Read Rampi Epesu 5 Bible Online

Epesu 5 - Rampi bible

Epesu 5

¹Mewaliꞌ, alaꞌ nopoꞌanaꞌmokei Pueꞌ Ala hei Nopokarimakei, iomo horiana hangangaa mampetuntuikei waliana Pueꞌ Ala.

²Waliami ando-ando, hangangaa marimakei pe toaꞌ ntaniꞌna, hibali konopokarimami Kerisitu. Alaꞌ komarimana pe ingkiꞌ, Nopewei wotaNe nirokoꞌ mosulewotaiki. WaliaNa tiꞌo mampomotanaꞌ Pueꞌ Ala, hibali popenomba to mewowau to nipewei pe Io.

³Mewaliꞌ inioꞌkei mpuꞌu mohantambi ba momaꞌani deleꞌ. Inioꞌkei mowali walia ntaniꞌna to mekokomaꞌi ba mangkohoka parewana toaꞌ ntaniꞌna, hingkeꞌna hawaꞌi uwaꞌ to wadi mosalaꞌikei. Walia to hatoꞌo hawaꞌi hintotoꞌ i ingkei, alaꞌ ingkei toaꞌna Pueꞌ Ala.

⁴Inioꞌkei woꞌo metororahu ba mampasuwu lolita to hawaꞌi modumbuꞌ ba mohalaꞌ-halaꞌ lampeꞌ. Aginamo totiꞌi woriꞌ komoromiꞌ i Pueꞌ Ala.

⁵Hangangaa ibahaꞌkei: hihimolu to mohantambi ba momaꞌani deleꞌ, ba mowali walia ntaniꞌna to mekokomaꞌi ba mangkohoka to noꞌompui toaꞌ, hawaꞌhi masipatoꞌ mekahi pe lali poparentana Kerisitu hei Pueꞌ Ala hante hawaꞌhi pahua howonina to moromiꞌ. Hihimolu to mangkohoka to noꞌompui toaꞌ, iohi hibali to menomba pe lomoa

⁶Mewaliꞌ, inioꞌkei mepoꞌohi pe toaꞌ to mantiꞌi walia to kodake tiꞌo moromiꞌ. Alaꞌ nokomi walia to hawaꞌi moromiꞌ tiꞌo, Pueꞌ Ala bateꞌna hingkiꞌ bukota pe toaꞌ to hawaꞌi mengkoruꞌ pe Io.

⁷Mewaliꞌ inioꞌkei moꞌawa hei mampetuntui waliara toaꞌ to hatoꞌo.

⁸Alaꞌ hampiha, tuwuꞌkei tene i lali komokorindi, angkana hinewowoꞌena mobaromo lalimi alaꞌ pohintuwuꞌmi hante Pueꞌ Yesu. Io horiana, hangangaa tuwuꞌkei hintotoꞌ hante toaꞌ to tuwuꞌ i lali komobaroa.

⁹Ka lalimi to mobaro, mehupaꞌ lekiꞌ-lekiꞌna walia to moromiꞌ, to tuꞌu, hei to masipatoꞌ iwalikei.

¹⁰Hangangaa modotokei hingkeꞌna ibahaꞌkei hapo to mampomotanaꞌ Pueꞌ.

¹¹Mewaliꞌ, inioꞌ ipetuntuikei waliare toaꞌ to mokorindi tene lalira, alaꞌ hawaꞌi uwaꞌ walia to moromiꞌ to mehupaꞌ ka komokorindia. Aginamo nipokonontokihi kokodakene waliara tiꞌo,

¹²alaꞌ waliara to tewuni, hongkoꞌlu nilolita-lita mepokohilimo.

¹³Lekiꞌna to tewuni hingkiꞌ niꞌokiꞌ i lali komobaro.

¹⁴Alaꞌ i lali komobaro lekiꞌ-lekiꞌna hingkiꞌ niꞌokiꞌ. Iomo horiana uwaꞌ lolita to mantiꞌi: “Meꞌaromokei! To leꞌo Meꞌaromokei ka komahia, hei Kerisitu hingkiꞌ mowantai lalimi.”

¹⁵Iomo horiana hangangaa ipomoromiꞌ-romiꞌkei waliami. Inioꞌkei hibali toaꞌ to mengkobebe, angkana hangangaa mononto lalimi.

¹⁶Hangangaa ipopodumbuꞌkei moromiꞌ tempo to uwaꞌ i ingkei, alaꞌ i tempo hinewowoꞌena, kodake mpololeke waliane toaꞌ.

¹⁷Mewaliꞌ, inioꞌkei mengkobebe, angkana mampekirikei nturusi hapo to nolei Pueꞌ.

¹⁸Inioꞌkei malanu, alaꞌ tiꞌo to hingkiꞌ mangkomikei mowali woriꞌ langkaꞌ walia to kodake. Hangangaa nokuasaꞌikei Inohaꞌ Mangkolehi,

¹⁹hingkeꞌna mampolingakei linga penombaha, linga pepokodeꞌ hei linga ntaniꞌna to nopaꞌanikikei Inohaꞌ Mangkolehi. Hingkiꞌ molingakei hante komotanaꞌ-tanaꞌ mampokodeꞌ Pueꞌ ka lalimi mpololeke,

²⁰Itiꞌikei nturusi woriꞌ komoromiꞌ i Pueꞌ Ala Umoꞌta i lali konaꞌna Yesu Kerisitu Pueꞌta, alaꞌ Nopaꞌaniki hinangkana.

²¹Hangangaa momepengkoruꞌikei haduo hei haduo alaꞌ peꞌadaꞌimi pe Kerisitu.

²²Ingkei towoweꞌe, hangangaa mengkoruꞌkei pe maꞌanimi, hibali pengkoruꞌmi pe Pueꞌ.

²³Tomaꞌani iomo tadulako i hantambina, hatoꞌo woꞌo Kerisitu tadulako i toaꞌNa. Kerisitu iomo Datu to mamposalamaꞌ toaꞌNa to nipandiriꞌ wotaNa.

²⁴Hibali woꞌo ingkiꞌ to mepoꞌohi mengkoruꞌ pe Kerisitu, hatoꞌo woꞌo towoweꞌe hangangaa mengkoruꞌ pe maꞌanina i langkaꞌ-langkaꞌna to nowali.

²⁵Hei ingkei tomaꞌani, hangangaa ipokarimakei hantambimi motuntuni pandiriꞌna Kerisitu to mampokarimaki lekiꞌ-lekiꞌna toaꞌNa, wute mampewei wotaNa.

²⁶Nowali hatoꞌo hingkeꞌna Nopohohidaki mewali toaꞌNa, hei Nopomangkolehiki ka dosanta moliu periu hante BooNa,

²⁷hingkeꞌna ingkiꞌ lekiꞌ-lekiꞌta to mepoꞌohi mewali toaꞌNa to mangkolehi hante manobaꞌ, wute hawaꞌi uwaꞌ komasalaꞌte ba komakuraꞌte, hingkeꞌna masipatoꞌki hingkiꞌ Nokohupaꞌi.

²⁸Hibali hante rimana Kerisitu pe toaꞌNa, hatoꞌo woꞌo tomaꞌani hangangaa mampokarima hantambina hibali mampokarima wotana hadoduona. Himo to mampokarima hantambina, palaihana, nopokarima woꞌo wotane hadoduona.

²⁹Hawaꞌi uwaꞌ toaꞌ to mampokoiꞌ wotana hadoduona, bateꞌna nopoꞌodaꞌ hei norewahi. Hatoꞌo woꞌo Kerisitu morewahi toaꞌ to mepoꞌohi pe Io.

³⁰Io morewahiki alaꞌ ingkiꞌ to mepoꞌohi pe Io mewaliki dolaꞌna wotaNa.

³¹I lali Suraꞌ Mangkolehi, teꞌukiꞌ waheꞌe: “Iomo horiana haduo tomaꞌani hangangaa mampolihi umoꞌna hante inoꞌna, hei tuwuꞌ moꞌawa hante hantambina, hingkeꞌna to roduo tiꞌo mewalihi hawowota.” [4]

³²Lolita tiꞌo, kuladu palaihane. To kutungkai iomo pohintuwuꞌna Kerisitu hante toaꞌNa.

³³Angkana kehapoꞌi hatoꞌo, bateꞌna uwaꞌ woꞌo palaihane i ingkei, tomaꞌani hangangaa mampokarima hantambina hibali pampokarimana wotana hadoduona, hei towoweꞌe woꞌo hangangaa moꞌadaꞌi maꞌanina.