Read Rampi Epesu 4 Bible Online

Epesu 4 - Rampi bible

Epesu 4

¹Aku, to nitarungkuꞌ alaꞌ Pueꞌ Ala, kutiꞌikikei hingkeꞌna ingkei to Nowowoimo, tuwuꞌkei hintotoꞌ hante pewowoi tiꞌo.

²Hinamo ingkei poko mengkaꞌiwowoikei, manondoꞌ, hei sabaraꞌ. Ipetidoꞌkimokei komarimami i lali pomesulungimi.

³Moromiꞌ-romiꞌkei hingkeꞌna hawaꞌi uwaꞌ posisalaꞌ, alaꞌ Inohaꞌ Mangkolehi to mampohintuwuꞌkei,

⁴haꞌanu wota, haduolu Inohaꞌ Mangkolehi. Hatoꞌo woꞌo ingkei niwowoikei hingkeꞌna; haꞌanu pepohinarua,

⁵haduo Pueꞌ Yesu, haꞌanu mpepoꞌohi, haꞌanu periu.

⁶Haduo Pueꞌ Ala to mewali Umoꞌ lekiꞌna toaꞌ. Pueꞌ Ala, iomo Pueꞌ Ala ka hinangkana duniaꞌ, to majama moliu i lekiꞌna, hei to makuasaꞌ i lali humampihana.

⁷Angkana pe ingkiꞌ haduo hei haduo nipaꞌanimoki kopebiaꞌ majama hapo to nopaꞌanikiki hi Yesu Kerisitu tojama.

⁸I lali Boo Mangkolehi teꞌukiꞌ waheꞌe: “KoꞌukoNa monani poniꞌNa Io mengkaꞌoreꞌ nolou pe peꞌohaꞌa to i wowomboꞌ. Mangkomi woriꞌ tawaniꞌ, hei pebarakati nodolaꞌ-dolaꞌ pe toaꞌNa” [3]

⁹Hawaꞌireꞌi, “Io mengkaꞌoreꞌmo” mopalaiha, Io ka mengkohoumo pe peꞌohaꞌa to i wowoiꞌna duniaꞌ hieꞌe?

¹⁰Io to mengkohoumo, Io woꞌo to mengkaꞌoreꞌmo moꞌela dingkaoꞌ ka laniꞌ, horiana Io uwaꞌ i imbo-imbolu.

¹¹Iomo to modolaꞌ-dolaꞌ pebarakati pe lekiꞌ-lekiꞌna toaꞌ to mepoꞌohi: uwaꞌhi to Nopopewali suroNa, uwaꞌhi to Nopopewali nabiNa, hei uwaꞌhi woꞌo to Nopopewali mampowute Kareba Moromiꞌ, topolambaꞌ, hei to mepoturuꞌ.

¹²Nodolaꞌ-dolaꞌ mampopengaa kopebiaꞌ tiꞌo hingkeꞌna ingkiꞌ toaꞌna Pueꞌ Ala pobiaꞌ majama to nopaꞌanikiki Pueꞌ. Alaꞌ ane tiꞌo to towali, ingkiꞌ to nitiꞌi Wotana Kerisitu hingkiꞌ tetambai komarohone pepoꞌohinta.

¹³Wute hampiha tempo hingkiꞌ hampekokiriki lekiꞌ-lekiꞌta i lali pepoꞌohinta, hei hingkiꞌ tobahaꞌ mpololeke Anaꞌne Pueꞌ Ala. Hingkiꞌ maroho pepoꞌohinte, hei hingkiꞌ mewaliki hibali Kerisitu to hawaꞌi uwaꞌ komakuraꞌaNe.

¹⁴Mewaliꞌ, ane hatoꞌoꞌi komarohone pepoꞌohinta, hamboaꞌmoki hingkiꞌ mololihaꞌ nipokonawuꞌ hibali oꞌanaꞌ. Pekirira oꞌanaꞌ hibali kora to noparowohi nolou humei, angkana ingkiꞌ, hamboaꞌmoki hatoꞌo. Hamboaꞌmoki hingkiꞌ mampetuntui lekiꞌ-lekiꞌna poturuꞌ ka toaꞌ to meꞌakokalai hei mepokonawuꞌ,

¹⁵angkana wae to pomombaha hapo to moromiꞌ ka lalinta to buhaꞌ rima, horiana i lali hapo-hapolu komorue-rueha pedeꞌ mewaliki mononto hibali Kerisitu. Iomo Tutuꞌta to motadulakoi lekiꞌ-lekiꞌta toaꞌNa.

¹⁶Hei Io to moꞌatoroꞌ toaꞌNa hibali Wotana hadoduoNa. Wotana toaꞌ, woriꞌ dolaꞌa, angkana uwaꞌ pomekaiꞌ-kaiꞌane hingkeꞌna mewali hawota. Ane topopatengkaꞌi jama hintotoꞌ hante hori-hori hapo to nopoꞌohikiki Pueꞌ, hingkiꞌ komaroho-rohoa pohintuwuꞌne toaꞌNa, alaꞌ pomepokarima haduo hei haduo.

¹⁷Mewaliꞌ, nokomi kuasaꞌ to nopaꞌanikiꞌa Pueꞌ, kupaꞌanikei lolita waheꞌe: Inioꞌ womo ipetuntuikei waliare toaꞌ to handoaꞌhi pobahaꞌ Pueꞌ Ala, alaꞌ pekirira hawaꞌi modumbuꞌ,

¹⁸Pekirira mokorindimo. Hawaꞌhi pahua kotuwuꞌ to wolaꞌ to ka Pueꞌ Ala, alaꞌ hawaꞌhi pobahaꞌ Pueꞌ Ala. Mengkobebehi alaꞌ morintodiꞌi lalire.

¹⁹Hamboaꞌmo robahaꞌ mohili, horiana motuntuniluhi peleihana lalira to hawaꞌi maniuꞌ, hei rolei mpololeke mowali hinangkana walia to mekokomaꞌi.

²⁰Angkana ingkei, handoꞌio walia tiꞌo to nipoturuꞌkikei noniuꞌ i Kerisitu.

²¹Ihorimokei mpuꞌu noniuꞌ i Io. I tempomi mampemoluka mepoꞌohi pe hi Yesu, nipoturuꞌkimokikei woꞌo poturuꞌ to tuꞌu to tohua ka Io.

²²Nipoturuꞌkimokikei waheꞌe: hangangaa ipohentekei waliami to ipetuntuikei ikohandoaꞌami tene mepoꞌohi pe Pueꞌ. Lekiꞌ-lekiꞌna peleihana lalimi to ipetuntuikei i tempo tiꞌo mampomonawuꞌkei hei mampokarugiꞌ kotuwuꞌmi.

²³Nipoturuꞌkei hingkeꞌna ipohentekei waliami to hampiha, hei iperapiꞌkei pe Pueꞌ Ala hingkeꞌna lalimi hante pekirimi Nowolaꞌi.

²⁴Hinamo tuwuꞌkei hibali manusiaꞌ to wolaꞌ to Nopopewali motuntuni lentena Pueꞌ Ala; iomo hante waliaNa to maniuꞌ to mononto, hei to mangkolehi.

²⁵Ala Nowolaꞌimokei, hangangaa ipohentemokei waliami to hampiha. Inioꞌkei mowuti. Hangangaa itiꞌikei hapo to tuꞌu, alaꞌ lekiꞌ-lekiꞌta dolaꞌnaki wotana Kerisitu.

²⁶Ane bukotakei, inioꞌ nipotedehi kobukotami tiꞌo mangkomikei pe lali dosa. Inioꞌkei bukota wute mentoriꞌ ando,

²⁷hingkeꞌna Belisiꞌ hawaꞌi pahua koholangkoa mokeloikei horiana madosakei.

²⁸Toaꞌ to manako, inioꞌ womohi manako. Aginamo majama ngkodeꞌhi, hingkeꞌna pahuahi hapo to roparalui hei wadihi woꞌo mosulungi toaꞌ ntaniꞌna to hawaꞌi nokoꞌuwaꞌi.

²⁹Inioꞌ uwaꞌ lolita to kodake to mesuwu ka omeꞌmi. Aginamo mampasuwukei lolita to masipatoꞌ hingkeꞌna wadikei mosulungi hei mampokaroho lalira toaꞌ ntaniꞌna. Lolita to hatoꞌo hingkiꞌ mangkomi pebarakati pe toaꞌ to pahori.

³⁰Inioꞌkei mampopohanondoiha Inohaꞌ Mangkolehi to ka Pueꞌ Ala. Inioꞌ ikolombulihakikei: Inohaꞌ Mangkolehi iomo petandaꞌina Pueꞌ Ala i lalimi to mampokononto koꞌingkeina toaꞌNe. Nokomi koꞌuwaꞌna Inohaꞌ Mangkolehi i lalimi, ibahaꞌmokei kohingkiꞌ hupaꞌne tempona Pueꞌ Ala mohompoꞌkei hei mamposalamaꞌkei.

³¹Mewaliꞌ, hangangaa ipohentekei lekiꞌ-lekiꞌne walia to waheꞌe: momepoꞌilali, momepokoiꞌ bukota, poheꞌero, hante mepononaꞌa. Hangangaa ipohentekei walia tiꞌo hante lekiꞌ-lekiꞌna walia to kodake.

³²Aginamo: moromiꞌ lalimi, momepokarimakei haduo hei haduo, hei momeꞌampunikei, hibali woꞌo Pueꞌ Ala moꞌampuni salaꞌmi nokomi petuntumi pe Kerisitu.