Read Rampi Pilipi 4 Bible Online

Pilipi 4 - Rampi bible

Pilipi 4

¹Mewaliꞌ, halali-halali to kupokarima hei kupotanaꞌ: kuperapiꞌ hingkeꞌna tuꞌu-tuꞌukei tuwuꞌ i koromiꞌa. Ingkeimo to kupokodeꞌ hei kukopundai mpololeke.

²Halali hampepoꞌohingku hi Euodia hante hi Sintike! Kuperapiꞌ hingkeꞌna hintuwuꞌkei huliꞌ hibali to masipatoꞌ hante toaꞌ to mepoꞌohi pe Pueꞌ.

³Hei awangku to tungkuꞌ, kuperapiꞌ hingkeꞌna isulungihi woreaꞌ towoweꞌe to roduo tiꞌo, hingkeꞌna inioꞌmohi mosisalaꞌ. Kolentuꞌangku tene moꞌawa-awa hante ingkei, modotohi mampoꞌowoniꞌa mampowute Kareba Moromiꞌ moꞌawa-awa hante hi Keleme hei awangku majama to ntaniꞌna. Konaꞌra lekiꞌ-lekiꞌ teꞌukiꞌ i lali suraꞌ Ngkotuwuꞌ.

⁴Halali-halali, hangangaa motanaꞌkei nturusi alaꞌ pohintuwuꞌmi hante Pueꞌ. Hampiha tene kutiꞌi: hangangaa motanaꞌkei.

⁵Hinamo lekiꞌ-lekiꞌna toaꞌ hingkiꞌ pobahaꞌ komoromiꞌna lalimi. Iponindikei, hamboaꞌmo morue Pueꞌ hingkiꞌ hupaꞌmo.

⁶Inioꞌkei tepe i lali hapo-hapolu. Angkana i langkaꞌ-langkaꞌna mekokaekei, merapiꞌkei sulungi pe Pueꞌ Ala, hei itiꞌikei woriꞌ komoromiꞌna i Io.

⁷Ane iwalikei hatoꞌo Pueꞌ Ala hingkiꞌ mampotinto lalimi. Hawaꞌi hingkiꞌ ibahaꞌkei hohumbo hinaꞌ lebaꞌ lalimi, angkana kolebaꞌ lali tiꞌo to hingkiꞌ mampoꞌodaꞌ lalimi hante pekirimi moliu Yesu Kerisitu.

⁸Koꞌukoana halali-halali, kuperapiꞌ hingkeꞌna ipoꞌilalikei nturusi hinangkana to moromiꞌ hei to masipatoꞌ niperenaki. Hapo to moromiꞌ hapo to tuꞌu, hapo to hawaꞌi mampohambeiꞌ hapo to mangkolehi, hapo to manobaꞌ, hei hapo to teꞌadaꞌi, iomo to hangangaa ipekirikei.

⁹Hapo to ipeguruikei ka aku, moromiꞌ poturuꞌku to ihorimokei hei to itorimomokei, moromiꞌ waliangku to iꞌokiꞌkei, tiꞌomo to hangangaa iwalikei. Ane iwalikei hatoꞌo, Pueꞌ Ala hingkiꞌ mampoꞌowonikei hei mampolebaꞌ lalimi.

¹⁰Halali-halali, motanaꞌ mpololeke lalingka, hei mampokodeꞌa Pueꞌ Yesu, alaꞌ kehapoꞌi moruemoki mokaꞌa, ipokatukiꞌakei womo pesulungimi. Hawaꞌi kutiꞌi kohawaꞌkumo ikolowoikei hampiha, angkanareꞌi ikolowoiꞌakei nturusi; angkana haꞌumbora komoruene, hawaꞌkei hampakaꞌ mosulungiꞌa.

¹¹Tungkaihangku mantiꞌi hatoꞌo, handoꞌio nokomi koꞌuwaꞌna to kuparaluꞌi. Hapolu to uwaꞌ i aku, kupobiasamo hei kupotanaꞌ.

¹²Kuhoriki tuwuꞌ i tempoku makuraꞌ, hei kuhoriki woꞌo tuwuꞌ i tempoku nokoꞌuwaꞌi. Kehapoꞌi hapomo to morumpaꞌa, moromiꞌ i tempoku wohu, moromiꞌ i tempoku bilora, nokoꞌuwaꞌi ba hawaꞌa nokoꞌuwaꞌi, motanaꞌ nturusi lalingka.

¹³Kubiaꞌ mantorimo hapolu to mewali, alaꞌ Kerisitu to mampokaroho lalingku.

¹⁴Angkana kehapoꞌi hatoꞌo, moromiꞌ mpololeke lalimi mosulungiꞌa kolentuꞌangku i lali komaporiꞌ hieꞌe.

¹⁵Ibahaꞌmokei, halalingku toPilipi, uluꞌ-uluꞌna tempoku mampowute Kareba Moromiꞌ i Kotami, hei i kopolaingku ka woiꞌ Makedonia, hawaꞌi uwaꞌ jumaꞌa ntaniꞌna to mosulungiꞌa, bateꞌnalu ingkei.

¹⁶Hei handoꞌio tiꞌolu, angkana i komakuraꞌku i tempoku dodungku tene i ingkei i kota Tesalonika, haꞌumbora mpiha pesulungimi ipokatukiꞌakei.

¹⁷To kutiꞌi hieꞌe, handoꞌio alaꞌ komangkodokoꞌingku hingkiꞌ pahua womo kopopuhiꞌna lalimi. Hampalena wae, peleihangku hingkeꞌna hingkiꞌ itorimokei woriꞌ pebarakati to ka Pueꞌ Ala nokomi pesulungimi tiꞌo i aku.

¹⁸Mewaliꞌ hingkeꞌna ibahaꞌkei: lekiꞌ-lekiꞌna to ipakatukei, kutorimomo ka hi Eparoditu. Pakatumi tiꞌo handoꞌio podo maganaꞌlu, angkana melobi ka hapo to kuparaluꞌi. Kopopuhiꞌna lalimi tiꞌo mampomotanaꞌ Pueꞌ Ala, hibali popenomba to mewowau.

¹⁹Hei Pueꞌ Ala to kupenombai, Iomo to hingkiꞌ mampoꞌuwaꞌ hinangkana to iparaluikei, motuntuni kopebiaꞌNa to hawaꞌi uwaꞌ komakuraꞌne, moliu Yesu Kerisitu.

²⁰Topokodeꞌmo Pueꞌ Ala Umoꞌta wute nantolou-louna. Amin.

²¹Kuperapiꞌ hingkeꞌna ipowutekei tabeangka pe lekiꞌ-lekiꞌna toaꞌ ntaniꞌna to uwaꞌ itoꞌo to mepoꞌohi pe Yesu Kerisitu. Halali hampepoꞌohimi to uwaꞌhi iseꞌe moꞌawa hante aku mampowutemohi woꞌo tabeara pe ingkei.

²²Lekiꞌ-lekiꞌna toaꞌna Pueꞌ Ala i kota Roma hieꞌe, pelumbuꞌnamo iohi to majama i tambina Datu ngkodeꞌ, mampowutemohi woꞌo tabeara pe ingkei halalingku.

²³Kuperapiꞌ hingkeꞌna Pueꞌta Yesu Kerisitu mobarakatikei lekiꞌ-lekiꞌmi ka kopopuhiꞌna laliNa.