hante Pueꞌ Ala alaꞌ pampetuntuira Aturana hi Musa, hingkiꞌ nisalaꞌihi i hinarona Pueꞌ Ala hei hingkiꞌ nihukuhi.

¹¹Tongawa mpololeke kohawaꞌna uwaꞌ howeꞌ haduo to nipomodame mahuliꞌ hante Pueꞌ Ala nokomi pampetuntuina Aturana hi Musa. Alaꞌ uwaꞌ woꞌo lolita i lali Suraꞌ Mangkolehi to teꞌukiꞌ waheꞌe: “Toaꞌ to nipomodame hante Pueꞌ Ala hingkiꞌ pahuahi kotehompoꞌa alaꞌ pepoꞌohira.”

¹²Angkana Aturana hi Musa hawaꞌi hintotoꞌ hante pepoꞌohi, palaihana ane walianta hadoduonta to topoꞌohi, hawaꞌki mempoꞌohi pe Pueꞌ Ala. Alaꞌ uwaꞌ teꞌukiꞌ i lali Suraꞌ Mangkolehi to mantiꞌi, “Himo to mampetuntui mpololeke Aturana hi Musa, kotuwuꞌna tehiluꞌ i atura tiꞌo.”

¹³Buntoꞌmoki alaꞌ polungkaꞌinta Aturana hi Musa. Angkana kehapoꞌi hatoꞌo, Kerisitu mampohentemoki ka kobuntoꞌ tiꞌo. Teꞌukiꞌ i lali Suraꞌ Mangkolehi waheꞌe: “Ane uwaꞌ toaꞌ to nihoi i loti momehulepe hei nirokoꞌ, mononto toaꞌ tiꞌo buntoꞌmo.” Mewaliꞌ, komahina Kerisitu i loti momehulepe, Io malentumo kobuntoꞌanta.

¹⁴Tungkaihana hi Yesu mahi nipaku i loti momehulepe, hingkeꞌna toaꞌ to handoꞌiohi toYahudi pahuahi woꞌo pebarakati to nodandi Pueꞌ Ala pe hi Burahima. Pebarakati tiꞌo tohua alaꞌ petuntuta pe hi Yesu Kerisitu. Mewaliꞌ, ane mepoꞌohiki pe hi Yesu Kerisitu, pahuaki Inohaꞌ Mangkolehi to nodandimo Pueꞌ Ala hampiha.

¹⁵Halali-halali, kuroa pandiri' ka kotuwuꞌta ando-ando. Pandiriꞌna, uwaꞌ haduo toaꞌ to mampoꞌuwaꞌ podandi, hei podandi tiꞌo roponiuꞌmo, palaihana hamboaꞌmo hohumbo rotambai ba nipohente.

¹⁶Hatoꞌo woꞌo podandina Pueꞌ Ala. Pueꞌ Ala mampoꞌuwaꞌ dandina pe hi Burahima hante pe pemuleꞌana. Ipoꞌilalikei moromiꞌ lolita tiꞌo. Hawaꞌi teꞌukiꞌ “pemuleꞌane” hi Burahima to woriꞌ. To teꞌukiꞌ: “i muleꞌna”, alaꞌ to notungkai hante lolita tiꞌo iomo muleꞌna hi Burahima to haduolu, Iomo Kerisitu.

¹⁷Mewaliꞌ halali-halali, hieꞌemo palaihane kareba pandiriꞌ to kuꞌukiꞌmo: uluꞌ-uluꞌna Pueꞌ Ala mampoꞌuwaꞌ dandina pe hi Burahima. Iba natu tolu mpuluꞌ ntoꞌa uko tiꞌo, Io mampoꞌuwaꞌ AturaNa moliu hi Musa. Angkana Aturana hi Musa tiꞌo hawaꞌi mampomoholi dandiNa to Nodandi pe hi Burahima hampiha. DandiNa tiꞌo bateꞌna hingkiꞌ mewali.

¹⁸Ane rapaꞌna manaꞌ to rotorimo muleꞌna hi Burahima pongkana ka pampetuntuira Aturana hi Musa, palaihana manaꞌ tiꞌo handoꞌio ka dandina Pueꞌ Ala. Angkana tobahaꞌ: Hi Burahima pahua manaꞌ tiꞌo bateꞌna ka dandina Pueꞌ Ala alaꞌ kopopuhiꞌna lalina Pueꞌ Ala pe io.

¹⁹Mewaliꞌ, bateꞌna hingkiꞌ uwaꞌ toaꞌ to mantiꞌi waheꞌe: “Ane watoꞌoꞌi, hapo tungkaihane atura-atura to noꞌukiꞌ hi Musa?” Aturana hi Musa tiꞌo nopaꞌaniki Pueꞌ Ala hingkeꞌna mampokononto komadosana toaꞌ. Atura to noꞌukiꞌ hi Musa tiꞌo modumbuꞌlu wute kohupaꞌana haduo muleꞌna hi Burahima to Notungkai Pueꞌ Ala i lali dandiNa hampiha, iomo Kerisitu. Pueꞌ Ala mampohawaꞌki malaꞌekaNa mampowute AturaNa pe hi Musa, hei hi Musa tiꞌo mewali to mampeꞌilumbui iomo to mampowute Hawaꞌna Pueꞌ pe toaꞌ.

²⁰Mewaliꞌ, hawaꞌna Pueꞌ ropowute pe toaꞌ moliu hi Musa. Angkana ikonopowutena Pueꞌ Ala dandiNe pe hi Burahima, hawaꞌi uwaꞌ to mampeꞌilumbuino. Bateꞌnalu Pueꞌ Ala hadoduoNa to mampowute dandiNe tiꞌo.

²¹Kololiuhana halali-halali, atura-atura to noꞌukiꞌ hi Musa hawaꞌi moꞌewa tungkaihana dandina Pueꞌ Ala. Ane rapaꞌna, tobiaꞌi topetuntui atura-aturano hingkeꞌna pahuaki kotuwuꞌ to moromiꞌ, palaihana atura tiꞌomo to mewali lala to mampokonontoki i pampeꞌelena Pueꞌ Ala.

²²Angkana i lali Suraꞌ Mangkolehi, Pueꞌ Ala mampokonontomo lekiꞌ-lekiꞌna toaꞌ tehiluꞌ hante kuasaꞌ dosara. Mewaliꞌ, hawaꞌi uwaꞌ lala ntaniꞌ to mampolohoꞌki ka kuasaꞌ dosa, bateꞌnalu moliu i pepoꞌohinta pe hi Yesu Kerisitu.

²³Ikohandoaꞌanaꞌ tene tobahaꞌ lala mampoꞌohi hi Yesu, hibaliki toaꞌ to nitarungkuꞌ hei nohiluꞌ Aturana hi Musa. Hatoꞌo kotuwuꞌte wute Pueꞌ Ala mampokononto hohumbo lalante mepoꞌohi pe Pueꞌ Yesu.

²⁴Aturana hi Musa wadi nipandiriꞌ hibali guru to morandaki wute ikohupaꞌna Kerisitu, hingkeꞌna mewaliki mononto i pampeꞌelena Pueꞌ Ala nokomi pepoꞌohinta pe Kerisitu.

²⁵Mewaliꞌ hinewowoꞌena, hamboaꞌmoki paralu noranda Aturana hi Musa alaꞌ modamemoki hante Pueꞌ Ala nokomi pepoꞌohinta pe Kerisitu.

²⁶Mewaliꞌ ingkei lekiꞌ-lekiꞌmi, nopoꞌanaꞌmokei Pueꞌ Ala alaꞌ pepoꞌohimi pe hi Yesu Kerisitu.

²⁷Niriumokei mewali toaꞌ to mohintuwuꞌ hante Kerisitu, hei waliami hibalimo hante Kerisitu.

²⁸Pueꞌ Ala hawaꞌi mampopoꞌoriꞌori toaꞌ: toYahudi ba to handoꞌio toYahudi, hawiꞌ ba to handoꞌio hawiꞌ, tomaꞌani ba towoweꞌe; i pampeꞌelena Pueꞌ Ala hibobalilukei lekiꞌ-lekiꞌmi alaꞌ pohintuwuꞌmi hante hi Yesu Kerisitu.

²⁹Alaꞌ petuntumi pe Kerisitu, Norekeꞌmokei muleꞌna hi Burahima, hei bateꞌna pahuakei hapo to nodandi Pueꞌ Ala pe hi Burahima.