Read Rampi Galatia 6 Bible Online

Galatia 6 - Rampi bible

Galatia 6

¹Halali-halali, ane pangkiꞌkei halali hampepoꞌohimi mowali salaꞌ, ingkei to noranda Inohaꞌ Mangkolehi, hangangaa irandakei huliꞌ toaꞌ to mowali salaꞌ pe lala to mononto. Angkana ane iwalikei tiꞌo, hangangaa ipomoꞌalusuꞌkei waliami. Hei majaga-jagakei woꞌo, hingkeꞌna inioꞌkei woꞌo tekeloi mowali salaꞌ.

²Hangangaa momesulungikei haduo hei haduo, hingkeꞌna ka waliami tiꞌo, ipetuntuimokei hawaꞌne Kerisitu.

³Ane uwaꞌ haduo toaꞌ to morekeꞌ meliu kotuwuꞌne ka awana, hantaro hawaꞌi, palaihana io mampowowutiki wotana hadoduona.

⁴Aginamo lekiꞌ-lekiꞌta mampekiri walianta hadoduonta, ba moromiꞌ ba hawaꞌi. Ane moromiꞌi, mabuloho lalinte. Hei hampoliꞌmo topohibali waliante hante waliana toaꞌ ntaniꞌna,

⁵alaꞌ ingkiꞌ lekiꞌ-lekiꞌta hangangaa mampopatengkaꞌki jamanta hadoduonta.[12]

⁶Toaꞌ to mantorimo poturuꞌ noniuꞌ hi Yesu hangangaa nodolaꞌ mahuliꞌ wuaꞌ ka hapo to notorimomo pe guruna.

⁷Majaga-jagakei, halali-halali! Pueꞌ Ala hawaꞌi wadi topampowowutiki. Hapo to tohuꞌa, tiꞌo woꞌo to hingkiꞌ torupuꞌ.

⁸Alaꞌ ane motuntuniki nturusi peleihanta hadoduonta, hingkiꞌ pahuaki wuaꞌna walianta iomo komanasa. Angkana ane walianta mampetuntui peleihana Inohaꞌ Mangkolehi, hingkiꞌ pahuaki wuaꞌna iomo kotuwuꞌ to wolaꞌ moꞌawa-awa hante Pueꞌ Ala wute nantolou-louna, alaꞌ kotuwuꞌ to wolaꞌ tiꞌo nopaꞌanikiki Inohaꞌ Mangkolehi.

⁹Mewaliꞌ halali-halali, inioꞌki luleꞌ mowali hapo to moromiꞌ, alaꞌ ane mowaliki nturusi walia to moromiꞌ, bateꞌna hingkiꞌ tohua wuaꞌne walianta i tempo to nipokononto.

¹⁰Mewaliꞌ, kolentuꞌana tene uwaꞌ tempo, hangangaa mowaliki nturusi hapo to moromiꞌ pe lekiꞌ-lekiꞌna toaꞌ, peꞌoꞌuwaꞌnamo i halali hampepoꞌohinta.

¹¹Hinewoꞌena kuꞌukiꞌ hante korawe hadoduongku, hei ukiꞌna kupokodeꞌ mpololeke.[13]

¹²Majaga-jagakei i toaꞌ to mampowute poturuꞌ to mepokonawuꞌ. Rolei hingkeꞌna niperenakihi ka toaꞌ ntaniꞌna. Magegahi hingkeꞌna nibulabaꞌkei motuntuni adaꞌra toYahudi, angkana tungkaihara hingkeꞌna hawaꞌhi nopoperima-rima toYahudi, alaꞌ hieꞌemo to rokotehuꞌ: ane mepoꞌohiluhi pe Kerisitu to nipaku i loti momehulepe, hei hamboaꞌmohi mampetuntui adaꞌ tiꞌo, bateꞌra hingkiꞌ nipoperima-rimahi.

¹³Kotuꞌuana, toaꞌ to mampetuntui adaꞌ pebulabaꞌ tiꞌo, hawaꞌhi mampetuntui lekiꞌ-lekiꞌna atura-atura to teꞌukiꞌ i Aturana hi Musa. Tungkaihara morumbaꞌkei mampopebulabaꞌ, hingkeꞌna mampokokodeꞌhi alaꞌ pampetuntuimi aturara tiꞌo.

¹⁴Angkana hawaꞌi kulei mamperenaki hapolu, ukonalu Pueꞌ Yesu Kerisitu to mahi nipaku i loti momehulepe. Alaꞌ nokomi komahina hi Yesu Kerisitu, hapo to noperenaki duniaꞌ hawaꞌi modumbuꞌ i aku, hei hapo to kuperenaki hawaꞌi noperenaki toaꞌ i duniaꞌ hieꞌe.

¹⁵Nibulabaꞌ ba hawaꞌi, handoꞌio tiꞌo to paralu. To paralu iomo kotuwuꞌ to wolaꞌ ka Pueꞌ Ala.

¹⁶I lali pekokaengku, kuperapiꞌ hingkeꞌna Pueꞌ Ala mampaꞌanikei Romiꞌ Ngkotuwuꞌ hei mampotongawa rimaNa i lekiꞌ-lekiꞌna toaꞌ to mampetuntui poturuꞌ hieꞌe hei to mewali toaꞌNa.

¹⁷Kololiuhana, kuperapiꞌ hingkeꞌna hamboaꞌmo uwaꞌ to mampomasusaꞌa, alaꞌ akumo surone Pueꞌ Yesu, hei tongawa ka belona wotangku.[14]

¹⁸Kuperapiꞌ hingkeꞌna Pueꞌta Yesu Kerisitu mobarakatikei ka kopopuhiꞌna laliNa. Amin.