Read Rampi 1 Tesalonika 1 Bible Online

1 Tesalonika 1 - Rampi bible

1 Tesalonika 1

¹Suraꞌ hieꞌe ka ingka totolu: hi Paulu, hi Silas hei hi Timotius. Kipokatu pe jumaꞌa Tesalonika to menomba pe Pueꞌ Ala Umoꞌta hei Pueꞌ Yesu Kerisitu! Tabea moromiꞌ. Mekokaeka pe Pueꞌ Ala hingkeꞌna Nobarakatikei ka kopopuhiꞌna laliNa hei Nopaꞌanikei romiꞌ ngkotuwuꞌ.

²Ingka poko moꞌawerasiꞌka pe Pueꞌ Ala, alaꞌ ingkei poko halali. I piha-pihana mekokaeka pe Pueꞌ Ala Umoꞌta, pokoka mamponindikei hei mampekokaekikei. Kipodindi hohumbo ingkei mampetidoꞌki waliami hei pepoꞌohimi pe Kerisitu, hohumbo komarimami pe toaꞌ ntaniꞌ horiana nirewuhi, hei hohumbo komarohone pepohinaruami pe Pueꞌ Yesu Kerisitu i hinarona Pueꞌ Ala Umoꞌta.

⁴Halali-halali, kibahaꞌ Pueꞌ Ala mampokarimakei hei Noꞌuwiꞌmokei mewali toaꞌNa,

⁵alaꞌ i tempoki mampowutekikei Kareba Moromiꞌ, hawaꞌi lolitalu to kipakeꞌ, angkana mololitaka hante Inohaꞌ Mangkolehi to mampaꞌanika kuasaꞌ mololita, hei kipoꞌohi mpololeke kotuꞌuna Kareba Moromiꞌ tiꞌo. Ibahaꞌkei hohumbo lalane kotuwuꞌki i tempoki tene moꞌawa hante ingkei, hei lekiꞌ-lekiꞌna tiꞌo kiwali hingkeꞌna mosulungikei.

⁶Hei ingkei, halali-halali, ikoꞌihorinalukei Kareba Moromiꞌ tiꞌo, ituntunikei waliangki hei waliana Pueꞌ Yesu, alaꞌ kehapoꞌi makaja konipopoꞌioꞌiomi, motanaꞌkei mantorimo Kareba Moromiꞌ. Komotanaꞌmi tiꞌo to Nopepaꞌaniki Inohaꞌ Mangkolehina Pueꞌ Ala.

⁷Mewaliꞌ, hinewowoꞌena kotuwuꞌmi mewalimo pampeꞌeleara lekiꞌ-lekiꞌna halali hampepoꞌohimi i woiꞌ Makedonia hei woiꞌ Akaia,

⁸alaꞌ pepoꞌohimi pe Pueꞌ Ala, horiana pohawaꞌNa Pueꞌ tekareba i humanele woiꞌ Makedonia hei woiꞌ Akaia, hei hawaꞌi itoꞌolu. Pepoꞌohimi i Pueꞌ Ala imbo-imbolu ropopololita. Mewaliꞌ, lekiꞌ-lekiꞌna i bolaꞌ to kikoꞌakoi pobahaꞌmohi, hohumbo koꞌitorimongki. Hei robahaꞌmo toaꞌ hohumbo koꞌipohentenekei molomoa, kotewolihinamo lalimi hei pengkoruꞌmi menomba pe Pueꞌ Ala to tuwuꞌ.

¹⁰Iohi woꞌo mampopololitahi hohumbo pepohinaruami ikohingkiꞌ hupaꞌna huliꞌ Anaꞌna Pueꞌ Ala ka Suruga, iomo hi Yesu to Nopotuwuꞌ huliꞌ Pueꞌ Ala ka komahia. Iomo to mamposalamaꞌki, i kobuntoꞌta ka Pueꞌ Ala.