Read Rampi Epesu 1 Bible Online

Epesu 1 - Rampi bible

Epesu 1

¹Suraꞌna hi Paulu Pe jumaꞌa Epesu Suraꞌ hieꞌe ka aku, hi Paulu surona Yesu Kerisitu, motuntuni peleihana Pueꞌ Ala. Hei suraꞌ hieꞌe kupokatu pe ingkei toaꞌna Pueꞌ Ala to uwaꞌ i kota Epesu to tungkuꞌ pe Yesu Kerisitu.

²Tabea ka aku! Mekokaeꞌa hingkeꞌna Pueꞌ Ala Umoꞌta hante Pueꞌ Yesu Kerisitu mobarakatikei hei mampaꞌanikei Romiꞌ Ngkotuwuꞌ.

³Topokodeꞌmo Pueꞌ Ala, Umoꞌna Pueꞌta Yesu Kerisitu, alaꞌ Nobarakatiki hante lekiꞌ-lekiꞌna pebarakati to moromiꞌ ka suruga nokomi pohaꞌanunta hante Kerisitu.

⁴Pebarakati tiꞌo waheꞌe: mepongka handoaꞌi tene Nowali duniaꞌ hieꞌe, Noꞌuwiꞌmoki hingkeꞌna mohaꞌanuki hante Kerisitu, horiana mewaliki toaꞌNa to mangkolehi hei hawaꞌi uwaꞌ salaꞌte i pampeꞌeleNa.

⁵Alaꞌ komarimana pe ingkiꞌ, ka uluꞌ-uluꞌna Nopokonontomo umbiꞌ hingkiꞌ Noꞌuwiꞌki mewali anaꞌNa moliu Yesu Kerisitu. Nowali hatoꞌo alaꞌ tiꞌomo tungkaihane, hei tiꞌo to Nopomotanaꞌ.

⁶Iomo horiana masipatoꞌ mpololeke Pueꞌ Ala topokodeꞌ, alaꞌ kopopuhiꞌna laliNa pe ingkiꞌ, moliu hapo to nowali hi Yesu, anaꞌNa to Nopokarima.

⁷Alaꞌ kopopuhiꞌna lalina Pueꞌ Ala pe ingkiꞌ, Nohompoꞌmoki ka pehuku dosanta, hei Noꞌampunimoki ka dosanta moliu komahina hi Yesu.

⁸KomarimaNa pe ingkiꞌ hawaꞌi mokoꞌukoa, hante kopebahaꞌ to Nopaꞌanikiki.

⁹Motuntuni peleihaNa, Noponobahaꞌimoki tungkaihaNa to moruemo tewuni. Tungkaihana tiꞌo hingkeꞌna hinangkana to uwaꞌ, moromiꞌ to i suruga moromiꞌ to i duniaꞌ hingkiꞌ Nopohaꞌanu, hei Kerisitu hingkiꞌ moparentai hinangkana. Pueꞌ Ala mampokononto tungkaihaNa to hingkiꞌ Nobuhoꞌi moliu Kerisitu, hei tungkaihaNa tiꞌo bateꞌna hingkiꞌ Nopopewali ane hupaꞌmoꞌi tempone.

¹¹Pueꞌ Ala mowali lekiꞌ-lekiꞌna tiꞌo motuntuni peleihaNa hei pobutusiNa hadoduoNa. Noꞌuwiꞌmoki hei Nopokononto koꞌingkiꞌnemo to mewali toaꞌNe alaꞌ pohaꞌanunta hante Kerisitu.

¹²Nowali hatoꞌo hingkeꞌna ingka toYahudi to uluꞌ-uluꞌna mohinaru pe Kerisitu mamperenaki hei mampokodeꞌ Pueꞌ Ala.

¹³Hatoꞌo woꞌo ingkei to handoꞌio toYahudi. Ikoꞌihorinamokei kareba to tuꞌu, mepoꞌohimokei i Kareba Moromiꞌ tiꞌo, hei Nopaꞌanikei Inohaꞌ Mangkolehi to Nodandi hampiha. Inohaꞌ Mangkolehi tiꞌo iomo tandaꞌ koꞌingkeinamo toaꞌne Pueꞌ Ala.

¹⁴Pueꞌ Ala mampaꞌaniki Inohaꞌ Mangkolehi hingkeꞌna mampokaroho dandiNa pe ingkiꞌ, hingkeꞌna mononto i ingkiꞌ, lekiꞌ-lekiꞌna to Nodandikiki hingkiꞌ Nopobuhoꞌi i tempo koNohompoꞌna toaꞌNa. Iomo horiana masipatoꞌ mpololeke Pueꞌ Ala niperenaki hei nipokodeꞌ.

¹⁵Kuhori kareba noniuꞌ pepoꞌohimi pe Pueꞌ Yesu, hei hohumbo komarimami pe lekiꞌ-lekiꞌna toaꞌna Pueꞌ Ala. Iomo horiana kutiꞌi woriꞌ komoromiꞌ i Pueꞌ Ala alaꞌ ingkei, hei kuponindikei nturusi i lali pekokaengku.

¹⁷Mekokaeꞌa pe Pueꞌ Alana Pueꞌta Yesu Kerisitu iomo UmoꞌNa to manobaꞌ. Kuperapiꞌ hingkeꞌna Inohaꞌ Mangkolehi mampomobaro lalimi, hingkeꞌna Pueꞌ Ala ibahaꞌkei mpololeke.

¹⁸Hei kuperapiꞌ pe Pueꞌ Ala hingkeꞌna Io mampaꞌanikei pekiri, hingkeꞌna ibahaꞌkei hohumbo komoromiꞌne pebarakati to ipohinarukei hingkiꞌ itorimokei ka Pueꞌ Ala, alaꞌ Io to moꞌuwiꞌkei mewali anaꞌNa. Kuperapiꞌ woꞌo hingkeꞌna ibahaꞌkei mpololeke kokodeꞌne pebarakati to Nopatimomomo umbiꞌ i lekiꞌ-lekiꞌna toaꞌNa,

¹⁹hei hingkiꞌ ibahaꞌkei woꞌo kokodeꞌne kuasaꞌna Pueꞌ Ala pe ingkiꞌ to mepoꞌohi pe Io. Kuasaꞌna tiꞌo hibali hante komarohona kuasaꞌNa i tempona mampopeꞌaro Kerisitu ka komahia hei Nopopahura tinaꞌ i kuanaNa i suruga.

²¹Kuasaꞌ to Nopaꞌaniki Pueꞌ Ala pe Kerisitu tiꞌo, meliu komarohone ka kuasaꞌra lekiꞌ-lekiꞌna topoparenta, lekiꞌ-lekiꞌna tadulako, lekiꞌ-lekiꞌna to makuasaꞌ. Maroho mpololeke kuasaꞌNe Kerisitu ka lekiꞌ-lekiꞌna to pahua pahura to teꞌadaꞌi, moromiꞌ to tuwuꞌ i tempo hinewowoꞌena, moromiꞌ to tuwuꞌ i tempo to hingkiꞌ dongkaꞌ.

²²Hei Pueꞌ Ala mampopengkoruꞌ hinangkana to uwaꞌ i kuasaꞌna Kerisitu, hei mohini Kerisitu mewali Tadulako to moparentai lekiꞌ-lekiꞌna toaꞌ to mepoꞌohi pe Io.

²³To mepoꞌohi pe Io, wadi nipandiriꞌ hibali Wotana Kerisitu to Nopoganaꞌi, hei mampoganai woꞌo hinangkana.