Read Rampi Galatia 5 Bible Online

Galatia 5 - Rampi bible

Galatia 5

¹Kerisitu mampohentemoki ka Aturana hi Musa, hingkeꞌna tepohenteki mpololeke. Iomo hinaꞌ hangangaa ipotintokei lalimi, hingkeꞌna inioꞌkei nopohawiꞌ huliꞌ.

²Ipehoromuakei moromiꞌ lolitangka! Aku hieꞌe hi Paulu, hei kutiꞌikikei: ane adaꞌ pebulabaꞌ to mampomodamekei hante Pueꞌ Ala, palaihana, Kerisitu hawaꞌi modumbuꞌ i ingkei.

³Hei kutiꞌikikei womo: hihimolu to mampopebulabaꞌ, hangangaa mampetuntuihi woꞌo lekiꞌ-lekiꞌna hawaꞌ ntaniꞌna i lali Aturana hi Musa.

⁴Ane dokoꞌkei mewali mononto nokomi kopetuntumi i Aturana hi Musa bateꞌna tekaꞌamokei ka Kerisitu, palaihana, nisapuakamo kopopuhiꞌne lalina Pueꞌ Ala.

⁵Angkana ingkiꞌ, halali-halali, alaꞌ perandana Inohaꞌ Mangkolehi, bateꞌna mohinaruki pe Pueꞌ Ala to mampomodameki hante Io alaꞌ pepoꞌohinta pe hi Yesu Kerisitu. Hei bateꞌna tiꞌo to topekau.

⁶Ane mohintuwuꞌki hante Yesu Kerisitu, nibulabaꞌ ba hawaꞌi, hamboaꞌmo paralu. Angkana to paralu mpololeke iomo pepoꞌohi, hei pepoꞌohinta tiꞌo nipotongawa hante rima pe hangko awanta.

⁷Hampiha, ipetuntuimokei poturuꞌ to tuꞌu. Hihimo to mokeloikei hingkeꞌna ipetuntuikei poturuꞌ tota tuꞌu?

⁸Mononto mpololeke poturuꞌra tiꞌo handoꞌio ka Pueꞌ Ala to moꞌuwiꞌmoki mewali toaꞌNa.

⁹Poturuꞌra to mepowuli tiꞌo hibali ragiꞌ, alaꞌ “Ragiꞌ kehapoꞌi hangkokiuꞌlu mampopembiaꞌ tinampu mewali woriꞌ.”

¹⁰Angkana kehapoꞌi hatoꞌo, bateꞌna kupoꞌohi kohawaꞌne ipetuntuikei poturuꞌ to mepowuli tiꞌo, alaꞌ mohintuwuꞌmokei hante Pueꞌ Yesu. Hei mononto woꞌo i aku, hihimo to mampowulikei moliu poturuꞌna, bateꞌna nohuku Pueꞌ Ala.

¹¹Halali-halali, uwaꞌhi toaꞌ to mantiꞌi koꞌakuna to mopaguru toaꞌ mampetuntui adaꞌ pebulabaꞌ motuntuni aturana hi Musa. Hawaꞌi tuꞌu lolitare tiꞌo! Ane hatoꞌoꞌi poturuꞌka kehawaꞌi uwaꞌ toYahudi to mampoperima-rimaꞌa. Mombaha kotane tuꞌu alaꞌ poturuꞌku noniuꞌ ikomahina Kerisitu i loti momehulepe mangkomi posisalaꞌ i lumbura.

¹²Hihimo to mampowulikei i pepoꞌohimi, hawaꞌi nibulabaꞌlu, agina nitoluimolu!

¹³Tungkaihana Pueꞌ Ala moꞌuwiꞌmokei, halali-halali, hingkeꞌna himpolohoꞌkei. Angkana kohimpolohoꞌmi tiꞌo inioꞌ iwalikei koholangkoami mowali hapolu motuntuni peleihami. Angkanareꞌi hangangaa momepokarimakei hei momesulungikei haduo hei haduo.

¹⁴Alaꞌ uwaꞌ hawaꞌ to teꞌukiꞌ i lali Aturana hi Musa to mantiꞌi, “Ipokarimakei hangko awami hibalikei mampokarima wotami hadoduomi.” Ane mampetuntuikei hawaꞌ to halangkaꞌ tiꞌo, hibalimokei woꞌo motuntuni lekiꞌ-lekiꞌna aturana hi Musa.

¹⁵Moromiꞌ-romiꞌkei! Hingkiꞌ momepokarugiꞌkei ane mosisalaꞌkei hante momepokoiꞌ lalikei.

¹⁶Waheꞌe tungkaihangka: hangangaa norandaki Inohaꞌ Mangkolehi hingkeꞌna hawaꞌki motuntuni peleihana lalinta hadoduonta.

¹⁷Alaꞌ peleihana lalinta hadoduonta hawaꞌi hintotoꞌ hante peleihana Inohaꞌ Mangkolehi. Ane totuntuniꞌi to halangkaꞌ, hawaꞌki wadi motuntuni to ntaniꞌna. Ane totuntuniꞌi peleihane lalinta hadoduonta, hawaꞌi towali hapo to moromiꞌ motuntuni peleihana Inohaꞌ Mangkolehi; hei ane totuntuniꞌi peleihane Inohaꞌ Mangkolehi, hawaꞌi hingkiꞌ towali peleihane lalinta.

¹⁸Mewaliꞌ, ane norandaki Inohaꞌ Mangkolehi, hamboaꞌmoki mengkoruꞌ pe Aturana hi Musa.

¹⁹Tongawamo ane toaꞌ mowali walia to hintotoꞌ hante peleihana lalira to kodake. Rapaꞌna: toaꞌ to haꞌanu koturua hante toaꞌ to handoꞌio hatambina ba maꞌanina, mowali walia to mekokomaꞌi, mampetuntui pekirira to mokomaꞌ,

²⁰menomba pe to handoꞌio Pueꞌ Ala, mampopodumbuꞌ kuasaꞌ to ka lomoa, mampokoiꞌhi awara, mosisalaꞌ, mohiriꞌ, poko bukota, motuntuniluhi peleihara hadoduora, nopeꞌoꞌuwaꞌ tene wotana hadoduona, poko mampopoheꞌero toaꞌ,

²¹mowahiꞌ, lolonua, mosusaꞌ-susaꞌ nturusi, hei uwaꞌ tene woꞌo to ntaniꞌne. Mewaliꞌ, lekiꞌ-lekiꞌna tiꞌo, kupaꞌingaꞌikei woꞌo hibali to kutiꞌikikei hampiha: hihimo to mowali hatoꞌo, hawaꞌhi hingkiꞌ mewali toaꞌna Pueꞌ Ala i lali kodatuaNa.

²²Angkana ane norandaki Inohaꞌ Mangkolehi, walianta waheꞌe: momepokarimaki, motanaꞌki, lebaꞌ lali, sabaraꞌki, moromiꞌ lalinte, moromiꞌ waliante; tungkuꞌki,

²³mengkaꞌiwowoiꞌki, hei morii peleihana lalinta. Hawaꞌi uwaꞌ hawaꞌ to moꞌopi walia to hatoꞌo.

²⁴Ingkiꞌ to mewali toaꞌna Yesu Kerisitu, hamboaꞌmoki nokuasaꞌi peleihana lalinta to kodake alaꞌ torokoꞌmoꞌi peleihane lalinta i loti momehulepe moꞌawa hante Kerisitu.

²⁵Alaꞌ nopaꞌanimoki Inohaꞌ Mangkolehi kotuwuꞌ to wolaꞌ, hangangaa topetuntui peleihane Inohaꞌ Mangkolehi.

²⁶Inioꞌki mampokokodeꞌ, inioꞌki momepoꞌilali ba meꞌewa pe hangko awanta.