Read Rampi Pilipi 1 Bible Online

Pilipi 1 - Rampi bible

Pilipi 1

¹Pe Jumaꞌa i kota Pilipi Tabea ka ingka hi Paulu hante hi Timotius, hawiꞌna hi Yesu Kerisitu. Kupokatu suraꞌ hieꞌe pe ingkei toaꞌna Yesu Kerisitu to uwaꞌ i kota Pilipi, hei pe toaꞌ to mampopatengkaꞌ jamana Pueꞌ i lumbumi, moromiꞌ hawiꞌna pueꞌ, moromiꞌ tadulakona tosarani. Mekokaeka hinamo Pueꞌ Ala umoꞌta hei Pueꞌ Yesu Kerisitu mobarakatikei hei mampaꞌanikei Romiꞌ Ngkotuwuꞌ.

³Halali-halali, i piha-pihana ane kuponindikei, kutiꞌi woriꞌ komoromiꞌ i Pueꞌku Pueꞌ Ala, alaꞌ koꞌingkeina.

⁴Hei i lali pekokaengku, motanaꞌ mpololeke lalingka mampekokaekikei lekiꞌ-lekiꞌmi,

⁵alaꞌ mepongka ka uluꞌ-uluꞌna i kopahorimi Kareba Moromiꞌ wute hinewowoꞌena, isulingiꞌakei i lali pajamangku mampowute Kareba Moromiꞌ to ka Pueꞌ Ala.

⁶Pueꞌ Ala hadoduoNa to majama i lalimi, hei moromiꞌ mpololeke hapo to Nopemolukamo Nowali i lali kotuwuꞌmi. Kupoꞌohi Pueꞌ Ala hingkiꞌ mampololiu jamaNa tiꞌo wute Nopotutuha hapo to Notungkai i lali kotuwuꞌmi i ando kohupaꞌana huliꞌ Yesu Kerisitu.

⁷Kupokarimakei, hei masipatoꞌ mpololeke kupekiri hatoꞌo alaꞌ isulingiꞌakei nturusi i lali pajamangku to nopaꞌanikiꞌa Pueꞌ Ala alaꞌ kopopuhiꞌna laliNa, moromiꞌ hinewowoꞌena kolentuꞌangku nitarungkuꞌ, moromiꞌ i tempoku mokamoroki toaꞌ to mosapuaka Kareba Moromiꞌ, hei mampokononto kotuꞌuna Kareba Moromiꞌ.

⁸Nobahaꞌ Pueꞌ Ala kokukopundaimi mpololeke, hei kopopundangku hieꞌe hibali komarimana Yesu Kerisitu pe ingkei.

⁹Mewaliꞌ, hieꞌemo pekokaengka pe Pueꞌ Ala. Kuperapiꞌ hingkeꞌna tetambai komarimami, hei tetambai woꞌo komapandemi hei kopebahaꞌ i lali hapo to tuꞌu, wute mononto i lalimi.

¹⁰Lekiꞌ-lekiꞌna tiꞌo kuperapiꞌ, hingkeꞌna ibahaꞌkei lala moꞌuwiꞌ hapo to moromiꞌ mpololeke, hei hingkeꞌna mangkolehi kotuwuꞌmi wute hawaꞌi uwaꞌ komasalaꞌmi i ando kohupaꞌana intu huliꞌ Kerisitu.

¹¹Mekokaeꞌa hingkeꞌna, nokomi kuasaꞌna Yesu Kerisitu i lali kotuwuꞌmi, hingkiꞌ mowalikei nturusi hapo to mononto i peꞌoꞌelena Pueꞌ Ala, koꞌukoana Pueꞌ Ala hingkiꞌ nipokodeꞌ hei niperenaki.

¹²Mewaliꞌ halali-halali, kulei hingkeꞌna ibahaꞌkei, kehapoꞌa nitarungkuꞌ, motanaꞌa, alaꞌ komaporiꞌku hieꞌe, koworiꞌ-woriꞌa toaꞌ to pahori hei mampoꞌohi Kareba Moromiꞌ.

¹³Koꞌukoana Surodadu to mampoꞌodaꞌ tambina datu hante toaꞌ ntaniꞌna to iseꞌe pobahaꞌ konitarungkuꞌku alaꞌ petuntuku pe Kerisitu.

¹⁴Hatoꞌo woꞌo, koworiꞌara tosarani iseꞌe maroho pepoꞌohire, alaꞌ pangkiꞌhi hohumbo Pueꞌ mosulungiꞌa i konitarungkuꞌku, koꞌukoana hamboaꞌmohi morokaꞌ, angkana kowurani-raniahi mampowute pohawaꞌna Pueꞌ Ala.

¹⁵Uwaꞌhi to mampowute Kareba Moromiꞌ noniuꞌ i Kerisitu alaꞌ kopopuhiꞌna lalira. Ropowute kareba tiꞌo alaꞌ komarimara i aku, alaꞌ robahaꞌ koꞌakuna to noꞌuwiꞌ Pueꞌ Ala mewali suroNa to mampokononto Kareba Moromiꞌ pe lekiꞌ-lekiꞌna toaꞌ iseꞌe. Angkana uwaꞌhi woꞌo toaꞌ to mampowute kareba tiꞌo alaꞌ kopowahiꞌra pe aku hei rolei moꞌewa jamangku.

¹⁷Mampowutehi kareba tiꞌo hante tungkaihara to salaꞌ, alaꞌ rolei mampokodeꞌ konaꞌra hadoduora. Tungkaihara hingkeꞌna motambaihi komaporiꞌku i lali tarungkuꞌ.

¹⁸Angkana kehapoꞌi hatoꞌo, hawaꞌi mahampo. Moromiꞌ ba hawaꞌi moromiꞌ tungkaihare, Kareba Moromiꞌ noniuꞌ i Kerisitu bateꞌna nipekarebaiki nturusi. Hei tontoku motanaꞌ.

¹⁹Hei kupotanaꞌ woꞌo, kubahaꞌ alaꞌ pekokaemi hei alaꞌ pesulungina Inohaꞌ Mangkolehi to ka Yesu Kerisitu, hingkiꞌ himpolohoꞌa.

²⁰Kubahaꞌ tiꞌo hingkiꞌ mewali, hei peleihangku hingkeꞌna hawaꞌa mohili mampopatengkaꞌ jama to Nopaꞌanikiꞌa Pueꞌ Ala, hampalena wae hingkeꞌna wuraniꞌa mampowute nturusi pewalingku sabiꞌNa, pelumbuꞌna tene hinewowoꞌena, hingkeꞌna nipokodeꞌi konaꞌne Kerisitu, moromiꞌ tempoku tene tuwuꞌ, moromiꞌ i komahingku intu.

²¹Alaꞌ ane tuwuꞌa, tungkaihana kotuwuꞌku hingkeꞌna Kerisitu nipokodeꞌ. Hei ane mahiꞌa, rasiꞌku mpololeke.

²²Angkana ane tuwuꞌluꞌa tene i duniaꞌ hieꞌe, wadiꞌa tene mampopatengkaꞌ jama to modumbuꞌ. Mewaliꞌ, hawaꞌi kubahaꞌ imboꞌina to kuꞌuwiꞌ.

²³Lalingku nokoꞌelaꞌi. Kukodokoꞌi mampolihi duniaꞌ hieꞌe hingkeꞌna tuwuꞌa moꞌawa hante Kerisitu i suruga, alaꞌ tiꞌo to moromiꞌ mpololeke.

²⁴Angkana ane tuwuꞌluꞌa tene i duniaꞌ hieꞌe, woriꞌ mpololeke podumbuꞌane i ingkei halalingku, hingkeꞌna wadikei tene kusulungi.

²⁵Kupoꞌohi bateꞌna hingkiꞌ tuwuꞌluꞌa tene nturusi. Mewaliꞌ hingkiꞌ kupekoholangkoi tene ako moweohikei hei mosulungikei hingkeꞌna tetambai komarohone pepoꞌohimi pe Pueꞌ Yesu hei hingkiꞌ tetambai woꞌo komotanaꞌmi mepoꞌohi pe Io.

²⁶Mewaliꞌ, ane mahuliꞌa pe ingkei, hingkiꞌ tetambai komotanaꞌmi hei pepokodeꞌmi pe Yesu Kerisitu.

²⁷Mewaliꞌ, to hangangaa nipohimpodulu iomo, waliami hangangaa hintotoꞌ hante waliana toaꞌ to mepoꞌohi i Kareba Moromiꞌ noniuꞌ i Kerisitu. Hangangaa iwalikei hatoꞌo, hingkeꞌna ane kukohidupaꞌkikei womo ba hamboaꞌmoki hidupaꞌ, hingkiꞌ kuhori komarohone pepoꞌohimi hei pohintuwuꞌmi i lali pajamami mampowute Kareba Moromiꞌ.

²⁸Inioꞌkei mangkorokaꞌ toaꞌ to moꞌewakei, alaꞌ nokomi kotami morokaꞌ tieꞌ, tiꞌo to mampokononto kohingkiꞌ nohukure Pueꞌ Ala, hei ingkei hingkiꞌ nopaꞌanikei Pueꞌ Ala kotuwuꞌ to wolaꞌ to hawaꞌi mokoꞌukoa. Pueꞌ Ala to makuasaꞌ mamposalamaꞌ.

²⁹Mewaliꞌ, inioꞌkei morokaꞌ i toaꞌ to moꞌewakei, alaꞌ Pueꞌ Ala mampetidoꞌki komoromiꞌNa pe ingkei, handoꞌio podo hingkeꞌna mepoꞌohikei pe Kerisitu, angkana wae uwaꞌ woꞌo tungkaihaNe hingkeꞌna pahuakei komaporiꞌ, koꞌukoana konaꞌna Kerisitu nipokodeꞌ.

³⁰Mewaliꞌ, i tempo hieꞌe, pahuamokei woꞌo komaporiꞌ hibali komaporiꞌ to kuhua i tempoku tene moꞌawa-awa hante ingkei, hei ihorimokei, halali-halali, kurii tene komaporiꞌ tiꞌo wute hinewowoꞌena.