Read Rampi Epesu 2 Bible Online

Epesu 2 - Rampi bible

Epesu 2

¹Hampiha, ikohandoaꞌami tene mepoꞌohi pe hi Yesu, hibalikei to mahi hei tekaꞌa ka Pueꞌ Ala, alaꞌ madosakei hei molungkaꞌikei hawaꞌNa.

²I tempo tiꞌo, waliami ando-ando hibali waliara toaꞌ to kodake i duniaꞌ hieꞌe, hei motuntunikei peleihana Belisiꞌ. Belisiꞌ tiꞌo, iomo tadulakona lomoa to i raoha. Wute hinewowoꞌena, io mokuasaꞌi lalina toaꞌ to hawaꞌi mengkoruꞌ pe Pueꞌ Ala.

³Hampiha, lekiꞌ-lekiꞌta hatoꞌo woꞌo waliante. Motuntuniluki peleihana lalinta to kodake, hei towali hapolu to tolei i wotanta hei i pekirinta. I tempo tiꞌo, masipatoꞌki mpuꞌu nokobukotai Pueꞌ Ala alaꞌ hatoꞌo waliante, hibali hante toaꞌ ntaniꞌna.

⁴Angkana Pueꞌ Ala, moromiꞌ mpololeke laliNe hei kodeꞌ rimaNe pe ingkiꞌ,

⁵iomo horiana, kehapoki hibali toaꞌ to mahi alaꞌ dosanta, Nopaꞌaniki kotuwuꞌ to wolaꞌ alaꞌ pohaꞌanunta hante Kerisitu. Hangangaa ikolowoikei: alaꞌ kopopuhiꞌna lalina Pueꞌ Ala horiana tehompoꞌki ka pehuku dosanta!

⁶Nokomi pohaꞌanunta hante Yesu Kerisitu, Pueꞌ Ala mampotuwuꞌki ka komahia, hei mampopahuraki i lali suruga i pahura to manobaꞌ hingkeꞌna moparentaki moꞌawa hante Kerisitu.

⁷Tungkaihana Pueꞌ Ala, hingkeꞌna i ando to hingkiꞌ dongkaꞌ, hingkiꞌ Nopomombahakiki kokodeꞌne kopopuhiꞌna laliNa hei komoromiꞌna laliNa to tohua alaꞌ pohaꞌanunta hante Yesu Kerisitu.

⁸Nohompoꞌmoki Pueꞌ Ala ka pehuku dosanta alaꞌ kopopuhiꞌna laliNa hei alaꞌ pepoꞌohinta pe hi Yesu. Hawaꞌki Nohompoꞌ alaꞌ komoromiꞌna walianta, angkana kopopuhiꞌna laliNa pe ingkiꞌ. Iomo horiana hawaꞌki wadi mamperenaki wotanta hei mantiꞌi, “Alaꞌ komoromiꞌna waliangku, iomo horiana nohompoꞌa Pueꞌ Ala ka pehuku dosangku.”

¹⁰Hawaꞌi uwaꞌ haduo to wadi mantiꞌi hatoꞌo, alaꞌ Pueꞌ Ala mampopewalimoki toaꞌ to wolaꞌ alaꞌ pohaꞌanunta hante Yesu Kerisitu. Nopopewaliki toaꞌ to wolaꞌ hingkeꞌna mowaliaki to moromiꞌ. Hei walia tiꞌo Nopatimomokiki umbiꞌ mepongka hampiha.

¹¹Mewaliꞌ, halali-halali, iponindikei hohumbo kotuwuꞌmi hampiha. Motuntuni konipoꞌanaꞌakimi, handoꞌiokei toYahudi. Motuntuni toYahudi, ingkei “Toaꞌ to hawaꞌi nibulabaꞌ”, hei toYahudi tiꞌo mantiꞌi ioluhi toaꞌne Pueꞌ Ala, alaꞌ nibulabaꞌhi motuntuni atura agamara. Adaꞌ pebulabaꞌ tiꞌo, iomo adaꞌ to nowalilu toaꞌ i wota.

¹²Hampiha, handoaꞌkei tene metuntu pe Kerisitu hei hawaꞌkei tepekahi i ihaꞌna toYahudi to noꞌuwiꞌ Pueꞌ Ala mewali toaꞌNa. Hawaꞌi uwaꞌ dolaꞌmi i lali dandina Pueꞌ Ala pe toYahudi. I lali kotuwuꞌmi i duniaꞌ hieꞌe, hawaꞌi uwaꞌ pepohinaruami,[1] hei moꞌelakei ka Pueꞌ Ala.

¹³Angkana hinewowoꞌena, alaꞌ pohaꞌanumi hante Yesu Kerisitu, hamboaꞌmo hatoꞌo kotuwuꞌmi. Ingkei to hampiha moꞌela ka Pueꞌ Ala, hinewowoꞌena dodungkumokei alaꞌ Kerisitu mampeweimo wotaNa nirokoꞌ mosulewotaikei.

¹⁴Io hadoduoNa to mampohintuwuꞌkei, toYahudi hante to handoꞌio toYahudi. Hampiha, atura agama hei parentara toYahudi tiꞌo hibali bontoꞌ i lumbu to mampopokaꞌaki hingkeꞌna mewaliki merontibura, moliu komahiNa Io mokero bontoꞌ tiꞌo. Hante lala tiꞌo Nopohintuwuꞌmo to merontibura tiꞌo hingkeꞌna mewali toaꞌNa to wolaꞌ.

¹⁶Nokomi komahiNa i loti momehulepe, Kerisitu mampohintuwuꞌ toYahudi hante toaꞌ to handoꞌiohi toYahudi. Katoꞌo, Nopohaꞌanumoki lekiꞌ-lekiꞌta hante Pueꞌ Ala. Horiana hamboaꞌmo uwaꞌ lekiꞌ-lekiꞌna posisalaꞌara.

¹⁷Io humei pe duniaꞌ mampowute kareba pohintuwuꞌ pe ingkei to moꞌela ka Pueꞌ Ala hei pe ingka toYahudi to dodungku pe Pueꞌ Ala.

¹⁸Nokomi pohaꞌanunta hante Kerisitu, ingka toYahudi moromiꞌ ingkei to handoꞌio toYahudi wadiki dodungku pe Pueꞌ Ala Umoꞌta moliu Inohaꞌ Mangkolehi.

¹⁹Hampiha, ingkei to handoꞌiokei toYahudi, hibalikei toaꞌ to i howalilu.[2] Angkana hinewowoꞌena hamboaꞌmokei hatoꞌo. Tepekahimokei lekiꞌ-lekiꞌmi toaꞌna Pueꞌ Ala. Hantinomokei hante lekiꞌ-lekiꞌna anaꞌna Pueꞌ Ala.

²⁰Ingkei to mepoꞌohi pe hi Yesu, wadikei nipandiriꞌ hibali tambi to noꞌaro Pueꞌ Ala. Surona Pueꞌ Yesu hante nabi-nabi, hibali orina, hei Yesu Kerisitu, Iomo watu pahura tambi.

²¹Ingkei to metuntu pe hi Yesu hibalikei tambi to niꞌaro i womboꞌ watu pahura tambi, koꞌukoana mewaliki hibali haꞌanu tambi penombaha to mangkolehi to masipatoꞌ nopeꞌohaꞌi Pueꞌ.

²²Hei ingkei woꞌo halali-halali, alaꞌ pohintuwuꞌmi hante Kerisitu, niꞌarokei woꞌo moꞌawa hante lekiꞌ-lekiꞌna toaꞌ to mepoꞌohi, hingkeꞌna mewaliki hibali haꞌanu tambi to nopeꞌohaꞌi Pueꞌ Ala moliu Inohaꞌ Mangkolehi.