Read Rampi Epesu 3 Bible Online

Epesu 3 - Rampi bible

Epesu 3

¹Iomo horiana aku hi Paulu mampekokaekikei, hinewowoꞌena kolentuꞌangku nitarungkuꞌ Nokomi pajamangku i Yesu Kerisitu mampowute Kareba Moromiꞌ pe ingkei to handoꞌiokei toYahudi.

²Monontomo koꞌihorinemokei hohumbo Pueꞌ Ala mampaꞌaniꞌa jama hieꞌe, hingkeꞌna mampowuteꞌa Kareba Moromiꞌ to mantiꞌi komarimana Pueꞌ Ala pe ingkei to handoꞌiokei toYahudi.

³Hampiha, tungkaihana Pueꞌ Ala tiꞌo tewuni tene. Angkana hinewowoꞌena Nopotongawamo i aku, hei tiꞌo to kuꞌukiꞌmo i lali suraꞌku hieꞌe, kehapoꞌi hangkokotu.

⁴Mewaliꞌ, ane ibasakei suraꞌka hieꞌe, hingkiꞌ ibahaꞌkei tungkaihane Pueꞌ Ala noniuꞌ i Kerisitu to uluꞌana tewuni tene, hibali to roponobahaꞌikimoꞌa.

⁵Uluꞌana, tungkaihane tiꞌo handoaꞌi tene Nopotongawa pe toaꞌ. Angkana hinewowoꞌena tungkaihane Pueꞌ Ala mombahamo i ingka to Noꞌuwiꞌ mewali suroNa hante nabiNa to mampowute lolitaNa, alaꞌ Inohaꞌ Mangkolehi mampokonontokika.

⁶Hieꞌemo tungkaihaNe to tewuni tiꞌo: toaꞌ to handoꞌiohi toYahudi pahuahi woꞌo pebarakati ka Pueꞌ Ala moꞌawa hante toYahudi. Mohintuwuꞌmohi hante mewalimohi hadolaꞌa hante toYahudi, horiana pahuahi woꞌo hapo to nodandi Pueꞌ Ala pe lekiꞌ-lekiꞌna anaꞌNa. Tiꞌo rohua alaꞌ pohintuwuꞌra hante Yesu Kerisitu, alaꞌ mepoꞌohihi i Kareba Moromiꞌ.

⁷Mewaliꞌ, mampowuteꞌa Kareba Moromiꞌ hieꞌe alaꞌ noꞌuwiꞌa Pueꞌ Ala mewali topajamaNa ka kopopuhiꞌna laliNa. Io mampokarohoꞌa hante kuasaꞌNa hingkeꞌna kubiaꞌi mampopatengkaꞌ jama tiꞌo.

⁸Akumo tota modumbuꞌ ka lekiꞌ-lekiꞌna toaꞌna Pueꞌ Ala. Angkana kehapoꞌi watoꞌo, alaꞌ kopopuhiꞌna laliNa, Pueꞌ Ala morumbaꞌa mampowute pe toaꞌ to handoꞌiohi toYahudi koworiꞌna pebarakati to tohua ka Kerisitu to hawaꞌi mokoꞌukoa.

⁹Pueꞌ Ala mampaꞌaniꞌa woꞌo jama mampokonontokihi pe lekiꞌ-lekiꞌna toaꞌ hapo tungkaihane Pueꞌ Ala, alaꞌ Uluꞌana, Pueꞌ Ala to mowali duniaꞌ hante lekiꞌ-lekiꞌna ohina, Nowowuni tene tungkaihane tiꞌo,

¹⁰hingkeꞌna hinewowoꞌena alaꞌ pohaꞌanuramo toaꞌ to mepoꞌohi, moromiꞌ toYahudi, moromiꞌ to handoꞌio toYahudi, lekiꞌ-lekiꞌna to moparenta hante lekiꞌ-lekiꞌna to makuasaꞌ i suruga hingkiꞌ pobahaꞌ komoromiꞌna Pueꞌ Ala pe hinangkana to uwaꞌ.

¹¹Pueꞌ Ala mowali lekiꞌ-lekiꞌna tiꞌo motuntuni tungkaihaNa to Nopokononto ikohandoaꞌna tene duniaꞌ hieꞌe Nopopewali, hei tungkaihaNa tiꞌo Nopopewali moliu ka hi Yesu Kerisitu Pueꞌta.

¹²Alaꞌ pohaꞌanunta hante Yesu Kerisitu hei nokomi pepoꞌohinta pe Io, podehoꞌmoki mekododungku pe Pueꞌ Ala hei hamboaꞌmo mororangko lalinte.

¹³Iomo horiana kuperapiꞌ hingkeꞌna inioꞌ nomororangko lalimi pahori kareba konipoperima-rimangku hante konitarungkuꞌku, alaꞌ komaporiꞌ to kurii hieꞌe mangkomi pebarakati pe ingkei.

¹⁴Halalingku to handoꞌiokei toYahudi, ane kupekiriꞌi lekiꞌ-lekiꞌna pebarakati to ihuakei alaꞌ petuntumi pe Kerisitu, melingkotuꞌa mampokodeꞌ Pueꞌ Ala Umoꞌta.

¹⁵Ka Iomola pemuleꞌane to tuwuꞌ i suruga hante i womboꞌ duniaꞌ.

¹⁶Mekokaeꞌa, hingkeꞌna Pueꞌ Ala to manobaꞌ, mampaꞌanikei kuasaꞌ moliu Inohaꞌ MangkolehiNa hingkeꞌna maroho lalimi,

¹⁷alaꞌ pepoꞌohimi horiana Kerisitu lebaꞌ i lalimi, hingkeꞌna moꞌuwakaꞌkei i lali komarima.

¹⁸Hei ingkei moꞌawa-awa hante lekiꞌ-lekiꞌna toaꞌna Pueꞌ Ala pobahaꞌ kokurauꞌna, hei kokorobana hei kodingkaoꞌna hei kokuladuna rimana Kerisitu, hei pobahaꞌ rima tiꞌo kehapoꞌi io moliuni ka lekiꞌna kopobahaꞌ. Hingkeꞌna hapo to uwaꞌ i Pueꞌ Ala uwaꞌ woꞌo i ingkei.

²⁰Pueꞌ Ala to pobiaꞌ mowali meliu ka to nipekokaeki hei ka to nipekiri, hibali to mombaha ka kuasaꞌ to majama i lalinta.

²¹Hinamo Pueꞌ Ala nipokodeꞌ nturusi i lali jumaꞌa, moliu ka hi Yesu Kerisitu. Tepokodeꞌmo Pueꞌ Ala wute nantolou-louna. Amin.