Read Rampi Epesu 6 Bible Online

Epesu 6 - Rampi bible

Epesu 6

¹Pokoꞌonaꞌ, nokomi pohintuwuꞌmi hante Pueꞌ, hangangaa ipetuntuikei hawaꞌne tomotodimi, alaꞌ tiꞌo to masipatoꞌ iwalikei.

²Hawaꞌ to uluꞌ-uluꞌna i lali Suraꞌ Mangkolehi to uwaꞌ dandina, iomo: “Hangangaa mengkoruꞌkei i inoꞌ umoꞌmi,

³hingkeꞌna kurauꞌ sungaꞌmi hei moromiꞌ tuwuꞌmi i duniaꞌ hieꞌe.”

⁴Hei ingkei to nipoꞌumoꞌ, inioꞌkei mampomolalo lalina anaꞌmi. Hangangaa nirewahihi, nipoturuꞌhi hei nipaꞌanihi lolita to masipatoꞌ hante peleihana Pueꞌ.

⁵Halalingku to nipohawiꞌ, ipetuntuikei hawaꞌne tuami i womboꞌ duniaꞌ hieꞌe. Iꞌadaꞌikei hei ipengkoruꞌikei ka lalimi mpololeke, hibali pengkoruꞌmi pe Kerisitu.

⁶Inioꞌkei mampopeꞌoꞌokiꞌlu i tuami hingkeꞌna niperenakikei. Hangangaa majamakei ka lalimi mpololeke alaꞌ ingkei rumbaꞌanakei Kerisitu to motuntuni peleihana Pueꞌ Ala.

⁷Hangangaa majamakei hante lali to motanaꞌ, hibalikei majama i Pueꞌ, hei handoꞌiolu i toaꞌ.

⁸Ipoꞌilalikei lolita hieꞌe: lekiꞌ-lekiꞌna toaꞌ to mowalia moromiꞌ, bateꞌra hingkiꞌ pahuahi howonina ka Pueꞌ, moromiꞌ to hawiꞌ tuwuꞌra, moromiꞌ to handoꞌio hawiꞌ tuwuꞌra.

⁹Hei ingkei to nipotua, hangangaa moromiꞌ woꞌo waliami pe hawiꞌmi. Inioꞌhi nipototehuꞌ. Hangangaa ikolowoikei: ingkei hante hawiꞌmi, haduolu Pueꞌmi, iomo Pueꞌ i lali suruga to hawaꞌi mampopoꞌoriꞌori toaꞌ.

¹⁰Koꞌukoana halali-halali, hangangaa marohokei i lali roho kuasaꞌna Pueꞌ, alaꞌ mohaꞌanumokei hante Io.

¹¹Hangangaa ipakeꞌkei lekiꞌ-lekiꞌne parewa mpoponiꞌ to nopatimomokikei Pueꞌ Ala, hingkeꞌna marohokei moꞌewa akalana Belisiꞌ.

¹²Alaꞌ i poponiꞌ hieꞌe, hawaꞌki moꞌewa toaꞌ angkana moꞌewaki kuasaꞌna to hawaꞌi toꞌokiꞌ. Moꞌewaki tadulako-tadulako komokorindi to makuasaꞌ i duniaꞌ. Moꞌewaki hinangkana lomoa ba to kodake to mokuasaꞌi raoha.

¹³Iomo horiana, hangangaa ipakeꞌkei lekiꞌ-lekiꞌna parewa mpoponiꞌ to ka Pueꞌ Ala, hingkeꞌna ane hupaꞌmoꞌi tempo komaporiꞌ to makaja mpololeke, hingkiꞌ marohokei nturusi i pepoꞌohimi wute i kotutuana komaporiꞌ to morumpakei, hei hawaꞌkei hingkiꞌ maꞌoruꞌ.

¹⁴Hangangaa timomokei, ipakeꞌmokei parewa mpoponiꞌ to ka Pueꞌ Ala. Hangangaa ipokarohokei petuntumi i poturuꞌ to tuꞌu noniuꞌ Pueꞌ, hibali salupiꞌ i henaꞌmi. Hangangaa mononto lalimi hante waliami, potukaꞌ baduꞌ besi mampoꞌodaꞌ wotami ka poniꞌmi.

¹⁵Hangangaa timomomokei nturusi mampowute Kareba Moromiꞌ, Alaꞌ tiꞌo to mampohaꞌanu toaꞌ hante Pueꞌ Ala, hibali sapatuꞌ to ipakeꞌkei matengkaꞌ.

¹⁶Hei hangangaa mepoꞌohikei nturusi pe Pueꞌ Ala. Pepoꞌohimi tiꞌo, ipolabakei nturusi. Nokomi pepoꞌohimi, wadikei moꞌewa lekiꞌ-lekiꞌna mata pana api to ka Belisiꞌ.

¹⁷ Hangangaa ipohinarukei kosalamaꞌami ka Pueꞌ Ala. Kosalamaꞌa tiꞌo hibali songko besi, Hangangaa ipakeꞌkei Boone Pueꞌ Ala alaꞌ tiꞌo hibali piho to nopaꞌanikikei Inohaꞌ Mangkolehi.

¹⁸Hei i lali poponiꞌmi moꞌewa Belisiꞌ, hangangaa mekokaekei nturusi merapiꞌ roho ka Pueꞌ Ala. I langkaꞌ-langkaꞌna, mekokaekei motuntuni perandana Inohaꞌ Mangkolehi. Inioꞌkei nohehaꞌ mekokae. Hangangaa ipekokaekikei nturusi lekiꞌ-lekiꞌne toaꞌna Pueꞌ Ala.

¹⁹Kuperapiꞌ hingkeꞌna ipekokaekiꞌakei woꞌo, hingkeꞌna i tempoku mololita, Pueꞌ Ala hingkiꞌ mampaꞌaniꞌa lolita to moromiꞌ, hingkeꞌna hawaꞌa morokaꞌ mampowute Kareba Moromiꞌ to tewuni uluꞌana, angkana hinewowoꞌena nopokonontokimoki Pueꞌ Ala.

²⁰Pueꞌ Yesu mohiniꞌa mewali suroNa mampowute Kareba Moromiꞌ, horiana hinewowoꞌena nitarungkuꞌa. Mewaliꞌ, kuperapiꞌ hingkeꞌna ipekokaekiꞌakei hingkeꞌna wuraniꞌa mampowute Kareba Moromiꞌ, alaꞌ tiꞌo to hangangaa kuwali.

²¹Hingkeꞌna ibahaꞌkei hohumbo kotuwuꞌka hinewowoꞌena, kurumbaꞌmo halalinte hi Tikiku nolou moweoꞌikei hei mamponobahaꞌikei lekiꞌ-lekiꞌna to mewali i aku. Hi Tikiku tiꞌo, iomo halalinta to topokarima, to nipoꞌohi mampopatengkaꞌ jamana Pueꞌ Ala.

²²Iomo horiana kurumbaꞌ nolou pe ingkei mamponobahaꞌikei hohumbo koꞌuwaꞌangki iseꞌe, hingkeꞌna tepododoli lalimi.

²³Hinamo Pueꞌ Ala umoꞌta hei Pueꞌ Yesu Kerisitu mampaꞌanikei Romiꞌ Ngkotuwuꞌ pe lekiꞌ-lekiꞌna halali hampepoꞌohingku. Kuperapiꞌ woꞌo hingkeꞌna Pueꞌ Ala hingkiꞌ mampodimbi pomepokarimami hante pepoꞌohimi.

²⁴Hinamo Pueꞌ mobarakati lekiꞌ-lekiꞌna toaꞌ to mampokarima Pueꞌta Yesu Kerisitu hante rima to hawaꞌi mokoꞌukoa.