Read Rampi Kolose 1 Bible Online

Kolose 1 - Rampi bible

Kolose 1

¹Pe jumaꞌa i kota Kolose Suraꞌ hieꞌe ka aku hi Paulu, to noꞌuwiꞌ Pueꞌ Ala mewali surona Yesu Kerisitu motuntuni peleihaNa. Hei halali hampepoꞌohinta hi Timotius mampoꞌawaꞌa.

²Kipokatu suraꞌ hieꞌe pe ingkei halali hampepoꞌohingki i Kolose to tungkuꞌ mepoꞌohi pe Kerisitu. Tabea moromiꞌ! Hinamo Pueꞌ Ala Umoꞌta Nobarakatikei ka kopopuhiꞌna laliNa hei mampaꞌanikei romiꞌ ngkotuwuꞌ.

³I piha-pihana kipekokaekikei, kitiꞌi woriꞌ komoromiꞌ i Pueꞌ Ala, Umoꞌna Pueꞌta Yesu Kerisitu,

⁴alaꞌ kihorimo kareba noniuꞌ komarohona pepoꞌohimi pe Yesu Kerisitu hei komarimami i lekiꞌ-lekiꞌna toaꞌNa.

⁵Maroho pepoꞌohimi hei rimami, alaꞌ ipohinarukei mpololeke hapo to nopatimomokikei Pueꞌ Ala i suruga, hibali to ihorimokei ka poturuꞌ to tuꞌu, iomo Boo Mangkolehi.

⁶Boo Mangkolehi tiꞌo tekareba i humanele duniaꞌ, horiana koworiꞌ-woriꞌa toaꞌ to mepoꞌohi i Pueꞌ Yesu hei mowalihi hapo to moromiꞌ. Hibali to mewali i ingkei, halali-halali. Ikoꞌihorinakei Boo Mangkolehi tiꞌo, liumokei mepoꞌohi pe Pueꞌ Yesu, horiana ibahaꞌmokei kotuꞌuna kopopuhiꞌna lalina Pueꞌ Ala pe ingkiꞌ.

⁷Boo Mangkolehi tiꞌo ihorikei ka hi Epara, awangki majama to kipokarima. Hi Epara tiꞌo, iomo rumbaꞌana Kerisitu to nipoꞌohi majama mosulingikei.

⁸Iomo to mampekarebaiki pe ingka hohumbo komarimami alaꞌ perandana Inohaꞌ Mangkolehi.

⁹Mewaliꞌ, halali-halali, ikokihorina kareba noniuꞌ pepoꞌohimi, kipekokaekikei nturusi. Kiperapiꞌ pe Pueꞌ Ala hingkeꞌna Nopokonontokikei peleiNe moliu Inohaꞌ Mangkolehi, hingkeꞌna mobaro lalimi hei ibahaꞌkei mpololeke lekiꞌ-lekiꞌna noniuꞌ Pueꞌ Ala.

¹⁰Mekokaeka hatoꞌo hingkeꞌna tuwuꞌmi hingkiꞌ hintotoꞌ hante peleihana Pueꞌ. Ane watoꞌoꞌi, lekiꞌ-lekiꞌna waliami hingkiꞌ mampomotanaꞌ laliNa hei hingkiꞌ tetambai woꞌo kopobahaꞌmi noniuꞌ Pueꞌ Ala.

¹¹Kiperapiꞌ pe Pueꞌ Ala hingkeꞌna Nopokaroho lalimi moliu kuasaꞌNa to maroho mpololeke, hingkeꞌna sabaraꞌkei morii hapolu to morumpakei, hei motanaꞌkei nturusi i lalimi.

¹²Mekokaeka hingkeꞌna itiꞌikei woriꞌ komoromiꞌ pe Umoꞌta, alaꞌ Iomo to mampopewalikei toaꞌNa, horiana masipatoꞌkei pahua dolaꞌmi moꞌawa hante lekiꞌ-lekiꞌna toaꞌNa i lali kodatua suruga.

¹³Pueꞌ Ala mampohentemoki ka kuasaꞌ to mokorindi, hei Nopopewalimokei toaꞌNa i lali poparentana Anaꞌna to Nopokarima.

¹⁴Moliu AnaꞌNa tiꞌo, Nohompoꞌmoki, palaihana, Noꞌampunimo dosante.

¹⁵Pueꞌ Ala hawaꞌi toꞌokiꞌ. Angkana ane tobahaꞌi pambiarane hei kuasaꞌne hi Yesu, tobahaꞌ woꞌo pambiarane hei kuasaꞌNe Pueꞌ Ala. Hi Yesu tiꞌo torekeꞌ hibali AnaꞌNa tokokaꞌ, hei i wowomboꞌ kuasaꞌNe ka lekiꞌ-lekiꞌna to nowali Pueꞌ Ala,

¹⁶alaꞌ moliu hi Yesu, Pueꞌ Ala mowali lekiꞌ-lekiꞌna to uwaꞌ, moromiꞌ to i suruga hei to i duniaꞌ, moromiꞌ to niꞌokiꞌ hei to hawaꞌi niꞌokiꞌ, tepekahi lekiꞌ-lekiꞌna to makuasaꞌ hei to meparenta. Tungkaihana mampopewali lekiꞌ-lekiꞌna tiꞌo moliu i Kerisitu, hingkeꞌna lekiꞌ-lekiꞌna tiꞌo mampokodeꞌ Kerisitu.

¹⁷Ikohandoaꞌana tene uwaꞌ lekiꞌ-lekiꞌna, umbiꞌna uwaꞌmo hi Yesu. Hei lekiꞌ-lekiꞌna tiꞌo uwaꞌ i lali komakuasaꞌNa.

¹⁸Ingkiꞌ to mepoꞌohi pe Kerisitu nipandiriꞌ hibali wotaNa, hei Kerisitu iomo tutuꞌta. Winoro tutuꞌ to moparenta wotalokaꞌ, Kerisitu Iomo to moparenta lekiꞌ-lekiꞌna toaꞌ to mepoꞌohi pe Io. Iomo tokokaꞌ, palaihana, to uluꞌ-uluꞌna tuwuꞌ huliꞌ ka komahia, hingkeꞌna Iomo to peꞌoꞌuwaꞌne ka lekiꞌ-lekiꞌna to uwaꞌ.

¹⁹Pueꞌ Ala mampokononto lekiꞌ-lekiꞌna, to uwaꞌ i Io uwaꞌ woꞌo i AnaꞌNa, iomo hinaꞌ hawaꞌi uwaꞌ komakuraꞌNe.

²⁰Pueꞌ Ala morumbaꞌ humei AnaꞌNa hingkeꞌna mahi i loti momehulepe. Tungkaihana mowali hatoꞌo, hingkeꞌna lekiꞌ-lekiꞌna to uwaꞌ Nopohintuwuꞌ huliꞌ hante Io, moromiꞌ to i duniaꞌ, moromiꞌ to i suruga. Komahina hi Yesu[1] i loti momehulepe mampohintuwuꞌ lekiꞌ-lekiꞌna hante Pueꞌ Ala.

²¹Hampiha, halali-halali, moꞌelakei ka Pueꞌ Ala, hei iponiꞌkei alaꞌ kodake lalimi hante waliami.

²²Angkana hinewowoꞌena, nokomi komahina AnaꞌNa, mohintuwuꞌmokei hante Pueꞌ Ala, hingkeꞌna Nopomangkolehikei wute hawaꞌi uwaꞌ komasalaꞌmi ba komakuraꞌmi i pampeꞌeleNa.

²³Mewaliꞌ, halali-halali, hangangaa maroho pepoꞌohimi, hei hangangaa mepoꞌohikei nturusi i Kareba moromiꞌ. Pokarohokei petuntumi i poturuꞌ to ihorimokei hei inioꞌ ipohentekei pepohinarumi i hapo to nodandikikei Pueꞌ Ala i lali Kareba moromiꞌ. Kareba moromiꞌ tiꞌo nipekarebakimo pe humanele duniaꞌ. Hei aku woꞌo, mewaliꞌa rumbaꞌana Pueꞌ to mampowute Kareba moromiꞌ tiꞌo.

²⁴Motanaꞌa mpololeke alaꞌ wadiꞌa maporiꞌ nokomi pajamangku mosulungikei i lekiꞌ-lekiꞌna toaꞌNa, to nipandiriꞌ hibali wotana Kerisitu.

²⁵Pueꞌ Ala mohiniꞌa mewali topajamaNa to mosulungi lekiꞌ-lekiꞌna toaꞌ to mepoꞌohi pe Io, hingkeꞌna kupowute lekiꞌ-lekiꞌne karebaNa pe ingkei to handoꞌiokei toYahudi.

²⁶I natuna ntoꞌa, tungkaihana Pueꞌ Ala tewuni pe lekiꞌ-lekiꞌna toaꞌ. Angkana hinewowoꞌena nipotongawamo pe lekiꞌ-lekiꞌna toaꞌna Pueꞌ Ala.

²⁷To tewuni tiꞌo, hinewowoꞌena hingkiꞌ nopowute Pueꞌ Ala pe toaꞌNa, iomo hohumbo komoromiꞌne hei komanobaꞌna tungkaihaNa pe ingkei to handoꞌiokei toYahudi. Tungkaihana tiꞌo, iomo Kerisitu uwaꞌ i lalimi, hingkeꞌna mononto kopahuami kotuwuꞌ to wolaꞌ moꞌawa hante Pueꞌ Ala. Tiꞌomo pepohinarunte!

²⁸Mewali, kipekarebaiki pe lekiꞌ-lekiꞌna toaꞌ noniuꞌ i Kerisitu, motuntuni kopebahaꞌki ka Pueꞌ ala. Kipaꞌanihi lolita hei kipoturuꞌhi, hante kirandahi lekiꞌ-lekiꞌra, hingkeꞌna ane mehupaꞌka i hinarona Pueꞌ Ala, wadihi kikomi lekiꞌ-lekiꞌra pe Io hei hawaꞌi uwaꞌ komakuraꞌne, alaꞌ mohaꞌanumohi hante Kerisitu. Iomo horiana modotoꞌa majama. Kuhohiꞌi mampololiu pajamangku motuntuni komaroho to kuhua ka Kerisitu, alaꞌ kodeꞌ mpuꞌu kuasaꞌne i lali kotuwuꞌku.