Read Rampi Galatia 4 Bible Online

Galatia 4 - Rampi bible

Galatia 4

¹Mewaliꞌ, halali-halali: ane rapaꞌna uwaꞌ to hingkiꞌ mewali tumpu manaꞌ angkana io oꞌanaꞌlu tene, io hibalilu hante haduo hawiꞌ, kehapoꞌi lekiꞌ-lekiꞌna lumana umoꞌna kotuꞌuana io to hingkiꞌ moꞌompui.

²Io hibali haduo hawiꞌ alaꞌ toaꞌ ntaniꞌna to morewahi manaꞌna wute tempona to nopokononto umoꞌna.

³Hatoꞌo woꞌo ingkiꞌ, halali-halali: ikohandoaꞌanta tene pobahaꞌ lala mampoꞌohi Yesu Kerisitu, hibaliki oꞌanaꞌ tiꞌo, alaꞌ nopohawiꞌki kuasaꞌ-kuasaꞌ duniaꞌ hieꞌe.

⁴Angkana i tempo to nopokonontomo Pueꞌ Ala, Io morumbaꞌmo AnaꞌNa humei pe duniaꞌ. AnaꞌNa tiꞌo nopoꞌanaꞌki haduo towoweꞌe, hei Io mengkoruꞌ pe Aturana hi Musa.

⁵Pueꞌ Ala morumbaꞌ AnaꞌNa humei pe duniaꞌ hingkeꞌna mampohinteki ka Aturana hi Musa hingkeꞌna mewaliki anaꞌNa.

⁶Mewaliꞌ, alaꞌ nopoꞌanaꞌmoki Pueꞌ Ala, Io morumbaꞌmo Inohaꞌna AnaꞌNa meꞌohaꞌ i lalinta. Nokomi pajamana Inohaꞌ Mangkolehi i lalinta, iomo hinaꞌ towowoi Pueꞌ Ala, “Umoꞌ! Umoꞌku!”

⁷Mewaliꞌ, hamboaꞌmoki mewali hawiꞌ to tehiluꞌ i Aturana hi Musa alaꞌ nopoꞌanaꞌmoki Pueꞌ Ala! Hei ane Nopoꞌanaꞌmoki, bateꞌna hingkiꞌ Nopaꞌaniki lekiꞌ-lekiꞌna pebarakati to Nopatimomokiki.

⁸Hampiha, kohandoaꞌami tene pobahaꞌ Pueꞌ Ala, nopohawiꞌkei lomoa to irekeꞌkei Pueꞌ Ala.

⁹Hinewowoꞌena ibahaꞌmokei Pueꞌ Ala, angkana kotuꞌuana nobahaꞌmokei umbiꞌ Pueꞌ Ala! Mewaliꞌ, mahamporeꞌi hinaꞌ ikodokoꞌikei motuntuni huliꞌ kuasaꞌ-kuasaꞌ to i duniaꞌ hieꞌe[8] to moledeꞌ hei hawaꞌi modumbuꞌ? Mahamporeꞌi hinaꞌ hiniꞌkei huliꞌ nipohawiꞌ hante kuasaꞌ-kuasaꞌ tiꞌo?

¹⁰Ipokodeꞌkei ando-ando, wula-wula, hei toꞌa-toꞌa to nipokononto. Mahamporeꞌi hinaꞌ ikodokoꞌikei mampomasana Pueꞌ Ala hante mampetuntui huliꞌ adaꞌ tiꞌo?

¹¹To kukotehuꞌ: inioꞌna intu hawaꞌi modumbuꞌ jamangka mampowute Kareba Moromiꞌ pe ingkei.

¹²Halalingku toGalatia! Kuperapiꞌ hingkeꞌna ipetuntuikei mpololeke waliangka, alaꞌ kehapoꞌa toYahudi, hamboaꞌmoꞌa mampetuntui adaꞌra toYahudi hingkeꞌna mewaliꞌa hibali ingkei to handoꞌiokei toYahudi. Hampiha, moromiꞌ mpololeke waliami pe aku.

¹³Ibahaꞌmokei, hampiha hangangaa meꞌohaꞌa mpoliu i kotami alaꞌ hawaꞌa polido, io hinaꞌ uwaꞌ tempoka mampowute Kareba Moromiꞌ pe ingkei.

¹⁴Kehapoꞌi uwaꞌ lalane mampariwoiꞌa nokomi kotangku polido tiꞌo, angkana hawaꞌa nisapuaka ba ipokoiꞌkei. Itorimoꞌakei moromiꞌ hibali haduo malaꞌeka to ka Pueꞌ Ala, hei itorimoꞌakei woꞌo hibali hi Yesu Kerisitu.

¹⁵Motanaꞌ mpololeke lalimi i tempo tiꞌo. Angkana hinewowoꞌena, mahamporeꞌi hinaꞌ tewolihi lalimi pe aku? Kubahaꞌ mpololeke halali-halali, hampiha ane uwaꞌ to kuparaluꞌi, hawaꞌkei ipokabohiꞌ. Iana woꞌo matami, ane kehohumboꞌi nidungkiꞌ keꞌipaꞌanikiꞌakei woꞌo, hawaꞌkei nokomakuraꞌi.

¹⁶Mewaliꞌ hinewowoꞌena, mahamporeꞌi hinaꞌ irekeꞌakei hibali poniꞌmi? Ba bilaꞌna kupowutekikei hapo to tuꞌu?

¹⁷Uwaꞌhi toaꞌ to mehupaꞌ to dokoꞌhi moroa lalimi, angkana tungkaihara hawaꞌi moromiꞌ alaꞌ dokoꞌhi mokaꞌakei ka aku, hingkeꞌna iohi ituntunikei.

¹⁸Hawaꞌkei kusalaꞌi ane tuꞌu-tuꞌu tungkaihare mowali to moromiꞌ, angkana handoꞌio i tempokulu uwaꞌ i lumbumi.

¹⁹Halali-halali, kurekeꞌmokei mpololeke anaꞌku. Angkana hampiha tene maporiꞌ lalingka mampekirikei. Komaporiꞌna lalingku hieꞌe hibali komaporiꞌna haduo towoweꞌe to nokomolaloi hingkiꞌ moꞌanaꞌ, hei hingkiꞌ maporiꞌ nturusi lalingka wute waliami hibali hante Kerisitu.

²⁰To kukodokoꞌi mpololeke, hingkeꞌna uwaꞌa moꞌawa-awa hante ingkei hinewowoꞌena, hingkeꞌna wadiꞌa mololita hante lolita ntaniꞌna, alaꞌ wulimoꞌa hapo to hangangaa kuwali.

²¹Ingkei to mangkodokoꞌi mampetuntui atura-atura agama, pehoromuakei! Hingkiꞌ kupokonontokikei hapo to teꞌukiꞌ i lali Aturana hi Musa.

²²Itoꞌo teꞌukiꞌ: uwaꞌ meroduo anaꞌne hi Burahima. Anaꞌna haduo nopoꞌanaꞌki hi Hagar haduo hawiꞌ. Hei anaꞌna haduo nopoꞌanaꞌki hi Sara hantambina to handoꞌio hawiꞌ.

²³Oꞌanaꞌ to nopoꞌanaꞌki hawiꞌ tiꞌo, nipoꞌanaꞌki motuntuni peleihana toaꞌ. Angkana oꞌanaꞌ to nopoꞌanaꞌki towoweꞌe to handoꞌio hawiꞌ, nipoꞌanaꞌki alaꞌ uwaꞌ dandine Pueꞌ Ala pe hi Burahima.

²⁴Lolitonana tiꞌo mewali pandiriꞌ i ingkiꞌ. Towoweꞌe to roduo tiꞌohi, palaihana rolangkaꞌ dandi to nopaꞌaniki Pueꞌ Ala pe toaꞌ, iomo dandi to hohai hante dandi to wolaꞌ: dandi to hohai noniuꞌ i atura-atura to notorimo hi Musa i Biri Sinai. Lekiꞌ-lekiꞌna toaꞌ to mampetuntui atura-atura toYahudi, kotuwuꞌra hibalihi kotuwuꞌna hawiꞌ, alaꞌ mengkoruꞌhi pe atura-atura tiꞌo.

²⁵Hi Hagar nipandiriꞌ woꞌo hibali biri Sinai i woiꞌ Arab iomo biri pantorimoana hi Musa atura. Hei biri Sinai tiꞌo wadi woꞌo nipandiriꞌ hibali kota Yerusale to i duniaꞌ hieꞌe. Tumpu bolaꞌ Yerusale nopohawiꞌhi Aturana hi Musa.

²⁶Angkana hi Sara iomo hantambina hi Burahima to handoꞌio hawiꞌ. Io hibali kota Yerusale to i suruga. Hi Sara tiꞌomo to topoꞌinoꞌ, alaꞌ tepohentemoki ka Aturana hi Musa; hawaꞌki nopohawiꞌ atura tiꞌo.

²⁷Teꞌukiꞌ i lali Suraꞌ Mangkolehi waheꞌe: “Motanaꞌko towoweꞌe to lalo, to hawaꞌi kahampiha moꞌanaꞌ![9] Motanaꞌko hei kareꞌko, to hawaꞌi kahampiha nokomolaloi hingkiꞌ moꞌanaꞌ! Alaꞌ kehapoko hibali towoweꞌe to nopolihi maꞌanina, hingkiꞌ meliu koworiꞌne pemuleꞌamu hintina towoweꞌe to tuwuꞌ moꞌawa-awa hante maꞌanina.” [10] Ingkeimo halali-halali, to mewali woꞌo anaꞌna Pueꞌ Ala motuntuni dandiNa. Wadikei nipandiriꞌ hibali hi Isaki, anaꞌna hi Burahima to nipoꞌanaꞌki motuntuni dandina Pueꞌ Ala.

²⁹I tempo tiꞌo, anaꞌna hi Burahima to nipoꞌanaꞌki motuntuni peleihana toaꞌ mampopoꞌioꞌio hineeꞌna to nipoꞌanaꞌki motuntuni kuasaꞌna Inohaꞌ Mangkolehi. Hatoꞌo woꞌo to mewali i tempo hieꞌe: ingkei to mampetuntui peleihana Inohaꞌ Mangkolehi ropoperima-rimakei toaꞌ to mangkodokoꞌi moparukukei mampetuntui atura-atura agama.

³⁰Angkana hapo to teꞌukiꞌ i lali Suraꞌ Mangkolehi? Uwaꞌ teꞌukiꞌ waheꞌe: “Ipopolaimo towoweꞌe to nipohawiꞌ moꞌawa hante anaꞌna, alaꞌ anaꞌna hawiꞌ tiꞌo hawaꞌi wadi pahua manaꞌ ka umoꞌna. Manaꞌ tiꞌo hangangaa nipaꞌaniki oꞌanaꞌ to nopoꞌanaꞌki towoweꞌe to handoꞌio hawiꞌ.”

³¹Halali-halali, ingkiꞌ hieꞌe hawaꞌki hibali anaꞌna hi Hagar to nipohawiꞌ.[11] Angkana ingkiꞌ hieꞌe hibaliki anaꞌna hi Sara to handoꞌio hawiꞌ.